Kʼo mat qʼaten che utereneʼxik ri Jesús

1. ¿Jas weneʼ kqanaʼo are chiʼ kqamaj ubʼixik chke nikʼaj chik ri kqetaʼmaj pa ri Biblia?

¿LA KNAʼTAJ chawe jas xanaʼo are chiʼ xawetaʼmaj ri qastzij chrij ri Dios? Xawilo che ri kukʼut ri Biblia kʼax ta uchʼobʼik y xawaj che konojel ri winaq kketaʼmaj. Qas awetaʼm che ri kukʼut ri Biblia kuya utzilal pa ri kikʼaslemal kimik y pa ri petinaq (Sal. 119:105). Rukʼ kikotemal xamaj ubʼixik chke ri awachiʼl y ri awachalal. Are kʼu sibʼalaj xatbʼisonik are chiʼ e kʼi xkaj taj xkitatabʼej ri xabʼij chke.

2, 3. ¿Jas xkichomaj ri winaq chrij ri Jesús y chrij ri xukʼutu?

² Qetaʼm che e kʼo winaq kkaj taj kkitatabʼej ri kqakʼut chkiwach. Are chiʼ ri Jesús xkʼojiʼ cho ri uwach Ulew xubʼan kʼi milagros che xukʼutu che tajin ktoʼ rumal ri Jehová, are kʼu kʼi chke ri winaq xkixutuj kanoq. Jun kʼutbʼal, ri e kʼamal bʼe judíos xkilo are chiʼ ri Jesús xukʼastajisaj ri Lázaro, are kʼu xkikoj taj che are ri Mesías. Xaneʼ xkichomaj ukamisaxik areʼ y ri Lázaro (Juan 11:47, 48, 53; 12:9-11).

³ Ri Jesús retaʼm chik che e kʼi chke ri winaq kkikoj taj che areʼ are ri Mesías (Juan 5:39-44). Ri Jesús xubʼij wariʼ chke e jujun utijoxelabʼ ri Juan el Bautista: «Utz re ri man kubʼan ta kebʼ ukʼuʼxb chwe» (Mat. 11:2, 3, 6). ¿Jasche e kʼi winaq xkixutuj kan ri Jesús?

4. ¿Jas chrij kojchʼaw wi pa wajun kʼutunem riʼ?

⁴ Pa wajun kʼutunem riʼ y pa ri jun chik, kqetaʼmaj jujun rumal che ri e winaq pa ri nabʼe siglo xkixutuj ri Jesús. Xuqujeʼ kqetaʼmaj ri rumal che e kʼi winaq kimik kkaj taj kketaʼmaj chrij ri kqakʼutu. Y ri más nim ubʼanik, kqetaʼmaj na ri kojtoʼwik rech ko ri qakojonik chrij ri Jesús y kubʼan ta kebʼ qakʼuʼx chrij.

1) RI XKʼIY WI RI JESÚS

5. ¿Jasche e jujun winaq xkichomaj che ri Jesús are ta ri Mesías?

⁵ E kʼi winaq xkaj taj xekojon chrij ri Jesús are chiʼ xketaʼmaj jawi xkʼiy wi. Ketaʼm che are jun utzalaj ajtij y kubʼan milagros, are kʼu nim ta xkilo rumal che ri uchak ri utat are ubʼanik taq tem, mexa y nikʼaj chik. Xuqujeʼ pa Nazaret xkʼiy wi, jun tinamit che chkiwach e nikʼaj chik nim ta ubʼanik. Y ri Natanael xubʼij wariʼ are chi majaʼ kux utijoxel ri Jesús: «¿La kuyaʼ ta kʼu lo kel uloq jun utzalaj jasach pa Nazaret?» (Juan 1:46). ¿Jasche xubʼij wariʼ? Weneʼ rumal che xuchomaj che ri tinamit kpe wi ri Jesús nim ta ubʼanik. O weneʼ are tajin kchoman chrij ri kubʼij pa Miqueas 5:2, che ri Mesías pa Belén kalax wi, pa Nazaret taj.

6. ¿Jas ta rajawaxik xkibʼan riʼ ri winaq rech kkikojo che ri Jesús are ri Mesías?

⁶ ¿Jas kukʼut ri Biblia? Ri qʼaxal tzij Isaías xutzʼibʼaj kan chrij ri Jesús che «mawi jun xok il che ri xukʼulmaj», wariʼ kraj kubʼij che e kʼi winaq xechoman ta chrij ronojel ri xkʼutuwik che ri Jesús are ri Mesías (Is. 53:8). Wet xechoman chrij ronojel ri jastaq riʼ xkichʼobʼ ta riʼ che ri Jesús pa Belén xalax wi y che pa ri ufamilia ri David xpe wi (Luc. 2:4-7). Rumal che ri tinamit che xalax wi ri Jesús are ri kubʼij pa Miqueas 5:2. ¿Jas kʼu xbʼanow chke ri winaq che xekojon ta chrij? Rumal che xechoman ta chrij ri jastaq che kʼo ubʼanik rukʼ ri upetik ri Mesías, xaq xkitzukuj ri xkibʼij, xubʼan kebʼ kikʼuʼx y xkixutuj ri Jesús.

7. ¿Jasche e kʼi winaq kkixutuj ri utinamit ri Jehová?

⁷ ¿La je kkʼulmataj kimik? Jeʼ. Kʼi chqe ri kqapatanij ri Jehová kojel pa jun tinamit che qas ta nim ubʼanik. E kʼi winaq nim ta kojkil wi y kkibʼij che kʼo ta qetaʼmabʼal (Hech. 4:13). Kkichomaj che kojkun taj kqakʼut ri kʼo pa ri Biblia rumal che kʼo ta jun título yaʼom chqe pa jun nimalaj tijobʼal re ri Biblia. E nikʼaj chik kkibʼij che oj jun kojonem che petinaq pa Estados Unidos, are kʼu ri qastzij are che chkixoʼl 7 Testigos xa jun kel chilaʼ. E kʼo jujun kkibʼij che kojkojon ta chrij ri Jesús. Y, pa kʼi junabʼ bʼim chqij che oj comunistas, kraj kubʼij che xa kqatas qibʼ chrij ri qʼatbʼal tzij y kbʼixik che kqabʼan kʼax chke ri winaq re nikʼaj chi tinamit o más kqaya uwiʼ ri kqabʼano. Ri ketatabʼen ri molom taq tzij riʼ y are ta kkil ri qas tajin kkʼulmatajik, kubʼan kebʼ kikʼuʼx y kkixutuj kan ri utinamit ri Jehová.

8. Junam rukʼ ri kubʼij Hechos 17:11, ¿jas rajawaxik kabʼano rech qas kawetaʼmaj e jachin ri tajin kkibʼan ri kraj ri Dios kimik?

⁸ ¿Jas kattoʼwik rech kqaj ta uchuqʼabʼ ri akojonik? Unikʼoxik ri qas tajin kkʼulmatajik. Are riʼ ri xubʼan ri Lucas. Are chiʼ xutzʼibʼaj ri Evangelio qas xunikʼoj na «ronojel qas pa ri uchapletajik». Xraj che ri kesikʼin uwach ri uwuj, kketaʼmaj ri qastzij chrij ri Jesús (Luc. 1:1-4). Xuqujeʼ are ri xkibʼan ri judíos re ri tinamit re Berea. Ri nabʼe mul che xketaʼmaj ri utzalaj taq tzij chrij ri Jesús, utz xkibʼan che unikʼoxik ri utzij ri Dios che tzʼibʼam pa hebreo rech qas xkilo che qastzij ri xkʼut chkiwach (chasikʼij uwach Hechos 17:11). Junam rukʼ wariʼ, at xuqujeʼ rajawaxik qas kanikʼoj ri qastzij chrij jun jastaq. Chawilaʼ we junam kkikʼut ri testigos rech Jehová rukʼ ri kukʼut ri Biblia. Xuqujeʼ utz riʼ we kawetaʼmaj chrij ri kibʼanom ri testigos rech Jehová pa ri kʼisbʼal taq junabʼ. We utz unikʼoxik ri jastaq kqabʼano kqaya ta bʼe riʼ che e nikʼaj chi winaq kojkisubʼu o kkibʼij molom taq tzij chqe.

2) RI JESÚS XUBʼAN TA RI MILAGROS XA RUMAL CHE KRAJ KYA UQʼIJ

9. ¿Jas xkʼulmatajik rumal che ri Jesús xuya ta ri «etal ajchikaj chkiwach ri winaq»?

⁹ Ri winaq pa ri utiempo ri Jesús xkubʼiʼ ta kikʼuʼx rukʼ ri xubʼan che kitijoxik. Xaneʼ xkaj xkʼut «jun etal ajchikaj» chkiwach rech kkikojo che ri Jesús qas are ri Mesías (Mat. 16:1). Weneʼ xkibʼan wariʼ rumal che qas ta xkichʼobʼ ri kubʼij pa Daniel 7:13, 14. Are kʼu wajun profecía xtzʼibʼax taj rech ktzʼaqat pa ri utiempo ri Jesús xaneʼ pa jun chi tiempo. Rumal che ri Jesús xukʼut ta ri etal o ri milagro che xkaj xkilo, xekojon ta chrij y xkixutuj kanoq (Mat. 16:4).

10. ¿Jas xubʼan ri Jesús che ubʼanik ri xubʼij ri Isaías chrij ri Mesías?

¹⁰ ¿Jas kukʼut ri Biblia? Ri qʼaxal tzij Isaías xubʼij kan wariʼ chrij ri Mesías: «Man kuraq ta uchiʼ, man ko ta kchʼawik, man kubʼan ta[j] chi ktataj ri uchʼabʼal pa taq ri bʼe» (Is. 42:1, 2). Ri Jesús xubʼan ta ri uchak che ri Dios rumal che kraj che nim kilik. Xuyak ta nimaʼq taq templos, xukoj ta atzʼyaq che kachupchutik y xubʼij ta chke ri e winaq che kkichʼabʼej rukʼ jun bʼiʼaj che nim ubʼanik rech nim kil wi kumal. Are chiʼ ri Herodes xubʼij che che kubʼan jun milagro, xubʼan taj paneʼ kamisaxik rij (Luc. 23:8-11). Qastzij che xubʼan jujun milagros, are kʼu ri más nim ubʼanik chuwach are utzijoxik ri utzalaj taq tzij. Xubʼij wariʼ chke ri utijoxelabʼ: «Che kʼu waʼ in petinaq wi» (Mar. 1:38).

11. ¿Jas kkichomaj e jujun winaq?

¹¹ ¿La je kkʼulmataj kimik? Jeʼ. E kʼi winaq are utz kkil ri nimaʼq taq ja che kʼo retzʼebʼalil y sachom kʼi pwaq che ubʼanik, utz kkil ri bʼiʼaj che kkoj che kichʼabʼexik ri kʼamal taq bʼe re ri kojonem y ri nimaqʼij kkibʼano che kukʼut ta ri Biblia. Are kʼu ri winaq che kebʼe pa ri kiriqbʼal ibʼ kʼi ta más kketaʼmaj chrij ri Dios y chrij ri kraj kubʼan na. Junam ta kkʼulmataj kukʼ ri winaq che keʼopan pa ri qariqbʼal ibʼ rumal che chilaʼ kketaʼmaj jas kraj ri Dios kqabʼano. Ri Ja re Ajawbʼal che kqamulij wi qibʼ are ta nimaʼq taq ja, are kʼu sibʼalaj chʼajchʼoj y jeʼl kpetik. Ri keyaʼow ri tijonik kkikoj ta atzʼyaq y bʼiʼaj che kukʼutu che nim kibʼanik. Y, ronojel ri kqabʼano y ri kqakʼutu pa ri uTzij ri Dios kqesaj wi. Paneʼ je wariʼ e kʼi winaq kkaj taj kkita ri kqakʼutu rumal che kkibʼij che nim ta ubʼanik o rumal che junam ta rukʼ ri kkichomaj e areʼ.

12. Junam rukʼ ri kubʼij Hebreos 11:1, 6, ¿jas rajawaxik kabʼano rech ko ri akojonik?

¹² ¿Jas kattoʼwik rech kqaj ta uchuqʼabʼ ri akojonik? Ri apóstol Pablo xubʼij wariʼ chke ri cristianos re Roma: «Rajawaxik chi jun winaq nabʼe kutatabʼej na jun tzij rech kkojonik. Ri tzij ri kutatabʼej, are ri utzij ri Cristo» (Rom. 10:17). Paneʼ sibʼalaj utz keʼilitaj ri nimaqʼij kkibʼan ri winaq are ta kkowirisan ri kojonik, xaneʼ are ri unikʼoxik ri uTzij ri Dios. Rajawaxik che ko ri akojonik y kachʼobʼ ri qas kubʼij ri Biblia, rumal che «jun [winaq] man kuyaʼ taj kqaj chuwach ri Dios» we kʼo ta ukojonik (chasikʼij uwach Hebreos 11:1, 6). Rumal laʼ, rech jun winaq qas kuchʼobʼo che uriqom ri qastzij chrij ri Dios rajawaxik taj kbʼan jun milagro chuwach. Unikʼoxik ri Biblia are ri ktobʼanik rech kkowir ri ukojonik jun winaq chrij ri Dios y rech kubʼan ta kebʼ ukʼuʼx.

3) RI JESÚS XUBʼAN TA RE RI JASTAQ CHE XKIBʼAN RI JUDÍOS

13. ¿Jasche e kʼi chke ri winaq xkibʼij che utz ta ri xubʼan ri Jesús?

¹³ Ri utijoxelabʼ ri Juan el Bautista xkimayo che ri utijoxelabʼ ri Jesús kkibʼan ta ayun. Ri Jesús xubʼij chke jasche kkibʼan taj (Mat. 9:14-17). Are kʼu ri fariseos y e nikʼaj chi winaq xkiyoqʼ ri Jesús rumal che xubʼan ta ri jastaq che xkibʼan e areʼ. Xpe koyowal are chiʼ ri Jesús xeʼukunaj yawabʼibʼ pa ri qʼij sábado (Mar. 3:1-6; Juan 9:16). Ri e winaq riʼ kkinimarisaj kibʼ rumal che kkibʼij che tajin kkinimaj ri taqanik re ri qʼij sábado, are kʼu xuqujeʼ tajin kkibʼan kikʼay pa ri rachoch ri Dios. Itzel xkita are chiʼ ri Jesús xubʼij chke che utz ta ri tajin kkibʼano (Mat. 21:12, 13, 15). Y, are chiʼ ri Jesús xutzijoj ri utzij ri Dios pa ri sinagoga re Nazaret, ri winaq xpe koyowal rumal che xeʼujunamisaj kukʼ ri israelitas che xaq xiw chkij e areʼ xechoman wi y kʼo ta kikojonik (Luc. 4:16, 25-30). E kʼi xeteriʼ ta chi chrij ri Jesús rumal che xubʼan ta ri xkaj e areʼ (Mat. 11:16-19).

14. ¿Jasche ri Jesús xuqʼalajisaj che utz ta ri tajin kkibʼan ri judíos?

¹⁴ ¿Jas kukʼut ri Biblia? Ri Jehová xukoj ri qʼaxal tzij Isaías che ubʼixik wariʼ: «We tinamit riʼ xaq kkitzijoj chi kinkipatanij kkiya kʼu nuqʼij xaq rukʼ ri kichiʼ naj kʼu kʼo wi ri kanimaʼ chwe, ri qʼijilanik ri kkiya chwe xaq winaq e chomaninaq, kikojom kʼu pa kijolom» (Is. 29:13). Ri Jesús xuqʼalajisaj che utz ta ri kkibʼan ri judíos rumal che kkibʼan ta ri tzʼibʼam pa ri uTzij ri Dios. Ri winaq che are más nim xkil ri chomanik y ri taqanik che xa kech winaq, xkixutuj ri Jehová y ri Jesús che are ri Mesías.

15. ¿Jas jastaq utz ta kkil ri winaq chke ri testigos rech Jehová?

¹⁵ ¿La je kkʼulmataj kimik? Jeʼ. E kʼi winaq utz ta kkilo che kqabʼan ta ri nimaqʼij junam rukʼ ri cumpleaños y ri Navidad. ¿Jasche kqabʼan taj? Rumal che are ta ri kukʼut ri Biblia. E nikʼaj chik itzel kojkilo rumal che kqabʼixoj ta ri himno nacional, kqayak ta qaqʼabʼ chuwach ri bandera y nikʼaj chi jastaq, y kqabʼan ta ri nimaqʼij che kʼo ubʼanik kukʼ taq ri kaminaqibʼ rumal che are ta ri kukʼut ri Biblia. Weneʼ ri winaq kkibʼij che utz ri tajin kkibʼano, are kʼu kqaj ta chuwach ri Dios. Rumal laʼ, we are kkaj kkibʼan ri xa kichomanik winaq y are ta kkibʼan ri kubʼij ri Biblia utz ta keʼil riʼ rumal ri Jehová (Mar. 7:7-9).

16. ¿Jas rajawaxik kqabʼano y jas jastaq kqaxutuj ubʼanik? (Salmo 119:97, 113, 163-165).

¹⁶ ¿Jas kattoʼwik rech kqaj ta uchuqʼabʼ ri akojonik? Cheʼaloqʼoqʼej ri utaqanik y ri uchomanik ri Dios (chasikʼij uwach Salmo 119:97, 113, 163-165). We qas kawaj ri Jehová kaxutuj apachike jastaq riʼ che utz ta krilo. Are más nim kawil wi riʼ ri uloqʼoqʼexik ri Jehová.

4) RI JESÚS XUBʼIJ TA CHKE RI WINAQ CHE ARE RI POLÍTICA KESAN RI KʼAX

17. ¿Jas xkaj ri winaq kubʼan ri Mesías?

¹⁷ Pa ri uqʼij ri Jesús, e jujun winaq xkichomaj che rajawaxik aninaq kkʼex ri qʼatbʼal tzij. Xkichomaj che ri Mesías keʼutoʼ che kesaxik chuxeʼ ri qʼatbʼal tzij re Roma. Are kʼu chiʼ xkaj xkikoj ri Jesús che qʼatal tzij, areʼ xraj taj (Juan 6:14, 15). E nikʼaj chik, (e jujun kojol tabʼal toqʼobʼ) xkixibʼij kibʼ. ¿Jasche xkixibʼij kibʼ? Rumal che xkichomaj che weneʼ ri Jesús kukʼex jujun jastaq pa ri qʼatbʼal tzij y wariʼ kubʼano che kesax ri taqanik yaʼom pa kiqʼabʼ rumal ri qʼatbʼal tzij re Roma. E kʼi judíos xkaj ta chik xeteriʼ chrij ri Jesús rumal ri jastaq che kʼo ubʼanik rukʼ ri política.

18. ¿Jas bʼim kan pa ri uTzij ri Dios chrij ri Mesías xechoman ta ri judíos chrij?

¹⁸ ¿Jas kukʼut ri Biblia? Qastzij wi tzʼibʼam kanoq che ri Mesías kchʼojinik y kchʼakanik. Are kʼu xuqujeʼ tzʼibʼam kanoq che nabʼe rajawaxik kkamik rech kutoj ri qamak (Is. 53:9, 12). We are ri tzʼibʼam kanoq, ¿jas kʼu che e kʼi winaq jalan ri xkichomaj? Rumal che xkichomaj che ronojel ri bʼim kan pa ri uTzij ri Dios kebʼantaj pa ri kiqʼij (Juan 6:26, 27).

19. ¿Jasche e kʼi winaq utz ta kkil ri kqabʼano?

¹⁹ ¿La je kkʼulmataj kimik? Jeʼ. E kʼi winaq utz ta kojkilo rumal che kqanim ta qibʼ pa política. Kkibʼij che rajawaxik kqabʼan votar are chiʼ kechaʼ ri e qʼatal taq tzij. Are kʼu oj qas kqachʼobʼo che we kqaya qatobʼanik che uchaʼik jun winaq rech kux qʼatal tzij pa qawiʼ, xa tajin kqaxutuj kan riʼ ri Jehová (1 Sam. 8:4-7). Weneʼ are kkaj che kqayak nimaʼq taq hospitales, tijobʼal o nikʼaj chi jastaq rech keʼutoʼ ri winaq. Utz ta kojkilo rumal che are kqatzijoj ri kubʼan na ri Dios y are ta kojchoman chrij usukʼumaxik ri kʼax che kʼo pa ri uwach Ulew.

20. Junam rukʼ ri kubʼij Mateo 7:21-23, ¿jas ri más nim ubʼanik?

²⁰ ¿Jas kattoʼwik rech kqaj ta uchuqʼabʼ ri akojonik? (Chasikʼij uwach Mateo 7:21-23). Chnaʼtaj chawe che ri más nim ubʼanik are ri chak che xojutaq wi kan ri Jesús (Mat. 28:19, 20). Kanim ta awibʼ pa ri política y nikʼaj chi jastaq re ri uwach ulew. Ri oj testigos rech Jehová keqaj ri winaq y kel qakʼuʼx chke rumal che kkiriq kʼax, are kʼu qetaʼm che ri más nim ubʼanik are che kqakʼut chkiwach ri tewchibʼal che kuya na ri uQʼatbʼal tzij ri Dios pa ri petinaq y keqatoʼo rech keʼuʼx rachiʼl ri Jehová.

21. ¿Jas rajawaxik kqabʼano?

²¹ Pa wajun kʼutunem, xqetaʼmaj kajibʼ jastaq ri xbʼanowik che ri winaq xeteriʼ ta chrij ri Jesús y xkikoj taj che are ri Mesías, y ri rumal che e jujun winaq kimik kekixutuj ri testigos rech Jehová. Are kʼu xaq xiw ta wariʼ kbʼanow chke ri winaq. Pa ri jun chi kʼutunem kqil chi na kajibʼ jastaq. Qonojel bʼaʼ chqakowirisaj ri qakojonik y kqaya ta bʼe che apachike jastaq kubʼano che kubʼan kebʼ qakʼuʼx.