¿Jas más kojkunik kqetaʼmaj chrij ri ya qetaʼm chik?

1. ¿Jas xanaʼo are chiʼ xawetaʼmaj chrij ri kubʼij ri Biblia?

RI NABʼE xqetaʼmaj pa ri Biblia are ri ubʼiʼ ri Dios. Y wariʼ xubʼano che xojux ramigos (Is. 42:8). Are chiʼ xqetaʼmaj che ri kaminaqibʼ kʼo ta kʼax kkibʼan chqe y che kʼo ta kʼax tajin kkiriqo, xubʼano che kqaxiʼj ta chi qibʼ (Ecl. 9:10). Y are chiʼ xqetaʼmaj che ri Dios kuya na jun kʼaslemal kʼo ta ukʼisik pa jun kotzʼiʼjalaj uwach Ulew, xubʼano che kojbʼison ta chi más rumal che kamik xa 70 u 80 junabʼ kojkʼasiʼk (Sal. 37:29; 90:10). Ronojel ri qetaʼmam pa ri Biblia ukʼexom ri qakʼaslemal.

2. Paneʼ kʼi chi junabʼ tajin kqapatanij ri Jehová, ¿jasche kqabʼij che kojkunik kqetaʼmaj más chrij ri Biblia? (2 Pedro 1:12, 13).

² Nim kibʼanik ri nabʼe taq jastaq che xqetaʼmaj pa ri Biblia. Ri apóstol Pedro xutzʼibʼaj ri ukabʼ u carta chke ri cristianos che ko e takʼal pa ri qastzij (chasikʼij 2 Pedro 1:12, 13). Xunaʼtasaj chke ri nabʼe taq jastaq che ketaʼm chik rech kkiya ta kan upatanixik ri Jehová rumal che e kʼo itzel taq winaq pa ri congregación che tajin kkibʼij molom taq tzij (2 Ped. 2:1-3).

3. Chayaʼ ubʼixik rukʼ jun ejemplo jasche rajawaxik kqaya ta kan retaʼmaxik chrij ri Biblia.

³ Kʼo más kqetaʼmaj chrij ri ya qetaʼm chi pa ri Biblia. Chojchoman chrij jun nan y ri ral che ketaʼm kkibʼan jun caldo. Ri nan rumal che kʼo más retaʼmabʼal kkunik kubʼan nikʼaj chi rikil rukʼ ri mismo ingredientes. Ri kʼi chi junabʼ tajin kqapatanij ri Jehová qetaʼm ri kqabʼan che ukojik pa ri qakʼaslemal ri kqetaʼmaj chupam ri Biblia, weneʼ kʼextajinaq jujun taq jastaq pa ri qakʼaslemal o yaʼom jujun taq eqeleʼn chqe. Pero ri kʼateʼ tajin kkibʼan estudiar ri Biblia majaʼ qas kketaʼmaj ri kkibʼan che ukojik pa ri kikʼaslemal. Rumal laʼ are chiʼ kojchoman chrij ri nabʼe taq jastaq xqetaʼmaj weneʼ kqilo jas más tobʼanik kuya chqe. Pa wajun kʼutunem riʼ kqil na jas más kqetaʼmaj chrij oxibʼ jastaq che qetaʼmam chupam ri Biblia.

RI JEHOVÁ ARE RI BʼANOL RE RONOJEL

4. ¿Jas tobʼanik kuya chqe retaʼmaxik che ri Jehová are ri Bʼanol re ronojel?

⁴ Hebreos 3:4 kubʼij: «Ri xebʼanow konojel ri jastaq, areʼ ri Dios». Kojkunik kqilo che ri Jehová sibʼalaj kʼo u poder y unojibʼal rumal ri xubʼan che ri uwach Ulew y ronojel ri kʼo chuwach. Y rumal che areʼ xojbʼanowik qas kuchʼobʼ qawach, kojraj y retaʼm ri qas kuya utzilal chqe. Retaʼmaxik wariʼ chrij ri Jehová kojutoʼ che uchʼobʼik che kʼo upatan ri qakʼaslemal.

5. ¿Jas kojutoʼ retaʼmaxik che ri Jehová are ri Bʼanol re ronojel? (Isaías 45:9-12).

⁵ Retaʼmaxik che ri Jehová are ri Bʼanol re ronojel kukʼut chqawach che utz taj che kqabʼan nim che qibʼ. Chojchoman chrij are chiʼ ri Job are más xchoman chrij ri tajin kukʼulmaj, xuchomaj che ri Jehová are tajin kyaʼow ri kʼax che y xsach pa ujolom che ri Jehová are ri Bʼanol re ronojel. Pero ri Jehová xunaʼtasaj che ri Job jachin xbʼanow ronojel ri jastaq (Job 38:1-4). Y rukʼ ri xubʼij ri Jehová che ri Job xkunik xrilo che ri Jehová kubʼan ta kʼax che jun winaq. Y qʼaxinaq chi ri tiempo ri Isaías xubʼij kanoq che ri winaq makichomaj che kʼo más ketaʼmabʼal chuwach ri Jehová (chasikʼij Isaías 45:9-12).

6. ¿Jasche utz che kojchoman chrij ri u poder y ri unojibʼal ri Jehová? (Xuqujeʼ chawilaʼ ri e wachbʼal).

⁶ Paneʼ jun qachalal kʼi chi junabʼ umajim upatanixik ri Jehová pero weneʼ are más kukubʼsaj ukʼuʼx chrij ri retaʼmabʼal y kutzukuj ta chi ri utobʼanik ri Jehová (Job 37:23, 24). Rech kqakʼulmaj ta wariʼ rajawaxik kqaya qa tiempo rech kojchoman chrij ri unojibʼal ri Jehová y ri nimalaj u poder (Is. 40:22; 55:8, 9). Wariʼ kojutoʼo rech kqabʼan ta nim che qibʼ y che kqanaʼtaj chqe che ri qanojibʼal kjunamataj ta rukʼ rech ri Jehová.

7. ¿Jas xubʼan ri qachalal Rahela rech xubʼan aceptar ri xbʼix pa ri Informe 8?

⁷ Ri xtoʼw ri qachalal Rahela che kel pa Eslovenia are uchomaxik che are ri Jehová bʼanowinaq ronojel. Ri are kubʼij: «Kʼax nubʼanom che ubʼanik aceptar jujun taq jastaq che kʼexom pa ri utinamit ri Jehová. Jun chke wariʼ are ri xbʼix pa ri Informe 8 chrij ri ismachiʼ, ri nabʼe mul che xinwil jun qachalal che tajin kuya jun discurso y kʼo rismachiʼ qas ta utz xinwilo. Rumal laʼ xinbʼan orar che ri Jehová rech kinutoʼo y kinbʼan aceptar wariʼ». Je wariʼ ri qachalal Rahela xrilo che ri Jehová qas retaʼm kukʼam ubʼe ri utinamit rumal che are ri Bʼanol re ronojel. Y ri at we kʼax kabʼan che ubʼanik aceptar ri tajin kkʼextaj pa ri utinamit ri Jehová utz che katchoman chrij ri unojibʼal y ri nimalaj u poder ri Jehová rumal che are xbʼanow ronojel (Rom. 11:33-36).

¿JASCHE RI JEHOVÁ UYAʼOM BʼE CHE KʼO KʼAX?

8. ¿Jas utzilal uyaʼom chqe retaʼmaxik ri rumal che ri Jehová uyaʼom bʼe che kʼo kʼax?

⁸ Rumal che jujun winaq ketaʼm taj jasche kʼo kʼaxkʼolil, kpe koyowal chrij ri Dios o kkikoj taj che kʼo Dios (Prov. 19:3). Are kʼu ri oj qetaʼm che umak ta ri Jehová che tajin kqariq kʼax kamik, xaneʼ rumal che ri Adan y Eva xeniman ta che ri Dios y rumal che oj ajmakibʼ. Xuqujeʼ qetaʼmam che rumal ri u paciencia ri Jehová e kʼi winaq tajin kkichʼobʼ uwach y tajin kketaʼmaj che ri Jehová kusach na uwach ri kʼaxkʼolil (2 Ped. 3:9, 15). Wariʼ ukubʼsam qakʼuʼx y más tajin kqachʼobʼ uwach ri Jehová.

9. ¿Jampaʼ utz knaʼtaj chqe ri rumal che ri Jehová uyaʼom bʼe che kʼo kʼaxkʼolil?

⁹ Qetaʼm che ri Jehová kresaj na ri kʼaxkʼolil, pero rajawaxik kkʼojiʼ qa paciencia. Pero are chiʼ kbʼan kʼax chqe, kkam jun qa familiar o kuriq kʼax jun qamigo weneʼ kqachomaj jasche ri Jehová majaʼ kresaj ri kʼax (Hab. 1:2, 3). Utz che are chiʼ tajin kkʼulmataj wariʼ kojchoman chrij ri rumal che ri Jehová tajin kuya bʼe che kqariq kʼax (Sal. 34:19).a Y utz che ksach ta chqe che ri Jehová qas kraj kusach uwach ri kʼax.

10. ¿Jas xtoʼw ri qachalal Anne are chiʼ xkam ri unan?

¹⁰ Kojkunik kqachʼij ri kʼax rumal che qetaʼm ri rumal che ri Dios tajin kuya bʼe che kʼo kʼaxkʼolil. Ri qachalal Anne, che kel pa ri isla re Mayotte, pa ri océano Índico, kubʼij: «Sibʼalaj xinbʼisonik are chiʼ xkam ri nunan. Pero knaʼtaj chwe che umak ta ri Jehová che kqariq kʼax xaneʼ kraj kusach uwach ri kʼax y keʼuwalajisaj ri kaminaqibʼ. Y are chiʼ kinchoman chrij wariʼ kubʼano che kinbʼison ta chi más».

11. ¿Jas kqaya ta kan ubʼanik rumal che qetaʼm jasche ri Dios tajin kuya bʼe che kʼo kʼax?

¹¹ Retaʼmaxik jasche ri Dios uyaʼom bʼe che kʼo kʼax y che rukʼ paciencia tajin kreyeʼj che ri winaq kkibʼan arrepentir kibʼ rech jeriʼ kekam taj kubʼano che ri oj kqaya ta kan ubʼanik predicar. Rumal laʼ ri Pedro xubʼij wariʼ: «¡Sibʼalaj rajawaxik chi kixbʼin pa jun tastalik ikʼaslemal xuqujeʼ kixniman che ri Dios!» (2 Ped. 3:11) Y are chiʼ kqabʼan predicar kqakʼutu che tajin kojniman che ri Dios. Junam rukʼ ri Jehová oj keqaloqʼoqʼej ri winaq y kqaj taj che kekamik, xaneʼ kqaj che kkiriq jun kʼaslemal kʼo ta ukʼisik. Y rumal ri u paciencia ri Jehová ri oj kojkunik keqatoʼ ri winaq rech kkichʼobʼ uwach y jeriʼ kekunik kkinimaj (1 Cor. 3:9).

OJ KʼO PA RI «KʼISBʼAL TAQ QʼIJOL»

12. ¿Jas kojutoʼ wi retaʼmaxik che oj kʼo pa ri «kʼisbʼal taq qʼijol»?

¹² Ri Biblia kubʼij jas kkibʼan na ri winaq pa ri «kʼisbʼal taq qʼijol» (2 Tim. 3:1-5). Are chiʼ kqilo che ri uwach Ulew nojinaq chke itzel taq winaq kojkunik kqilo che wajun profecía riʼ tajin ktzʼaqatik. Y wariʼ kubʼano che más kqakubʼsaj qakʼuʼx chrij ri kubʼij ri Biblia (2 Tim. 3:13-15).

13. ¿Jas preguntas utz kojchoman chrij? (Lucas 12:15-21).

¹³ Retaʼmaxik che oj kʼo pa ri kʼisbʼal taq qʼij kubʼano che más kqakoj qachuqʼabʼ che upatanixik ri Jehová. Rumal laʼ ri Jesús xubʼij che rajawaxik utz kqabʼan che ukojik ri qa tiempo junam rukʼ ri kubʼij pa Lucas 12:15-21 (chasikʼij). ¿Jasche kbʼixik che ri qʼinom achi kʼo ta unojibʼal? Rumal che are más tajin «kukʼol uqʼinomal chbʼil ribʼ» pero «qʼinom ta chuwach ri Dios». ¿Jasche rajawaxik utz kubʼan che ukojik ri tiempo? Rumal che ri Dios xubʼij che: «Pa wajun chaqʼabʼ kelesax na ri akʼaslemal». ¿Jas kqetaʼmaj chrij wariʼ? Rumal che naqaj chi kʼo wi ri kʼisbʼalil utz che kojchoman chrij ri preguntas riʼ: «¿La kinkʼut rukʼ ri kinchaʼ ubʼanik pa ri nukʼaslemal che are más nim kinwil wi upatanixik ri Jehová? ¿La tajin kentoʼ ri walkʼwal rech kkipatanij más ri Jehová? ¿La are tajin kinkoj más nu tiempo, nuchuqʼabʼ y nupwaq che upatanixik ri Jehová, o are tajin kinkoj más nu tiempo rech kinqʼinomar más?».

14. ¿Jasche utz che kojchoman chrij ri kʼisbʼal taq qʼij junam rukʼ ri xubʼan ri qachalal Miki?

¹⁴ Are chiʼ kqakojo che oj kʼo pa ri kʼisbʼal taq qʼij kojutoʼo rech are kqachaʼ upatanixik más ri Jehová. Y are laʼ ri xubʼan ri qachalal Miki. Ri areʼ xubʼij: «Are chiʼ xinbʼan graduar wibʼ xwaj xinbʼe pa ri universidad rech kwetaʼmaj más chkij ri e chikop (Zoología). Pero xuqujeʼ kwaj kinmajij ri precursorado regular y kinbʼe pa jun lugar jawiʼ kajwataj wi tobʼanik. Jujun qachalal xkibʼij chwe che qas kinchomaj na we kinkunik kinbʼe pa ri universidad y kinbʼan ri precursorado. Xkinaʼtasaj chwe che naqaj chi kʼo wi ri kʼisbʼalil y we kwaj kwetaʼmaj chkij ri e chikop, pa ri kʼakʼ uwach Ulew kkʼojiʼ na kʼi nu tiempo rech kinbʼan wariʼ. Rumal laʼ xinbʼe pa jun escuela rech kwetaʼmaj ubʼanik jujun chak. Y rukʼ waʼ xinriq jun chak che kuya tiempo chwe kinbʼan ri precursorado. Y xinbʼe pa Ecuador jawiʼ kajwataj wi más tobʼanik che utzijoxik ri Utzij ri Dios». Kamik ri qachalal y ri rachajil e solinelabʼ re circuito pa Ecuador.

15. ¿Jas kqetaʼmaj chrij ri Santiago? (Xuqujeʼ chawilaʼ ri e wachbʼal).

¹⁵ Mubʼan kebʼ qakʼuʼx are chiʼ ri winaq kojkitatabʼej taj. Chnaʼtaj chqe che ri winaq kkʼextaj ri kikʼaslemal y weneʼ kojkitatabʼej na. Chojchoman chrij ri rachalal ri Jesús ubʼiʼ Santiago che junam xkʼiy rukʼ ri Jesús, xrilo are chiʼ xux Mesías y che kʼo ta kjunamataj rukʼ ri kubʼan che utzijoxik ri utzij ri Dios. Pero ri Santiago aninaq taj xkojon chrij ri Jesús. Ri Santiago kʼateʼ xux discípulo are chiʼ xkʼastajisax ri Jesús. Y qas xukoj uchuqʼabʼ che upatanixik ri Dios (Juan 7:5; Gál. 2:9).b Rumal laʼ mubʼan kebʼ qakʼuʼx y maqachomaj che ri qa familiares y ri e winaq kkaj taj kketaʼmaj chrij ri Jehová. Chnaʼtaj chqe che oj kʼo pa ri kʼisbʼal taq qʼij. Rumal laʼ rajawaxik kqaya ta kan ubʼanik predicar rumal che weneʼ ri winaq kʼateʼ kkaj kketaʼmaj chrij ri Jehová are chiʼ kkilo che ya kumajij ri nimalaj kʼaxkʼolil.c

AMAQʼEL CHQAMALTYOXIJ CHE RI JEHOVÁ KUNAʼTASAJ CHQE RI QETAʼMAM CHIK

16. ¿Jas utzilal ariqom rumal che ri Jehová kunaʼtasaj chawe ri awetaʼmam chik? (Xuqujeʼ chawilaʼ ri recuadro «Chakʼutuʼ chkiwach ri nikʼaj chik»).

¹⁶ Kʼi chke ri información e bʼanom chke ri winaq che majaʼ kketaʼmaj uwach ri Jehová. Junam rukʼ ri chʼabʼal che kyaʼ pa ri fin de semana, jujun kʼutunem y videos che kel pa jw.org y ri revistas. Pero xuqujeʼ kʼo kqetaʼmaj oj chrij wariʼ, rumal che kubʼano che kqaloqʼoqʼej más ri Jehová, kqakubʼsaj más qakʼuʼx chrij ri Biblia y che utz kqabʼan che ubʼixik ri utzij ri Dios chke ri winaq (Sal. 19:7).

17. ¿Jas tobʼanik kuya chawe ri nabʼe taq jastaq che xawetaʼmaj pa ri Biblia?

¹⁷ Sibʼalaj kojkikotik are chiʼ ri utinamit ri Jehová kuya lo ubʼixik kʼakʼ taq etaʼmanik chqe. Pero xuqujeʼ nim kqil wi ri nabʼe taq jastaq che xqetaʼmaj pa ri Biblia paneʼ kʼi chi junabʼ tajin kqapatanij ri Jehová. Junam rukʼ ri xqil pa wajun kʼutunem riʼ qonojel kʼo más kqetaʼmaj chrij ri ya qetaʼm chik. We kqachʼobʼ taj jasche kʼo kkʼextaj pa ri utinamit ri Jehová, utz taj che kqabʼan nim che qibʼ, xaneʼ chnaʼtaj chqe che ri Jehová areʼ xbʼanow ronojel y che are tajin kkʼamow ubʼe ri utinamit rumal che kʼo nim unojibʼal y u poder. Are chiʼ ri oj o jun qa familia tajin kuriq kʼax utz che kkʼojiʼ qa paciencia y knaʼtaj chqe jasche ri Jehová kuya bʼe che kʼo kʼax. Retaʼmaxik che oj kʼo pa ri kʼisbʼal taq qʼij kojutoʼo rech utz kqabʼan che ukojik ri qa tiempo y ri qapwaq. Amaqʼel chnaʼtaj chqe ri qetaʼm chik rech utz kqachaʼ ubʼanik pa qakʼaslemal y jeriʼ kqaya ta kan upatanixik ri Jehová.