Qas chakojoʼ che ri Jehová ukuyum chi ri amak

1, 2. ¿Jas kubʼan ri Jehová are chiʼ kqabʼan arrepentir qibʼ y jas kqanaʼ rumal wariʼ? (Xuqujeʼ chawilaʼ ri wachbʼal).

RI REY David xbʼisonik rumal che xmakun chuwach ri Jehová (Sal. 40:12; 51:3; encabezamiento). Pero rumal che xubʼan arrepentir ribʼ xkuy umak rumal ri Jehová (2 Sam. 12:13). Ri David sibʼalaj xkikotik are chiʼ xkuy umak (Sal. 32:1).

² Ri oj xuqujeʼ kojkikotik are chiʼ ri Jehová kukuy ri qamak. Paneʼ jun nimalaj mak xqabʼano ri areʼ kukuy ri qamak we kqabʼan arrepentir qibʼ, kqabʼij ri xojmakun wi y kqabʼan ta chi jumul (Prov. 28:13; Hech. 26:20; 1 Juan 1:9). Kukubʼsaj qakʼuʼx retaʼmaxik che knaʼtaj ta chi ri qamak che ri Jehová che xukuyu (Ezeq. 33:16).

3, 4. ¿Jas xunaʼ ri qachalal Jennifer? ¿Jas kqil na pa wajun kʼutunem riʼ?

³ Weneʼ jujun taq mul kqachomaj che ri Jehová ukuyum ta ri qamak. Chqilaʼ ri xukʼulmaj ri qachalal Jennifer. Ri areʼ xretaʼmaj chrij ri Jehová kukʼ ri unan utat, pero are chiʼ xkʼiyik xubʼan itzel taq jastaq y xubʼij ta chke ri unan utat. Are chiʼ qʼaxinaq chi ri tiempo xuya kan ubʼanik ri itzel taq jastaq y xubʼan ri u bautismo. Ri areʼ kubʼij: «Ojer xinqaj pa inmoralidad sexual, kinqʼabʼarik, aninaq kpe woyowal y are más xbʼe nukʼuʼx che utzukuxik pwaq. Paneʼ xinbʼan arrepentir wibʼ y xintaʼ kuybʼal numak che ri Jehová pero pa ri wanimaʼ kinnaʼo che ri Jehová ukuyum ta numak».

⁴ ¿La kʼax kabʼan che ukojik che ri Jehová ukuyum chi ri amak che xabʼan ojer kanoq? Ri Jehová kraj che qas kakojo che ri areʼ ukuyum chi ri amak junam rukʼ ri xubʼan ri David. Pa wajun kʼutunem riʼ kqil na jasche rajawaxik kqakojo che ri Jehová ukuyum chi ri qamak y jas kojtoʼwik rech qas kqakojo.

¿JASCHE RAJAWAXIK KQAKOJO CHE RI JEHOVÁ UKUYUM CHI RI QAMAK?

5. ¿Jas kraj ri Satanás che kqachomaj?

⁵ We qas kqakojo che ri Jehová ukuyum chi ri qamak, ri Satanás kkun ta riʼ kojubʼan engañar. Ri areʼ kutzukuj ri kubʼano rech kqaya kan upatanexik ri Jehová. Jun chke ri kubʼano are che kqachomaj che xqabʼan jun nimalaj mak che kkuyutaj ta chik. Chojchoman chrij ri achi re ri ojer Corinto che xesax bʼi pa ri congregación rumal che xubʼan inmoralidad sexual (1 Cor. 5:1, 5, 13). Are chiʼ xqʼax ri tiempo ri achi xubʼan arrepentir ribʼ, pero ri Satanás kraj taj che ri cristianos kkikuy umak y che kkiya ta bʼe ktzalij pa ri congregación, wet mat xkikuy ri umak ri achi weneʼ xuchomaj riʼ che kkuyutaj ta chi ri umak y ri Satanás qas kkikot riʼ y weneʼ wariʼ kubʼano che ri achi sibʼalaj kbʼisonik y kuya kan upatanexik ri Jehová. Ri Satanás je kubʼan kamik kraj che kqachomaj che ri Jehová kukuy ta ri qamak y kqaya kan upatanexik (2 Cor. 2:5-11).

6. ¿Jas kojtoʼwik rech kqaya kan uchomaxik che kkuyutaj ta ri qamak?

⁶ We qas kqakojo che ri Jehová ukuyum chi ri qamak más ta kojbʼison riʼ. Y kʼo ta kubʼano che kojbʼisonik are chiʼ xojmakunik (Sal. 51:17). Rumal che wariʼ kukʼutu che ri qa conciencia tajin kubʼij chqe che utz ta ri xqabʼano, che rajawaxik kqabʼan arrepentir qibʼ y kqaya kan ubʼanik ri makaj (2 Cor. 7:10, 11). We kqaya ta kan uchomaxik che ri Jehová ukuyum ta ri qamak weneʼ kqaya kan upatanexik, pero we qas kqakojo che ri Jehová ukuyum chi ri qamak rukʼ kikotemal riʼ kqapatanij y kojubʼan ta chi molestar riʼ ri qa conciencia (Col. 1:10, 11; 2 Tim. 1:3). Chanim riʼ chqilaʼ jas ri kojtoʼwik rech qas kqakojo che ri Jehová ukuyum chi ri qamak.

¿JAS KATUTOʼO RECH QAS KAKOJO CHE RI JEHOVÁ UKUYUM CHI RI AMAK?

7, 8. ¿Jas e ubʼantajik ri Jehová kʼolik y jas kojutoʼ wi wariʼ?

⁷ Chatchoman chrij ri e ubʼantajik ri Jehová. Chatchoman chrij ri xubʼij che ri Moisés pa ri juyubʼ Sinaí (chasikiʼj Éxodo 34:6, 7).a Ri Jehová xubʼij che are jun «Dios junalik, xuqujeʼ toqʼobʼisal wachaj». Rukʼ ri e bʼantajik che xubʼij ri Jehová kukʼutu che qas kukuy umak ri winaq che kloqʼoqʼen che y ubʼanom chi arrepentir ribʼ. Wet mat kukuy umak ri winaq che ubʼanom chi arrepentir ribʼ tajin ta kukʼut riʼ che qas kutoqʼobʼisaj kiwach ri winaq.

⁸ Are chiʼ ri Jehová kubʼij che kutoqʼobʼisaj kiwach ri winaq qas kqakoj ri kubʼij rumal che ri areʼ kubʼij ta molom taq tzij (Sal. 31:5). Are chiʼ qas ta kakojo che ri Jehová ukuyum chi ri amak, chnaʼtaj chawe che ri areʼ kutoqʼobʼisaj kiwach ri winaq, kel ukʼuʼx chke y kukuy kimak ri kkibʼan arrepentir kibʼ. Rumal laʼ xuqujeʼ kukuy ri amak at.

9. ¿Jas kubʼij Salmo 32:5 chrij ri kubʼan ri Jehová che ukuyik ri qamak?

⁹ Chatchoman chrij ri kubʼij ri Biblia chrij ri kubʼan ri Jehová che ukuyik makaj. Ri David xubʼij che ri Jehová xeʼukuy ri umak (chasikʼij Salmo 32:5). Pa ri chʼabʼal hebrea ri tzij «ukuyik» xuqujeʼ kraj kubʼij «uyakik» o «ukʼamik bʼik». Rumal laʼ are chiʼ ri Jehová xukuy ri umak ri David jetaneʼ xuyak jun alalaj eqaʼn chrij y xukʼam bʼik. Y wariʼ xubʼano che ri David xkikot chi jumul (Sal. 32:2-4). We rukʼ ronojel qanimaʼ kqabʼan arrepentir qibʼ kqanaʼ riʼ ri xunaʼ ri David. Utz taj che kqukʼaj wi na eqaʼn che ri Jehová ya xukʼam bʼik.

10, 11. ¿Jas kubʼij Salmo 86:5 chrij ri Jehová?

¹⁰ (Chasikʼij Salmo 86:5). Ri David xubʼij wariʼ che ri Jehová: «Lal utz kkuyun kʼu la». Wariʼ kraj kubʼij che ri Jehová aninaq taj kpe royowal are chiʼ kʼo kojsach wi xaneʼ amaqʼel kraj kukuy ri qamak. ¿Jasche je waʼ kubʼan ri Jehová? Ri versículo kubʼij chik: «Nim ri loqʼoqʼebʼal kʼuʼx la chke ri kenaʼtan la». Junam rukʼ ri xqil pa ri jun kʼutunem kanoq, ri uloqʼoqʼebʼal ri Jehová chke ri upatanelabʼ sibʼalaj nim y ksach ta uwach. Rumal laʼ kukuy kimak ri kkibʼan arrepentir kibʼ (Is. 55:7). We kʼax kabʼan che ukojik che ri Jehová ukuyum chi ri amak che xabʼan ojer kanoq pero kakojo che ukuyum ri kimak ri nikʼaj chik, qas chakojoʼ che xuqujeʼ ukuyum chi ri awech at.

¹¹ Y ri Biblia kubʼij che ri Jehová retaʼm che xaq oj ulew y che oj ajmakibʼ, wariʼ kukubʼsaj qakʼuʼx (Sal. 139:1, 2). Chqetaʼmaj más chrij wariʼ pa jun chi salmo che kojutoʼo rech qas kqakojo che ri Jehová kraj kukuy qamak.

¿JAS RETAʼM RI JEHOVÁ?

12, 13. Junam rukʼ ri kubʼij Salmo 103:14, ¿jas retaʼm ri Jehová y jas kraj kubʼano?

¹² (Chasikʼij Salmo 103:14). Ri David xubʼij che ri Jehová «qas retaʼm chi oj pukʼukʼ ulew». Rukʼ ri xubʼij ri David kukʼutu che ri Jehová retaʼm che oj ajmakibʼ y rumal laʼ kraj kukuy ri qamak we kqabʼan arrepentir qibʼ. Chqilaʼ jas más kubʼij wajun versículo riʼ.

¹³ Ri David xubʼij, che ri Jehová «retaʼm jas xkoj che qabʼanik». Ri Jehová xubʼan ri Adán rukʼ ulew y rumal laʼ retaʼm che rajawaxik kewaʼik, kewarik y keʼuxlabʼik rech kekʼasik (Gén. 2:7). Y ri oj xuqujeʼ rukʼ ulew xojbʼan wi, pero xaq xiw ta rajawaxik kojwaʼik, kojwarik y kojuxlabʼik junam rukʼ ri Adán rumal che ri oj oj ajmakibʼ chik are chiʼ kojkʼojik. Y ri David xubʼij, che ri Jehová retaʼm che oj ajmakibʼ y ksach ta wariʼ pa ujolom. Rumal laʼ kʼi kojsach wi pero ri Jehová kukuy qamak are chiʼ kqabʼan arrepentir qibʼ (Sal. 78:38, 39).

14. a) Junam rukʼ kubʼij Salmo 103:12, ¿jas kubʼan ri Jehová che ukuyik qamak? b) ¿Jas kqetaʼmaj chrij ri xubʼan ri Jehová che ukuyik umak ri David? (Chawilaʼ ri recuadro «Ri Jehová kkuyunik y knaʼtaj ta chi che»).

¹⁴ ¿Jas más kqetaʼmaj pa ri Salmo 103 chrij ri kubʼan ri Jehová che ukuyik makaj? (Chasikʼij Salmo 103:12). Ri David xubʼij che ri Jehová kunajtajisaj ri qamak chqe «jachaʼ unajtajisam ri elebʼal qʼij rukʼ ri uqajebʼal qʼij». Y qetaʼm che ri elebʼal qʼij rukʼ ri uqajebʼal qʼij sibʼalaj naj kixoʼl. ¿Jas kqetaʼmaj chrij wariʼ? Jun wuj che kchʼaw chrij wajun versículo riʼ kubʼij che ri Dios naj kukʼam wi bʼi ri qamak. Knaʼtaj ta chi che y kojukʼajisaj ta rumal ri qamak (Ezeq. 18:21, 22; Hech. 3:19).

15. ¿Jas kqabʼano we kojbʼison na rumal jun mak che xqabʼan ojer kanoq?

¹⁵ We katbʼison na rumal jun mak che xabʼan ojer kanoq chasikʼij Salmo 103, wariʼ katutoʼo rech qas kakojo che ri Dios ukuyum chi ri amak. Ri Jehová retaʼm che at ajmak pero ri areʼ xukuy amak rumal che xabʼan arrepentir awibʼ y knaʼtaj ta chi che ri xabʼano ni kukʼajisaj ta awach rumal ri amak. Rumal laʼ machomaj che ri Jehová ukuyum ta ri amak. We ri Jehová kchoman ta chi chrij ri amak utz taj che ri at xaq are wi katchoman na chrij (Sal. 130:3). We qas kakojo che ri Jehová ukuyum chi ri amak, katbʼison ta chi riʼ y katchoman ta chi riʼ chrij ri xabʼan kanoq.

16. ¿Jasche utz taj che xaq katchoman chrij ri xabʼan ojer kanoq? (Xuqujeʼ chawilaʼ ri wachbʼal).

¹⁶ Chojchoman chrij jun winaq che kubʼinisaj jun carro, we xaq xiw pa ri retrovisor kkaʼy wi y kril ta ri ubʼe weneʼ kuriq kʼax riʼ. Utz che xa kuriq na kkaʼy pa ri retrovisor y are más kril ri ubʼe. Xa junam rukʼ, we xa kuriq na katchoman chrij ri xatsach wi nabʼe kanoq wariʼ katutoʼo rech katqaj ta chi jumul chupam. Pero we xaq xiw katchoman chrij ri amak katkikot ta chi riʼ che upatanexik ri Jehová. Rumal laʼ are más chatchoman chrij ri kʼaslemal pa ri kʼakʼ uwach Ulew jawiʼ kʼo ta chi makaj (Is. 65:17; Prov. 4:25).

QAS CHAKOJOʼ CHE RI JEHOVÁ UKUYUM CHI RI AMAK

17. ¿Jasche rajawaxik qas kqakojo che oj loqʼ chuwach ri Jehová y che kukuy ri qamak?

¹⁷ Qonojel rajawaxik qas kqakojo che ri Jehová kojraj y amaqʼel kukuy ri qamak (1 Juan 3:19). Rumal che ri Satanás kraj che kqachomaj che ri Jehová kojraj taj y che kukuy ta ri qamak. Rumal che naj ta chi tiempo kʼaslik kraj che e kʼi kkiya kan upatanexik ri Jehová (Apoc. 12:12). ¡Pero chqakojoʼ qachuqʼabʼ chuwach ri Satanás y maqayaʼ kan upatanexik ri Jehová!

18. ¿Jas katkunik kabʼano rech qas kakojo che at loqʼ chuwach ri Jehová y che ukuyum chi ri amak?

¹⁸ Pa ri jun kʼutunem kanoq xawetaʼmaj ri rajawaxik kabʼano rech qas kakojo che ri Jehová katraj. Y pa wajun kʼutunem chik xawetaʼmaj ri rajawaxik kabʼano rech qas kakojo che ri Jehová ukuyum chi ri amak. Chatchoman chrij ri kubʼij ri Biblia chrij ri e ubʼantajik ri Jehová y ri kubʼan che ukuyik ri qamak. Ri areʼ ksach ta pa ujolom che at ajmak y amaqʼel kutoqʼobʼisaj awach. Y masach chawe che ri Dios qas kukuy ri amak. We kabʼan wariʼ qas katkun riʼ kabʼij na awe junam rukʼ ri xubʼij ri David: «¡Maltyox Jehová, rumal che kakuy ri numak!» (Sal. 32:5).