¿Jasche uyaʼom b’e ri Dios che kqariq kʼax?

¿JAS KUNAʼ RI DIOS CHIʼ KRILO CHE KQARIQ KʼAX?

Michelle: La utz awach Sofía. Kinkikotik che xatinriq cho ja.

Sofía: Jeʼ, in xuqujeʼ sibʼalaj kinkikotik che kinwil awach.

Michelle: Pa ri jun qʼij kanoq xojtzijon chrij ri kunaʼ ri Dios are chiʼ kqariq kʼax.a At xabʼij chwe che amaqʼel at chomanaq chrij wajun pregunta riʼ, más na are chiʼ xuriq accidente ri amamá. ¿Y jas ubʼanom chanim riʼ?

Sofía: Jujun taq mul kunaʼ qʼoxom y jujun taq mul kel che, are k’u utz uwach kimik.

Michelle: Kinkikotik che utz uwach kimik. Sibʼalaj kʼax are chiʼ jun kukʼulmaj wariʼ.

Sofía: Jeʼ, jujun taq mul kinchoman chrij jampaʼ kkʼis waʼ ri kʼaxkʼolil.

Michelle: Qastzij, man xaq xiw ta at katchoman chrij wariʼ. Weneʼ knaʼtaj chawe che pa ri ukʼisbʼal mul che xojtzijonik xintaʼ chawe, ¿jasche ri Dios uyaʼom bʼe che kʼo kʼaxkʼolil we kʼo uchuqʼabʼ che usachik uwach?

Sofía: Jeʼ, knaʼtaj chwe.

Michelle: Kwaj che kqanaʼtasaj chi jumul ri xojtzijon kan chrij.

Sofía: Utz bʼaʼ.

Michelle: Are xojchʼaw chrij jun achi che kʼo pa ri Biblia che xutaʼ che ri Dios jasche sibʼalaj kʼo kʼaxkʼolil, ri Dios man xuyaj taj y xubʼij ta che, che xa kʼo ta ukojonik.

Sofía: Jeʼ qastzij, nutom ta chrij wariʼ.

Michelle: Xuqujeʼ xqetaʼmaj che ri Jehová kʼax kunaʼo chiʼ krilo che kqariq kʼax, ri Biblia kubʼij che ojer kanoq are chiʼ ri utinamit xuriq kʼax, ri Jehová sibʼalaj xbʼisonik.b ¿La mat qastzij che wariʼ kukubʼsaj qakʼuʼx?

Sofía: Jeʼ kukubʼsaj qakʼuʼx.

Michelle: Xqilo che ri Dios kʼo sibʼalaj nim uchuqʼabʼ, y che kkunik kusach uwach ri kʼaxkʼolil.

Sofía: Are waʼ ri qas ta kinchʼobʼo. ¿Jasche xaq uyaʼom bʼe che kqariq na kʼax we kʼo uchuqʼabʼ che usachik uwach?

¿JACHIN TAJIN KUBʼIJ RI QASTZIJ?

Michelle: Nabʼe chqilaʼ ri kyaʼ ubʼixik pa ri wuj re Génesis. ¿La atoʼm chkij ri Adán y Eva y ri uwach ri cheʼ che xkitijo?

Sofía: Jeʼ, xkʼut chnuwach pa ri catecismo. Ri Dios xubʼij chke che kkitij ta uwach ri cheʼ, are kʼu ri e areʼ xkita taj.

Michelle: Jeʼ qastzij. Are kʼu chqilaʼ ri xkʼulmataj nabʼe chuwach wariʼ, che kʼo ubʼanik rukʼ ri kʼaxkʼolil che tajin kqariqo. ¿La kawaj kasikʼij Génesis 3:1-5, capítulo 3, versículos 1 kopan 5?

Sofía: Jeʼ, kubʼij: «Ri kumatz are kʼo na unoʼj chkiwach konojel ri juyubʼal taq awaj ri e ubʼanom ri Ajawaxel Dios, xukʼot kʼu uchiʼ ri ixoq: ‹¿La ubʼim ri Dios chiwe chi man kitij taj ri kiwach ri cheʼ ri e kʼo pa ri tikonijibʼal?›. Ri ixoq xubʼij che: ‹Kuyaʼ kqatij qech ri uwach apachike cheʼ, are kʼu ri uwach ri cheʼ ri kʼo pa unikʼyajil ri tikonijibʼal. Xubʼij ri Dios chqe chi man kqatij taj, mawi kqachap ri uwach we cheʼ riʼ, we kʼu kqabʼano kujkam na›. Are kʼu ri kumatz xubʼij che ri ixoq: ‹Man qastzij taj. Man kixkam taj. Ri Dios qas retaʼm chi are taq kitij iwe ri uwach we cheʼ riʼ, kkʼojiʼ inoʼj che retaʼmaxik ri utz xuqujeʼ ri man utz taj, je kʼu riʼ kixux jachaʼ ri Dios›».

Michelle: Maltyox. Chqilampeʼ ri kraj kubʼij ri versículos riʼ. Nabʼe kubʼij che ri kumatz xchʼaw rukʼ ri Eva. Pa nikʼaj chi uchʼaqapil ri Biblia kyaʼ ubʼixik che ri Itzel, Satanás, xukoj wajun kumatz riʼ rech xchʼaw rukʼ ri Eva.c Ri kumatz xutaʼ che ri Eva chrij ri taqanik che xuya ri Dios chke. ¿Jas xubʼij ri Dios che kkiriq ri Adán y Eva we keniman ta che?

Sofía: Xubʼij che kekamik.

Michelle: Jeʼ qastzij. Are kʼu chiʼ xbʼitaj wariʼ rumal, ri Itzel xubʼan jun nimalaj molom tzij chrij ri Dios. Ri areʼ xubʼij: «Man qastzij taj. Man kixkam taj». ¡Rukʼ ri e tzij riʼ xubʼij che ri Dios are jun ajmolom tzij!

Sofía: Kʼo ta jumul nutoʼm wariʼ.

Michelle: Are chiʼ ri Satanás xubʼij che ri Dios are jun ajmolom tzij wariʼ xubʼano che xkanaj kan jun pregunta, che naj tiempo kchʼobʼotaj ta ri kraj kubʼij. ¿La awetaʼm jasche?

Sofía: Mmm... No wetaʼm taj.

Michelle: Chojchoman chrij wariʼ. Chachomajampeʼ che kinpe jun qʼij awukʼ y kinbʼij chawe che ri in kʼo na más nuchuqʼabʼ chawach at. ¿Jas kabʼan riʼ che ukʼutik che qastzij ta ri kinbʼij?

Sofía: Weneʼ rajawaxik kqilo jachin qas kʼo nim uchuqʼabʼ.

Michelle: Jeʼ. Y weneʼ kqatzukuj jun jastaq che sibʼalaj al rech kqilo jachin chqe kkunik kutelej. Je wariʼ kqilo jachin kʼo más uchuqʼabʼ.

Sofía: Jeʼ qastzij.

Michelle: Are kʼu chachomajampeʼ che kinbʼij chawe, che at jun itzel winaq. ¿La mat qastzij che wariʼ are jun chi wi ubʼanik?

Sofía: Jeʼ junam ta chik.

Michelle: Rukʼ ta ri achuqʼabʼ kilitajik che at jun utzalaj winaq.

Sofía: Qastzij wi.

Michelle: Weneʼ rajawaxik tiempo rech kakʼut chkiwach ri nikʼaj chik che qas at jun utz winaq.

Sofía: Kinchʼobʼ ri kabʼij.

Michelle: Chqilaʼ chi jumul ri kubʼij pa ri wuj Génesis. ¿La xubʼij ri Itzel che are kʼo más uchuqʼabʼ chuwach ri Dios?

Sofía: Xubʼij taj.

Michelle: Kʼax ta kubʼan riʼ ri Dios che ukʼutik che are kʼo na más uchuqʼabʼ chuwach. Are kʼu ri xubʼij ri Satanás are che ri Dios are jun itzelalaj Dios. Jetaneʼ xubʼij che ri Eva: «Ri Dios xa xumol tzij chawe, in tajin kinbʼij ri qastzij».

Sofía: Mmm, in chomanaq ta chrij wariʼ.

Michelle: Ri Dios sibʼalaj kʼo unojibʼal y retaʼm che kajwataj kʼi tiempo che rech kukʼutu che qastzij ta ri xubʼij ri Satanás. Rech kilitajik jachin ri ajbʼanol tzij.

JUN PREGUNTA CHE SIBʼALAJ NIM UBʼANIK

Sofía: Are kʼu chiʼ xkam Eva, ¿la mat xqʼalajin riʼ che qastzij ri xubʼij ri Dios?

Michelle: Jeʼ xqʼalajinik. Are kʼu ri molom tzij che xubʼan ri Satanás rajawaxik más kqʼalajisaxik. Chqilaʼ chi jumul ri versículo 5. ¿Jas jun chi jastaq xubʼij ri Itzel che ri Eva?

Sofía: Che we kutij ri uwach ri cheʼ kkʼojiʼ unojibʼal.

Michelle: Jeʼ, are laʼ ri xubʼij y xubʼij che kkunik kretaʼmaj «ri utz xuqujeʼ ri man utz taj y kux jachaʼ ri Dios».

Sofía: Mmm.

Michelle: Wariʼ are jun nimalaj molom tzij xubʼan che ri Eva.

Sofía: ¿Jasche? Kinchʼobʼ taj.

Michelle: Ri Itzel xubʼij che ri Eva che are más utz na we kkʼam ta kibʼe ri winaq rumal ri Dios. Rumal laʼ ri Jehová xuchʼobʼo che ri xubʼij ri Itzel man qastzij taj, rajawaxik kilitajik are chiʼ kqʼax ri tiempo. Xuya bʼe che, che kuqʼat tzij puwiʼ ri uwach Ulew pa jun tiempo. Rumal laʼ sibʼalaj kʼi kʼaxkʼolil kʼo kimik: rumal che ri qas tajin kqʼatow tzij puwiʼ ri uwach Ulew are ri Itzel, man are ta ri Dios.d Are kʼu, kʼo kubʼsal kʼuʼx.

Sofía: ¿Jas riʼ?

Michelle: Ri Biblia kubʼij jun utzalaj jastaq chqe chrij ri Dios. Kubʼij che ri Jehová kʼo chqanaqaj are chiʼ kqariq kʼax. Jun kʼutbʼal, chqilampeʼ ri xutzʼibʼaj kan ri qʼatal tzij David pa Salmo 31:7. Ri areʼ sibʼalaj xuriq kʼax pa ri ukʼaslemal, are kʼu chawilampeʼ ri xubʼij ri Dios che. ¿La kawaj kasikʼij uwach?

Sofía: Jeʼ, kubʼij: «Ri loqʼoqʼebʼal kʼuʼx la kukʼam uloq kikotemal pa wanimaʼ. Ilom la ri nubʼis, etaʼm la ri nukʼaxkʼolil».

Michelle: Paneʼ ri David tajin kuriq kʼax, are kʼu retaʼm che ri Jehová tajin kril ri kʼax che tajin kuriqo. ¿La kukubʼsaj akʼuʼx che ri Jehová tajin kril ri kʼax che tajin kariqo, y che kril ri kʼo pa awanimaʼ paneʼ jujun winaq kkichʼobʼ taj?

Sofía: Jeʼ, sibʼalaj kukubʼsaj nukʼuʼx.

Michelle: Jeʼ, y ri Biblia kutzujuj che ri Dios kuya ta bʼe che kqariq kʼax pa ronojel ri qakʼaslemal. Xuqujeʼ kubʼij che ri Dios kusach na uwach ri uqʼatbʼal tzij ri Satanás y che kusukʼumaj na ri kʼax che ubʼanom. Junam rukʼ ri kʼax che xiriq ix rukʼ ri amamá. Kwaj kinpe chi awukʼ pa ri jun chi semana. Rech kojtzijon chrij, ¿jasche qas qetaʼm che xa jubʼiqʼ chi tiempo kraj che ri Dios kusachisaj uwach ri kʼaxkʼolil?e

Sofía: Jeʼ, utz laʼ katweyeʼj.