Ri xubʼan ri Jehová rech xeresaj ri winaq pa uqʼabʼ ri makaj y ri kamikal

1, 2. a) ¿Jas (o su) riʼ ri makaj y jas kqabʼano rech kojchʼakan puwiʼ? (Xuqujeʼ chawilaʼ ri «Chomanik nim ubʼanik»). b) ¿Jas kqil na pa wajun kʼutunem riʼ y jas kqil na pa ri nikʼaj chik? (Xuqujeʼ chawilaʼ «Che ri sikʼinel»).

¿LA KAWAJ kawetaʼmaj ri nimalaj loqʼoqʼebʼal che kunaʼ ri Jehová chawe? Rech kqetaʼmaj, utz che kqanikʼoj ri ubʼanom che qatoʼik chuwach ri makaj y ri kamikal. Ri makaja are jun kʼulel che xaq pa qatukel kojkun taj kojchʼakan chuwach. Juntir oj ajmakibʼ y ronojel taq qʼij kʼi kojsach wi y rumal wariʼ kojkamik (Rom. 5:12). Pero kʼo jun utzalaj tobʼanik qukʼ: qas qetaʼm che rukʼ ri utobʼanik ri Jehová kojkunik kojchʼakan chuwach ri makaj.

² Ri Jehová 6,000 junabʼ chik tajin kuya ri utobʼanik chke ri winaq rech kekunik kechʼakan chuwach ri makaj. Y kubʼan wariʼ rumal che sibʼalaj kojuloqʼoqʼej. Xumajij lo qaloqʼoqʼexik are chiʼ xojubʼano y rumal laʼ kʼi tobʼanik uyaʼom chqe rech kojkunik kojchʼakan chuwach ri makaj. Ri Dios retaʼm che ri makaj kojukʼam bʼi pa ri kamikal y kraj taj che kojkamik, xaneʼ kraj che kqariq ri kʼaslemal kʼo ta ukʼisik (Rom. 6:23). ¡Y are waʼ ri kraj che kariqo! Pa wajun kʼutunem riʼ kqil na oxibʼ preguntas: 1) ¿jas kubʼsal kʼuʼx xuya ri Jehová chke ri winaq?, 2) ¿jas xkibʼan ri upatanelabʼ ri Jehová ojer kanoq rech xekunik xkibʼan ri kqaj chuwach y xkibʼan ramigos paneʼ e ajmakibʼ? Y 3) ¿jas xubʼan ri Jesús che kitoʼik ri winaq chuwach ri makaj y ri kamikal?

¿JAS KUBʼSAL KʼUʼX XUYA RI JEHOVÁ CHKE RI WINAQ?

3. ¿Jas xbʼanowik che ri Adán y Eva xeʼux ajmakibʼ?

³ Are chiʼ ri Jehová xeʼubʼan ri Adán y Eva, ri xraj chke are che kekikotik. Xuya jun jeʼlikalaj lugar jawiʼ kekʼojiʼ wi, xeʼukʼulbʼaʼ, xubʼij chke che kkinojisaj ri uwach Ulew chke ri kalkʼwal y che kkibʼan kotzʼiʼj che ronojel ri uwach Ulew junam rukʼ ri kotzʼiʼj Edén. Xa jun jastaq ri xubʼij chke che kkibʼan taj y xubʼij chke che we kenimanik, kekam ta riʼ. Y qetaʼm ri xkʼulmatajik: jun itzel uxlabʼal, che kunaʼ ta loqʼoqʼebʼal chke xuqujeʼ che ri Jehová, xeʼutaqchiʼj che ubʼanik ri xubʼij ri Jehová che kkibʼan taj. Ri Adán y Eva xkikubʼsaj ta kikʼuʼx chrij ri Jehová y are xkibʼan ri xubʼij ri itzel uxlabʼal chke y xemakunik. Rumal che xeniman taj, xkʼulmataj ri xubʼij ri Jehová chke: xkimajij uriqik kʼi kʼax, xerijobʼik y xekamik (Gén. 1:28, 29; 2:8, 9, 16-18; 3:1-6, 17-19, 24; 5:5).

4. ¿Jasche utz ta kril ri Jehová ri makaj y jasche kojutoʼo rech kojchʼakan chuwach? (Romanos 8:20, 21).

⁴ Ri xkʼulmatajik qas bʼisobʼal utaʼik, rumal laʼ ri Jehová xuya kan wariʼ pa ri Biblia rech kqetaʼmaj jasche itzel kril ri makaj. Ri makaj kojunajtajisaj chrij ri Jehová y kojukʼam bʼi pa ri kamikal (Is. 59:2). Rumal laʼ ri Satanás utz kril ri makaj y are waʼ ri rumal che xuya ri tentación chkiwach ri Adán y Eva y je tajin kubʼan qukʼ oj kamik. Weneʼ xuchomaj che pa ri kotzʼiʼj Edén areʼ xchʼakanik. Pero kuchʼobʼ ta ri nimalaj uloqʼoqʼebʼal ri Jehová che kʼolik. Ri Dios xukʼex ta ri ubʼim che kuya na chke ri kalkʼwal ri Adán y Eva. Ri areʼ sibʼalaj keʼuloqʼoqʼej ri winaq y rumal laʼ are chiʼ xemakun ri Adán y Eva aninaq xubʼij ri kubʼan che kitoʼik (chasikʼij Romanos 8:20, 21). Retaʼm che jujun chke ri kalkʼwal kkichaʼ upatanixik y kkitzukuj na tobʼanik rech kechʼakan chuwach ri makaj. Y ri Jehová, rumal che are jun utz Tat y areʼ xbʼanow ronojel, qas keʼutoʼ na ri winaq riʼ rech keqebʼ rukʼ y kechʼakan chuwach ri makaj y ri kamikal. ¿Jas kubʼan che ubʼanik wariʼ?

5. ¿Jampaʼ y jas xubʼan ri Jehová che uyaʼik jun kubʼsal kʼuʼx chke ri winaq? (Génesis 3:15).

⁵ (Chasikʼij Génesis 3:15). Ri kubʼsal kʼuʼx che xuya ri Jehová chke ri winaq xilitajik are chiʼ xuqʼat tzij puwiʼ ri Satanás. Ri Dios xubʼij che kʼo jun tobʼanel che kutaq na uloq rech kutakʼalej ri ujolom ri Satanás y kusukʼumaj na juntir ri kʼax che xubʼan pa ri kotzʼiʼj Edén (1 Juan 3:8). Pero ri Tobʼanel kuriq na kʼax pa uqʼabʼ ri Satanás, rumal che kukamisaj na. Wariʼ kuya na jun nimalaj bʼis che ri Jehová. Pero ri Jehová xuchʼij ri kʼax riʼ rumal che retaʼm che e kʼi winaq keʼel na chuxeʼ ri makaj y ri kamikal.

¿JAS XKIBʼAN RI WINAQ RE OJER KANOQ RECH XEKUNIK XEQEBʼ RUKʼ RI DIOS Y XKIBʼAN RAMIGOS PANEʼ E AJMAKIBʼ?

6. ¿Jas xkibʼan ri Abel y ri Noé rech xeqebʼ rukʼ ri Jehová?

⁶ ¿Jas kkibʼan ri winaq che ajmakibʼ rech keqebʼ rukʼ ri Jehová y kkibʼan ramigos? Ri areʼ nojimal xuqʼalajisaj wariʼ are chiʼ xqʼax ri e junabʼ. Are chiʼ ri Adán y Eva e makunaq chik, ri nabʼe winaq che xkojon chrij ri Jehová are ri ukabʼ kalkʼwal ubʼiʼ Abel. Ri areʼ xuloqʼoqʼej ri Jehová y xraj xubʼan ri kqaj chuwach rech xux ramigo. Y rumal laʼ xuya jun sacrificio che ri Jehová. Rumal che e kʼo uchij, xukʼam e kʼi «chke ri nabʼe taq kal» y xeʼusipaj che. ¿Y jas xubʼan ri Dios? «Nim xril wi ri Abel, xuqujeʼ ri usipanik» (Gén. 4:4). Qʼaxinaq chi kʼi junabʼ, xuqujeʼ xukʼam ri sacrificios che xkiya ri winaq che kkiloqʼoqʼej y kkikubʼsaj kikʼuʼx chrij junam rukʼ ri Noé (Gén. 8:20, 21). Wariʼ kukʼutu che ri winaq paneʼ e ajmakibʼ, kekunik kkibʼan ri kqaj chuwach ri Jehová y kkibʼan ramigos.b

7. ¿Jas kqetaʼmaj chrij ri Abrahán rumal che xraj xuya ri ukʼojol che ri Jehová?

⁷ Ri Jehová xubʼij che ri Abrahán, jun achi che kʼo jun nimalaj ukojonik, che kubʼan jun sipanik che che sibʼalaj kʼax ubʼanik: kukamisaj ri Isaac, ri ukʼojol. Qastzij riʼ che wariʼ sibʼalaj kʼax ubʼanik chuwach ri Abrahán. Pero ri areʼ rukʼ ronojel ranimaʼ xunimaj ri Jehová. Are chiʼ ya kukamisaj ri ralkʼwal, ri Jehová xuqʼatej. Ri Abrahán xuya kan jun utz kʼutbʼal chkiwach ri winaq che kʼo jun nimalaj kikojonik chrij ri Dios: che ri Jehová kuya na ri Ukʼojol pa kamikal rumal ri nimalaj loqʼoqʼebʼal che kunaʼ chke ri winaq (Gén. 22:1-18).

8. ¿Jas xukʼut ri sacrificios che xbʼan pa taq ri uqʼij ri Moisés? (Levítico 4:27-29; 17:11).

⁸ Kʼi junabʼ chik qʼaxinaq, are chiʼ ri Jehová xubʼij chke ri israelitas che kekikamisaj ri e chikop rech kkuyutaj ri kimak (chasikʼij Levítico 4:27-29; 17:11). Ri sacrificios riʼ xukʼutu che ri Jehová kuya na jun sacrificio che más nim ubʼanik chuwach ri xkiya ri israelitas, rumal che keresaj na ri winaq chuxeʼ ri kamikal. Ri Dios xubʼano che ri profetas xkiqʼalajisaj kanoq che ri Tobʼanel che are ri Ukʼojol ri Dios kuriq na kʼax y kkamisax na. Jetaneʼ jun alaj chij che kbʼan na sacrificar (Is. 53:1-12). Ri Jehová xuya ri loqʼalaj Ukʼojol rech keʼutoʼ e juntir ri winaq chuwach ri makaj y ri kamikal, xuqujeʼ che atoʼik at.

¿JAS XUBʼAN RI JESÚS RECH XEʼUTOʼ RI WINAQ?

9. ¿Jas xuqʼalajisaj ri Juan el Bautista? (Hebreos 9:22; 10:1-4, 12).

⁹ Pa ri junabʼ 29, are chiʼ ri Juan el Bautista xril ri Jesús re Nazaret, xubʼij: «Chiwilampeʼ, ri Alaj uChij ri Dios, ri kresaj ri kimak ri winaq» (Juan 1:29). Rukʼ ri xubʼij ri Juan el Bautista xukʼutu che ri Jesús are ri Tobʼanel che ri Jehová ubʼim che kutaq na loq. Ri kuya na ri ukʼaslemal pa kiwiʼ ri winaq. Rukʼ wariʼ ri winaq kechʼakan na puwiʼ ri makaj y ri kamikal (chasikʼij Hebreos 9:22; 10:1-4, 12).

10. ¿Jas xubʼan ri Jesús che ukʼutik che are xeʼutzukuj ri ajmakibʼ taq winaq?

¹⁰ Ri Jesús are más xeʼutoʼ ri winaq che kebʼisonik rumal che e ajmakibʼ y xuya ri sikʼinik chke che keʼux utijoxelabʼ. Retaʼm che ri kʼax tajin kkiriq ri winaq are rumal ri makaj. Rumal laʼ xeʼutzukuj ri achijabʼ ixoqibʼ che ri winaq kkibʼij che e ajmakibʼ. Y xubʼij wariʼ: «Ri winaq ri e utz man rajawaxik ta kunal kech, xaneʼ ri kʼo yabʼil chke». Y xubʼij chik: «Man in petinaq taj che kisikʼixik ri e sukʼ, xaneʼ ri ajmakibʼ» (Mat. 9:12, 13). Y xukʼut wariʼ rukʼ ri xubʼano are chiʼ xukuy ri umak ri ixoq che xeʼuchʼaj ri raqan rukʼ ri uwaʼl uwach (Luc. 7:37-50). Xukʼut ri Utzij ri Dios chuwach ri samaritana paneʼ retaʼm che kʼi mul makuninaq kukʼ achijabʼ (Juan 4:7, 17-19, 25, 26). Xuqujeʼ ri Jehová xuya poder che ri Jesús rech kkunik keʼuwalajisaj achijabʼ, ixoqibʼ y akʼalabʼ che e kaminaq y je wariʼ kchʼakan puwiʼ ri kamikal che kuya ri makaj (Mat. 11:5).

11. ¿Jasche ri winaq che ajmakibʼ utz xkinaʼo xekʼojiʼ rukʼ ri Jesús?

¹¹ Konojel ri winaq che kibʼanom nimaʼq taq mak utz xkinaʼo xekʼojiʼ rukʼ ri Jesús. Y kqamay ta wariʼ, rumal che ri Jesús rukʼ loqʼoqʼebʼal xeʼutoʼ ri winaq riʼ (Luc. 15:1, 2). Y xubʼij chke che utz ri tajin kkibʼano rumal che kekojon chrij (Luc. 19:1-10). Ri Jesús xukʼut chkiwach ri winaq che ri Jehová kel ukʼuʼx chke ri winaq (Juan 14:9). Rukʼ ri xubʼij y ri xubʼano, xukʼutu che ri Jehová kojuloqʼoqʼej, kel ukʼuʼx chqe y kraj kojutoʼ rech kojchʼakan chuwach ri makaj. Ri Jesús xubʼano che ri winaq che ajmakibʼ xkaj xkikʼex ri kikʼaslemal y xeniman che (Luc. 5:27, 28).

12. ¿Jas xuqʼalajisaj ri Jesús chrij ri ukamikal?

¹² Ri Jesús qas retaʼm ri kukʼulmaj na. Kʼi taq mul xubʼij chke ri utijoxelabʼ che kjach na pa kiqʼabʼ ri ukʼulel y che kkamisax na (Mat. 17:22; 20:18, 19). Y retaʼm che rumal ri ukamikal ksach na ri kimak e juntir ri winaq, junam rukʼ ri xubʼij ri Juan y ri profetas. Xuqujeʼ xubʼij che are chiʼ kkamik konojel kiwach winaq kekojon na chrij (Juan 12:32). Juntir ri kekojon chrij ri Jesús y kkibʼan ri kubʼij, keqaj na riʼ chuwach ri Jehová y keʼesax na pa uqʼabʼ ri makaj (Rom. 6:14, 18, 22; Juan 8:32). Rech kkunik kubʼan wariʼ, ri Jesús xuxiʼj ta ribʼ y xuchʼij ri xbʼan che (Juan 10:17, 18).

13. ¿Jas xbʼan che ukamisaxik ri Jesús y rumal wariʼ jas kqetaʼmaj chrij ri Jehová? (Xuqujeʼ chawilaʼ ri e wachbʼal).

¹³ Ri Jesús xjach pa kiqʼabʼ ri ukʼulel, xyoqʼik, xbʼix molom taq tzij chrij, xqʼat tzij puwiʼ y xkamisaxik. Y chuwach jun cheʼ xxekebʼax wi are chiʼ xkamisaxik. Ri Jesús xuchʼij juntir ri kʼax riʼ che xbʼan che y ri Jehová xunaʼ jun nimalaj bʼis pa ri ranimaʼ are chiʼ xril ri tajin kbʼan che ri Ukʼojol. Paneʼ sibʼalaj kuloqʼoqʼej y kkunik kutoʼo, pero xutoʼ taj. ¿Jasche? Rumal ri loqʼoqʼebʼal. Ri Jesús xubʼij wariʼ: «Ri Dios sibʼalaj keʼuloqʼoqʼej ri winaq cho ri uwach ulew, xuyaʼ kʼut ri uKʼojol, ri xaʼ jun kʼolik, rech konojel ri kekojon che, man ksach ta kiwach, xaneʼ kkʼojiʼ na junalik kikʼaslemal» (Juan 3:16).

14. ¿Jas kukʼut chawach ri xubʼan ri Jesús?

¹⁴ Ri xubʼan ri Jesús are kukʼut ri nimalaj loqʼoqʼebʼal che kunaʼ ri Jehová chqe qonojel ri oj kalkʼwal ri Adán y Eva. Y kukʼutu che sibʼalaj katuloqʼoqʼej. ¿La mat kopan pa awanimaʼ ronojel ri kʼax che xuqʼaxej ri Dios rech ri at katkunik katel pa uqʼabʼ ri makaj y ri kamikal? (1 Juan 4:9, 10). Ri areʼ kraj kojutoʼ chqajujunal rech kojchʼakan puwiʼ ri kamikal.

15. ¿Jas rajawaxik kqabʼano rech kqariq utzilal rukʼ ri ukamikal ri Jesús?

¹⁵ Ri ukamikal ri Ukʼojol ri Dios are jun sipanik rumal che kusachisaj ri qamak. Pero rajawaxik kʼo kqabʼano. Ri Juan el Bautista y ri Jesucristo xkibʼij kanoq ri rajawaxik kqabʼano: «Chikʼexaʼ ikʼuʼx, rumal rech chi naqaj chik kʼo wiʼ ri rajawbʼal ri Dios» (Mat. 3:1, 2; 4:17). Rumal laʼ, we kqaj kojqebʼ rukʼ ri Qatat Jehová, rajawaxik che kqabʼan arrepentir qibʼ. Pero, ¿jas kraj kubʼij che kqabʼan arrepentir qibʼ y jas kojutoʼ wi wariʼ rech are kqabʼan ri kqaj chuwach ri Jehová paneʼ oj ajmakibʼ? Pa ri jun chi kʼutunem kqil na wariʼ.