Ri kojonik kuya qachuqʼabʼ

RI UCHUQʼABʼ ri kojonik sibʼalaj nim. Jun kʼutbʼal, paneʼ ri Satanás kraj kojukamisaj pa ri qakojonik, ri kojonik kkunik kubʼano che kqachup «konojel taq ri e uchʼabʼ ri itzel ri kenikowik» (Efes. 6:16). Xuqujeʼ, ri kojonik kojutoʼ rech kojchʼakan pa uwiʼ ri nimaʼq taq kʼax che kjunamataj rukʼ nimaʼq taq juyubʼ. Jesús xubʼij chke ri utijoxelabʼ: «We ta kʼo ikojonik jeʼ jas ri unimal ri rijaʼ ri moxtansa, kibʼij na riʼ che we juyubʼ riʼ: ‹Chatel bʼik waral, chatqʼax chilaʼ›, kqʼax kʼu na» (Mat. 17:20). Rumal che ri kojonik kuya uchuqʼabʼ ri qachilanik rukʼ ri Dios, utz che kqanikʼoj we preguntas riʼ: ¿Jas riʼ ri kojonik? ¿Jasche kajwataj jun utz qanimaʼ? ¿Jas kqabʼan che ukowirisaxik ri qakojonik? Xuqujeʼ ¿jachin chrij kkʼojiʼ wi qakojonik? (Rom. 4:3).

¿JAS RIʼ RI KOJONIK?

Ri kojonik xaq xiw ta ukojik o uchʼobʼik che ri kukʼut ri Biblia are ri qastzij, rumal che ri Biblia kubʼij che ri itzel taq uxlabʼal kkikojo che kʼo Dios xuqujeʼ kkixibʼij kibʼ chuwach (Sant. 2:19). Rumal laʼ, ¿jas riʼ ri kojonik?

Are chiʼ ri Biblia kchʼaw chrij ri kojonik, kukʼutu che kʼo kebʼ bʼantajik chupam. Nabʼe, kubʼij che «kqakuʼbʼaʼ qakʼuʼx chi jeʼ keʼel na ri jastaq ri kqeyeʼj», kraj kubʼij, ukojik che qastzij kkʼulmatajik (Heb. 11:1a). We kʼo qakojonik, kqakojo che ronojel ri kubʼij ri Jehová are qastzij xuqujeʼ ktzʼaqatik. Jun kʼutbʼal, Dios xubʼij chke ri israelitas ri e tzij riʼ: «Man bʼantajel taj chi ma ta ktzʼaqat ri kʼulwachinik ri nubʼanom rukʼ ri pa qʼij xuqujeʼ rukʼ ri chaqʼabʼ, jeriʼ chi ri pa qʼij xuqujeʼ ri chaqʼabʼ ma ta keʼopan qas pa ri kiqʼijol. Jewaʼ xuqujeʼ, man bʼantajel taj chi ma ta ketzʼaqat ri nukʼulwachinik ri nubʼanom rukʼ ri pataninel wech ri David» (Jer. 33:20, 21). ¿La kʼo jumul qachomam che ri qʼij kel ta lo aqʼabʼil xuqujeʼ kqaj ta bʼi bʼenaqʼij che ksaqir taj o kok ta aqʼabʼ? We kʼo ta jumul kqachomaj che ma ta neʼ ksutin ri Ulew pa ri ukʼolbʼal xuqujeʼ chrij ri qʼij, utz kojchoman chrij che ri Bʼanol re ronojel ri jastaq qas kubʼan ronojel ri kutzujuj (Is. 55:10, 11; Mat. 5:18).

Ukabʼ, kojonik are che «qetaʼm pa qanimaʼ chi qastzij e kʼo ri jastaq ri man keʼilitaj taj», wariʼ are ri qas kkʼutuw chrij jun jastaq che kqil taj qastzij kʼolik (Heb. 11:1b). Chojchoman chrij jun kʼutbʼal. Jun akʼal kutaʼ chqe ri rumal che qas kʼo ri kaqiqʼ. Paneʼ kʼo ta jumul qilom, kʼax ta kqabʼan che ubʼixik che ri akʼal rumal che kʼo jastaq kkʼutuwik che qas kʼo ri kaqiqʼ, junam rukʼ che kojuxlabʼik xuqujeʼ ri jastaq kusilabʼaj ri kaqiqʼ o nikʼaj chik. Are chiʼ ri akʼal kretaʼmaj che qas kʼo ri kaqiqʼ, kuchʼobʼo che jun jastaq che kilitaj taj qas kʼolik. Junam rukʼ, qas kʼo rumal kqakʼut kojonik (Rom. 1:20).

KAJWATAJ JUN UTZ QANIMAʼ

Rumal che ri kbʼanowik che kʼo kojonik are ri e jastaq che e kʼolik, rech kʼo qakojonik rajawaxik nabʼe kkʼojiʼ tzʼaqat qetaʼmanik chrij ri «qastzij» (1 Tim. 2:4). Are kʼu xaq xiw ta wariʼ rajawaxik. Ri apóstol Pablo xutzʼibʼaj che ri kojonik kkʼut «rukʼ ri animaʼ» (Rom. 10:10). Xaq xiw ta rajawaxik che kqakojo che are ri qastzij, rajawaxik nim kqil wi. Xa jeriʼ kojkunik kqakʼutu che kʼo qakojonik, kraj kubʼij, kqabʼan pa qakʼaslemal ri kubʼij ri Biblia (Sant. 2:20). Ri winaq che nim ta kril ri qastzij, weneʼ kraj taj kukoj ri kubʼij ri Biblia xuqujeʼ are kbʼe ukʼuʼx chrij ri retaʼmabʼal o xaq kutzukuj kubʼij chrij ri itzel taq urayinik (2 Ped. 3:3, 4; Jud. 18). Rumal wariʼ, ojer kanoq ri e winaq che xkil ri e mayibʼal konojel taj xkʼojiʼ kikojonik (Núm. 14:11; Juan 12:37). Ri ruxlabʼal ri Dios xaq xiw kchakun pa kikʼaslemal ri e winaq che kkiloqʼoqʼej ri qastzij xuqujeʼ itzel kkil ri jastaq che qastzij taj (Gál. 5:22; 2 Tes. 2:10, 11).

¿JAS XUBʼAN RI DAVID RECH XKʼOJIʼ JUN KO UKOJONIK?

Jun chke ri upatanelabʼ ri Dios ojer kanoq che xkʼojiʼ jun ko ukojonik are ri ajawinel David (Heb. 11:32, 33). Are kʼu kuya taj jeʼ kqabʼij chkij konojel ri e ufamilia. Jun kʼutbʼal, Eliab ri ratz ri David, xukʼut ta kojonik are chiʼ xuyaj ri David rumal che xraj xretaʼmaj más chrij ri Goliat (1 Sam. 17:26-28). Kʼo ta jun winaq kʼo chi ukojonik are chiʼ kalaxik o krechbʼej ta chke ri unan utat. Rumal laʼ, David kʼo ukojonik rumal ri utzalaj rachilanik rukʼ ri Dios.

Pa ri Salmo 27, David xukʼut ri xubʼan che uriqik jun koʼalaj ukojonik (versículo 1). Xchoman chrij ri ukʼaslemal ojer xuqujeʼ ri xubʼan Jehová chke ri e ukʼulel (versículos 2 xuqujeʼ 3). Sibʼalaj nim xril ri utabernáculo ri Jehová (versículo 4) xuqujeʼ xuqʼijilaj chilaʼ kukʼ e nikʼaj chi israelitas (versículo 6). Xutaʼ pa chʼawem che ri Jehová che kukʼam ubʼe (versículos 7 xuqujeʼ 8). Xuqujeʼ xraj che Jehová kukʼut chuwach ri kubʼan pa ri ukʼaslemal (versículo 11). Sibʼalaj nim ubʼanik ri ukojonik chuwach areʼ xchoman chrij che kʼo ta upatan riʼ wet ma ta kʼolinaq ukojonik (versículo 13).

RI KQABʼAN CHE UKOWIRISAXIK RI QAKOJONIK

Kojkunik kkʼojiʼ jun qakojonik junam rukʼ ri David we kqesaj uwach ri utz uchomanik xuqujeʼ ri ubʼantajik che kubʼij ri Salmo 27. Rumal che ri tzʼaqat etaʼmanik kubʼano che kʼo qakojonik, are chiʼ kqanimarisaj más ri qetaʼmanik chrij ri uTzij ri Dios xuqujeʼ ri e qawuj, kʼax ta kqabʼan riʼ che ukʼutik ri uwachinik ri uxlabʼixel (Sal. 1:2, 3). Are chiʼ kqatijoj qibʼ chrij ri Biblia, chqatasaʼ qatiempo rech kojchoman chrij ri kqetaʼmaj, we jeʼ kqabʼano kqamaltyoxij riʼ ri e jastaq. Are chiʼ kqamaltyoxij ri e jastaq che Jehová, más kqaj kqakʼut ri qakojonik rech kqaqʼijilaj pa ri e riqbʼal ibʼ xuqujeʼ kojchʼaw chrij ri qeyebʼal kukʼ e nikʼaj chik (Heb. 10:23-25). Xuqujeʼ kqakʼut ri qakojonik are chiʼ amaqʼel kqabʼan qachʼawem xuqujeʼ kkʼistaj ta qakʼuʼx (Luc. 18:1-8). Rumal laʼ, kqaya ta kan ubʼanik qachʼawem che ri Jehová xuqujeʼ kqakubʼsaj qakʼuʼx che areʼ kok il chqe (1 Tes. 5:17; 1 Ped. 5:7). Ri kojonik kuya qachuqʼabʼ xuqujeʼ ri kqabʼano kuya uchuqʼabʼ ri qakojonik (Sant. 2:22).

CHOJKOJON CHRIJ RI JESÚS

Pa ri chaqʼabʼ are chiʼ majaʼ kkamik, Jesús xubʼij chke ri utijoxelabʼ: «Chixkojon che ri Dios, xuqujeʼ chixkojon chwe in» (Juan 14:1). Rumal laʼ rajawaxik kojkojon chrij ri Jesús, xaq xiw ta chrij ri Jehová. ¿Jas kqabʼano? Chqilaʼ oxibʼ ubʼanik.

Nabʼe, chqachʼobʼoʼ che ri tojbʼal mak are jun sipanik che ri Dios xuya chqe pa qajujunal. Ri apóstol Pablo xubʼij: in kʼasal rumal ri «kojonik che ri uKʼojol ri Dios, ri xinuloqʼoqʼej xuqujeʼ xuya ri ukʼaslemal rumal wech» (Gál. 2:20). Are chiʼ kʼo qakojonik chrij ri Jesús, kqachʼobʼo che ri tojbʼal mak chqe oj xyaʼ wi, are ri tobʼanik rech ksach ri qamak, rech kqariq ri kʼaslemal che kʼo ta ukʼisik, xuqujeʼ ri kʼutbʼal che ri Dios qas kojuloqʼoqʼej (Rom. 8:32, 38, 39; Efes. 1:7). Wariʼ kuya qachuqʼabʼ rech kqasach uwach ri chomanik che utz taj (2 Tes. 2:16, 17).

Ukabʼ, chojqebʼ rukʼ ri Jehová pa chʼawem rukʼ kojonik chrij ri tojbʼal mak che xuya ri Jesús. Rumal ri tojbʼal mak, kojkunik kojchʼaw rukʼ ri Jehová rukʼ kubʼsal kʼuʼx «rech ri areʼ kil ukʼuʼx chqe, kubʼan toqʼobʼ chqe che qatoʼik pa ri qʼij ri rajawaxik na chqe» (Heb. 4:15, 16; 10:19-22). Ri chʼawem kojutoʼ che uxutuxik ri makaj (Luc. 22:40).

Urox, chqanimaj ri Jesús. Ri apóstol Juan xutzʼibʼaj: «Ri kkojon che ri Kʼojolaxel, kʼo junalik ukʼaslemal. Ri man kkojon ta che ri Kʼojolaxel, man kʼo ta ukʼaslemal, xaneʼ ri royowal ri Dios kqaj na puwiʼ» (Juan 3:36). Kqilo che Juan xukʼutu che junam ta jun winaq che kʼo ukojonik rukʼ ri kniman taj. Rumal laʼ, kqakʼut kojonik chrij ri Jesús are chiʼ kojniman che. Kqanimaj are chi kqabʼan «ri upixabʼ ri Cristo», kraj kubʼij, ronojel ri xukʼutu xuqujeʼ ri xtaqan che ubʼanik (Gál. 6:2). Xuqujeʼ kqanimaj ri Jesús are chiʼ kqabʼan ri kubʼij «ri jikalaj pataninel» (Mat. 24:45). We kqanimaj ri utaqanik ri Jesús, kojutoʼ che uchʼijik ri kʼax che kqariq pa ri qakʼaslemal (Mat. 7:24, 25).

CHQABʼANAʼ NIM CHE RI TASTALIKALAJ QAKOJONIK

Ojer kanoq, jun achi xubʼij che ri Jesús: «Kinkojo. Chintoʼ la rech kintaqej kojonik» (Mar. 9:24). Wajun achi riʼ kʼo jubʼiqʼ ukojonik, are kʼu xumachʼ ribʼ xuqujeʼ xuchʼobʼo che kajwataj na más ri ukojonik. Junam rukʼ areʼ, qonojel kopan na jun qʼij che kajwataj más qakojonik. Are kʼu kojkunik kqanimarisaj kimik. Junam rukʼ ri qilom chik, kqanimarisaj are chiʼ kqetaʼmaj más chrij ri uTzij ri Dios xuqujeʼ kojchoman chrij, wariʼ xuqujeʼ kunimarisaj ri qamaltyoxinik che ri Jehová. Xuqujeʼ knimar ri qakojonik are chiʼ kqaqʼijilaj kukʼ ri e qachalal, kojchʼaw kukʼ ri e nikʼaj chik chrij ri qeyebʼal xuqujeʼ amaqʼel kqabʼan qachʼawem. We jewaʼ kqabʼan che unimarisaxik ri qakojonik, kqariq nimaʼq taq tewchibʼal: kojkʼojiʼ pa ri loqʼoqʼebʼal ukʼuʼx ri Dios (Jud. 20, 21).