Qatukel taj oj kʼolik

1, 2. a) ¿Jasche kojkunik kqabʼij che qatukel ta chuwach ri kʼax che kqakʼulmaj? b) ¿Jas kqil na pa wajun kʼutunem riʼ?

ARE chiʼ kqariq kʼax pa qakʼaslemal weneʼ kqanaʼo che qatukel oj kʼo pa jun kʼachelaj y kqariq ta ri bʼe rech kojel chupam. Pero qatukel taj rumal che ri loqʼalaj Qatat Jehová krilo ri tajin kqakʼulmaj y ubʼim che kojutoʼo. Ri Jehová kubʼij wariʼ chqe chqajujunal: «In katintoʼ» na (Is. 41:10).

² Pa wajun kʼutunem kqil na ri kubʼan ri Jehová che qatoʼik: 1) kukʼam qabʼe, 2) kuya ri kajwataj chqe, 3) kojuchajij y 4) kukubʼsaj qakʼuʼx. Ri areʼ ubʼim chqe che kojuya ta kan qatukel are chiʼ kqariq kʼax pa ri qakʼaslemal y kojsach ta pa ujolom. Rumal laʼ qatukel taj oj kʼolik.

RI JEHOVÁ KUKʼAM QABʼE

3, 4. ¿Jas kubʼan ri Jehová che ukʼamik qabʼe? (Salmo 48:14).

³ (Chasikʼij Salmo 48:14). Ri Jehová retaʼm che kojkun taj kqabʼan ronojel qatukel pa ri qakʼaslemal, rumal laʼ kukʼam qabʼe y kuya ri tobʼanik che rajawaxik chqe. ¿Jas kubʼan che qatoʼik? Are kukoj ri Biblia che ukʼamik qabʼe (Sal. 119:105). Rukʼ ri Utzij, kojutoʼo rech utz kqabʼan che uchaʼik ri kqaj kqabʼan pa ri qakʼaslemal y kojutoʼo rech kkʼojiʼ utz qabʼantajik rech kojkikotik y rech kqariq jun qakʼaslemal kʼo ta ukʼisik.a Kukʼut chqe ri kqabʼano rech kqakuy kimak ri nikʼaj chik, rech kkanaj ta oyowal pa qanimaʼ chkij nikʼaj chik, y oj utz pa ronojel (honrados) y kqaloqʼoqʼej qibʼ rukʼ ronojel qanimaʼ (Sal. 37:8; Heb. 13:18; 1 Ped. 1:22). Are chiʼ kqakʼut ri e bʼantajik riʼ kojux utz taq achajil, tat y amigos.

⁴ Pa ri Biblia, ri Jehová uyaʼom kan ejempos kech ri upatanelabʼ che xkikʼulmaj kʼax junam rukʼ ri kqakʼulmaj oj kamik (1 Cor. 10:13; Sant. 5:17). Are chiʼ kqasikʼij ri xkikʼulmaj ri upatanelabʼ ri Jehová kqilo che xaq xiw ta oj tajin kqariq ri kʼax pa qakʼaslemal. Xaneʼ e kʼo nikʼaj chik che kikʼulmam kʼax junam rukʼ ri tajin kqariq oj y xekun che uchʼijik rukʼ ri utobʼanik ri Jehová (1 Ped. 5:9). Xuqujeʼ kqetaʼmaj ri kojkunik kqabʼan chuwach ri e kʼax che kqariqo (Rom. 15:4).

5. ¿E jachin kuʼkoj ri Jehová che ukʼamik qabʼe?

⁵ Ri Jehová xuqujeʼ kuʼkoj ri qachalal che qatoʼik.b Ri solinelabʼ re circuito kekisolij ri congregaciones y kkiya discursos che kunimarisaj ri qakojonik y kojkitoʼo rech kʼo junamil chqaxoʼl (Hech. 15:40-16:5). Ri kʼamal taq bʼe re ri congregación nim kekil wi ri qachalal y kekitoʼo (1 Ped. 5:2, 3). Ri tat nan kkikʼut chke ri kalkʼwal che kkiloqʼoqʼej ri Jehová y utz kkichaʼ pa ri kikʼaslemal y amaqʼel kkisikʼij ri Biblia, kebʼe pa ri e riqbʼal ibʼ y kebʼe che ubʼanik predicar (Prov. 22:6). Ri qachalal ixoqibʼ che kʼi chi junabʼ tajin kkipatanij ri Jehová kekitoʼ ri alitomabʼ y rukʼ ri ki ejemplo kkiya utz pixabʼ chke y kkiya kichuqʼabʼ (Tito 2:3-5).

6. ¿Jas utzilal kqariq rukʼ ri tobʼanik che kuya ri Jehová chqe?

⁶ Ri Jehová uyaʼom ri tobʼanik che kajwataj chqe. ¿Jas rajawaxik kqabʼano rech kqariq utzilal rukʼ ri tobʼanik che uyaʼom ri Jehová chqe y jas kqabʼano rech kqakʼutu che kqamaltyoxij? Proverbios 3:5, 6 kubʼij: «Rukʼ ronojel awanimaʼ chakubʼaʼ akʼuʼx chrij ri Ajawaxel man chrij ta kʼut ri awetaʼmanik pa awech wi». ¿Jas utzilal kqariqo? Kubʼij chik: «Areʼ kʼu katkʼamow na bʼik pa ri sukʼalaj bʼe». Kraj kubʼij che kojutoʼo rech utz ri kqachaʼ ubʼanik rech kqariq ta kʼax y rech más kojkikotik. ¡Sibʼalaj kqamaltyoxij che ri Jehová kojraj y kuya utz taq pixabʼ chqe! (Sal. 32:8).

RI JEHOVÁ KUYA RI KAJWATAJ CHQE

7. Junam rukʼ ri kubʼij Filipenses 4:19 ¿Jas kubʼan ri Jehová che qatoʼik?

⁷ (Chasikʼij Filipenses 4:19). Ri Jehová xaq xiw ta kojutoʼ pa ri qakojonik xaneʼ kojutewchij rukʼ ri kajwataj chqe junam rukʼ ri qawa, ri qatzʼyaq y jun lugar ri kojkʼojiʼ wi (Mat. 6:33; 2 Tes. 3:12). Qastzij che kojchoman chrij ri kajwataj chqe, pero ri Jehová kubʼij chqe che más ta kojchoman chrij wariʼ (Mateo 6:25). ¿Jasche? Rumal che ri Jehová ubʼim che keʼuya ta kan ri upatanelabʼ kitukel (Mat. 6:8; Heb. 13:5). Rumal laʼ kqakubʼsaj qakʼuʼx che kubʼan na ri ubʼim y che qas kuya na ri kajwataj chqe.

8. ¿Jas xubʼan ri Jehová che utoʼik ri David?

⁸ Chojchoman chrij ri xubʼan ri Jehová che utoʼik ri David are chiʼ tajin kanimaj chuwach ri rey Saúl. Pa ri tiempo che tajin kkiriq kʼax ri David xuqujeʼ ri rachijabʼ, ri Jehová xuya ri kajwataj chke. Are chiʼ ri David xnaʼtaj che ri xubʼan ri Jehová che uchajixik chuwach ri kʼax, xubʼij: «In xinux kan kʼojol, in kʼu nim winaq chik, mawi kʼu jumul xinwil jun utzalaj winaq ri wonobʼam ta kanoq mawi xeʼenwil ta ri ralkʼwaʼl chi xa ta kkitzʼonoj kochinik» (Sal. 37:25). Weneʼ at awilom pa ri akʼaslemal ri ubʼanom ri Jehová che achajixik y ri ubʼanom che kichajixik ri qachalal.

9. ¿Jas kubʼan ri Jehová kamik che kitoʼik ri qachalal are chiʼ kkiriq jun kʼax? (Xuqujeʼ chawilaʼ ri e wachbʼal).

⁹ Ri Jehová kuya ri kajwataj chke ri qachalal are chiʼ kkiriq kʼax rumal jun desastre. Pa ri nabʼe siglo, ri cristianos re kʼi taq tinamit xkiya ri tobʼanik che kajwataj chke ri cristianos pa Jerusalén che tajin kkiqʼaxej wiʼjal (Hech. 11:27-30; Rom. 15:25, 26). Kamik, ri utinamit ri Jehová tajin kekitoʼ ri qachalal junam rukʼ ri xkibʼan ri cristianos re ri nabʼe siglo. Are chiʼ kkʼulmataj jun desastre, ri Jehová kuʼkoj ri qachalal rech kkiya ri kiwa, ri kijoron, ri katzʼyaq y ri kunabʼal che kajwataj chke ri xkiriq kʼax. Xuqujeʼ kekisukʼumaj ri Ja rech Ajawbʼal y ri kachoch ri qachalal che xkiriq kʼax. Y aninaq kkichomaj jas kkibʼan che uyaʼik kichuqʼabʼ ri qachalal pa ri kikojonik rech kebʼison taj, rumal che weneʼ xkam jun ki familiar o xuriq kʼax ri kachoch.c

10, 11. ¿Jas kukʼut chawach ri xukʼulmaj jun achi ubʼiʼ Boris?

¹⁰ Ri Jehová sibʼalaj ksipanik rumal laʼ kuya ri kajwataj chke ri winaq che e Testigos taj. Ri oj xuqujeʼ kqatzukuj ri kqabʼano rech keqatoʼ ri nikʼaj chik che e Testigos taj are chiʼ kʼo kajwataj chke (Gál. 6:10). Rukʼ ri tobʼanik che kqaya chke ri winaq kkichʼobʼ más kiwach ri testigos rech Jehová y kkaj kketaʼmaj chrij ri Jehová. Chqilaʼ ri xukʼulmaj jun achi ubʼiʼ Boris, che kel pa Ucrania che are jun director pa jun escuela. Paneʼ testigo rech Jehová taj, amaqʼel xuʼbʼan respetar ri alumnos che e testigos rech Jehová. Are chiʼ xmajtaj ri chʼoj, ri areʼ xel bʼi pa ri lugar ri kʼo wi y xbʼe pa jun chi lugar y ri qachalal xkiya ri tobʼanik che. Xqʼax ri tiempo xbʼe pa ri Unaʼtabʼalil ri ukamikal ri Jesús. Are chiʼ xchoman chrij ri tobʼanik che xkiya ri qachalal che, ri achi xubʼij: «Ri testigos rech Jehová xkiya ri tobʼanik che xajwataj chwe y xinkichajij. Sibʼalaj kinmaltyoxij ri tobʼanik che xkiya chwe».

¹¹ Qonojel kojkunik kqesaj uwach ri Jehová are chiʼ kqaya ri tobʼanik chke ri kʼo kajwataj chke paneʼ e Testigos taj (Luc. 6:31, 36). Ri loqʼoqʼebʼal che kqakʼut chke kubʼano che kkaj kketaʼmaj más chrij ri Jehová y kkaj kkipatanij (1 Ped. 2:12). Paneʼ kkaj taj kkipatanij ri Jehová, pero kojkikotik rumal che keqatoʼo (Hech. 20:35).

RI JEHOVÁ KOJUCHAJIJ

12. ¿Jas ubʼim ri Jehová che kubʼan na puwiʼ ri utinamit? (Salmo 91:1, 2, 14).

¹² (Chasikʼij Salmo 91:1, 2, 14). Ri Jehová ubʼim che kuchajij na ri ukojonik ri utinamit. Kuya ta bʼe che ri Satanás keʼuqʼatej ri upatanelabʼ rech kkipatanij junam rukʼ ri kraj areʼ (Juan 17:15). Are chiʼ kumajij «ri nimalaj kʼaxkʼolil», qetaʼm che ri Jehová qas kojuchajij na rech kqariq ta kʼax y rech kuriq ta kʼax ri qakojonik (Apoc. 7:9, 14).

13. ¿Jas kubʼan ri Jehová che kichajixik ri upatanelabʼ chkijujunal?

¹³ ¿Jas kubʼan ri Jehová che kichajixik ri upatanelabʼ chkijujunal? Uyaʼom ri Biblia chqe rech kqachʼobʼ ri utz y ri utz taj (Heb. 5:14). Are chiʼ kqabʼan ri kubʼij ri Biblia kuriq ta kʼax ri qachilanik rukʼ ri Jehová, utz ri kqachaʼ ubʼanik pa qakʼaslemal y kojkikotik (Sal. 91:4). Xuqujeʼ ri Jehová kukoj ri congregación che qachajixik (Is. 32:1, 2). Are chiʼ amaqʼel kojkʼojiʼ kukʼ ri qachalal kkiya qachuqʼabʼ rech kojkunik kqaxutuj ri utz ta kril ri Jehová (Prov. 13:20).

14. a) ¿Jasche ri Jehová amaqʼel taj kresaj ri kʼax che kqakʼulmaj? b) ¿Jas kubʼij Salmo 9:10? (Xuqujeʼ chawilaʼ ri nota).

¹⁴ Ri Jehová xuchajij jujun taq mul ri upatanelabʼ re ojer kanoq rech kekam taj, pero amaqʼel taj xubʼano. Rumal che ri Biblia kubʼij che juntir ri winaq «xaq kʼateʼ tal kkitaqlebʼej» jun kʼax (Ecl. 9:11). Junam rukʼ ri ojer, jujun taq mul kuya bʼe che ri upatanelabʼ kkiriq kʼax y weneʼ kekamik. ¿Jasche? Rech kilitajik che ri Satanás are ri bʼanal tzij (Job 2:4-6; Mat. 23:34). Ri Jehová amaqʼel taj kresaj ri kʼax che kqakʼulmaj, pero kqakubʼsaj qakʼuʼx che kojuya ta kan qatukel ri kojloqʼoqʼen che (Sal. 9:10).d

RI JEHOVÁ KUKUBʼSAJ QAKʼUʼX

15. ¿Jas kubʼan ri Jehová che ukojik ri oración, ri Biblia y ri qachalal che ukubʼsaxik qakʼuʼx? (2 Corintios 1:3, 4).

¹⁵ (Chasikʼij 2 Corintios 1:3, 4). Jujun taq mul qonojel kqariq kʼax, kojbʼisonik o kqanaʼ ansiedad. Weneʼ tajin kqakʼulmaj jun kʼax y wariʼ kubʼano che kojbʼisonik y kqanaʼo che xaq qatukel oj kʼolik. Weneʼ nijun kuchʼobʼ ri tajin kqakʼulmaj, pero ri Jehová retaʼm ri tajin kqakʼulmaj. Y xaq xiw ta retaʼm xaneʼ «kukubʼsaj qakʼuʼx pa konojel ri qakʼaxkʼolil». ¿Jas kubʼan che qatoʼik? Kukoj ri Biblia, ri oración y ri e qachalal. Are chiʼ kqabʼan orar kqariq «ri ujamaril ri Dios, ri nim na chuwach ronojel noʼj» (Filip. 4:6, 7). Are chiʼ kqasikʼij ri Biblia kqilo che ri Jehová sibʼalaj kojraj, kqetaʼmaj ri pixabʼ che kuya chqe y kojkikotik rumal che kʼo jun kubʼsal kʼuʼx chqe pa ri petinaq. Y are chiʼ kojkʼojiʼ kukʼ ri qachalal pa ri e riqbʼal ibʼ, kkiya qachuqʼabʼ y kkikubʼsaj qakʼuʼx rukʼ ri Biblia.

16. ¿Jas kqetaʼmaj chkij ri a Nathan y Priscilla?

¹⁶ Rech kqetaʼmaj ri kubʼan ri Jehová che ukubʼsaxik qakʼuʼx rukʼ ri Biblia, chqilaʼ ri xkikʼulmaj ri qachalal Nathan y Priscilla, che keʼel pa Estados Unidos. Ojer kanoq xkichomaj kebʼe pa jun chi lugar rech kkitzijoj ri utzij ri Dios chilaʼ. Ri qachalal Nathan kubʼij: «Xqakubʼsaj qakʼuʼx che ri Jehová kojutewchij na». Pero are chiʼ xoʼpan pa ri congregación, xeyawajik y kʼax xkibʼan che uriqik ri pwaq. Rumal laʼ xetzalij chi pa ri kitinamit, pero xuqujeʼ kʼax xkibʼan che uriqik ri pwaq. Ri qachalal Nathan kubʼij: «Xinchomaj, jasche ri Jehová xojutewchij taj junam rukʼ ri xqachomaj. Xuqujeʼ xinchoman chrij weneʼ kʼo jun jastaq xinbʼano che utz taj». Are chiʼ qʼaxinaq chi ri tiempo, xkilo che ri Jehová e uyaʼom ta kanoq. Ri qachalal Nathan kubʼij: «Ri xojtoʼwik are chiʼ tajin kqakʼulmaj ri kʼax riʼ, are usikʼixik ri Biblia rumal che xqanaʼo che jetaneʼ tajin ktzijon jun qamigo qukʼ che tajin kuya pixabʼ chqe y tajin kuya qachuqʼabʼ. Xqetaʼmaj che utz taj che más kojchoman chrij ri kʼax che tajin kqakʼulmaj, xaneʼ rajawaxik are kojchoman chrij ri tobʼanik che tajin kuya ri Jehová chqe rech kqachʼij ri kʼax. Y wariʼ kojutoʼo rech qetaʼm jas kqabʼan chuwach ri kʼax che kpe na».

17. ¿Jas xubʼan che uriqik kubʼsal kʼuʼx ri qachalal Helga? (Xuqujeʼ chawilaʼ ri e wachbʼal).

¹⁷ Junam rukʼ ri xqilo, ri qachalal kekunik kkiya kubʼsal kʼuʼx chqe. Chqilampeʼ ri xukʼulmaj ri qachalal Helga, che kel pa Hungría. Kʼi taq junabʼ, ri areʼ xuriq kʼax y wariʼ xubʼano che kbʼisonik y xunaʼo che kʼo ta upatan. Pero kamik, are chiʼ kchoman chrij ri xukʼulmaj krilo che ri Jehová xuʼkoj ri qachalal che utoʼik y che ukubʼsaxik ukʼuʼx. Ri areʼ kubʼij: «Ri Jehová xuya ri nuchuqʼabʼ rech xinkun che ubʼanik ri chak, rilik ri alaj wal che yawabʼ y nikʼaj chi kʼax. Qʼaxinaq chi 30 junabʼ y ri Jehová amaqʼel ukubʼsam nukʼuʼx. Y kʼo ta jun qʼij ma ta inutoʼm. Amaqʼel uyaʼom nuchuqʼabʼ rukʼ ri utz taq tzij che kkibʼij ri qachalal chwe. ¡Kʼi taq mul kbʼix chwe che utz tajin kinbʼan che ubʼanik jun chak, ktaq lo mensajes o jun tarjeta are chiʼ más kajwataj chwe!».

18. ¿Jas kojkunik kqabʼano rech kqakubʼsaj kikʼuʼx ri qachalal?

¹⁸ Kojkunik keqatoʼ ri nikʼaj chik, kqaya kichuqʼabʼ y kqakubʼsaj kikʼuʼx junam rukʼ ri kubʼan ri Jehová. ¿Jas kqabʼan che ubʼanik? Kojkunik keqatatabʼej rukʼ paciencia, kqaya kichuqʼabʼ rukʼ ri tzij che kqabʼij chke y kqaya ri tobʼanik che rajawaxik chke (Prov. 3:27). Y xaq xiw ta keqatoʼ ri qachalal xaneʼ konojel ri winaq che tajin kkiriq jun kʼax paneʼ e Testigos taj. We ri winaq tajin kkikʼulmaj jun kʼax, weneʼ xkam jun ki familiar o e yawabʼ, kojbʼe kukʼ cho kachoch, kqatatabʼej ri kkibʼij y kqakubʼsaj kikʼuʼx rukʼ ri Biblia. Are chiʼ kqesaj uwach ri Dios «ri kukubʼsaj qakʼuʼx pa ronojel», kubʼano che xaq xiw ta keqatoʼ ri qachalal che uchʼijik ri kʼax, xaneʼ xuqujeʼ keqatoʼ ri winaq rech kketaʼmaj chrij ri Jehová (Mat. 5:16).

RI JEHOVÁ AMAQʼEL KʼO CHE QATOʼIK

19. ¿Jas kubʼan ri Jehová che qatoʼik y jas kqabʼan che resaxik uwach?

¹⁹ Ri Jehová sibʼalaj kel ukʼuʼx chqe ri kojloqʼoqʼen che y amaqʼel kʼo che qatoʼik are chiʼ kqariq kʼax. Kojraj y kojuchajij junam rukʼ ri kubʼan jun tat rukʼ ri ralkʼwal. Kukʼam qabʼe, kuya ri kajwataj chqe, kojuchajij y kukubʼsaj qakʼuʼx. Kojkunik kqabʼan qe junam rukʼ ri kubʼan ri Jehová are chiʼ keqatoʼ ri nikʼaj chik che tajin kkiriq kʼax. Paneʼ kqakʼulmaj kʼax pa ri qakʼaslemal pero kqakubʼsaj qakʼuʼx chrij ri Jehová che amaqʼel kʼo che qatoʼik rumal che ubʼim: «Man kaxeʼj ta awibʼ, in kʼo kʼu ne awukʼ» (Is. 41:10). ¡Sibʼalaj kojkikotik che ri Jehová kojuya ta kan qatukel!