Ri ubʼiʼ ri Dios pa ri e wuj Escrituras Hebreoarameas

Pa ri e wuj Escrituras Hebreoarameas (xuqujeʼ kbʼix Antiguo Testamento che), ri ubʼiʼ ri Dios xa jubʼiqʼ kraj che 7.000 mul kriqitaj rukʼ ri símbolos riʼ יהוה. Ri símbolos riʼ are ri kajibʼ letras hebreas, kbʼix Tetragrámaton che. Pa ri Traducción del Nuevo Mundo, ri kajibʼ letras riʼ kojom «Jehová» che. Wariʼ are ri bʼiʼaj che sibʼalaj kʼi mul kriqitaj pa ri Biblia. Qastzij che ri xetzʼibʼan ri Biblia xkikoj kʼi títulos chiʼ xechʼaw chrij ri Dios, jujun chke are nim ukuʼinem, nim pa uwiʼ ri uwach Ulew xuqujeʼ Señor. Are kʼu ri qas ubʼiʼ ri Dios are ri Tetragrámaton.

Are ri Jehová xbʼanow chke ri xetzʼibʼan ri Biblia che xkikoj ri ubʼiʼ. Jun kʼutbʼal, xubʼano che ri ajqʼaxal tzij Joel xutzʼibʼaj: «Konojel kʼut ri kakiyaʼ uqʼij ri Ajawaxel [Jehová, TNM] kekuʼinik kakitoʼtajisaj kibʼ man keriq ta na rumal ri kamikal», xuqujeʼ jun chke ri xtzʼibʼan ri Salmo xubʼij: «Rech ri winaq kketaʼmaj che at ri abʼiʼ are Jehová xiw at qas at nim puwiʼ ri uwach Ulew» (Joel 2:32; Salmo 83:18, TNM). Xuqujeʼ, ri ubʼiʼ kriqitaj weneʼ 700 mul chupam ri Salmos, jun wuj rech bʼixonem xuqujeʼ poemas che ri rajpatanelabʼ xkibʼixoj o xkibʼij. Tekʼuriʼ, ¿jasche kʼo ta ri ubʼiʼ ri Dios pa kʼi Biblia? Xuqujeʼ ¿jasche ri Traducción del Nuevo Mundo kukoj Jehová? ¿Jas kraj kubʼij wajun bʼiʼaj riʼ?

¿Jasche kʼo ta ri ubʼiʼ ri Dios pa kʼi Biblia? Kʼo kʼi rumal. 1) E kʼi winaq kkichomaj che ri Dios che nim uchuqʼabʼ rajawaxik ta jun ubʼiʼ. 2) Nikʼaj chik rumal che kkikoj ri kkibʼij ri judíos che awas kkoj ri ubʼiʼ ri Dios, weneʼ rumal che kkixibʼij kibʼ che kkibʼan ta nim che. 3) Nikʼaj chik kkikoj taj rumal che kchʼobʼtaj taj ri qas kbʼan che ubʼixik, rumal laʼ kkichomaj che utz xiw kkoj ri títulos Ajawaxel o Dios. Are kʼu ri jastaq riʼ kʼo ta upatan. Chqilaʼ jasche.

• Nabʼe, ri winaq che kkibʼij che rajawaxik ta ri ubʼiʼ ri Dios kechoman ta chrij ri wuj che xkoj che utzʼibʼaxik ri Biblia ojer —jujun chke nabʼe chuwach ri Cristo— che kʼo ri ubʼiʼ ri Dios chupam. Junam rukʼ ri xqil kan nabʼe, ri Dios xubʼano che xkoj ri ubʼiʼ más che 7.000 mul pa ri Utzij. Rumal laʼ qas qʼalaj che areʼ kraj che kqetaʼmaj xuqujeʼ kraj kqakoj ri ubʼiʼ.

• Ukabʼ, ri e winaq che xkiqʼaxej ri Biblia pa nikʼaj chik chʼabʼal che xkesaj ri ubʼiʼ ri Dios rumal ri kichomanik ri judíos are kʼu kʼo jun jastaq che kechoman ta chrij. Pa neʼ kʼo jujun ajtzʼibʼ judíos kkaj taj kkibʼij ri ubʼiʼ ri Dios, are kʼu xkitzʼibʼaj chupam ri Biblia. Chunaqaj ri mar Muerto, pa Qumrán, xriqitaj ojer taq wuj che kʼo ri ubʼiʼ ri Dios chupam. Jujun chke ri xeqʼaxen ri Biblia pa nikʼaj chik chʼabʼal che xkesaj ri bʼiʼaj, xkikoj ri título SEÑOR che ukʼaxel rukʼ mayúsculas rech kukʼutu jachiʼ kʼo wi ri bʼiʼaj pa ri ojer taq wuj. Are kʼu ketaʼm che kʼi mul kriqitaj ri ubʼiʼ ri Dios pa ri Biblia, ¿jasche xkikʼexo o xkesaj? Kʼo ta jun xyaʼow taqanik chke rech xkesaj.

• Xuqujeʼ ri urox, ri winaq che kkibʼij che kkoj ta ri ubʼiʼ ri Dios rumal che etaʼmatal ta ri qas kbʼan che ubʼixik are kʼu kkikoj ri ubʼiʼ ri Jesús. Are kʼu ri qastzij, kimik kʼo ta jun winaq kkunik kubʼij ri ubʼiʼ ri Jesús junam rukʼ ri kkibʼij ri winaq pa ri nabʼe siglo. Ri kojonelabʼ che kechʼaw pa hebreo weneʼ kkibʼij «Yeshúa». Xuqujeʼ ri título Cristo (o Mesías) are «Maschíaj». Ri kojonelabʼ che kechʼaw pa griego kkibʼij «Iēsóus Kjristós», xuqujeʼ ri kechʼaw pa latín, kkibʼij «Iesus Christus». Rumal ri utobʼanik ri uxlabʼixel, ri xetzʼibʼan ri Biblia xkikoj ri bʼiʼaj che kkikoj ri griegos. Xkikoj ta kichuqʼabʼ che ubʼixik ri kbʼix che pa hebreo, are xkikoj ri bʼiʼaj che kkikoj ri winaq pa kichʼabʼal. Je waʼ xkʼulmataj rukʼ ri ubʼiʼ ri Dios: ri Comité de Traducción de la Biblia del Nuevo Mundo rilom che utz kkoj Jehová pa neʼ je ta kbʼix che pa ri hebreo ojer.

¿Jasche ri Traducción del Nuevo Mundo kukoj Jehová? Pa español, ri kajibʼ letras re Tetragrámaton (יהוה) are waʼ ri letras riʼ YHWH (xuqujeʼ weneʼ kkoj YHVH o JHVH). ¿Jasche kkoj ta vocales? Rumal che pa hebreo ojer xaq xiw kkoj consonantes. Are kʼu, ¿jas kkibʼan ri winaq che retaʼmaxik jas vocal kkikojo are chiʼ kkisikʼij uwach jun tzij? Ketaʼm ri kkibʼan che usikʼixik rumal che are ri kkikoj ronojel qʼij.

Qʼaxinaq chi weneʼ mil junabʼ che xkʼis utzʼibʼaxik ri e wuj Hebreoarameas, ri e judíos che nim ketaʼmabʼal xkibʼan jun tobʼanik rech kkisikʼij uwach ri tzij pa hebreo. Wajun tobʼanik riʼ kukoj jujun taq puntos, o signos rech kukʼutu jas vocal kbʼe pa jun tzij. Are kʼu, pa taq ri junabʼ che xbʼan wajun tobʼanik riʼ kʼi judíos xkimajij uchomaxik che utz taj kkoj ri ubʼiʼ ri Dios, rumal laʼ xkikoj nikʼaj chi tzij che ukʼaxel. Weneʼ rumal laʼ, chiʼ xkitzʼibʼaj ri Tetragrámaton, xkikoj ri vocales rech ri nikʼaj chik tzij pa ri kajibʼ consonantes rech ubʼiʼ ri Dios. Rumal laʼ ri e wuj riʼ che kukoj ri puntos riʼ ktobʼan ta che retaʼmaxik ri kbʼan che ubʼixik ri ubʼiʼ ri Dios pa hebreo. Kʼo jujun kkibʼij che are «Yahweh» (o «Yahvé»), nikʼaj chik kkikoj jujun chi tzij che. Pa ri wuj rech ri mar Muerto kʼo jun chʼaqap re Levítico che tzʼibʼatal pa griego che kʼo ri ubʼiʼ ri Dios chupam kojom ri tzij «lao» che utzʼibʼaxik. Nikʼaj chik ajtzʼibʼanelabʼ rech ri griego ojer xuqujeʼ kkibʼij che weneʼ utz kkoj ri tzij «Iaé», «Iabé» o «Iaoué». Qastzij wi, qetaʼm taj ri kbʼan che ubʼixik ri ubʼiʼ ri Dios pa hebreo chiʼ xtzʼibʼax ri Biblia, rumal laʼ utz taj kqabʼij che kojkun taj kqakojo (Génesis 13:4, TW; Éxodo 3:15, TW). Are kʼu qetaʼm che ri Dios kʼi mul xukoj ri ubʼiʼ chiʼ xchʼaw kukʼ ri rajpatanelabʼ xuqujeʼ e areʼ xkikojo chiʼ xkibʼan kichʼawem che xuqujeʼ chiʼ xetzijon kukʼ nikʼaj chik winaq chrij ri Dios (Éxodo 6:2, TW; 1 Reyes 8:23, TW; Salmo 99:9, TW).

Rumal laʼ, ¿jasche ri Traducción del Nuevo Mundo kukoj Jehová? Junam rukʼ ri kqil na, rumal che kʼi chi junabʼ tajin kkoj wajun bʼiʼaj riʼ pa español.

Ri nabʼe Biblia pa español che kukoj ri ubʼiʼ ri Dios are rech ri Salmos rech Juan de Valdés, weneʼ pa taq ri junabʼ 1537. Kukoj ri tzij lehova. Chiʼ xkʼextaj ri chʼabʼal xuqujeʼ xkʼextaj ri utzʼibʼaxik ri ubʼiʼ ri Dios. Jun kʼutbʼal, ri traducción rech Salmos rech Bernardino de Rebolledo, re ri junabʼ 1661, kukoj ri tzij Jehova. Ri Biblia rech Scío de San Miguel, re ri junabʼ 1791, kukoj pa ri notas ri tzij lehováh. Ri versión Torres Amat rech ri junabʼ 1824 xukoj Jehovah, xuqujeʼ ri Reina-Valera rech ri junabʼ 1862, kukoj Jehová. Pa nikʼaj chik chʼabʼal xuqujeʼ kojom bʼiʼaj che kjunamataj rukʼ wariʼ che ri ubʼiʼ ri Dios pa kʼi junabʼ. Jun kʼutbʼal, ri traducción rech ri Pentateuco rech William Tyndale, rech ri junabʼ 1530, kukoj Iehouah. Are waʼ ri nabʼe Biblia pa inglés che kukoj ri ubʼiʼ ri Dios.

Pa jun wuj che tzʼibʼam pa inglés Studies in the Psalms (Retaʼmaxik ri kubʼij ri Salmos), che xbʼan pa ri junabʼ 1911, jun achi che nim ubʼanik che kunikʼoj ri Biblia ubʼiʼ Joseph Bryant Rotherham xukoj ri tzij inglés Jehovah che ukʼaxel Yahweh rumal che krilo che «are jun bʼiʼaj che más kchʼobʼ uwach —xuqujeʼ kajawax— kumal ri kesikʼin uwach ri Biblia». Xuqujeʼ, pa ri junabʼ 1930, ri achi che kʼo retaʼmabʼal chrij ri chʼabʼal hebreo ubʼiʼ Alexander Kirkpatrick xuqujeʼ junam xubʼij chrij ri ukojik ri bʼiʼaj Jehovah pa inglés: «Kʼi winaq che ketaʼm chrij utzʼibʼaxik taq tzij kkibʼij che rajawaxik kkoj ‹Yahvehʼ› o ‹Yahaveh›; are kʼu JEHOVAH ri qas kkoj pa ri chʼabʼal inglés, xuqujeʼ rajawaxik taj kqachʼobʼ ri qas kbʼan che ubʼixik, are che qetaʼm che are jun Qastzij Bʼiʼaj, are ta jun título che kukʼut ri ubʼantajik, junam rukʼ Ajawaxel». Pa español, ri Diccionario Manual Bíblico kukoj jun chomanik che kjunamataj rukʼ chiʼ kubʼij «ri bʼiʼaj Jehová nim ubʼanik rumal che kkoj» pa jujun taq Biblias che más etaʼmatal kumal kʼi winaq.

¿Jas kraj kubʼij ri bʼiʼaj Jehová? Pa hebreo, ri bʼiʼaj Jehová petinaq che jun verbo che kraj kubʼij «kuxik». Jujun winaq che nim ketaʼmabʼal kkibʼij che ri tzij riʼ kukʼutu che areʼ kbʼanowik. Wariʼ kraj kubʼij che ri winaq che kchʼaw ri verbo chrij kukoj jun jastaq o jun winaq che ubʼanik ri kraj. Rumal laʼ, ri Comité de Traducción del Nuevo Mundo kubʼij che ri ubʼiʼ ri Dios kraj kubʼij «Ri Kux Ronojel». Ri winaq che nim ketaʼmabʼal jalajoj ri kkichomaj chrij wariʼ, rumal laʼ kojkun taj kqabʼij che xa jun kbʼan che ubʼixik. Are kʼu, ri tzij riʼ qas kukʼutu che are ri Jehová xbʼanow ronojel ri jastaq xuqujeʼ che kubʼan ronojel ri utzujum. ¿Jasche? Rumal che xaq xiw ta xubʼan ri kajulew, ri e ángeles xuqujeʼ ri e winaq, pa neʼ kʼo kkʼulmatajik, areʼ amaqʼel kubʼano che ri urayibʼal qas kbʼantajik.

¿Jas kʼu kraj kubʼij ri tzij che kʼo pa Éxodo 3:14? Chilaʼ ri Dios kukoj ri tzij riʼ chbʼil ribʼ: «IN RIʼ RI IN». Ri tzij riʼ kukoj ri verbo hebreo che kjunamataj rukʼ ri verbo che esam wi ri ubʼiʼ ri Dios. Are kʼu ri tzij riʼ qas ta kuqʼalajisaj ri ubʼiʼ ri Dios. Qastzij wi xaq xiw jujun ri ubʼantajik kuqʼalajisaj: ri areʼ kux ri kajwataj pa kijujunal ri jastaq rech kubʼan ri kraj. Are kʼu, ri ubʼiʼ ri Dios xaq xiw ta kraj kubʼij che areʼ kux ri kraj rech kbʼantaj ri urayibʼal. Xuqujeʼ areʼ kkunik kubʼan che ri jastaq che ubʼanom kkʼextajik rech kubʼan ri kraj.