Ri Jehová kojubʼan invitar pa ri rachoch

1, 2. ¿Jas invitación kuya ri Jehová chqe?

ARE chiʼ katchoman chrij ri awachilanik rukʼ ri Jehová, weneʼ kabʼij: «Ri Jehová are wachiʼl, nuTat y nuDios». O weneʼ kakoj nikʼaj chi tzij. Are kʼu ¿la katubʼan invitar riʼ ri Jehová pa ri rachoch?

² Ri qʼatal tzij David xujunamaj ri achilanik che kʼo chkixoʼl ri Jehová kukʼ ri sukʼalaj taq upatanelabʼ rukʼ ri kubʼan jun rajaw ja chke ri winaq che xeʼubʼan invitar pa ri rachoch. Xubʼij wariʼ: «Ajawaxel, ¿jachin ta ri kkuʼinik kkʼojiʼ pa ri achoch la? ¿Jachin ta ri kkuʼinik kjeqiʼ pa ri tastalikalaj juyubʼ la?» (Sal. 15:1). Ri e tzij riʼ kukʼutu che kojkunik kojok pa ri rachoch ri Jehová, kraj kubʼij, kojux rachiʼl. ¡Are jun nimalaj tewchibʼal!

RI JEHOVÁ KRAJ KOJUBʼAN INVITAR PA RI RACHOCH

3. ¿Jachin ri nabʼe che xbʼan invitar rumal ri Jehová y jas xunaʼo are chiʼ xkʼojiʼ rukʼ?

³ Are chiʼ ri Jehová majaʼ kubʼan ronojel ri jastaq ri areʼ xaq utukel kʼolik. Rumal laʼ ri nabʼe che xubʼan invitar are ri uKʼojol. Ri Jehová jetaneʼ jun rajaw ja che tajin kubʼan invitar ri nabʼe winaq pa ri rachoch. ¡Sibʼalaj xkikotik are chiʼ xubʼan wariʼ! Ri Biblia kubʼij che ri Jehová sibʼalaj xkikotik are chiʼ xubʼan invitar ri uKʼojol y ri uKʼojol xuqujeʼ sibʼalaj xkikotik rumal che are ri nabʼe xbʼan invitar (Prov. 8:30).

4. ¿E jachin taq más xeʼubʼan invitar ri Jehová pa ri rachoch?

⁴ Are chiʼ xqʼax ri tiempo, ri Jehová xeʼubʼan ri ángeles y xeʼubʼan invitar rech keʼok pa ri rachoch o keʼux ufamilia. Ri Biblia kubʼij pataninel taq aj kaj chke y kubʼij che sibʼalaj xekikotik rumal che e kʼo rukʼ ri Jehová (Job 38:7; Dan. 7:10). Pa kʼi taq junabʼ, ri Jehová xaq xiw xubʼan rachiʼl chke ri e kʼo pa ri kaj. Are kʼu are chiʼ xqʼax ri tiempo xeʼubʼan ri winaq y xeʼubʼan invitar jujun chke. Jujun chke ri winaq riʼ are ri Enoc, ri Noé, ri Abrahán y ri Job. Ri Biblia kubʼij che ri e winaq riʼ xeniman che ri Dios (Gén. 5:24; 6:9; Job 29:4; Is. 41:8).

5. ¿Jas kukʼut chqawach ri profecía che kʼo pa Ezequiel 37:26, 27?

⁵ Are chiʼ xqʼax ri tiempo, ri Jehová xuya ta kan kibʼanik invitar ri e rachiʼl pa ri rachoch. Chojchoman chrij ri kubʼij ri profecía re Ezequiel 37:26, 27 (chasikʼij). Wajun profecía riʼ kukʼutu che ri Dios qas kraj che ri upatanelabʼ keʼux rachiʼl. Ri Jehová xubʼan jun «kʼulwachinik kukʼ che ujikibʼaxik ri rukʼaxik jun kʼaslemal pa utzil». Ri e tzij riʼ ketzʼaqatik are chiʼ ri upatanelabʼ ri Jehová che kebʼe pa ri kaj y ri kekanaj kan cho ri uwach Ulew kekʼojiʼ junam jetaneʼ «xaʼ jumulaj chij» pa ri rachoch ri Jehová (Juan 10:16). Y are laʼ ri tajin kqil kamik.

PANEʼ OJ KʼO PA JALAJOJ TAQ LUGAR RI JEHOVÁ KOJUCHAJIJ

6. ¿Jampaʼ xojok pa ri rachoch ri Jehová y jawchiʼ kʼo wi?

⁶ Ojer kanoq, ri e ja che e bʼanom rukʼ atzʼyaq keʼutoʼ ri winaq chuwach weneʼ ri tew, ri qʼij y nikʼaj chik y kuyaʼo keʼuxlan chupam. Y, are chiʼ jun kok pa jun chke ri e ja riʼ, qas retaʼm che utz kbʼan che ukʼulaxik. Kjunamataj rukʼ wariʼ are chiʼ kqajach ri qakʼaslemal che ri Jehová, jetaneʼ kojok chupam ri rachoch (Sal. 61:4). Chilaʼ kqariq wi ronojel ri kajwataj chqe pa ri qakojonik y kojkʼojiʼ kukʼ nikʼaj chi winaq che e ubʼanom invitar ri Jehová. Are kʼu ri ja che kojubʼan wi invitar ri Jehová xa ta pa jun lugar kʼo wi. Xaneʼ konojel re jalajoj taq tinamit kekunik keʼok chupam. Are laʼ ri kilom e kʼi che e bʼenaq pa jun chi tinamit, weneʼ pa jun asamblea especial y kichʼobʼom kiwach nikʼaj chi winaq che e kʼo pa ri rachoch ri Dios (Apoc. 21:3).

7. ¿Jasche qetaʼm che ri upatanelabʼ ri Jehová che xekam ojer kʼa e kʼo na pa ri rachoch? (Xuqujeʼ chawilaʼ ri wachbʼal).

⁷ ¿E kʼu ri sukʼalaj taq upatanelabʼ ri Jehová che e kaminaq chik? ¿La kʼa e kʼo pa ri rachoch ri Jehová? E kʼolik. ¿Jasche kqabʼij wariʼ? Rumal che ri Biblia kubʼij che e kʼasal pa ri uchomanik ri Jehová. Ri Jesús xubʼij wariʼ: «Xuqujeʼ ri Moisés, are taq kʼo chuwach ri kʼix ri knikowik, xuqʼalajisaj chi ri kaminaqibʼ kekʼastaj na, xubʼij chi ri Ajawaxel are uDios ri Abrahán, uDios ri Isaac xuqujeʼ uDios ri Jacob. Ri areʼ kʼut man are ta kiDios kaminaqibʼ, xaneʼ are kiDios ri e kʼaskʼoj. Konojel kʼut e kʼaskʼoj che areʼ» (Luc. 20:37, 38).

RI UTZILAL KQARIQO Y RI RAJAWAXIK KQABʼANO

8. ¿Jas utzilal kqariqo rumal che oj kʼo pa ri rachoch ri Jehová?

⁸ Junam rukʼ jun qastzij ja che kojuchajij chuwach weneʼ ri tew o ri qʼij y kojkunik kojuxlan chupam, ri rachoch ri Jehová kojutoʼ chuwach ri kʼax che weneʼ kqariq pa ri qakojonik y kuya qeyebʼal. Are chiʼ oj kʼo naqaj che ri Jehová, ri Satanás kkun taj kubʼan kʼax chqe che mat kojkunik kqachʼijo (Sal. 31:23; 1 Juan 3:8). Y pa ri kʼakʼ uwach Ulew ri Jehová kuya ta kan kichajixik ri utzalaj taq rachiʼl, kuya taj che kuriq kʼax ri kikojonik y keʼuchajij na chuwach ri kamikal (Apoc. 21:4).

9. ¿Jas rajawaxik kkibʼan ri e kʼo pa ri rachoch ri Jehová?

⁹ ¡Are jun nimalaj eqeleʼn che ri Jehová kuya bʼe che kojkʼojiʼ pa ri rachoch y kkʼojiʼ jun utz qachilanik rukʼ! Are kʼu ¿jas rajawaxik kqabʼano rech amaqʼel kojkʼojiʼ pa ri rachoch ri Jehová? We jun winaq kojubʼan invitar pa ri rachoch, qastzij riʼ che kqaj kqetaʼmaj ri kraj che kqabʼano. Jun kʼutbʼal, weneʼ kraj keqesaj ri qaxajabʼ are chiʼ kojok pa ri rachoch. Xa junam rukʼ, kqaj kqetaʼmaj ri rajawaxik kqabʼano rech amaqʼel kojkʼojiʼ pa ri rachoch ri Jehová. Sibʼalaj kqaloqʼoqʼej rumal laʼ kqaj kqanimaj rukʼ ronojel qanimaʼ (Col. 1:10). Qastzij che ri Jehová are qachiʼl, are kʼu xuqujeʼ are qaDios y qaTat y rumal laʼ rajawaxik che nim kqil wi (Sal. 25:14). Kqaj taj ksach pa qajolom jachin ri areʼ. Retaʼmaxik wariʼ kubʼano che kqaxutuj apachike jastaq che kuya bʼis che ri Jehová y kqaj che rukʼ machʼachʼem kqapatanij (Miq. 6:8).

JUNAM XUBʼAN CHE KILIK RI ISRAELITAS PA RI DESIERTO

10, 11. ¿Jas kkʼutuwik che ri Jehová junam keril konojel ri upatanelabʼ?

¹⁰ Ri Jehová junam keril wi ri e rachiʼl (Rom. 2:11). Chojchoman chrij ri xubʼan che kilik ri israelitas che xekʼojiʼ pa ri desierto re Sinaí.

¹¹ Are chiʼ ri Jehová xresaj lo ri utinamit pa Egipto, xeʼuchaʼ jujun kojol tabʼal toqʼobʼ rech kepatanin pa ri tabernáculo. Y xubʼij chke jujun levitas che kkibʼan jalajoj taq chak che kʼo ubʼanik rukʼ ri tabernáculo. ¿La más nim xeril wi ri Jehová ri xepatanin pa ri tabernáculo o ri e kʼo naqaj che? No, ri Jehová junam xubʼan che kilik konojel.

12. ¿Jas xubʼan ri Jehová che ukʼutik che junam xeril ri israelitas are chiʼ xekʼojiʼ pa ri desierto? (Éxodo 40:38; xuqujeʼ chawilaʼ ri e wachbʼal).

¹² Konojel ri israelitas kekunik keʼux rachiʼl ri Jehová; are ta más nim ubʼanik ri eqeleʼn che yaʼom chke o che we naqaj e kʼo wi che ri tabernáculo. Ri Jehová, xubʼano che konojel ri israelitas xekunik xkil ri sutzʼ y ri qʼaqʼ che xkʼojiʼ puwiʼ ri tabernáculo (chasikʼij Éxodo 40:38). Rumal laʼ, are chiʼ ri sutzʼ kukʼex ri lugar che kʼo wi, konojel ri israelitas xuqujeʼ ri e kʼo naj che ri tabernáculo kekunik kkilo, kekimulij ri jastaq ke, kkikʼam bʼi ri kachoch che kibʼanom che atzʼyaq y junam kebʼe pa jun chi lugar (Núm. 9:15-23). Xuqujeʼ, konojel kkito are chiʼ keʼoqʼisax ri kebʼ trompetas re plata che kuya ubʼixik chke che rajawaxik kekiyak ri jastaq ke (Núm. 10:2). Wariʼ kukʼutu che ri e kʼo naqaj che ri tabernáculo kraj ta kubʼij che más utz na ri kachilanik rukʼ ri Jehová. Xaneʼ konojel ri israelitas kekunik keʼok pa ri rachoch ri Jehová, kkʼam kibʼe y kechajix rumal. Xa junam rukʼ kamik: apastaneʼ ri lugar che kojel wi, ri Jehová kojuloqʼoqʼej y kojuchajij.

KAMIK RI JEHOVÁ JUNAM KERIL WI RI WINAQ

13. ¿Jas kubʼan ri Jehová kamik che ukʼutik che junam keril wi ri winaq?

¹³ E jujun cristianos naqaj keʼel wi che ri sede mundial kech ri testigos rech Jehová o che jun sucursal. Y nikʼaj chik kechakun pa taq ri e lugar riʼ. Ketobʼan che ubʼanik jujun chak che kbʼan chilaʼ y kekunik kekʼojiʼ kukʼ ri qachalal che kkikʼam ubʼe wajun chak riʼ. E jujun chik e solinelabʼ re circuito o kkipatanij ri Jehová pa tiempo completo. Are kʼu konojel taj yaʼom jun eqeleʼn chke junam rukʼ wariʼ. We at jun chke ri yaʼom ta jun eqeleʼn chke, qas chakubʼsaj akʼuʼx che ri Jehová katraj, katukʼam pa ri rachoch y katuchajij (1 Ped. 5:7). Ri Dios kuya na chke konojel ri upatanelabʼ ri kajwataj chke pa ri kikojonik, kukʼam kibʼe y keʼuchajij.

14. ¿Jas jun chi jastaq kubʼan ri Jehová che ukʼutik che junam keril wi ri winaq che keʼubʼan invitar pa ri rachoch?

¹⁴ Jun chik che kukʼutu che ri Jehová junam keril wi ri winaq are che konojel kekunik kkʼojiʼ jun kiBiblia. Pa oxibʼ chʼabʼal xtzʼibʼax wi ri Biblia: pa hebreo, arameo y griego. ¿La kraj kubʼij che ri winaq che kekunik kkisikʼij ri Biblia pa ri e chʼabʼal riʼ más utz na ri kachilanik rukʼ ri Dios? Qastzij che je taj (Mat. 11:25).

15. Chayaʼ jun kʼutbʼal che kukʼutu che ri Jehová junam keril wi ri winaq (xuqujeʼ chawilaʼ ri e wachbʼal).

¹⁵ Ri Jehová kojubʼan ta invitar pa ri rachoch xa rumal che xojbʼe pa nimaʼq taq tijobʼal o rumal che qetaʼm ri e chʼabʼal che xtzʼibʼax wi ri Biblia. Ri Jehová xaq xiw ta kuya kinojibʼal ri winaq che xebʼe pa nimaʼq taq tijobʼal; xaneʼ kuya chke konojel, paneʼ xebʼek o xebʼe ta pa nimaʼq taq tijobʼal. Ri Biblia, bʼanom pa kʼi taq chʼabʼal. Rumal laʼ konojel winaq re ronojel ri uwach Ulew kekunik kketaʼmaj ri kubʼij ri Biblia y kekunik keʼux rachiʼl ri Dios (2 Tim. 3:16, 17).

AMAQʼEL CHOJKʼOL PA RI RACHOCH RI JEHOVÁ

16. ¿E jachin keʼukʼulaj ri Jehová pa ri rachoch? (Hechos 10:34, 35).

¹⁶ Are jun nimalaj tewchibʼal che kojkʼojiʼ pa ri rachoch ri Jehová. Utz kubʼan che qakʼulaxik pa ri rachoch y sibʼalaj kojuloqʼoqʼej. Ri areʼ junam keril wi konojel ri winaq, apastaneʼ ri tinamit che keʼel wi, ri kicultura, ri tijobʼal e bʼenaq wi, ri kiraza, ri kijunabʼ o paneʼ achijabʼ o ixoqibʼ. Ri kraj ri Jehová che kkibʼano are che keniman che (chasikʼij Hechos 10:34, 35).

17. ¿Jas kqil na pa ri jun chi kʼutunem?

¹⁷ Ri David xubʼan ri preguntas riʼ pa ri Salmo 15:1: «Ajawaxel, ¿jachin ta ri kkuʼinik kkʼojiʼ pa ri achoch la? ¿Jachin ta ri kkuʼinik kjeqiʼ pa ri tastalikalaj juyubʼ la?». Tekʼuriʼ, ri Jehová xubʼano che areʼ xriqow ri kirespuestas ri upreguntas. Pa ri jun chi kʼutunem kqil na ri rajawaxik kqabʼano rech amaqʼel kojkʼojiʼ pa ri rachoch ri Jehová.