¿La umak ri pwaq ronojel ri kʼax che kqariqo?

Ri kubʼij ri Biblia

Umak taj. Ri Biblia kubʼij taj che ri pwaq are ajmak che ronojel ri kʼax che kqariqo. Kʼo jun tzij che kkibʼij ri e winaq «Umak ri pwaq kqariq k’i taq kʼax», y ri winaq kkichomaj che ri tzij riʼ pa ri Bibia esam wi. Are kʼu, ¿la qastzij wariʼ? Qastzij taj. Xaneʼ ri Biblia kubʼij wariʼ: «Rukʼ ri uloqʼoqʼexik ri pwaq kkʼiy wi uloq ronojel etzelal» (1 Timoteo 6:10).a

¿Jas kubʼij ri Biblia chrij ri pwaq?

Ri Biblia kubʼij che we utz kqabʼan che ukojik ri pwaq are kux jun «tobʼal ibʼ» chqe chuwach ri kʼax (Eclesiastés 7:12). Xuqujeʼ pa ri Biblia kubʼij utz taq tzij chkij ri e winaq che kesipanik y che kkikoj ri kipwaq che kitoʼik nikʼaj chik (Proverbios 11:25).

Are kʼu ri Biblia, kunaʼtajisaj, che are ta ri pwaq ri más nim ubʼanik pa ri qakʼaslemal. Pa Hebreos 13:5 kubʼij: «Miloqʼoqʼej ri pwaq, chubʼanaʼ chiwe ri kʼo iwukʼ». ¿Jas kqetaʼmaj chrij? Che ri pwaq kʼo upatan, are kʼu are ta kux nim upatan pa ri qakʼaslemal. Ri rajawaxik chqe are che kojkikot rukʼ ri jastaq che kajwatajik, junam rukʼ ri kqatijo, ri qatzʼyaq xuqujeʼ jun qachoch (1 Timoteo 6:8).

**¿Jasche kuya kʼax we kqaloqʼoqʼej más ri pwaq?**

Ri winaq che kkirayij más pwaq kkiriq ta ri kʼaslemal che kʼo ta ukʼisik (Efesios 5:5). Nabʼe, Rumal che urayixik más ri pwaq are junam rukʼ ri uyaʼik uqʼij jun tyox (Colosenses 3:5). Ukabʼ, ri e winaq che kkirayij más pwaq kkibʼan jastaq che utz taj rech kkʼojiʼ más kirajil. Rumal laʼ Proverbios 28:20 kubʼij che «jachin sibʼalaj kurayij ri qʼinomal man kkanaj ta kanoq chi mata kkʼajisax uwach». Weneʼ kkaj kkibʼan jun jastaq che utz taj junam rukʼ usubʼik jun winaq, kkita pwaq chke e nikʼaj chik rech kkibʼan ta kʼax chke o weneʼ ketobʼan che ukamisaxik jun winaq o che ukʼamik bʼik jun winaq rech kkichʼak pwaq chrij.

Y, weneʼ kqabʼan ta jun jastaq che utz taj, are kʼu ri uloqʼoqʼexik ri pwaq kuya kʼax chqe. Ri Biblia kubʼij: «Ri kkaj keqʼinomarik, are riʼ ketaqchiʼx pa mak, ketzaq chupam. Ketzaq pa chapbʼal, pa kʼi konalaj taq rayinik ri kkibʼan kʼax» (1 Timoteo 6:9).

Ri utzilal che kqariqo are chiʼ kqanimaj ri kubʼij ri Biblia

Ri Dios kkikot qukʼ are chiʼ kqanimaj ri utaqanik, kqaya ta kan ubʼanik utz taq jastaq y nim kqil wi ri kuchomaj ri Dios chrij ri pwaq. Rumal laʼ, we kqakoj qachuqʼabʼ rech kqilo ri kuchomaj ri Dios chrij ri pwaq, ri areʼ kubʼij wariʼ chqe: «Man katintzoqopij ta kanoq mawi katinyaʼ kanoq» (Hebreos 13:5, 6). Xuqujeʼ kubʼij wariʼ: «Ri winaq che ko takʼal pa ri ukʼaslemal, sibʼalaj ktewchiʼx ri’ pa ronojel» rumal ri Dios (Proverbios 28:20, Ri Tyoxlaj Wuj).

Jujun taq pixabʼ che kuya ri Biblia chrij ri pwaq

Eclesiastés 7:12: «Rumal rech chi ri noʼj are jun toʼbʼal ibʼ junam rukʼ ri pwaq».

Ri kraj kubʼij: We utz kqabʼan che ukojik ri pwaq kuya tobʼanik chqe pa ri qakʼaslemal.

Lucas 12:15: «Puneʼ e kʼo kʼi jastaq re jun winaq, man are ta riʼ ri kyoʼw ri ukʼaslemal».

Ri kraj kubʼij: Ri pwaq are ta ri más nim ubʼanik pa ri qakʼaslemal y are ta kojtowik rech kojkolotaj kanoq.

1 Timoteo 6:10: «Rukʼ ri uloqʼoqʼexik ri pwaq kkʼiy wi uloq ronojel etzelal. E kʼo jujun ri sibʼalaj xkirayij ri pwaq, xesach kʼut, xkiyaʼ kan ri kojonik, xkibʼan kʼiʼalaj kʼax chbʼil kibʼ».

Ri kraj kubʼij: Kʼo ta kʼax kuya ri pwaq. Are kʼu ri winaq che kuloqʼoqʼej ri pwaq, che kubʼano che are ri nim ubʼanik pa ri ukʼaslemal, kuya kʼax che. Kubʼan kʼax che ri ufamilia y kyawajik rumal che kuxlan ta che ri uchak.

Hebreos 13:5: «Miloqʼoqʼej ri pwaq, chubʼanaʼ chiwe ri kʼo iwukʼ».

Ri kraj kubʼij: Kqabʼan ta jastaq che utz taj rech kqachʼak pwaq, xaneʼ chojkikot rukʼ ri kʼo qukʼ.

Mateo 19:24: «Kʼax taj che jun kamey kqʼax pa ri ujulil jun bʼaq, chuwach jun qʼinom kok ta pa ri rajawibʼal ri Dios».

Ri kraj kubʼij: Ri Jesús xusikʼij jun qʼinomalaj ala rech kux utijoxel. Are kʼu ri ala xraj taj rumal che are xuloqʼoqʼej ri jastaq che kʼo rukʼ. Ri tzij che xubʼij ri Jesús kunaʼtajisaj jun jastaq chqe: we are más nim kqil ri qaqʼinomal chuwach ri Dios kqatzaq ri kʼaslemal che kʼo ta ukʼisik.

a Xuqujeʼ pa nikʼaj chi Biblia kubʼij wariʼ chrij ri versículo: «Rumal rech, che ri urab’ ronojel itzel, are ri loqʼoqʼebʼal k’u’x chrij ri pwaq».