Ri upetik ri Mesías

¿JAS kkibʼan ri winaq che uchʼobʼik che are ri Mesías? Are riʼ ri Ajawaxel kuya uqʼalajisaxik ri ubʼantajik. Chiʼ qʼaxinaq chi 400 junabʼ che xtzʼaqat utzʼibʼaxik ri Escrituras Hebreas, jun ángel ubʼiʼ Gabriel xukʼut ribʼ chuwach ri María, jun ali che kʼo pa relebʼal kaqiqʼ rech Galilea, pa Nazaret. Ri Gabriel xubʼij che ri María che kkʼojiʼ jun alaj uneʼ. Pa neʼ ri areʼ qʼapoj na, ri Ajawaxel rumal ri uxlabʼixel kubʼan che ri ali kux yawabʼ ixoq. Ri akʼal riʼ are ri Ajawinel che bʼim kanoq ri uqʼatbʼal tzij kʼot ukʼisik. Ri qas xbʼanik, are che ri Ajawaxel xuqʼaxej ri ukʼaslemal ri nabʼeʼal Ukʼojol, che kʼo rukʼ areʼ pa ri kaj, rukʼ ri María.

Ri María xubʼan ta nim che ribʼ chiʼ xyaʼ wajun eqaleʼn riʼ che nim ubʼanik che. Ri ala che uyaʼom chi utzij che, jun ajanel ubʼiʼ José, xkʼuleʼ rukʼ chiʼ ri Ajawaxel utaqom chi lo jun ángel che xubʼij che ri xkʼulmatajik. Chnaʼtaj chaqe che bʼim kanoq che ri Mesías kalax pa Belén, pa Nazaret taj (Miqueas 5:2). ¿Jas kbʼan riʼ che ubʼanik ri bʼim kanoq, rumal che ri Nazaret weneʼ kʼo 150 kilómetros uxoʼl rukʼ Belén?

Chiʼ xeqʼax ri qʼij, jun ajawinel rech Roma xuya jun taqanik rech keʼajilax ri winaq, xuqujeʼ xubʼij che konojel kkitzʼibʼaj kibʼiʼ pa ri kitinamit. Rukʼ waʼ, kqilo che ri ufamilia ri José xuqujeʼ María aj Belén, rumal laʼ xebʼe jelaʼ chiʼ xajubʼiqʼ chik kqaj che ri María kkʼojiʼ ri ral (Lucas 2:3). Ri Jesús xalax pa jun kabʼal kech chikop, xuqujeʼ xa pa jun jukubʼ xqʼoyobʼax wi. Tekʼuriʼ, pa jun juyubʼ che naqaj kʼo wi, kʼi ángeles xkikʼut kibʼ chkiwach nikʼaj ajyuqʼabʼ xuqujeʼ xkibʼij chike che xalax ri Mesías, o ri Cristo che bʼim kanoq che kpe na.

Xuqujeʼ kʼo jun chik winaq xuqʼaxej ubʼixik che Jesús are ri Mesías bʼim kanoq. Ri ajqʼaxal tzij Isaías xubʼij kanoq che kʼo jun kusukʼumaj ri bʼe re ri chak che nim ubʼanik che kubʼan na ri Cristo (Isaías 40:3). Are ri Juan el Bautista. Pa jun qʼij, chiʼ xril ri Jesús, xubʼij waʼ: «Chiwilampeʼ, ri alaj uChij ri Dios, ri karesaj ri kimak ri winaq». Kʼi chike ri rajtijoxelabʼ ri Juan xkibʼan rajtijoxelabʼ ri Jesús. Jun chike xubʼij wariʼ: «Xqariq ri Mesías» (Juan 1:29, 36, 41).

Are kʼu ri qas kkʼutuwik majaʼ kqʼalajinik. Chiʼ xbʼan uqasanjaʼ ri Jesús rumal ri Juan, ri Jehová xubʼan Mesías che rukʼ ri uxlabʼixel xuqujeʼ xubʼij: «Are loqʼalaj nuKʼojol waʼ ri sibʼalaj kinkikot rukʼ» (Mateo 3:16, 17). ¡Qas xopan ri Mesías che bʼim kanoq!

¿Jampaʼ xkʼulmatajik? Pa ri junabʼ 29, chiʼ xtzʼaqat ri 483 junabʼ che xubʼij kan ri Daniel. Ri qastzij, wariʼ xa jujun chike ri kkʼutuwik che ri Jesús are ri Mesías. Tekʼuriʼ, ¿jas kuya ubʼixik riʼ chiʼ kkʼojiʼ cho ri uwach Ulew?

(Esam chupam ri capítulo 1 kopan 3 rech Mateo, ri capítulo 1 rech Marcos, ri capítulo 2 rech Lucas xuqujeʼ ri capítulo 1 rech Juan.)