RI ALABʼOM ALITOMABʼ KKITAʼ

¿Jasche rajawaxik kqabʼan qachʼawem?

Jun encuesta xukʼutu che ochenta por ciento chke ri alabʼom alitomabʼ pa Estados Unidos kkibʼan kichʼawem, are kʼu xa e nikʼaj chke kkibʼan kichʼawem ronojel taq qʼij. Weneʼ e jujun kkichomaj: «¿La xaq xiw kojutoʼ ri chʼawem rech ksach jubʼiqʼ ri kʼax chqe?».

¿Jas riʼ ri chʼawem?

Ri chʼawem are ubʼanik tzijonem rukʼ ri Jehová ri xbʼanow ronojel ri jastaq. Chomaj wariʼ: paneʼ ri areʼ sibʼalaj nim ubʼanik are kʼu «man naj taj kʼo wi chqe chqajujunal» (Hechos 17:27). Ri Biblia kuya wajun sikʼinik ri’ chqe: «Chixqebʼ rukʼ ri Dios ri are kqebʼ na iwukʼ» (Santiago 4:8).

¿Jas rajawaxik kabʼano rech katqebʼ rukʼ ri Dios?

Ubʼanik chʼawem. Katutoʼo rech kattzijon rukʼ.
Usikʼixik uwach ri Biblia. Rumal che je wariʼ «ktzijon» ri Dios awukʼ.

We kabʼan achʼawem y kasikʼij uwach ri Biblia wariʼ katutoʼo rech katux rachiʼl ri Dios.

«Ubʼanik chʼawem rukʼ ri Jehová are jun nimalaj eqelen yaʼom chqe ri oj winaq» (Jeremy).

«Are chiʼ kinjaq ri wanimaʼ chuwach ri Jehová kinaʼo che más kinqebʼ rukʼ» (Miranda).

¿La qas kuta ri Dios ri nuchʼawem?

Paneʼ katkojon chrij ri Dios y kabʼan achʼawem che, weneʼ kachomaj che katuta taj. Ri Biblia kubʼij che Jehová kutatabʼej ri chʼawem che kbʼan che (Salmo 65:2). Xuqujeʼ kubʼij chawe che kabʼij che ronojel ri kabʼisoj ¿jasche? Rumal che kel ukʼuʼx chawe (1 Pedro 5:7).

Chatchoman chrij wariʼ: ¿La amaqʼel kattzijon kukʼ ri awachiʼl? Xuqujeʼ katkunik kabʼan wariʼ rukʼ ri Dios. Amaqʼel chattzijon rukʼ y chakojoʼ ri ubʼiʼ, Jehová (Salmo 86:5-7; 88:9). Y ri Biblia kubʼij chawe che amaqʼel chabʼanaʼ achʼawem che ri Dios (1 Tesalonicenses 5:17).

«Ri chʼawem are ubʼanik tzijonem rukʼ ri nuTat che kʼo pa ri kaj y rukʼ ri areʼ kinjaq wi ronojel ri wanimaʼ» (Moises).

«Kinbʼij che ri Jehová ronojel ri kinkʼulmaj junam rukʼ ri kinbʼan rukʼ ri nunan y ri utzalaj taq wachiʼl» (Karen).

¿Jas kinbʼij pa ri nuchʼawem?

Ri Biblia kubʼij: «Chiyaʼ ronojel chuwach ri Dios pa chʼawem rukʼ Dios; chixtzʼonon che, chiyaʼ kʼu maltyoxinik che xuqujeʼ» (Filipenses 4:6).

Katkunik kabʼij che ri Dios ronojel ri kʼax che kariqo. Ri Biblia kubʼij: «Chayaʼ kan ronojel ri abʼis pa uqʼabʼ ri Ajawaxel, katutoqʼej kʼu na» (Salmo 55:22).

Are kʼu, xaq xiw ta kabʼij ronojel ri kʼax che kariqo. Jun ali ubʼiʼ Chantelle, kubʼij: «In rachiʼl ta riʼ ri Jehová we xaq xiw kinta tobʼanik che. In kinchomaj che ri nabʼe rajawaxik kqabʼano are kojmaltyoxinik, y qetaʼm che kʼi taq jastaq kojkunik kqamaltyoxij che ri Dios».

Chatchoman chrij wariʼ: ¿Jas jastaq katkunik kamaltyoxij che ri Dios? Chatchoman chrij oxibʼ jastaq che kamaltyoxij che ri Jehová kimik.

«Rilik jun alaj kotzʼiʼj kubʼano che kaya maltyoxinik che ri Jehová, paneʼ kachomaj at che nim ta ubʼanik» (Anita).

«Chatchoman chrij jun versículo che sibʼalaj utz kawilo o chrij jun jastaq che ubʼanom ri Jehová. Tekʼuriʼ chamaltyoxij wariʼ che» (Brian).

Ri kkichomaj jujun taq alabʼom alitomabʼ

«Rajawaxik kqabʼij ronojel che ri Jehová, ri areʼ kraj kojutoʼo paneʼ retaʼm ri kajwataj chqe. We kqabʼij ronojel che kqakʼutu che kqakubʼsaj qakʼuʼx chrij» (Moises).

«Ri chʼawem kjunamataj rukʼ jun kolobʼ che ri Jehová uchapom pa jun lado y ri in pa ri jun chik. Are chiʼ kinbʼij ronojel che ri kinnaʼo jetaneʼ kinjikʼ ri kolobʼ rech ri areʼ aninaq kinutolaʼ, y je wariʼ kubʼan más ko ri wachilanik rukʼ» (Miranda).

«We kqachajij ta qibʼ xaq xiw chi kqata jastaq pa ri qachʼawem che kqaj. Are kʼu are chiʼ kojmaltyoxin che ri Jehová, wariʼ kubʼano che nim kqil wi ronojel ri uyaʼom chqe y xaq xiw ta kojchoman chqij oj» (Jeremy).

«Are chiʼ más katmaltyoxin che ri Jehová, más katyoxij ri kʼo awukʼ. Y wariʼ katutoʼo rech are katchoman chrij ri utz taq jastaq che kuya chawe y man are ta katchoman chrij ri kʼax che tajin kariqo» (Shelby).