Chakojoʼ achuqʼabʼ rech kabʼan ronojel che utzijoxik ri Ajawbʼal
1. ¿Jas kqetaʼmaj chrij ri xubʼan ri David pa ri ukʼaslemal?
1 Ri ajawinel David xuya ta che ri xkʼulmataj pa ri ukʼaslemal xuqʼatej che ubʼanik nikʼaj chi jastaq. Jun kʼutbʼal, xraj xubʼan jun ja che ri Jehová, are kʼu xajawax taj che areʼ xbʼanowik. Rumal laʼ xukʼex ri uchomanik xuqujeʼ xubʼan ronojel ri rajawaxik rech ri ukʼojol ubʼiʼ Salomón kkunik kuyako (1 Rey. 8:17-19; 1 Crón. 29:3-9). Are ta xukʼis ribʼ pa bʼis rumal che kkun taj kubʼan ri kraj, are xok il che ri kkunik kubʼano. ¿Jas kqabʼano rech kqabʼan qe junam rukʼ ri xubʼan ri David chiʼ kqatzijoj ri Ajawbʼal?
2. ¿Jasche rajawaxik kojchoman chrij ri tajin kqabʼano?
2 Chabʼanaʼ ronojel ri katkun che ubʼanik. E kʼi qachalal kikʼexom ri kikʼaslemal rech xeʼux precursores auxiliares o regulares (Mat. 6:22). ¿La katkun at kabʼano? Chabʼanaʼ achʼawem che ri Jehová xuqujeʼ qas chawilaʼ ri ubʼanom ri akʼaslemal; weneʼ kawilo che katkun che «ubʼanik jun nimalaj chak». We katkunik, je chabʼanaʼ (1 Cor. 16:8, 9).
3. We kojkun taj kojux precursores, ¿jas kojkunik kqabʼano rech kqaya ubʼixik ri utzalaj taq tzij?
3 ¿Jas kqabʼano we kojkun taj kojux precursores? Chojchoman chrij ri kojkun che ubʼanik. Jun kʼutbʼal re, we e kʼo winaq che e kojonelabʼ taj pa ri qachak, ¡chqayaʼ ubʼixik ri utzalaj taq tzij chiʼ kuya kqabʼano! O, at yawabʼ, ¡chayaʼ ubʼixik ri utzalaj taq tzij chke ri ajkunanelabʼ xuqujeʼ ri ajchajinelabʼ! Chnaʼtaj chawe che ri kekun taj kkibʼan más rumal che nim chi kijunabʼ o rumal jun yabʼil kuya kkitzʼibʼaj ri tiempo che kkikoj che utzijoxik ri utzij ri Dios pa neʼ xa quince minutos. Chiʼ kanojisaj ri wuj rech informe ronojel taq ikʼ, masach chawe che katzʼibʼaj ri tiempo che xakojo chiʼ xaya ubʼixik ri utzalaj taq tzij che ri ajkun o chke ri awachiʼl pa ri achak, xuqujeʼ ri wuj che xaya kanoq, ri alaj taq wuj, ri wuj rech Unaʼtabʼalil ri ukamikal ri Jesús o ri wuj rech ri nim riqbʼal ibʼ rech oxibʼ qʼij. Kawilo che nim ri xabʼano chiʼ kawajilaj ronojel ri xabʼano.
4. ¿Jas kqaj kqabʼano?
4 Pa neʼ jalajoj ubʼanik ri qakʼaslemal, chqakojoʼ qachuqʼabʼ che ubʼixik ri utzalaj taq tzij pa lugar jachiʼ kuya wi kqabʼano. Rukʼ wariʼ kojkikotik rumal che kqabʼan ronojel ri kojkun che ubʼanik che uqʼalajisaxik ri Ajawbʼal (Mar. 14:8; Luc. 21:2-4).