¿La kkun ri Biblia che nutoʼik we kwaj ta chik kinkʼasiʼk y che kwaj kinkamisaj wibʼ?

Ri kuya ubʼixik ri Biblia

Jeʼ kkunik katutoʼo, rumal che ri Biblia are ri uTzij ri Dios y ri areʼ kukubʼsaj kikʼuʼx ri kebʼisonik (2 Corintios 7:6). Paneʼ are ta jun wuj che ktzijon chrij ri kichak e kunanel, are kʼu ri Biblia e utoʼm kʼi winaq che kkaj kkikamisaj kibʼ. Ri e pixabʼ che kʼo chupam xuqujeʼ kkunik katutoʼo.

• ¿Jas pixabʼ kuya ri Biblia chqe?

• ¿La kchʼaw ri Biblia chkij e winaq che xkaj xekamik?

• ¿Jas textos rech ri Biblia katutoʼo rech kakamisaj ta awibʼ?

• ¿Jas kqabʼano we jun qachiʼl kubʼij chqe che kraj ta chik kkʼasiʼk?

• ¿Y we nabʼe kanoq xwaj xinkamisaj wibʼ?

¿Jas pixabʼ kuya ri Biblia chqe?

• ● Chabʼij ri kanaʼo.

  Ri kuya ubʼixik ri Biblia: «Jun achiʼl amaqʼel kel ukʼuʼx, pa taq kʼu ri qʼijol re riqoj kʼax jachaʼ jun achalalaxik» (Proverbios 17:17).

  Ri kraj kubʼij: Are chiʼ kojbʼisonik, kajwataj tobʼanik chqe.

  We kabʼij ta che jun chik ri kanaʼo, kariq más kʼax. Are kʼu, we kabʼij che jun chik ri kanaʼo, kel ri bʼis chawe y katutoʼ che usukʼumaxik ri achomanik.

  

  Chabʼanaʼ wariʼ: Chattzijon rukʼ jun chik, weneʼ rukʼ jun afamiliar o jun awachiʼl che kakubʼsaj akʼuʼx chrij.a Xuqujeʼ, katkunik katzʼibʼaj chuwach jun wuj ri kanaʼo.

• ● Chatzukuj utobʼanik jun winaq che kʼo nim retaʼmabʼal

  Ri kuya ubʼixik ri Biblia: «Ri winaq ri e utz man rajawaxik ta kunal kech, xaneʼ ri kʼo yabʼil chke» (Mateo 9:12).

  Ri kraj kubʼij: Are chiʼ oj yawabʼ, kajwataj jun kunanel chqe.

  Are chiʼ jun winaq kraj kukamisaj ribʼ weneʼ rumal che kʼo yabʼil pa ri ujolom o xa kbʼisonik. Are chiʼ kʼo jun yabʼil chqe kojkʼix ta che ubʼixik, rajawaxik je kqabʼano chiʼ kʼo jun yabʼil pa qajolom o kojbʼisonik. Waʼ taq yabʼil riʼ kʼo ukunabʼalil.

  Chabʼanaʼ wariʼ: Chatzukuj utobʼanik jun kunanel che nim retaʼmabʼal.

• ● Chnaʼtaj chawe che nim abʼanik chuwach ri Dios.

  Ri kuya ubʼixik ri Biblia: «¿La mata kebʼ alaj taq pwaq ri xa jubʼiqʼ kajil kekʼayix wi jobʼ chiʼochiʼ? Man kʼo ta kʼu jun chke kasach ta pa ri ujolom ri Dios [...]. Mixeʼj bʼaʼ iwibʼ, are nim na iqʼij chkiwach kʼi chiʼochiʼ» (Lucas 12:6, 7).

  Ri kraj kubʼij: Ri Dios sibʼalaj nim katril wi.

  Weneʼ kanaʼo che xaq atukel at kʼolik, are kʼu xaq ta atukel. Ri Dios retaʼm ri tajin kakʼulmaj. Paneʼ kawaj ta chik katkʼasiʼk, ri Dios qas kel ukʼuʼx chawe. Ri Salmo 51:17 kubʼij che ri Dios kuxutuj ta jun «animaʼaj ri kʼajim». Wariʼ kukʼutu che ri Dios sibʼalaj katuloqʼoqʼej y che kraj taj katkamik.

  Chabʼanaʼ wariʼ: Chatzukuj tobʼanik pa ri Biblia y chawilaʼ che ri Dios qastzij katraj. Jun kʼutbʼal, pa ri capítulo 24 re ri wuj Acerquémonos a Jehová kariq jujun taq tobʼanik.

• ● Chabʼanaʼ achʼawem che ri Dios.

  Ri kuya ubʼixik ri Biblia: «Ronojel ri kixok wi il, chiyaʼ pa uqʼabʼ ri Dios. Ri areʼ kʼut kixuchajij» (1 Pedro 5:7).

  Ri kraj kubʼij: Ri Dios kraj che ri at kabʼij che ri kanaʼo y ri kabʼisoj.

  Ri Dios kuyaʼ jamaril pa ri awanimaʼ y kuya achuqʼabʼ rech kachʼij ri bʼis (Filipenses 4:6, 7, 13). Xuqujeʼ keʼutoʼ ri keqebʼ rukʼ (Salmo 55:22).

  

  Chabʼanaʼ wariʼ: Kimik, chabʼanaʼ achʼawem che ri Dios. Chakojoʼ ri ubʼiʼ, Jehová, y chabʼij che ri kanaʼo (Salmo 83:18). Chataʼ che, che katutoʼ chuwach ri bʼis.

• ● Chatchoman chrij ri eyebʼal che kʼo pa ri Biblia chrij ri petinaq.

  Ri kuya ubʼixik ri Biblia: «Ko takʼalik je jas ri katakʼabʼan jun nim jukubʼ, kuyaʼ kkubʼiʼ qakʼuʼx chrij» (Hebreos 6:19).

  Ri kraj kubʼij: Ri bʼis che kanaʼo kubʼan kʼax chawe, junam rukʼ jun kaqiqʼ jabʼ che kubʼan kʼax che jun barco. Are kʼu ri eyebʼal che kʼo pa ri Biblia katutoʼo rech kachʼij ri kʼax.

  Ri eyebʼal riʼ are qastzij, rumal che are ri Dios kbʼinik che kusachisaj na apachike kʼax che kuya bʼis chqe (Apocalipsis 21:4).

  Chabʼanaʼ wariʼ: Chawetaʼmaj más chrij ri eyebʼal che kubʼij ri Biblia pa ri kʼutunem 5 re ri folleto Kbʼix utz jastaq rech ri Ajawaxel.

• ● Chabʼanaʼ ri utz kawilo.

  Ri kuya ubʼixik ri Biblia: «Utzalaj kunabʼal ri animaʼaj ri kakikotik, are kʼu ri animaʼaj ri kbʼisonik kuqʼip chuqʼabʼ» (Proverbios 17:22).

  Ri kraj kubʼij: We kqabʼan jastaq che utz kqilo kojutoʼ chuwach ri kqanaʼo y kojbʼison ta más.

  

  Chabʼanaʼ wariʼ: Chabʼanaʼ ri utz kawilo. Jun kʼutbʼal chata música che kuya kikotemal chawe, chasikʼij jun wuj o chatzukuj jun etzʼanem che kuya achuqʼabʼ. Xuqujeʼ sibʼalaj katkikot riʼ we katoʼ e nikʼaj chik, paneʼ nim ta ri tobʼanik che kayaʼo (Hechos 20:35).

• ● Chachajij ri akʼaslemal.

  Ri kuya ubʼixik ri Biblia: «Ri ukojik qachuqʼabʼ rukʼ ri qacuerpo xaq jubʼiqʼ kojutoʼ wi» (1 Timoteo 4:8).

  Ri kraj kubʼij: We kabʼan ejercicio, katwar ri horas che rajawaxik y utz ri awa katijo nim katutoʼ wi.

  Chabʼanaʼ wariʼ: Jat pa bʼinem paneʼ xa 15 minutos.

• ● Chnaʼtaj chawe che ri kanaʼo y ri kkʼulmataj pa ri akʼaslemal kkʼextajik.

  Ri kuya ubʼixik ri Biblia: «Man iwetaʼm ta kʼu ri chweʼq, jas kel wi na ri ikʼaslemal» (Santiago 4:14).

  Ri kraj kubʼij: Ri kʼax che kuya bʼis chqe kimik y ri kqachomaj che kʼo ta kojtoʼw chuwach, ksach na are chiʼ kqʼax ri tiempo.

  Paneʼ sibʼalaj kʼax ri tajin kakʼulmaj kimik, are kʼu weneʼ kkʼextaj chweʼq. Rumal laʼ kkʼistaj ta akʼuʼx (2 Corintios 4:8). Ri kʼax che kakʼulmaj ksach na rukʼ ri tiempo, are kʼu kʼo ta nijun winaq kkunik kutzalij ri akʼaslemal we kakamisaj awibʼ.

  Chabʼanaʼ wariʼ: Chasikʼij e kʼutbʼal pa ri Biblia kech e winaq che xubʼan kebʼ kikʼuʼx y che xkaj xekamik. Chawetaʼmaj chrij ri xetoʼwik. Chawilaʼ jujun kʼutbʼal.

¿La kchʼaw ri Biblia chkij e winaq che xkaj xekamik?

Jeʼ. Ri Biblia kchʼaw chkij jujun taq winaq che xkaj xekamik. Ri Dios xpe ta royowal kukʼ, xaneʼ xeʼutoʼo. Y jeʼ kubʼan che atoʼik.

Elías

• ● ¿Jachin laʼ ri Elías? Are jun qʼaxal tzij che kʼo ukojonik, kʼo jujun mul che sibʼalaj xbʼisonik. Santiago 5:17 kubʼij che ri Elías «are jun achi junam ubʼanik qukʼ oj».

• ● ¿Jasche xraj xkamik? Kʼo jun tiempo, che ri Elías xunaʼo che xaq utukel kʼolik, xuxiʼj ribʼ y xunaʼo che kʼo ta upatan. Rumal laʼ xubʼij wariʼ che ri Dios: «Ajawaxel chesaj la ri nukʼaslemal» (1 Reyes 19:4).

• ● ¿Jas xtoʼwik? Ri Elías rukʼ ronojel ranimaʼ xubʼij che ri Dios ri kunaʼo. ¿Jas xubʼan ri Jehová che utoʼik? Ri Jehová xukʼut chuwach ri Elías ri nimalaj uchuqʼabʼ y xukʼut chuwach che sibʼalaj kel ukʼuʼx che. Xuqujeʼ che nim ubʼanik chuwach y xuya jun tobʼanel rech kchajixik.

• ▸ Chasikʼij más chrij ri Elías: 1 Reyes 19:2-18.

Job

• ● ¿Jachin laʼ ri Job? Are jun qʼinomalaj achi che kʼo jun nimalaj ufamilia xuqujeʼ xux jun sukʼalaj upataninel ri qastzij Dios.

• ● ¿Jasche xraj xkamik? Xaq kʼateʼ ri Job xuriq kʼax pa ri ukʼaslemal. Xsach ri uqʼinomal, xekam konojel ri ralkʼwal y xuriq jun kʼaxalaj yabʼil. Xuqujeʼ xbʼix che, che are ajmak che ri kʼax che tajin kukʼulmaj. Ri Job sibʼalaj xbʼisonik y rumal laʼ xubʼij: «Man kinwaj taj kintaqej kʼaslem» (Job 7:16).

• ● ¿Jas xtoʼwik? Ri Job xubʼan uchʼawem che ri Jehová xuqujeʼ xtzijon kukʼ nikʼaj chi winaq (Job 10:1-3). Xkubʼsax ukʼuʼx rumal jun utzalaj rachiʼl, ri Elihú, y xukʼut chuwach che are ta ajmak che ri tajin kukʼulmaj. Are kʼu ri más nim ubʼanik are che ri Job xuya bʼe che xtoʼ rumal ri Dios.

• ▸ Chasikʼij más chrij ri Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moisés

• ● ¿Jachin laʼ ri Moisés? Ri areʼ xux ajkʼamal bʼe re ri tinamit Israel xuqujeʼ xux jun sukʼalaj profeta.

• ● ¿Jasche xraj xkamik? Ri Moisés xubʼan jun nimalaj chak, xbʼan chʼachʼatem chrij y wariʼ xubʼano che xqʼitajik. Rumal laʼ xubʼij che ri Dios: «Utz na chi kesaj la ri nukʼaslemal» (Números 11:11, 15).

• ● ¿Jas xtoʼwik? Ri Moisés xubʼij che ri Dios ri kunaʼo. Rumal laʼ xyaʼ tobʼanik che rech kkos ta rukʼ ri uchak.

• ▸ Chasikʼij más chrij ri Moisés: Números 11:4-6, 10-17.