Domingo 2 re noviembre
Mujwar bʼaʼ jas ri e juleʼ chik, xaneʼ chojkʼaskʼatoq, chqachomaj jas kqabʼano (1 Tes. 5:6).
Rech kojkʼaskʼatik y kqachʼobʼ ri kqabʼano rajawaxik kqakʼut loqʼoqʼebʼal (Mat. 22:37-39). Jun kʼutbʼal, ri loqʼoqʼebʼal che kqanaʼ che ri Jehová kojutoʼ rech kqaya ta kan utzijoxik ri utzij paneʼ kqariq kʼax (2 Tim. 1:7, 8). Y rumal che keqaj ri winaq kqakoj qachuqʼabʼ che utzijoxik ri utzij ri Dios chke, paneʼ pa teléfono o pa carta. Y kqachomaj taj che kkikʼex ta wi ri kikʼaslemal (Ezeq. 18:27, 28). Xuqujeʼ keqaloqʼoqʼej ri qachalal are chiʼ kqakubʼsaj kikʼuʼx y kqaya kichuqʼabʼ (1 Tes. 5:11). Ri ajchʼojabʼ che junam kechʼojinik kkitoʼ la kibʼ. Rajawaxik je kqabʼan oj kukʼ ri qachalal, kqabʼan ta kʼax chke y kqatoj ta ukʼaxel ri kʼax che kbʼan chqe (1 Tes. 5:13, 15). Jun chi ukʼutik kqabʼano che keqaj ri e qachalal are che nim keqil wi ri e kʼamal taq bʼe pa ri congregación (1 Tes. 5:12). w23.06 10 párr. 6; 11 párrs. 10, 11
Lunes 3 re noviembre
Are taq ri areʼ [Jehová] kubʼij jun jasach, kutzʼaqatisaj ubʼanik (Núm. 23:19).
Jun jastaq kqabʼano rech kqakowirisaj ri qakojonik are che kojchoman chrij ri xubʼan ri Jesús pa qawiʼ. Rumal ri xubʼan pa qawiʼ qas kbʼantaj ri utzujum ri Jehová. Rajawaxik kojchoman chrij ri xkibʼan ri Jehová y ri Jesús pa qawiʼ. Rech jeriʼ más kqakubʼsaj qakʼuʼx chrij ri Jehová che qas kukʼam lo ri kʼakʼ ulew che utzujum. Ri Jehová xuya bʼe che xpe ri loqʼalaj uKʼojol cho ri uwach Ulew. Are chiʼ xpe ri Jesús waral xuriq kʼi taq kʼax y más na chiʼ xkamisaxik. Sibʼalaj kʼax xunaʼ riʼ ri Jehová are chiʼ xril wariʼ rumal che are jun tat kloqʼoqʼenik. Are kʼu rumal che kraj kqariq jun utz kʼaslemal, xuya bʼe che xkam ri uKʼojol (Juan 3:16; 1 Ped. 1:18, 19). Ri Jehová nim xutojbʼej ri qamak rumal laʼ qas kuya na ri kʼaslemal che kʼo ta ukʼisik chqe. w23.04 27 párrs. 8, 9
Martes 4 re noviembre
¿Jawijeʼ kʼo wi, kamikal, ri akuʼinem che usachisaxik wachaj? (Os. 13:14).
¿La kraj ri Jehová keʼukʼasuj ri kaminaqibʼ? Kraj. Rumal laʼ ri areʼ xuya bʼe che ktzʼibʼax kan ri kʼastajibʼal pa ri Biblia (Is. 26:19; Apoc. 20:11-13). Y are chiʼ ri areʼ kutzujuj jun jastaq qas kubʼano (Jos. 23:14). Xuqujeʼ kurayij kikʼasuxik ri kaminaqibʼ. Chojchoman chrij ri xubʼij ri Job. Ri areʼ xubʼij che we kkamik, ri Jehová kurayij ukʼasuxik (Job 14:14, 15). Wariʼ kunaʼtasaj chqe che ri Jehová kurayij kikʼasuxik ri upatanelabʼ che e kaminaq, kraj che keyawaj ta chik y kekikotik. ¿Jas kubʼan na ri Jehová chke ri winaq che xekun taj xketaʼmaj uwach? Ri areʼ kubʼij che keʼuwalajisaj chi na (Hech. 24:15). Kraj che keʼux rachiʼl y kkiriq jun kʼaslemal che kʼo ta ukʼisik cho ri uwach Ulew (Juan 3:16). w23.04 9 párrs. 5, 6