¿Jampaʼ xumaj uqʼatik tzij ri uQʼatbʼal tzij ri Dios? (Ukabʼ uchʼaqapil)

CHQANIKʼOJ CHI JUMUL RI RACHIKʼ RI NABUCODONOSOR

Julio: ¿La utz awach Ernesto? ¡Kinkikotik che xinwil chi jumul awach! Utz kinnaʼo kintzijon awukʼ ronojel taq semanas chrij ri Biblia.a

Ernesto: Jeʼ utz nuwach, maltyox.

Julio: ¡Kinkikotik che utz awach! Pa ri ukʼisbʼal mul che xojtzijon kanoq xojchʼaw chrij jasche ri oj testigos rech Jehová kqabʼij che ri uQʼatbʼal tzij ri Dios xumaj uqʼatik tzij pa 1914.b Xuqujeʼ xqil ri capítulo 4 rech Daniel che kukʼut chqawach jasche kqabʼij wariʼ. ¿La knaʼtaj chawe?

Ernesto: Jeʼ, are xojchʼaw chrij ri rachikʼ ri Nabucodonosor.

Julio: Jeʼ, ri areʼ xrachikʼaj jun nimalaj cheʼ kʼa kopan cho taq ri kaj. Xuqujeʼ xril jun ángel che xtaqan che uramixik ri cheʼ, y xaq xiw ri ukutaʼmil xkanaj kanoq. Are chiʼ xqʼax siete tiempos ri cheʼ riʼ xumaj chi kʼiyem.c Xuqujeʼ xqilo che kamul xtzʼaqat wajun profecía riʼ. ¿La knaʼtaj chawe jampaʼ xtzʼaqat ri nabʼe mul?

Ernesto: Jeʼ, xtzʼaqat rukʼ ri qʼatal tzij Nabucodonosor che siete junabʼ xchʼujarik.

Julio: Jeʼ qastzij. Ri areʼ xchʼujarik y xuya kan uqʼatik tzij. Y ri ukabʼ mul che xtzʼaqat wajun profecía riʼ are chiʼ siete tiempos xuya kan uqʼatik tzij ri uQʼatbʼal tzij ri Dios cho ri uwach Ulew. Wajun tiempo riʼ xmajtajik are chiʼ xbʼan kʼax che Jerusalén pa ri junabʼ 607 antes de Cristo. Y pa wajun junabʼ riʼ kʼo ta nijun qʼatal tzij xukʼutunisaj ri uQʼatbʼal tzij ri Jehová cho ri uwach Ulew. Are chiʼ xkʼis wajun tiempo riʼ ri Dios xukoj jun kʼakʼ qʼatal tzij pa ri kaj. Kraj kubʼij che are chiʼ kkʼis ri siete tiempos kumaj uqʼatik tzij. Chanim riʼ qilom chik jampaʼ xumaj ri siete tiempos. Are kʼu chqilampeʼ jampaʼ tiempo xuchʼij wariʼ rech kqetaʼmaj ri junabʼ che xumaj chi uqʼatik tzij ri uQʼatbʼal tzij ri Dios. ¿La tajin kachʼobʼo?

Ernesto: Jeʼ, tajin knaʼtaj jujun jasche chwe che xojtzijon kan chrij nabʼe kanoq.

Julio: Sibʼalaj utz. Chanim riʼ chqilaʼ jampaʼ qʼij xuchʼij ri siete tiempos. In xinnikʼoj chi na jumul rech knaʼtaj jujun taq jastaq chwe. Kinkoj nuchuqʼabʼ rech kʼax ta kinbʼan che uchʼobʼik chawe.

Ernesto: Utz laʼ.

XKʼIS RI SIETE TIEMPOS, XUMAJ RI KʼISBʼAL TAQ QʼIJ

Julio: Ri nabʼe mul che xtzʼaqat wajun profecía riʼ siete junabʼ xuchʼij ri siete tiempos. Are kʼu ri ukabʼ mul che xtzʼaqatik más kʼi na junabʼ xuchʼijo.

Ernesto: ¿Jasche awetaʼm wariʼ?

Julio: Ri siete tiempos xumaj pa ri junabʼ 607 antes de Cristo, are chiʼ xbʼan kʼax che Jerusalén. We kqamaj rajilaxik ri siete junabʼ pa wajun junabʼ riʼ, kojopan pa ri junabʼ 600 antes de Cristo y pa wajun jun junabʼ riʼ kʼo ta jun jastaq xkʼulmatajik che kʼo ubʼanik rukʼ ri uQʼatbʼal tzij ri Dios. Y junam rukʼ ri qilom chik are chiʼ xpe ri Jesús cho ri uwach Ulew y are chiʼ xtzalij pa ri kaj, xubʼij che ri siete tiempos kʼa majaʼ na kkʼisik.

Ernesto: Jeʼ, knaʼtaj wariʼ chwe.

Julio: Rukʼ wariʼ kqachʼobʼo che man are ta siete junabʼ, xaneʼ are kʼi taq junabʼ.

Ernesto: ¿Jampaʼ kʼu riʼ?

Julio: Pa ri wuj rech Apocalipsis, kʼo jun profecía che kʼo ubʼanik rukʼ ri kʼo pa ri wuj rech Daniel y che kojutoʼ che retaʼmaxik jampaʼ junabʼ xuchʼij ri siete tiempos. Wajun profecía riʼ kubʼij che tres tiempos y medio kraj kubʼij 1.260 qʼij.d Y we kamul kqajilaj wajun tiempo riʼ, kukʼaqaʼ 2.520 qʼij. ¿La tajin kachʼobʼ wariʼ?

Ernesto: Jeʼ, are kʼu qas ta kinchʼobʼo jasche ri ix kibʼij che ri uQʼatbʼal tzij ri Dios xumajij pa ri junabʼ 1914.

Julio: Chqilampeʼ. Pa jujun profecías rech ri Biblia jun qʼij kraj kubʼij jun junabʼ.e We je kqabʼan che rajilaxik ri tiempos riʼ, ri 2.520 qʼij are 2.520 junabʼ. Y we kqamaj rajilaxik ri 2.520 junabʼ pa ri junabʼ 607 antes de Cristo, kukʼaqaʼ pa 1914.f Rumal laʼ kqabʼij che pa wajun junabʼ riʼ xkʼis ri siete tiempos y che ri Jesús xchaʼ rumal ri Dios rech kux Qʼatal tzij pa ri uQʼatbʼal tzij. Xuqujeʼ pa wajun junabʼ riʼ, 1914, xilitaj kʼi taq jastaq che yaʼom kan ubʼixik pa ri Biblia che kukʼutu che oj kʼo chi pa ri kʼisbʼal taq qʼijol.

Ernesto: ¿Jas xubʼij kanoq?

Julio: Pa Mateo 24:⁠7, ri Jesús xubʼij ri kkʼulmatajik are chiʼ kumaj uqʼatik tzij pa ri kaj: «Kwalij na jun nim tinamit chrij jun nim tinamit chik. Kwalij na jun ajawibʼal chrij jun ajawibʼal chik. Pa jalajoj taq kʼolbʼal kepe na wiʼjal, xuqujeʼ keʼubʼan na kabʼraqan». Waral ri Jesús xubʼij che kubʼan na wiʼjal y kabʼraqan. ¿Y la mat qastzij che are waʼ ri tajin kkʼulmataj kimik?

Ernesto: Jeʼ qastzij.

Julio: Ri Jesús xuqujeʼ xubʼij che kbʼan na chʼoj. Y ri wuj rech Apocalipsis kubʼij che ri e chʼoj riʼ sibʼalaj e nimaʼq y che kebʼan cho ronojel ri uwach Ulew.g ¿La knaʼtaj chawe jampaʼ xumaj ri Primera Guerra Mundial?

Ernesto: Pa 1914. Are ri junabʼ che kibʼij che xumajij uqʼatik tzij ri Jesús. In chomanaq ta chrij wariʼ.

Julio: Jeʼ, are chiʼ kqetaʼmaj che ri profecía re ri siete tiempos kʼo ubʼanik rukʼ ri profecías re ri kʼisbʼal taq qʼij, qas kqachʼobʼo. Ri oj testigos rech Jehová qas qetaʼm che pa ri junabʼ 1914 xumaj uqʼatik tzij ri Jesús y che oj kʼo chi pa ri kʼisbʼal taq qʼijol.h

Ernesto: Kʼax tajin kinbʼan che retaʼmaxik.

Julio: Qastzij ri kabʼij, are je xinbʼan in are chiʼ xkʼut chnuwach nabʼe mul. Are kʼu kinchomaj che xatutoʼ ri xqilo che ri Biblia kchʼaw ta chrij ri junabʼ 1914, are kʼu ri oj testigos rech Jehová kʼo rumal che kqakojo che ri Jesús xumaj uqʼatik tzij pa wajun junabʼ riʼ. Y che ronojel ri kqakʼutu pa ri Biblia kqesaj wi.

Ernesto: Jeʼ, qastzij ri kabʼij are laʼ ri wilom. Ronojel ri kakʼutu pa ri Biblia kawesaj wi. Apastaneʼ ri kintaʼ chawe kʼo ta ni jumul kabʼij: «Ri in kinchomaj». Xaneʼ amaqʼel kakoj ri Biblia. Are kʼu, ¿jasche kʼax uchʼobʼik? ¿Jasche ri Dios man xaq xiw ta xubʼij che ri Jesús xumaj uqʼatik tzij pa ri junabʼ 1914?

Julio: Jun utz pregunta Ernesto. Kʼo jujun taq jastaq pa ri Biblia che qas ta xqʼalajisaxik. ¿Jasche jewaʼ xubʼan ri Dios che? ¿Jasche rajawaxik kqakoj na qachuqʼabʼ rech kqachʼobʼo? ¿La kawaj kojtzijon chi chrij wariʼ pa jun chi qʼij?

Ernesto: Jeʼ utz, katinweyeʼj.