KʼUTUNEM 53

Chqilaʼ che ri etzʼanem kqabʼano kuya uqʼij ri Jehová

Ri k'o pa ri wuj

Jehová are ri «Dios che kkikotik» (1 Timoteo 1:11, TNM). Ri areʼ kraj che kojkikot pa ri qakʼaslemal. Kraj che kqatas qatiempo rech kojuxlanik. Pa wajun kʼutunem riʼ, kqil na ri rajawaxik kqabʼano rech utz kqabʼan che ukojik ri qatiempo y che kqaj chuwach ri Jehová.

1. ¿Jas rajawaxik kojchoman chrij are chiʼ kqachaʼ ubʼanik jun etzʼanem?

¿Jas más utz kanaʼ ubʼanik are chiʼ tajin katuxlanik? E jujun utz kkinaʼo kkisikʼij jun wuj, kkita música, kkil jun película o kkil ri kʼo pa Internet. E nikʼaj chik utz kkinaʼo kebʼe kukʼ ri kachiʼl pa waʼkatem, kemuxanik o keʼetzʼanik. Apastaneʼ ri kqachaʼ ubʼanik, ri más nim ubʼanik are che kqetaʼmaj «jachike jastaq keqaj chuwach ri Ajawaxel» (Efesios 5:10). Sibʼalaj nim ubʼanik che kqachʼobʼ wariʼ, rumal che kʼi chke ri etzʼanem che utz kkil ri winaq kimik kʼo jastaq chupam che itzel kril ri Jehová, junam rukʼ ri itzelal, ri chʼoj, ri inmoralidad sexual, ri qʼijinik o ri itzinik (chasikʼij Salmo 11:5). ¿Jas kojtowik rech utz ri kqachaʼ ubʼanik?

We keqatzukuj qachiʼl che kkiloqʼoqʼej ri Jehová, keʼux utz taq qachiʼl riʼ y kojkitoʼ riʼ che uchaʼik utz taq etzʼanem. Pa ri kʼutunem 48 xqetaʼmaj, «che ri kkukʼaj kibʼ kukʼ ri ajnoʼjabʼ kkiriq kʼu na kinoʼj». Are kʼu, we kojkʼojiʼ kukʼ ri winaq che nim ta kkil ri utaqanik ri Jehová «kkisachisaj qawach» (Proverbios 13:20).

2. ¿Jasche rajawaxik kojchoman chrij jampaʼ tiempo kqakoj che ri etzʼanem?

Paneʼ utz ri etzʼanem kqabʼano, are kʼu rajawaxik kojchoman chrij jampaʼ tiempo kqakoj che ubʼanik. Rumal che kʼo ta chi qatiempo riʼ che ubʼanik jastaq che más nim na upatan. Ri Biblia kubʼij: «Chiwechbʼej taq ri qʼij che ubʼanik ri utz» o ri más nim na ubʼanik (chasikʼij Efesios 5:15, 16).

CHANIMARISAJ RI AWETAʼMANIK

Chqilaʼ ri rajawaxik kqabʼano rech utz kqabʼan che uchaʼik ri etzʼanem.

3. Kabʼan ta etzʼanem che kubʼan kʼax chawe

¿Jasche rajawaxik utz uchaʼik ri etzʼanem kqabʼano? Chiwilaʼ ri VIDEO y chixtzijon chrij wariʼ:

VIDEO: ¿Jas uwach etzʼanem kinbʼano? (4:39)

¿Jas kjunamataj wi ri kkibʼan ri gladiadores o ri ajchʼojabʼ ojer kukʼ ri etzʼanem che e kʼo kimik?
Junam rukʼ ri xqil pa ri video, ¿jas xretaʼmaj Danny chrij ri etzʼanem?

Chisikʼij Romanos 12:9 y chixtzijon chrij wariʼ:

¿Jas kubʼan wajun versículo riʼ che qatoʼik rech utz kqabʼan che uchaʼik ri etzʼanem?

¿Jas jastaq itzel kril ri Jehová? Chisikʼij Proverbios 6:16, 17 y Gálatas 5:19-21. Are chiʼ isikʼim chi ri textos pa kijujunal, chixtzijon chrij wariʼ:

Ronojel ri kyaʼ ubʼixik pa wajun texto riʼ, ¿la e kʼo ri jastaq riʼ pa ri etzʼanem kimik?

¿Jas kabʼan che uchaʼik ri etzʼanem?

Chachomaj:

¿Jas ubʼanik? ¿La kʼo jastaq chupam che itzel kril ri Jehová?
¿Jampaʼ tiempo kabʼano? ¿La kresaj atiempo rech kabʼan ta chi ri jastaq che más nim ubʼanik?
¿Jachin kukʼ katetzʼan wi? ¿La kubʼano che katkʼojiʼ naj tiempo kukʼ winaq che kkiloqʼoqʼej ta ri Jehová?

Rech kʼo ta jas kqariqo rajawaxik kqachajij qibʼ chuwach ri kʼax. Rumal laʼ rajawaxik kqachajij qibʼ chuwach ri etzʼanem che kubʼan kʼax chqe.

Jun carro xa jubʼiqʼ kraj che ktzaq bʼi pa jun siwan. Ri llanta che kʼo chrij elinaq chi bʼi jubʼiqʼ pa ri carretera.

4. Utz chabʼanaʼ che ukojik ri atiempo

Chiwilaʼ ri VIDEO y chixtzijon chrij wariʼ:

VIDEO: ¿Jas kabʼan che ukojik ri atiempo? (2:45)

Ri qachalal che xqil pa ri video tajin ta kubʼan jun itzel jastaq, are kʼu ¿jas tajin kubʼan che ukojik ri utiempo?

Chisikʼij Filipenses 1:10 y chixtzijon chrij wariʼ:

¿Jas kubʼan wajun versículo riʼ che qatoʼik rech utz kqabʼan che ukojik ri tiempo pa ri etzʼanem?

5. Utz chabʼanaʼ che uchaʼik ri etzʼanem

Qastzij che ri Jehová utz ta kril jujun taq etzʼanem, are kʼu kuya bʼe che kqabʼan nikʼaj chik che kuya kikotemal chqe. Chisikʼij Eclesiastés 8:15 y Filipenses 4:8, y chixtzijon chrij wariʼ:

¿Jas etzʼanem utz kawil at?

Wachbʼal ke winaq che jalajoj kijunabʼ che tajin kkibʼan jalajoj taq etzʼanem: 1. Jun alaj ali tajin kuta música are chiʼ tajin kubʼan dibujar. 2. Oxibʼ alabʼom tajin ketzʼan che básquet. 3. E kebʼ akʼalabʼ e kʼo chrij bicicleta. 4. Jun akʼal tajin kuwiq jun retzʼabʼal. 5. Jun achi tajin kubʼan jun tambor. 6. Jun akʼal y ri utat tajin kkibʼan videojuego. 7. Jun ixoq tajin kresaj fotos. — Kojkunik kojkikotik y kqabʼan utz taq etzʼanem.

RI KKICHOMAJ JUJUN WINAQ: «Kʼo ta kubʼano we kabʼan etzʼanem che kʼo qʼijinik, itzinik, itzelal, chʼoj, inmoralidad sexual chupam, rumal che kabʼan ta awe».