Jun chʼaqap abʼaj che xkiriq ri arqueólogos xukʼutu che ri qʼatal tzij David qastzij xkʼojik

Ri Biblia kubʼij che ri David, ri qʼatal tzij re Israel, xkʼasiʼ pa taq ri junabʼ re ri siglo once nabʼe chuwach ri qaqʼij y ri rijaʼlil kʼi taq junabʼ xkiqʼat tzij. Jujun winaq kkibʼij che ri David qastzij taj xkʼojik che xa jun leyenda che kʼateʼ xbʼixik. Are kʼu ¿la qastzij xkʼojiʼ ri qʼatal tzij David?

Pa ri junabʼ 1993, jun jupuq winaq che kʼamom kibʼe rumal ri arqueólogo Avraham Biran xkiriq jun chʼaqap abʼaj pa Tel Dan, ri norte re Israel, che tzʼibʼatal «rijaʼlil ri David» chuwach. Ri kʼo chuwach tzʼibʼam pa semítico re ri siglo noveno nabʼe chuwach ri qaqʼij. Kbʼixik che wariʼ weneʼ esam che jun monumento kech ri arameos che xbʼanik rech kukʼutu are chiʼ xkichʼak ri tinamit Israel.

Jun wuj ubʼiʼ Bible History Daily xubʼij: «Jujun xkibʼij che qastzij taj ri tzʼibʼam kanoq che kubʼij ‹rijaʼlil ri David› [...]. Are kʼu, kʼi chke ri winaq che kkinikʼoj ri Biblia y ri arqueólogos kkibʼij che ri chʼaqap abʼaj che xriq pa Tel Dan kukʼutu che qastzij xkʼojiʼ ri qʼatal tzij David che kyaʼ ubʼixik pa ri Biblia. Wariʼ xux ri más nim ubʼanik che kiriqom ri arqueólogos che xyaʼ ubʼixik chupam ri wuj Biblical Archaeology Review».