Pablo xkʼam bʼi pa Roma

Ri urox ubʼinem ri Pablo che utzijoxik ri utzij ri Dios xkʼis pa Jerusalén. Chilaʼ xchap wi. Jun chaqʼabʼ, are chiʼ kʼo pa cheʼ, Jesús xubʼij che pa jun achikʼ: «Katbʼe na pa Roma xuqujeʼ katzijoj na ri utzij ri Dios pa ri tinamit riʼ». Tekʼuriʼ xkʼam bʼi ri Pablo pa Jerusalén kʼa pa Cesarea. Chilaʼ xkʼojiʼ kebʼ junabʼ pa cheʼ. Jun qʼij, are chiʼ kʼo pa ri qʼatbʼal tzij chuwach ri ajawinel Festo, Pablo xubʼij: «Kwaj che ri César kuqʼat tzij pa nuwiʼ pa Roma». Festo xutzalij ubʼixik che: «We kawaj che ri César kuqʼat tzij pa awiʼ, katintaq bʼi jachiʼ kʼo wi ri César». Jeʼ riʼ xkʼam bʼi ri Pablo pa jun barco che kbʼe pa Roma. Xebʼe kebʼ cristianos rukʼ: Lucas xuqujeʼ Aristarco.

Are chiʼ e kʼo pa uwiʼ ri mar, xpe jun nimalaj kaqiqʼ jabʼ che kʼi qʼij xuchʼijo. Konojel xkichomaj che kekamik. Are kʼu ri Pablo xubʼij chke: «Achijabʼ, jun ángel xubʼij chwe pa jun achikʼ: ‹Kaxibʼij ta awibʼ. Katopan na pa Roma, xuqujeʼ konojel ri e kʼo awukʼ pa ri barco kekam taj›. Rumal laʼ, ¡kixibʼij ta iwibʼ! Kojkam taj».

Qʼaxinaq chi 14 qʼij che kikojom kichuqʼabʼ chuwach ri kaqiqʼ jabʼ, kʼateʼ riʼ xkil ri ulew. Are ri isla re Malta. Ri barco xchʼapiʼ kanoq xuqujeʼ xubʼan chʼaqataʼq, are kʼu ri e 276 winaq e kʼaslik xeʼopan chuchiʼ ri mar. Jujun xemuxanik xuqujeʼ nikʼaj chik xebʼe pa uwiʼ ri e uchʼaqapil ri barco rech xeʼopanik. Ri winaq re Malta xekichajij xuqujeʼ xkinukʼ qʼaqʼ rech kkimiqʼisaj kibʼ.

Oxibʼ ikʼ qʼaxinaq chik, ri e soldados xkikʼam bʼi ri Pablo pa Roma pa jun barco chik. Ri e qachalal xebʼe che ukʼulaxik are chiʼ xopanik. Are chiʼ xerilo, Pablo xuya maltyoxinik che ri Dios xuqujeʼ sibʼalaj xunaʼ kubʼsal kʼuʼx. Pa neʼ Pablo chapom bʼi kumal ri soldados, xyaʼ che kkʼojiʼ pa jun qajom ja are kʼu chajital rumal jun soldado. Chilaʼ xkʼojiʼ kebʼ junabʼ. Ri winaq kebʼe che usolixik, areʼ kutzijoj ri utzalaj taq tzij rech ri rajawbʼal ri Dios xuqujeʼ kuya tijonik chrij ri Jesús chke. Pablo xuqujeʼ xutzʼibʼaj ri e wuj chke ri congregaciones re Asia Menor xuqujeʼ Judea. Qas kqʼalajinik che Jehová xukoj ri Pablo rech kukʼam bʼi ri utzalaj taq tzij re ri Dios chke e kʼi tinamit.