Chqakubʼsaj qakʼuʼx chrij ri kubʼan ri Dios che qatoʼik

1. ¿Jasche xkikot ri Pablo are chiʼ xchoman chrij ri ubʼanom pa ri ukʼaslemal?

RI APÓSTOL Pablo retaʼm che kkamisax na. Pero are chiʼ xchoman chrij ri xubʼan pa ri ukʼaslemal sibʼalaj xkikotik. ¿Jasche? Ri areʼ xubʼij: «Xinkʼis ri nuchak, xinchajij wibʼ pa ri nukojonik» (2 Tim. 4:6-8). Pa ronojel ri ukʼaslemal xuchaʼ ubʼanik utz taq jastaq, rumal laʼ qas retaʼm che ri Jehová kkikot rukʼ. Junam rukʼ ri xubʼan ri Pablo, kqaj che kkikot ri Jehová qukʼ rumal ri kqachaʼ ubʼanik pa ri qakʼaslemal. ¿Jas ri kojtoʼwik?

2. ¿Jas kraj kubʼij che kqakubʼsaj qakʼuʼx chrij ri Dios?

² Are chiʼ ri Pablo xubʼij: «Kujbʼinik rumal ri kojonik, man rumal ta ri kayenik» tajin kchʼaw chrij ri areʼ y ri nikʼaj chi cristianos (2 Cor. 5:7). ¿Jas xraj xubʼij rukʼ wariʼ? Jujun taq mul are chiʼ ri Biblia kukoj ri tzij «kojbʼinik» are ta kchʼaw chrij are chiʼ jun winaq kbʼinik, xaneʼ kchʼaw chrij ri kubʼan jun winaq pa ri ukʼaslemal. Ri winaq che kkojon ta chrij ri Dios kuchomaj ta na we ri kuchaʼ ubʼanik utz kril ri Dios, xaneʼ xaq xiw kuchaʼ ubʼanik jastaq rukʼ ri kuto, ri krilo o ri kunaʼo. Pero ri winaq che kkojon chrij ri Dios kuchaʼ ubʼanik jastaq che utz kril ri Dios. Qas kukojo che we kukubʼsaj ukʼuʼx chrij ri Dios y chrij ri kubʼij ri Biblia kuriq na utzilal kamik y pa ri petinaq ri Dios kuya na ri kʼaslemal kʼo ta ukʼisik che (Sal. 119:66; Heb. 11:6).

3. ¿Jas utzilal kqariqo we kqakubʼsaj qakʼuʼx chrij ri Dios? (2 Corintios 4:18).

³ Qastzij wi che weneʼ jujun taq mul kqachaʼ ubʼanik jujun jastaq rumal ri kqilo, ri kqato y ri kqanaʼo. Pero kqariq ta utzilal riʼ we are chiʼ kʼo kqachaʼ ubʼanik xaq xiw kojchoman chrij ri kqilo, ri kqato o ri kqanaʼo. Rumal che kʼi mul ri kqilo, ri kqato o ri kqanaʼo are ta ri más utz. Y we kqakubʼsaj ta qakʼuʼx chrij ri Dios weneʼ kqabʼan jastaq che kqaj ta chuwach o kqaxutuj ri pixabʼ che kuya chqe (Ecl. 11:9; Mat. 24:37-39). Pero we kqakubʼsaj qakʼuʼx chrij ri Dios, ri kqachaʼ ubʼanik qas kqaj riʼ chuwach (Efes. 5:10). Are chiʼ kqakʼam ri utobʼanik ri Dios y kqanimaj, kqariq riʼ ri qastzij kikotemal (Sal. 16:8, 9; Is. 48:17, 18). Y we kqaya ta kan ukubʼsaxik qakʼuʼx chrij ri Dios, kqariq na riʼ ri kʼaslemal kʼo ta ukʼisik (chasikʼij 2 Corintios 4:18).

4. ¿Jas kqabʼan che uchʼobʼik we tajin kqakubʼsaj qakʼuʼx chrij ri Dios?

⁴ ¿Jas kqabʼan che uchʼobʼik we tajin kqakubʼsaj qakʼuʼx chrij ri Dios? Ri kojutoʼo are ubʼanik ri preguntas riʼ: «¿Jachin chrij kinkubʼsaj wi nukʼuʼx are chiʼ kʼo kinchaʼ ubʼanik? ¿La are kinkubʼsaj nukʼuʼx chrij ri kinwilo o are chrij ri pixabʼ che kuya ri Jehová chwe?». Pa wajun kʼutunem riʼ kqil na jas kqabʼano rech kqakubʼsaj qakʼuʼx chrij ri Dios: are chiʼ kqatzukuj jun qachak, are chiʼ kqachomaj jachin rukʼ kojkʼuliʼ wi y are chiʼ ri utinamit ri Dios kuya jun taqanik chqe. Pa waʼ oxibʼ jastaq riʼ kqil na jas chrij rajawaxik kojchoman wi rech utz ri kqachaʼ ubʼanik.

ARE CHIʼ KQATZUKUJ JUN QACHAK

5. ¿Jas chrij kojchoman wi are chiʼ kqatzukuj jun qachak?

⁵ Qastzij wi che kqaj kqariq jun qachak ri kojutoʼ che uriqik ri kajwataj chqe y ri kajwataj chke ri qa familia (Ecl. 7:12; 1 Tim. 5:8). Kʼo jujun chak jawiʼ nim ketoj wi ri ajchakibʼ, rumal laʼ kʼo ri kajwataj chke ronojel taq qʼij y kekunik kkikʼol kan kipwaq. Pero kʼo chi nikʼaj chak ri nim ta ketoj wi ri ajchakibʼ, y xaq xiw kkiriq ri kajwataj chke ronojel taq qʼij. Rumal laʼ are chiʼ jun winaq kutzukuj jun uchak, kchoman chrij jampaʼ ktoj wi. Pero we jun winaq xaq xiw kchoman chrij wariʼ tajin ta kukubʼsaj ukʼuʼx chrij ri Dios.

6. ¿Jas kqabʼan che ukʼutik che kqakubʼsaj qakʼuʼx chrij ri Dios are chiʼ kqatzukuj jun qachak? (Hebreos 13:5).

⁶ We kqakubʼsaj qakʼuʼx chrij ri Dios, kqachomaj na riʼ we ri chak che kqachaʼ ubʼanik kʼo kubʼan che ri qachilanik rukʼ ri Jehová. Chqachomaj wariʼ: «¿La ktaʼ chwe che kinbʼan jastaq che utz ta kril ri Dios? ¿La kʼo ta chi más nu tiempo che utzijoxik ri utzij ri Dios, usikʼixik ri Biblia o kinbʼe ta chi pa ri e riqbʼal ibʼ? ¿La kinkʼojiʼ ta chi más tiempo kukʼ ri nu familia?» (Prov. 6:16-19; Filip. 1:10). We kawilo che kʼo jun chke wariʼ kakʼulmaj, ri más utz are che kakʼam ta wajun chak riʼ, paneʼ kʼax kabʼan che uriqik jun chik. Rumal che kqakubʼsaj qakʼuʼx chrij ri Dios, qas qetaʼm che kojutoʼ na y kuya na ri kajwataj chqe (Mat. 6:33; chasikʼij Hebreos 13:5).

7, 8. ¿Jas xubʼan jun qachalal che kel pa Sudamérica che ukʼutik che qas kukubʼsaj ukʼuʼx chrij ri Dios? (Xuqujeʼ chawilaʼ ri wachbʼal).

⁷ Jun qachalal ubʼiʼ Javiera che kel pa Sudamérica qas retaʼm che nim ubʼanik che kukubʼsaj ukʼuʼx chrij ri Dios. Ri areʼ kubʼij: «Pa ri empresa che kinchakun wi xel jun chak che utz kinwilo y che nim tojom wi, rumal laʼ xintaʼ che kyaʼ chwe». Pero ri a Javier kraj kubʼan ri precursorado. Ri areʼ kubʼij chik: «Ri encargado re ri chak xinubʼan entrevistar. Pero are chiʼ majaʼ kinbʼe pa ri entrevista xinbʼan orar che ri Jehová y xinkubʼsaj nukʼuʼx che ri areʼ kinutoʼo. Kwaj kinbʼan wajun chak riʼ, pero kwaj taj kinuqʼatej che upatanexik ri Jehová».

⁸ Ri a Javier kubʼij: «Are chiʼ tajin kinubʼan entrevistar ri kilow ri chak, xubʼij che rajawaxik kinchakun kʼi horas pa jun qʼij. Rukʼ utz taq tzij xinbʼij che che kinkun taj kinkʼam ri chak rumal che in testigo rech Jehová y kinbʼe pa ri e riqbʼal ibʼ». Ri a Javier xukʼam ta ri chak y are chiʼ qʼaxinaq chi kebʼ semanas xumajij ri precursorado. Tekʼuriʼ xuriq jun uchak che xa kebʼ oxibʼ qʼij kchakun pa jun semana. Ri areʼ kubʼij: «Ri Jehová xuta ri nu oraciones y xinutoʼ che uriqik jun chak che kinutoʼ rukʼ ri nu precursorado. Sibʼalaj kinkikotik che xinriq jun chak che kinuqʼatej ta che upatanexik ri Jehová y che kinkunik keʼntoʼ ri qachalal».

9. ¿Jas kawetaʼmaj chrij ri xubʼan ri a Trésor?

⁹ ¿Jas rajawaxik kqabʼano we ri qachak kuya ta bʼe che kqapatanij más ri Dios? Chqilaʼ ri xukʼulmaj ri qachalal Trésor, che kel pa Congo. Ri areʼ kubʼij: «Xinriq ri chak che más utz kwilo. Más nim kinchʼak chilaʼ chuwach nikʼaj chi chak y ri winaq nim kinkilo». Pero ri qachalal Trésor jujun taq mul kbʼe ta chi pa ri e riqbʼal ibʼ rumal che kchakun más horas. Y ri rachiʼl kkitaq che ubʼixik molom taq tzij rech ketaʼmax taj jas ri qas kubʼan ri empresa. Ri areʼ kraj kuya kan ri uchak, pero kubʼisoj che kuriq ta chi jun. ¿Jas xtoʼwik? Ri areʼ kubʼij: «Ri kubʼij pa Habacuc 3:17-19 xinutoʼ che uchʼobʼik, che paneʼ kinya kan wajun chak riʼ y kinchʼak ta chi nim pwaq, ri Jehová kinutoʼ na riʼ. Rumal laʼ xinya kan wajun chak». Y xubʼij chik: «E kʼi jefes kkichomaj che we nim ktoj wi jun ajchak, kubʼan riʼ apachike kbʼix che, xuqujeʼ kkʼojiʼ ta chi más tiempo rukʼ ri u familia y kupatanij ta chi más ri Dios. Sibʼalaj kinkikotik che xinya ta pa kʼax ri wachilanik rukʼ ri Jehová y ri nu familia. Are chiʼ xqʼax jun junabʼ, xinriq jun chak che kuyaʼ kinpatanij más ri Jehová y kinya ri kajwataj che ri nu familia. Are chiʼ kqaya ri Jehová pa nabʼe lugar pa ri qakʼaslemal weneʼ jujun taq mul kʼo ta más qapwaq, pero ri areʼ nijun mul kojuya kanoq». We kqakubʼsaj qakʼuʼx chrij ri pixabʼ che kuya ri Jehová chqe y chrij ri ubʼim che kuya na chqe pa ri petinaq, tajin kqakʼut riʼ che kqakubʼsaj qakʼuʼx chrij y ri areʼ kojutewchij na.

ARE CHIʼ KQACHOMAJ JACHIN RUKʼ KOJKʼULIʼ WI

10. ¿Jas rajawaxik kuchomaj na ri winaq are chiʼ kutzukuj jachin rukʼ kkʼuliʼ wi?

¹⁰ Ri kʼulanem are jun sipanik che uyaʼom ri Jehová, rumal laʼ awas taj che kqaj kojkʼuliʼk. Are chiʼ jun qachalal ali kraj kkʼuliʼ rukʼ jun qachalal, weneʼ kchoman chrij ri ubʼantajik ri qachalal, ri kkaʼyik, ri kkichomaj ri nikʼaj chik chrij, ri kubʼan che ukojik ri pwaq, la kkikot rukʼ y la kʼo u familia kuchajij na.b Are kʼu we xaq xiw kchoman chrij wariʼ, are tajin kbʼe ukʼuʼx riʼ chrij ri krilo.

11. ¿Jas kqabʼan che ukʼutik che kqakubʼsaj qakʼuʼx chrij ri Dios are chiʼ kqachomaj kojkʼuliʼk? (1 Corintios 7:39).

¹¹ Ri Jehová sibʼalaj kkikot kukʼ ri qachalal che kkinimaj ri pixabʼ che kuya chrij ri kʼulanem. Jun chke ri pixabʼ che kuyaʼo are che kkeyeʼj na are chiʼ kʼo chi kijunabʼ (1 Cor. 7:36). Jun chi pixabʼ are che qas kkil na we ri winaq qas kʼo ubʼantajik junam rukʼ ri kubʼij ri Jehová che rajawaxik kukʼut jun utz achajil o jun utz ixoqil (Prov. 31:10-13, 26-28; Efes. 5:33; 1 Tim. 5:8). We kchʼabʼex jun qachalal rumal jun winaq che Testigo taj, ri qachalal kunimaj ri kubʼij ri Jehová che rajawaxik xaq xiw kkʼuliʼ rukʼ jun winaq we «kojonel che ri» Jehová junam rukʼ ri kubʼij 1 Corintios 7:39 (chasikʼij). Kkikubʼsaj kikʼuʼx che ri Jehová kuya na ri kajwataj chke rech kekikotik (Sal. 55:22).

12. ¿Jas kawetaʼmaj chrij ri xubʼan ri qachalal Rosa?

¹² Chqilaʼ ri xukʼulmaj ri qachalal Rosa, jun precursora che kel pa Colombia. Pa ri uchak xuchʼobʼ uwach jun ala che Testigo taj y che utz kil rumal. Y ri qachalal Rosa xuqujeʼ utz kril ri ala. Ri areʼ kubʼij: «Kʼo utz taq ubʼantajik. Keʼutoʼ ri winaq y kel ukʼuʼx chke. Utz kinwil ri kubʼan che nuchʼabʼexik. Kʼo ubʼantajik che kwaj in che kukʼut jun achajil, pero Testigo taj». Y kubʼij chik: «Kʼax xinriq che ubʼixik che che kwaj taj... rumal che pa wanimaʼ qas kwaj che kqachʼabʼej qibʼ. Pa wajun tiempo riʼ xinbʼisonik, kinnaʼo che xaq nutukel in kʼolik y kwaj kinkʼulik, pero nuriqom ta jun qachalal». Pero ri qachalal Rosa are ta más xchoman chrij ri kunaʼo y ri kuchomaj, xaneʼ xuchomaj che ri kuchaʼ ubʼanik xa kubʼan kʼax riʼ che ri rachilanik rukʼ ri Jehová. Rumal laʼ ktzijon ta chi rukʼ wajun ala riʼ y are más xupatanij ri Dios. Are chiʼ xqʼax ri tiempo xbʼan invitar rech kbʼe pa ri Tijobʼal chke ri kkiya ubʼixik ri Ajawbʼal y chanim riʼ precursora especial chik. Ri areʼ kubʼij: «Ri Jehová sibʼalaj uyaʼom kikotemal chwe». Kʼax ubʼanik ri kraj ri Jehová we ri qanimaʼ kraj kubʼan jun chi jastaq. Pero are chiʼ kqabʼan ri kraj ri Dios, amaqʼel kqariq utzilal.

ARE CHIʼ RI UTINAMIT RI DIOS KUYAʼ JUN TAQANIK

13. ¿Jas weneʼ kqabʼano are chiʼ ri utinamit ri Dios kuyaʼ jun taqanik chqe?

¹³ Kʼi taq mul rech utz kqabʼan che upatanexik ri Dios kyaʼ jujun taq taqanik chqe, jujun chke weneʼ are keyaʼow ri kʼamal taq bʼe, ri solinelabʼ re circuito, ri sucursal o ri Jupuq Ajkʼamal bʼe cho ronojel uwach Ulew. Pero weneʼ jujun taq mul kqachʼobʼ taj jasche kyaʼ jujun taqanik chqe. ¿Jas riʼ kqabʼano? ¿La are kojchoman riʼ chrij che kʼax ubʼanik ri kyaʼ ubʼixik chqe? ¿La are kojchoman chrij ri kesach wi ri keyaʼow ri taqanik chqe? We kqabʼan wariʼ, tajin ta kqakubʼsaj qakʼuʼx chrij ri Dios.

14. ¿Jas kojtoʼwik rech kqanimaj ri taqanik che kuya ri utinamit ri Dios? (Hebreos 13:17).

¹⁴ Aninaq kqanimaj ri kubʼij ri utinamit ri Dios rumal che kqakubʼsaj qakʼuʼx che ri Jehová retaʼm ri más utz chqe (chasikʼij Hebreos 13:17). Qetaʼm che we kojnimanik, kojtobʼanik rech ri utinamit ri Dios kʼo pa junamil (Efes. 4:2, 3). Qetaʼm che paneʼ ri keyaʼow lo ri taqanik e ajmakibʼ, ri Jehová kojutewchij na rumal che kojnimanik (1 Sam. 15:22). Y are chiʼ ri Jehová krilo che kʼo rajawaxik ksukʼumaxik, aninaq kubʼano (Miq. 7:7).

15, 16. ¿Jas xtoʼw ri a Kevin rech kukubʼsaj ukʼuʼx chrij ri Dios? (Xuqujeʼ chawilaʼ ri wachbʼal).

¹⁵ Chqilampeʼ ri utzilal che kqariqo we kqakubʼsaj qakʼuʼx chrij ri Dios. Paneʼ pa ri tinamit re Perú ri winaq kechʼaw pa español, e kʼo winaq che kechʼaw pa jun chi chʼabʼal. Jun chke ri chʼabʼal riʼ are ri quechua. Pa kʼi junabʼ, ri qachalal che kechʼaw pa ri chʼabʼal quechua kkikoj kichuqʼabʼ che kitzukuxik ri winaq che kechʼaw pa wajun chʼabʼal riʼ. Are chiʼ ri gobierno xukʼex jujun taqanik, ri qachalal xkikʼex ri kkibʼan che kitzukuxik ri winaq (Rom. 13:1). Rumal laʼ jujun xkichomaj jas kkibʼan chi riʼ che kitzukuxik ri winaq che kechʼaw pa quechua. Ri e qachalal xkinimaj ri taqanik che kyaʼ chke y ri Jehová xutewchij ri chuqʼabʼ che xkikoj che kitzukuxik ri winaq che kechʼaw pa wajun chʼabʼal riʼ.

¹⁶ Ri qachalal Kevin, che are jun kʼamal bʼe pa ri congregación re ri chʼabʼal quechua, qas ta kuchʼobʼ ri rumal che xyaʼ wajun taqanik riʼ. Ri areʼ kubʼij: «Xinchomaj ‹¿Jas kʼu kqabʼan riʼ che kiriqik ri winaq re ri chʼabʼal quechua?›». ¿Jas xubʼan ri qachalal Kevin? Ri areʼ kubʼij: «Xinchoman chrij ri kubʼij Proverbios 3:5. Y xinchoman chrij ri xubʼan ri Moisés. Ri Jehová xubʼij che che keresaj bʼi ri israelitas pa Egipto y keʼukʼam bʼi pa ri mar Rojo, pero kuchʼobʼ taj jasche ri Jehová xutaʼ wariʼ che rumal che tajin keterenex kumal ri egipcios y kkiriq ta chik jawiʼ kebʼe wi. Pero ri Moisés xnimanik y ri Jehová xuya poder che rech kkunik kubʼan jun milagro» (Éx. 14:1, 2, 9-11, 21, 22). Ri qachalal Kevin xniman che ri xyaʼ ubʼixik, ¿y jas xuriq rukʼ wariʼ? Ri areʼ kubʼij: «Sibʼalaj kinmay ri xubʼan ri Jehová che qatewchixik. Ojer kanoq sibʼalaj nim kqabʼinibʼej are chiʼ kqatzijoj ri utzij ri Dios y jujun taq mul xa jun o kebʼ winaq keqariqo che kechʼaw pa quechua, pero kamik kojbʼe pa jun territorio jawiʼ e kʼo kʼi chke. Utz kojtzijon kukʼ, keqariq revisitas y kqamajij etaʼmanik re ri Biblia kukʼ. Y más e kʼi chi ri winaq ri keʼopan pa ri e riqbʼal ibʼ». Rumal laʼ qas qʼalaj che are chiʼ kqakubʼsaj qakʼuʼx chrij ri Dios, ri areʼ amaqʼel kojutewchij.

17. ¿Jas xawetaʼmaj pa wajun kʼutunem riʼ?

¹⁷ Xqilo jas kqabʼan che ukubʼsaxik qakʼuʼx chrij ri Dios pa oxibʼ jastaq. Y che rajawaxik kqabʼan pa ronojel ri qakʼaslemal, jachaʼ ri uchaʼik ri etzʼanem kqabʼano, we rajawaxik kojbʼe pa nimaʼq taq tijobʼal y ri kbʼan che kikʼiyisaxik ri akʼalabʼ. Are chiʼ kʼo kqachaʼ ubʼanik pa ri qakʼaslemal, rajawaxik che amaqʼel kojchoman chrij ri qachilanik rukʼ ri Jehová, ri pixabʼ che kuya chqe, che qas kojuchajij na y are ta kbʼe qakʼuʼx chrij ri kqilo. Jeriʼ, «ri oj amaqʼel are kqanimaj» ri qa Dios Jehová (Miq. 4:5).