KʼUTUNEM 52
¿Jasche nim ubʼanik ri qatzʼyaq che kqakojo?
Qonojel jalajoj kqabʼan che usukʼumaxik qibʼ y jalajoj taq atzʼyaq utz kqilo. Kqakikotemaj ri Jehová y kqanimaj ri upixabʼ chiʼ utz ri qatzʼyaq kqakojo. Chqanikʼoj jujun chke ri pixabʼ che kʼo pa ri Biblia.
1. ¿Jas pixabʼ rajawaxik kojchoman chrij are chiʼ kqasukʼumaj qibʼ?
Ri cristianos rajawaxik «utz katzʼyaqixik kibʼ kkibʼano, rukʼ jikomal, xuqujeʼ kukʼ atzʼyaq ri man nimaʼq ta kajil». Xuqujeʼ, rajawaxik che ri kibʼantajik chʼajchʼoj che kukʼutu che «kkiqʼijilaj ri Dios» (1 Timoteo 2:9, 10). Chatchoman chkij ri kajibʼ pixabʼ che kqariq pa ri texto riʼ. 1) Rajawaxik «utz» kkaʼy ri qatzʼyaq. Weneʼ awilom pa taq ri riqbʼal ibʼ che ri utinamit ri Jehová jalajoj atzʼyaq kqakojo, are kʼu ri qatzʼyaq y ri kqabʼan che uxiyik ri qawiʼ kukʼutu che nim kqil wi ri Dios. 2) Ukojik atzʼyaq «rukʼ jikomal» kraj kubʼij che kqakoj ta atzʼyaq che utz ta kkaʼyik, y che kubʼano che ri winaq xaq kekaʼy chqe. 3) Kqakʼutu che kqakoj ta atzʼyaq ri «nimaʼq [...] kajil» chiʼ are ta kqakoj ri kʼateʼ xel loq. 4) Ri qabʼanik rajawaxik kukʼut chkiwach ri nikʼaj chik che are tajin kqaqʼijilaj ri qastzij Dios (1 Corintios 10:31).
2. ¿Jas kubʼan chke nikʼaj chi cristianos ri qatzʼyaq che kqakojo?
Qastzij che oj kojchaʼow ri kqaj kqakojo. Are kʼu rajawaxik kojchoman chrij we ri ubʼanik ri qatzʼyaq kubʼan kʼax chke nikʼaj chik. Rech kqabʼan ta kʼax che nijun rajawaxik kojchoman chrij wajun pixabʼ riʼ: «Chqajujunal chqabʼanaʼ ri kqaj chuwach ri qajil qatzʼaqat, pa ri jastaq ri utz kibʼanik, rech kux jun tobʼanik pa ri kikojonik» (chasikʼij Romanos 15:1, 2).
3. ¿Jas kubʼan ri qatzʼyaq che kitoʼik nikʼaj chik rech kkichʼobʼ uwach ri Jehová?
Kqakoj atzʼyaq che utz kkaʼyik. Are kʼu más kqasukʼumaj na bʼi qibʼ chiʼ kojbʼe pa ri e riqbʼal ibʼ y chiʼ kqatzijoj ri utzij ri Dios. Kqaj taj che ri atzʼyaq kqakojo kubʼano che ktatabʼex ta ri utzij ri Dios. Xaneʼ, ri kqaj are che keʼutoʼ nikʼaj chik rech kkichʼobʼ ri qastzij y che kukʼutu «chi sibʼalaj jeʼlik ri utijonik ri Dios ri qaKolonel» (Tito 2:10).
CHANIMARISAJ RI AWETAʼMANIK
Qas chqilaʼ che ri qatzʼyaq y ri kqabʼan che usukʼumaxik qibʼ kukʼutu che oj cristianos.
Ri qatzʼyaq kukʼutu we nim keqil wi ri winaq che kʼo taqanik pa kiqʼabʼ. Paneʼ ri Jehová are kril ri kʼo pa qanimaʼ, are kʼu rajawaxik che qas utz kqabʼan che qibʼ rech kqakʼutu che nim kqil wi.
4. Ri kqabʼan che usukʼumaxik qibʼ kukʼutu che nim kqil wi ri Jehová
¿Jas riʼ ri rumal kqasukʼumaj qibʼ? Chisikʼij Salmo 47:2 y chixtzijon chrij wariʼ:
Rumal che kqapatanij ri Jehová, ¿jasche rajawaxik che utz ri qatzʼyaq kqakojo?
¿Jas kachomaj, la nim ubʼanik che qas utz kqabʼan bʼi che qibʼ are chiʼ kojbʼe pa ri e riqbʼal ibʼ y chiʼ kqatzijoj ri utzij ri Dios? ¿Jasche?
5. ¿Jas kqabʼan che uchaʼik ri qatzʼyaq y usukʼumaxik qibʼ?
Ri más nim ubʼanik are che chʼajchʼoj y qas utz kkaʼy ri qatzʼyaq, are ta ri rajil. Chisikʼij 1 Corintios 10:24 y 1 Timoteo 2:9, 10. Tekʼuriʼ chixchʼaw chrij jasche kqakoj ta atzʼyaq che...
... qʼeʼl chik o che utz ta kkaʼyik.
... sibʼalaj nitzʼ chqe, kukʼut ri qacuerpo, o che kubʼano che ri nikʼaj chik xaq kekaʼy chqe.
Paneʼ ri oj cristianos oj kʼo ta chi chuxeʼ ri Taqanik che xyaʼ che ri Moisés, are kʼu kukʼut chqawach ri kuchomaj ri Jehová. Chisikʼij Deuteronomio 22:5 y chixtzijon chrij wariʼ:
¿Jasche utz taj che jun achi kukoj ratzʼyaq jun ixoq o jun ixoq kukoj ratzʼyaq jun achi?
Chisikʼij 1 Corintios 10:32, 33 y 1 Juan 2:15, 16, y chixtzijon chrij wariʼ:
We ri qatzʼyaq che kqakojo utz ta kkil ri winaq pa ri lugar che kojel wi o pa ri congregación, ¿la rajawaxik kqakʼexo? ¿Jasche?
¿Jas taq atzʼyaq kkikoj ri winaq pa ri lugar che katel wi?
¿La utz che ri cristianos kkikoj atzʼyaq junam rukʼ wariʼ? ¿Jasche?
Kojkunik kqakoj jalajoj uwach atzʼyaq che kuya uqʼij ri Jehová.
RI KKICHOMAJ JUJUN WINAQ: «In kinkoj ri kwaj kinkojo».
¿La utz wajun chomanik riʼ? ¿Jasche?
RI XQETAʼMAJ
Are chiʼ qas utz kqabʼan che uchaʼik ri atzʼyaq che kqakojo y utz kqabʼan che usukʼumaxik qibʼ, kqakʼutu che nim kqil wi ri Jehová y ri nikʼaj chik.
¿La knaʼtaj chawe?
¿Jas kuchomaj ri Jehová chrij ri kqabʼan che usukʼumaxik qibʼ?
¿Jas taq pixabʼ kojutoʼo chiʼ kqasukʼumaj qibʼ?
¿Jas kkichomaj riʼ ri winaq chrij ri qastzij qʼijilanik we utz ta kqabʼan che usukʼumaxik qibʼ? ¿Jas kubʼan riʼ chke?
CHAWILAʼ CHI NIKʼAJ
Chawetaʼmaj ri kkichomaj ri winaq chrij ri awatzʼyaq.
«¿Jas kkichomaj ri winaq chrij ri atzʼyaq che kinkojo?» (Kʼutunem re jw.org)
¿Jasche rajawaxik katchoman na chrij we kawaj kabʼan jun atatuaje?
Chawilaʼ nikʼaj chi pixabʼ che katutoʼo rech utz ri kachaʼ ubʼanik.
«¿La kuya uqʼij ri Dios ri qatzʼyaq che kqakojo?» (La Atalaya, septiembre 2016)
¿Jas xubʼan jun ixoq rech are ta xchoman chrij ri kkibʼan ri nikʼaj chik che usukʼumaxik kibʼ?
«Utz ta xwil ri kkibʼan ri nikʼaj chik che usukʼumaxik kibʼ» (¡Despertad!, 22 re diciembre 2003)