Cheqatoʼ ri kekaʼy taj rech kketaʼmaj chrij ri Jehová
1. ¿Jas xubʼan ri Jesús che ukʼutik che xok il chke ri winaq che kekaʼy taj?
1 Chiʼ xaq jubʼiqʼ chi kraj che kel bʼi ri Jesús pa Jericó. Xeʼuriq kebʼ winaq che kekaʼy taj che xkimajij uraqik kichiʼ xkibʼij waʼ: «Chel kʼuʼx la chqe, Qajaw». Ri Jesús weneʼ sibʼalaj kbʼison chik, rumal che retaʼm che xa kebʼ oxibʼ qʼij chik kraj che kopan ri ukamikal. Are kʼu chiʼ xuta ri winaq riʼ xtakʼeʼik, xeʼuchʼabʼej xuqujeʼ xeʼukunaj (Mat. 20:29-34). ¿Jas kqabʼan che ubʼanik qe ri xubʼan ri Jesús che xok il chke ri winaq che kekaʼy taj?
2. ¿Jas kqabʼan che utzijoxik ri utzij ri Dios chke ri winaq che kekaʼy taj che kqariq pa ri bʼe?
2 Cheqatoʼ. We kqariq jun winaq che kkaʼy taj, jun kʼutbʼal weneʼ pa ri bʼe, chqabʼij che jachiʼ kojpe wi, ri qabʼiʼ xuqujeʼ che kqaj kqatoʼ. Weneʼ ri winaq qas ta kraj, rumal che kʼi taq mul e kʼo itzel taq winaq kkibʼan kʼax chke. Are kʼu we oj utz xuqujeʼ qastzij kqaj keqatoʼ, weneʼ kuxibʼij ta chi ribʼ. Xuqujeʼ qas chkʼol pa qajolom che kʼi uwach ri kbʼanow chke ri winaq che kemoyirik, wariʼ kojutoʼ rech kqilo jas kqabʼan che utoʼik ri winaq, chiʼ e qatoʼm chi ri winaq, kuya kqabʼij chke che oj kojtobʼan che ukʼutik chrij ri Biblia. Chqasikʼij chuwach jun texto rech ri Biblia, weneʼ Salmo 146:8 o Isaías 35:5, 6. We ri winaq kkunik kusikʼij uwach ri wuj pa braille, chataʼ che we kraj jun wuj pa braille che esam pa ri Biblia. Xuqujeʼ kuya kqakʼut chuwach ri kqabʼan che uriqik ri audio pa jw.org. We ri winaq kʼo ucomputadora che kukoj ri programa che kubʼij ri kel cho ri pantalla, weneʼ xuqujeʼ kkunik kril nikʼaj chik jastaq che kʼo pa Internet pa jw.org xuqujeʼ ri wuj che kuya kebʼan descargar pa formato de texto enriquecido (RTF). (Chawilaʼ pa ri recuadro «Chiʼ kqatoʼ jun winaq che kkaʼy taj...».)
3. ¿Jas kqabʼano rech keqariq ri kekaʼy taj che e kʼo pa ri qaterritorio?
3 Cheqatzukuj ri winaq che kekaʼy taj. Chiʼ kojbʼe chuchiʼ taq ja weneʼ keqariq taj, rumal che kʼo jujun taq mul kkaj taj kechʼaw kukʼ winaq che kkichʼobʼ ta kiwach che keʼopan cho kachoch. Rumal laʼ, rajawaxik kqakoj qachuqʼabʼ rech keqariqo xuqujeʼ kqatzijoj ri utzij ri Dios chke (Mat. 10:11). ¿La kʼo jun qachiʼl pa ri qachak o pa ri tijobʼal che kkaʼy taj? Chqatzijoj ri utzalaj taq tzij che. We kʼo jun tijobʼal chke ri winaq che kekaʼy taj pa ri qaterritorio, kqabʼij che ri ajtij we kraj kqakʼam bʼi jujun taq wuj che, che kʼo pa braille. ¿La qetaʼm uwach jun winaq che kʼo jun ufamilia che kkaʼy taj? ¿La kʼo jun kʼolbʼal pa ri territorio jachiʼ ketoʼ wi ri winaq che kekaʼy taj o ja che kekʼojiʼ wi ri winaq che e yawabʼ, che chkixoʼl e kʼo winaq che kekaʼy taj? Chqabʼij chke ri kifamiliar, ri kechajinik o ri ajtij che ri e testigos rech Jehová kqaj keqatoʼ ri kekaʼy taj, xuqujeʼ kʼo wuj pa braille che kuya kkikojo xuqujeʼ pa audio rech e areʼ kkitatabʼej. Chqakʼutuʼ chkiwach pa ri Biblia che Dios ubʼim che kukunaj na ri moyil. Xuqujeʼ kuya kqakʼut ri video chkiwach ubʼiʼ «No sé qué haría sin ella», che kʼo pa Internet jw.org. Wajun video riʼ kchʼaw chrij jun qachalal che kkaʼy taj che sibʼalaj xtoʼ rumal ri Biblia pa braille. We kqabʼij ri rumal che kqatzukuj ri winaq che kekaʼy taj, weneʼ kojutoʼ rech kkaj kechʼaw qukʼ.
4. ¿Jas kukʼut chqawach ri xukʼulmaj ri qachalal ubʼiʼ Janet?
4 Jun qachalal ixoq che kkaʼy taj ubʼiʼ Janet xbʼe pa jun ja jachiʼ e kʼo wi winaq che kekaʼy taj, xumajij tzijonem rukʼ jun ali. Janet xubʼij che ri ali: «Chiʼ ri Jesús xkʼojiʼ pa ri uwach Ulew, xeʼukunaj jujun winaq che kekaʼy taj rech xukʼut ri kubʼan na pa ri petinaq pa kiwiʼ ri kekaʼy taj». Xuqujeʼ xkil ri kubʼij Apocalipsis 21:3, 4, xuqujeʼ Janet xubʼij ri kubʼan ri Rajawbʼal ri Dios che ubʼanik ri kubʼij ri texto. Chiʼ qʼaxinaq chi kebʼ oxibʼ segundos che kʼot ubʼim ri ali, xubʼij: «Are nabʼe mul che jun winaq che kkaʼy taj kubʼij waʼ chwe. Kʼi chke ri winaq che kekaʼik kkichomaj che ri moyil are jun kʼajisabʼal wach rumal jun jastaq che man utz taj xqabʼano o are rumal che ri qatiʼt qamam xkibʼan itzelal». Janet xutaq bʼi pa correo electrónico jachiʼ kriqtaj wi ri wuj Su qas kukʼut, kimik junam kkitijoj kibʼ chrij ri Biblia kamul pa jun semana.
5. Pa neʼ kojkun taj keqakunaj ri winaq che kekaʼy taj, ¿jas keʼutoʼ wi pa kikʼaslemal we kojok il chke?
5 Pa neʼ oj kojkun taj keqakunaj ri kekaʼy taj, junam che xubʼan ri Jesús. Are kʼu kojkunik kʼo kqabʼano. Ri dios kech we qʼij junabʼ riʼ umoyirisam ri kichomabʼal e kʼi winaq, chkixoʼl, e kʼo jujun che qas kekaʼy taj. Kojkunik keqatoʼ konojel rech kkichʼobʼ ri qastzij che kubʼij ri Utzij ri Dios (2 Cor. 4:4). Ri Jesús xeʼukunaj kebʼ winaq che kekaʼy taj, naqaj che Jericó rumal che xel ukʼuʼx chke (Mat. 20:34). We kojok il chke ri man kekaʼy taj, kojkun riʼ keqatoʼ rech kkichʼobʼ uwach ri Jehová, ri kukunaj na ri kibʼaqʼwach xuqujeʼ kuya na kikʼaslemal che kʼot ukʼisik.