Ri ángel Gabriel xusolij María

María are jun ali che kʼo pa ri tinamit re Nazaret, pa Galilea xuqujeʼ ufamiliar Elisabet. María kkʼuliʼ rukʼ jun ajanel ubʼiʼ José. Are chiʼ Elisabet waqibʼ ikʼ chik yawabʼ ixoq, ri ángel Gabriel xtzijon rukʼ María, xubʼij che: «Saqarik, María, Jehová sibʼalaj utoqʼobʼisam awach». Areʼ xuchʼobʼ ta ri xubʼij Gabriel che, rumal laʼ xubʼij che: «Katkanaj yawabʼ ixoq kkʼojiʼ jun awal ala. Kakoj Jesús che ubʼiʼ. Kux na ajawinel, ri Rajawinik kʼo ta ukʼisik».

María xubʼij che: «Are kʼu in qʼapoj ali. ¿Jas kʼu che kkʼojiʼ jun wal?». Gabriel xubʼij che: «Che Jehová kʼo ta jun jastaq che mat kkʼulmatajik. Ri uxlabʼixel kqaj pawiʼ, rech kkʼojiʼ jun awal. Ri awachalal, Elisabet, xuqujeʼ are yawabʼ ixoq chik». Tekʼuriʼ María xubʼij: «In rajchak Jehová. Chkʼulmataj wukʼ ri xabʼij».

María xbʼe che uchʼabʼexik Elisabet, pa jun tinamit che kʼo pa ri juyubʼ. Are chiʼ xopanik, xuya rutzil uwach, Elisabet xunaʼo che ri uneʼ xchʼopin chupam. Areʼ xnoj che uxlabʼixel xubʼij: «María, Jehová atutewchim. Are nim ubʼanik che kpe ri unan ri wajaw cho wachoch che nusolixik». María xubʼij: «Kinqʼijilaj Jehová rukʼ ronojel wanimaʼ». Tekʼuriʼ xkʼojiʼ oxibʼ ikʼ rukʼ Elisabet tekʼuriʼ xtzalij pa rachoch, pa Nazaret.

Are chiʼ José xretaʼmaj che María yawabʼ ixoq chik, kraj ta chik kkʼuliʼ rukʼ. Are kʼu ri ángel xchʼaw rukʼ pa uwaram, xubʼij che: «Kaxibʼij ta awibʼ che katkʼuliʼ rukʼ. Kʼo ta makaj ubʼanom». Rumal laʼ José xkʼuliʼ rukʼ María rech xukʼam bʼi cho rachoch.