Ri qʼatal taq tzij kkibʼij che weneʼ ya kkʼulmataj ri Armagedón | ¿Jas kubʼij ri Biblia chrij wariʼ?

Ri lunes aqʼabʼil 10 re octubre 2022, kʼi taq misiles che xukʼaq bʼi Rusia xubʼan kʼax che Ucrania. Wariʼ xkʼulmatajik rumal che kebʼ qʼij kanoq jun bomba xubʼan kʼax che jun qʼaʼm che kukoj Rusia rech kopan pa Crimea. Are chiʼ majaʼ kkʼulmataj wariʼ jujun chke ri qʼatal taq tzij kibʼim chik che naqaj chi kʼo wi ri Armagedón.

• «Xaq xiw pa taq ri uqʼij ri Kennedy [qʼatal tzij re Estados Unidos] y ri chʼoj che xbʼan pa Cuba, xilik che xa jubʼiqʼ xraj che xumaj ri Armagedón. [...] In kinchomaj che we kkoj ri bombas nucleares kmajtaj riʼ ri Armagedón» (Joe Biden qʼatal tzij re Estados Unidos, 6 re octubre 2022).

• «Qastzij ri kbʼixik che wariʼ are ri Armagedón; kkiriq kʼax ri winaq rumal» (xuya ubʼixik Volodímir Zelenski, qʼatal tzij re Ucrania, are chiʼ xtaʼ che jas kuchomaj chrij ukojik ri bombas nucleares, BBC News, 8 re octubre 2022).

¿La qastzij kkʼulmataj ri Armagedón rumal ukojik bombas nucleares? ¿Jas kubʼij ri Biblia chrij wariʼ?

¿La rumal ri bombas nucleares kkʼulmataj ri Armagedón?

No. Ri tzij Armagedón o «chʼoj re ri nimalaj uqʼij ri Dios» xa jumul kyaʼ ubʼixik pa ri Biblia pa Apocalipsis 16:16. Y are ta kchʼaw chrij chʼoj chkixoʼl ri tinamit, xaneʼ are ri nimalaj chʼoj che kubʼan na ri Dios «kukʼ ri ajawinelabʼ re ronojel ri uwach ulew» (Apocalipsis 16:14). Ri Dios kukoj na ri Armagedón o ri nimalaj chʼoj che usachisaxik kiwach konojel ri qʼatal taq tzij (Daniel 2:44).

Rech kawetaʼmaj más chrij ri Armagedón, chawilaʼ ri kʼutunem «¿Jas riʼ ri Armagedón?».

¿La ksach uwach ri uwach Ulew y ri e winaq rumal jun bomba nuclear?

No. Weneʼ ri qʼatal taq tzij kkikoj na bombas nucleares pa ri petinaq, are kʼu ri Dios kuya ta bʼe che kkisachisaj ri uwach Ulew. Ri Biblia kubʼij wariʼ:

• «Ri uwach ulew mawi jubʼiqʼ kkʼextajik» (Eclesiastés 1:4).

• «Ri e utzalaj taq winaq kkechbʼej na ri ulew kejeqiʼ kʼu na chuwach chbʼe qʼij saq» (Salmo 37:29).

Are kʼu ri profecías che kʼo pa ri Biblia y ri tajin kkʼulmataj cho ri uwach Ulew kukʼutu che oj kʼo pa ri kʼisbʼal taq qʼij (Mateo 24:3-7; 2 Timoteo 3:1-5). Chawetaʼmaj ri kubʼij ri Biblia chrij ri kkʼulmataj na pa ri petinaq pa jun etaʼmanik re ri Biblia che tojom taj.