¿La utz kqabʼan qachʼawem chke ri tyox?

Ri kuya ubʼixik ri Biblia

Utz taj. Ri Biblia kubʼij taj che rajawaxik kqabʼan qachʼawem chke ri tyox. Rajawaxik xaq xiw che ri Dios kqabʼan wi qachʼawem pa ubʼiʼ ri Jesús. Ri Jesús xubʼij chke ri utijoxelabʼ: «Ri ix kʼut je chʼawem waʼ chibʼanaʼ: ‹QaTat ri kʼo la pa ri kaj, chtastaj ri bʼiʼ la›» (Mateo 6:9). Ri Jesús xuya ta kan ubʼixik che rajawaxik kqabʼan qachʼawem che jun tyox, jun ángel o jun chik jastaq che are ta ri Dios.

Y ri Jesús xubʼij: «In riʼ ri bʼe, ri qastzij, ri kʼaslemal. Man kʼo ta jun kopan rukʼ ri Tataxel, we ta ma ta wumal in» (Juan 14:6). Xaq xiw ri Jesús kkunik kchʼaw pa qawiʼ rukʼ ri Dios (Hebreos 7:25).

¿La kojkunik kqabʼan qachʼawem che ri Dios y chke ri tyox?

Pa jun chke ri Diez Mandamientos. Ri Dios xubʼij: «In riʼ ri Ajawaxel ri aDios, Dios achixomanel» (Éxodo 20:5). ¿Jas kraj kubʼij che ri Dios achixomanel? Jun nota rech ri Biblia de América kuya ubʼixik che xaq xiw che ri Dios kyaʼ wi qʼijilanik man chke ta nikʼaj chi tyox. Ri Dios kraj che xaq xiw ri areʼ kqʼijilaxik, y ri ubʼanik chʼawem are jun qʼijilanik che ri Dios (Isaías 48:11).

We kqabʼan qachʼawem che jun ángel o che jun tyox, ri Dios sibʼalaj kbʼisonik. Ri wuj rech Apocalipsis kubʼij che ri apóstol Juan xxukiʼ chuwach jun ángel rech kuqʼijilaj. Tekʼuriʼ ri ángel xubʼij che: «¡Mabʼano! In awach pataninel, in kach pataninel ri awachalal ri kʼo uqʼalajisaxik ri Jesús kukʼ. Are chaqʼijilaj ri Dios» (Apocalipsis 19:10).