Kʼakʼ taq bʼixonem rech uqʼijilaxik ri Jehová
1 Pa ri riqbʼal ibʼ re wajun junabʼ riʼ che xbʼan pa ri 4 rech octubre 2014, rech ri corporación Watch Tower Bible and Tract Society of Pennsylvania, xbʼixik che chomam chik che kkʼex ri wuj re bʼixonem. Qastzij wi, are jun utz jastaq che xyaʼ ubʼixik. Xuqujeʼ, xnaʼtax chke konojel che ri bʼixonem are jun chke ri jastaq che nim ubʼanik pa ri qaqʼijilanik che ri Dios (Sal. 96:2).
2 Are kʼu ¿jasche rajawaxik kkʼex ri wuj rech bʼixonem? Rumal kʼi jastaq. Ri nabʼe rumal, kimik tajin knimar ri qetaʼmabʼal chrij ri kraj kubʼij jun taq textos rech ri Biblia, rumal laʼ xkʼextaj jujun taq letras rech ri wuj re bʼixonem (Prov. 4:18). Ukabʼ rumal, che pa kʼi chʼabʼal tajin kkʼex jujun taq tzij pa ri Traducción del Nuevo Mundo, rumal laʼ weneʼ rajawaxik che xkʼex jujun taq tzij pa ri wuj rech bʼixonem rumal che esam pa ri ojer Biblia. Xuqujeʼ, rumal che kʼi ri ksukʼumax chupam ri wuj, xchomaxik che kkoj chi nikʼaj kʼakʼ chupam.
3 ¿La rajawaxik kqeyej na che kel lo ri kʼakʼ wuj rech bʼixonem rech kqabʼixoj ri kʼakʼ taq bʼixonem? Rajawaxik taj, rumal che pa taq ikʼ riʼ kyaʼ jujun pa jw.org. Chiʼ qʼaxinaq chi kebʼ oxibʼ qʼij che elinaq lo ri kʼakʼ bʼixonem, are kqabʼixoj pa ri Riqbʼal ibʼ rech uchak ri Ajawaxel. Pa ri cholajil rech ri semana kriqitaj ri ubʼiʼ ri bʼixonem xuqujeʼ ri tzij: «Kʼakʼ bʼixonem».
4 Ri kqabʼan che retaʼmaxik ri e kʼakʼ bʼixonem. Kʼax retaʼmaxik jun kʼakʼ bʼixonem. Are kʼu oj kqaj kqabʼan qe junam rukʼ ri salmista, che xubʼij: «Man kuyaʼ taj kinkanaj xaq chi jeriʼ: kebʼenbʼixoj na bʼix che uyaʼik qʼij la» (Sal. 30:12). Chqilaʼ ri e pixabʼ che kojkitoʼ che retaʼmaxik ri kʼakʼ bʼixonem xuqujeʼ rech kojbʼixon rukʼ ronojel qanimaʼ.
Chqatatabʼej kʼi mul ri música, che e kʼo pa jw.org. Wariʼ kubʼano che chanim kqetaʼmaj.
Utz che kojchoman chrij ri kubʼij xuqujeʼ kqakoj qachuqʼabʼ rech kkanaj kan pa qajolom.
Chqabʼixoj kʼi mul, kʼa kojkun na che ubʼixoxik.
Chqabʼanaʼ pa ri Qaqʼijilanik pa ri familia rech qas kketaʼmaj ronojel ri familia.
5 Pa ri nikʼaj chi ikʼ, chiʼ kkoj jun chke ri kʼakʼ bʼixonem chiʼ kkʼis ri Riqbʼal ibʼ rech uchak ri Ajawaxel, ri qachalal pa ri congregación nabʼe kkitaʼ ri música. Tekʼuriʼ kbʼixoxik junam rukʼ ri kbʼan che ubʼixoxik ri nikʼaj chik.
6 Qastzij wi, ri bʼixonem che kqabʼixoj pa ri qariqbʼal ibʼ nim ubʼanik, rumal che kuya junam kqakoj ri qachʼabʼal che uyaʼik uqʼij ri Jehová. Rumal laʼ, maqabʼan chi jun jastaq chiʼ kbʼan ri bʼixonem pa ri riqbʼal ibʼ.
7 Kʼo nikʼaj chik jastaq kojkunik kqabʼano rech kqakʼutu che nim kqil wi ri bʼixonem. Pa ri nim riqbʼal ibʼ, chiʼ majaʼ keʼok ri chʼabʼal, kkoj música. E kʼi qachalal re ronojel lugar pa ri uwach ulew kkikoj kichuqʼabʼ che ubʼanik ri bʼixonem che kqakoj pa ri qaqʼijilanik. Kebʼ mul pa jun junabʼ kebʼe pa Patterson (Nueva York) xuqujeʼ kirajil ri e areʼ ri kkikojo. Rumal laʼ, chiʼ oj kʼo pa ri riqbʼal ibʼ chiʼ kbʼix chqe che kojkubʼek xuqujeʼ kqatatabʼej ri música che bʼanom rech kqatatabʼej, utz che chanim kqabʼan ri kbʼix chqe. Wariʼ kubʼan chqe che kopan pa qanimaʼ ri e chʼabʼal che keyaʼik (Esd. 7:10).
8 Wajun riqbʼal ibʼ riʼ kkʼis rukʼ jun kʼakʼ bʼixonem ubʼiʼ «¡Que venga el Reino establecido por Dios!». Wajun bʼixonem riʼ, che xyaʼ ubʼixik pa ri riqbʼal ibʼ che kbʼan jumul pa jun junabʼ, xbʼanik rumal che xtzʼaqat cien junabʼ che tajin chi kuqʼat tzij ri Ajawbʼal.
9 Ri e kʼakʼ bʼixonem are jun chke ri «utzalaj taq jastaq» che uyaʼom ri Jehová chqe (Mat. 12:35a). Chqakojoʼ qachuqʼabʼ che retaʼmaxik rech kqabʼixoj rukʼ ronojel qanimaʼ. Rech je wariʼ kqaqʼijilaj ri Dios rumal che taqal che (Sal. 147:1).