Chqayaʼ kichuqʼabʼ ri e nikʼaj chik pa ri riqbʼal ibʼ

1. ¿Jasche kqaya qacomentarios pa ri e riqbʼal ibʼ?

¿JASCHE kojbʼe pa ri e riqbʼal ibʼ? Rumal che kqaj kqaya uqʼij ri Jehová (Sal. 26:12; 111:1). Y rech kqayalaʼ qachuqʼabʼ pa we kʼaxalaj tiempo che oj kʼo wi (1 Tes. 5:11). Rumal laʼ, are chiʼ kqabʼan qacomentarios tajin kqabʼan we e kebʼ jastaq riʼ.

2. ¿Jampaʼ kojkunik kqabʼan qacomentarios pa ri riqbʼal ibʼ?

² Ronojel taq semanas kojkunik kqaya qacomentarios pa ri e riqbʼal ibʼ. Jun kʼutbʼal, pa taq sábados o domingos are chiʼ knikʼox ri wuj Ri Chajinel, pa ri riqbʼal ibʼ che kbʼan chuxoʼl semanas pa ri sección «Jeʼlalaj taq pixabʼ» y are chiʼ kyaʼ ri «Etaʼmabʼal chrij ri Biblia rech ri congregación» o pa nikʼaj chik.

3. a) ¿Jas weneʼ kojqʼaten che ubʼanik ri qacomentarios? b) ¿Jas kojutoʼ wi Hebreos 10:24, 25?

³ Qonojel kqaj kqaqʼijilaj ri Jehová y kqaya kichuqʼabʼ ri e qachalal rukʼ ri qacomentarios. Are kʼu, kʼo jujun jastaq kojuqʼatej che ubʼanik: weneʼ kqaxibʼij qibʼ kqaya qacomentarios, o weneʼ kʼi mul kqayak qaqʼabʼ y kyaʼ ta chqe. Pa ri carta che xutzʼibʼaj bʼi ri apóstol Pablo chke ri hebreos, kqariq jun pixabʼ che kojutoʼ, xubʼij: «Qas kʼu chujok na il» (chasikʼij uwach Hebreos 10:24, 25). We kqachʼobʼo che rajawaxik kqaya kichuqʼabʼ ri e qachalal, kojutoʼ rech kqaxeʼj ta qibʼ kqaya qacomentarios. Y we kojkun taj kqabʼano, kojkikot kukʼ ri kekunik (1 Ped. 3:8).

4. ¿Jas oxibʼ jastaq kqil na pa wajun kʼutunem?

⁴ Pa wajun kʼutunem riʼ, nabʼe kqil na jas kqabʼan che uyaʼik qachuqʼabʼ chbʼil qibʼ we oj kʼo pa jun congregación che oj kʼi ta más, y rumal laʼ rajawaxik che kqaya más qacomentarios. Y we oj kʼo pa jun congregación jawiʼ e kʼo wi kʼi qachalal che kkaj kkiya kicomentarios. Chukʼisbʼal, kqil na jas kqabʼan che uyaʼik ri qacomentarios rech kqaya kichuqʼabʼ ri e qachalal.

¿JAS KQABʼAN CHE UYAʼIK QACHUQʼABʼ CHBʼIL QIBʼ PA JUN CONGREGACIÓN CHE OJ KʼI TA MÁS?

5. ¿Jas rajawaxik kqabʼano rech kqaya kichuqʼabʼ ri e nikʼaj chik we oj kʼi ta oj kʼo pa ri congregación?

⁵ Pa jun congregación jawiʼ e kʼo ta kʼi qachalal o pa jun grupo, kajwataj tobʼanik che uyaʼik comentarios. Jujun taq mul, ri kkʼamow bʼe pa ri riqbʼal ibʼ kreyej na ri e qachalal kkiyak kiqʼabʼ. Rumal laʼ kbʼeyetaj más ri riqbʼal ibʼ, y wariʼ kuya ta chuqʼabʼ. ¿Jas kqabʼano we kkʼulmataj wariʼ pa ri qacongregación? Chqatijoj qibʼ rech kqaya kʼi comentarios, rech jeriʼ ri e nikʼaj chik kkaj kkibʼan ke.

6, 7. ¿Jas rajawaxik kabʼano rech kaxibʼij ta awibʼ kabʼan acomentarios?

⁶ Are chiʼ e jujun qachalal kkichomaj uyaʼik jun comentario, kkixibʼij kibʼ. We je kakʼulmaj at, ¿jas katkunik kabʼano? Katkunik katzukuj tobʼanik rech kaxibʼij ta chi awibʼ y kaya kichuqʼabʼ ri e qachalal rukʼ ri acomentarios.

⁷ Chatzukuj jujun tobʼanik pa Ri Chajinelb che bʼanom kanoq. Jun chke ri tobʼanik are che rajawaxik katijoj awibʼ (Prov. 21:5). Rumal che we kabʼano kaxibʼij ta awibʼ. Jun chi pixabʼ are che kʼi ta tzij kabʼij (Prov. 15:23; 17:27). Rech kanaʼ ta xibʼin ibʼ y rech ri e qachalal más kkichʼobʼ ri kabʼij. Xuqujeʼ, we rukʼ ri atzij kabʼan ri acomentarios y kʼi ta tzij kakojo, kqʼalajinik che qas xatijoj awibʼ y kachʼobʼ ri kʼutunem.

8. ¿Jas kunaʼ ri Jehová are chiʼ kqabʼan ronojel ri kojkun che ubʼanik?

⁸ ¿Jas katkunik kabʼano we abʼanom chi waʼ taq pixabʼ, are kʼu kel ta ri xibʼin ibʼ chawe? Chnaʼtaj chawe che ri Jehová nim kril wi ri achuqʼabʼ che kakojo rech kaya jun acomentario (Luc. 21:1-4). Ri areʼ kutaʼ ta jastaq chawe che katkun ta che ubʼanik (Filip. 4:5). Rumal laʼ, chatchoman chrij ri katkun che ubʼanik, y chataʼ achuqʼabʼ che ri Jehová. Katkunik kamaj uyaʼik nitzʼaq taq comentarios.

¿JAS KQABʼAN CHE UYAʼIK QACHUQʼABʼ CHBʼIL QIBʼ PA JUN CONGREGACIÓN CHE E KʼO KʼI QACHALAL?

9. ¿Jas kkʼulmataj pa jun congregación jawiʼ e kʼo wi kʼi qachalal?

⁹ We pa ri acongregación e kʼo kʼi qachalal weneʼ katkun taj kabʼan acomentario rumal che e kʼi kkiyak kiqʼabʼ. Chqilampeʼ ri ukʼutbʼal jun qachalal ixoq Danielle ubʼiʼ,c sibʼalaj utz krilo kubʼan ucomentarios pa ri riqbʼal ibʼ, rumal laʼ kubʼij che ubʼanik wariʼ are uqʼijilaxik ri Jehová, uyaʼik kichuqʼabʼ ri e nikʼaj chik y rech más kkanaj kan pa ujolom ri kretaʼmaj. Are kʼu are chiʼ xqʼax chi pa jun congregación jawiʼ e kʼo wi kʼi qachalal xyaʼ ta chi más che kubʼan ucomentarios, kubʼij: «Xinbʼisonik, rumal che xinnaʼo che jetaneʼ xesax jun eqeleʼn chwe. Xuqujeʼ xinchomaj che xa chubʼanik kkibʼan ri e qachalal che kkiya ta chwe».

10. ¿Jas kabʼano rech katkunik kaya acomentarios?

¹⁰ ¿La kʼo jumul anaʼom ri xunaʼ ri qachalal Danielle? We je laʼ ri anaʼom weneʼ kachomaj che kayak ta chi ri aqʼabʼ. Are kʼu kkʼistaj ta akʼuʼx. ¿Jas kabʼano rech katkunik kaya acomentarios? Rajawaxik che katijoj awibʼ rukʼ ronojel ri kʼutunem, rech je wariʼ we man xyaʼ jun acometario katkunik kayak chi jumul ri aqʼabʼ. Are chiʼ tajin katijoj awibʼ rukʼ ri wuj Ri Chajinel chachomaj jas ubʼanik ri párrafos rukʼ ri ubʼiʼ ri kʼutunem. Jun chi jastaq che katkunik kabʼano are katijoj awibʼ chrij ri jastaq che kʼax kichʼobʼik (1 Cor. 2:10). Rumal che kʼax kichʼobʼik, e kʼi qachalal kkiyak ta kiqʼabʼ. Are kʼu ¿jas katkunik kabʼano we abʼanom chi ronojel wariʼ y kyaʼ ta acomentarios? Are chiʼ majaʼ kumaj ri riqbʼal ibʼ katkunik kattzijon rukʼ ri qachalal che kkʼamow bʼe y kabʼij che jas párrafo kawaj kaya acomentario.

11. Junam rukʼ ri kubʼij pa Filipenses 2:4, ¿jas rajawaxik kqabʼano?

¹¹ (Chasikʼij uwach Filipenses 2:4). Ri apóstol Pablo xubʼij che rajawaxik kojchoman chkij ri e nikʼaj chik. Kqanimaj wajun pixabʼ are chiʼ kqaya bʼe chke ri e nikʼaj chik kkiya kicomentarios.

12. ¿Jas rajawaxik kqabʼano rech kqaya kichuqʼabʼ ri e qachalal pa ri e riqbʼal ibʼ? (Xuqujeʼ chawilaʼ ri wachbʼal).

¹² Chojchʼaw chrij jun kʼutbʼal che kojutoʼ che uchʼobʼik wariʼ. ¿La mat qastzij che xaq xiw ta ri at katchʼawik are chiʼ at kʼo rukʼ jun awachiʼl? Je wariʼ kkʼulmataj pa ri e qariqbʼal ibʼ, kqaj che ri e qachalal kkiya ri kicomentarios. Kqaya kichuqʼabʼ ri e qachalal are chiʼ kqaya bʼe chke e areʼ kkiya kicomentarios (1 Cor. 10:24). Chqilaʼ ri kojkunik kqabʼano rech e kʼi kkiya kicomentarios.

13. ¿Jas rajawaxik kqabʼano rech kkibʼan kicomentarios e nikʼaj chi qachalal?

¹³ Xuqujeʼ rajawaxik kʼi ta tzij kqabʼij are chiʼ kqabʼan qacomentarios rech kechʼaw chi ri e nikʼaj. Ri e kʼamal taq bʼe y ri e qachalal che kʼi chi junabʼ kipatanim ri Jehová kkiya ri kʼutbʼal che ubʼanik wariʼ. Katchʼaw ta chrij ronojel ri kubʼij ri párrafo rech kʼo kkibʼij chi ri nikʼaj qachalal. Jun kʼutbʼal, pa wajun párrafo kʼo kebʼ pixabʼ: kʼi ta tzij kakojo y katchʼaw ta chrij ronojel ri kubʼij ri párrafo. We at katyaʼow ri nabʼe comentario pa wajun párrafo, utz che xaq xiw katchʼaw chrij jun pixabʼ.

14. ¿Jas chrij rajawaxik kojchoman wi are chiʼ kqaj kqaya jun qacomentario? (Xuqujeʼ chawilaʼ ri e wachbʼal).

¹⁴ Chqachomaj jampaʼ mul kqayak ri qaqʼabʼ. Rumal che we xaq kqayak wi ri qaqʼabʼ kqaya ta bʼe chke ri e qachalal kkiya kicomentarios. Y weneʼ e jujun qachalal kkichomaj che rajawaxik taj kkiya kicomentarios (Ecl. 3:7).

15. a) ¿Jas utz taj kqabʼano we xojkun taj xqaya jun qacomentario? b) ¿Jas rajawaxik kril ri qachalal che kbʼanow ri preguntas? (Chawilaʼ ri recuadro «Pixabʼ rech utz kabʼan che ukʼamik bʼe pa jun etaʼmanik»).

¹⁵ Are chiʼ e kʼi qachalal kkaj kkiya kicomentarios, weneʼ kojkun taj kqaya kʼi qech oj o nijun. Paneʼ kojbʼisonik, rajawaxik kpe ta qoyowal (Ecl. 7:9).

16. ¿Jas kojkunik kqabʼano rech kqaya kichuqʼabʼ ri e qachalal che xkibʼan kicomentario?

¹⁶ Paneʼ katkun taj kaya kʼi acomentario, utz che keʼatatabʼej ri kicomentarios ri e nikʼaj chik y kabʼij utz taq tzij chke are chiʼ kkʼis ri riqbʼal ibʼ. Ri utz taq tzij che kabʼij chke kuya kichuqʼabʼ riʼ junam rukʼ ri comentarios che xatkun taj xayaʼo (Prov. 10:21).

¿JAS NIKʼAJ CHI JASTAQ KQABʼANO RECH KQAYA QACHUQʼABʼ CHBʼIL TAQ QIBʼ?

17. a) ¿Jas rajawaxik kkibʼan ri e tat nan? b) Junam rukʼ ri xawil pa ri video, ¿jas kajibʼ jastaq kqabʼano are chiʼ kqatzukuj qacomentario? (Xuqujeʼ chawilaʼ ri nota).

¹⁷ ¿Jas más rajawaxik kqabʼano rech kqaya qachuqʼabʼ pa ri e riqbʼal ibʼ? We ri ix tat nan e kʼo iwalkʼwal che e nitzʼaq na cheʼitoʼ rech kkiya jujun kicomentarios (Mat. 21:16). Jujun taq mul knikʼox kʼutunem pa ri riqbʼal ibʼ che kchʼaw chrij ri kʼax kkʼulmataj pa ri kʼulanem o nikʼaj chik. Are kʼu ri akʼalabʼ kekunik kkibʼan kicomentarios. Xuqujeʼ utz kibʼij chke ri iwalkʼwal jasche kbʼan taj kyaʼ ronojel ri comentarios chke are chiʼ kkiyak ri kiqʼabʼ, wariʼ keʼutoʼ rech kpe ta koyowal o kebʼison taj chiʼ kyaʼ ta chke (1 Tim. 6:18).d

18. ¿Jas kojkunik kqabʼano rech are ta kojchʼaw más chqij oj? (Proverbios 27:2).

¹⁸ Qonojel kojkunik kqaya qacomentarios che uyaʼik uqʼij ri Jehová y kuya kichuqʼabʼ ri e qachalal (Prov. 25:11). Jujun taq mul weneʼ kuyaʼ kojchʼaw chrij ri qakʼulmam pa ri qakʼaslemal, are kʼu rajawaxik are ta más kojchʼaw chqij oj (chasikʼij uwach Proverbios 27:2; 2 Cor. 10:18). Xaneʼ are más chojchʼaw chrij ri Jehová, ri utinamit y ri uTzij (Apoc. 4:11). Y we ri pregunta re ri párrafo kubʼij che kojchʼaw chrij ri qakʼulmam utz che kojchʼaw chrij. Pa ri pregunta re ri jun chi párrafo kqariq jun kʼutbʼal.

19. a) ¿Jas kkʼulmataj pa ri riqbʼal ibʼ we kojchoman chkij ri e nikʼaj chik? (Romanos 1:11, 12). b) ¿Jasche kawaj kabʼan acomentarios pa ri riqbʼal ibʼ?

¹⁹ Paneʼ kʼo ta jun taqanik chrij ri kqabʼan che ri qacomentarios, are kʼu rajawaxik kqakoj qachuqʼabʼ che uyaʼik rech kqaya kichuqʼabʼ ri e qachalal. Weneʼ wajun kʼutunem xeʼutoʼ e jujun qachalal rech kkibʼan más kicomentarios. Y weneʼ e nikʼaj chik xeʼutoʼ rech kekikot rukʼ ri tajin kkibʼan che ubʼanik ri kicomentarios y kkiya bʼe chke e nikʼaj chik che kkibʼano. We kojchoman chkij ri e nikʼaj chik ktobʼanik rech kqayalaʼ qachuqʼabʼ chbʼil qibʼ (chasikʼij uwach Romanos 1:11, 12).