Ri Ajawaxel keʼuchʼabʼej ri winaq rukʼ ri Loqʼalaj Pixabʼ (2 Timoteo 3:16)

Ri qastzij Ajawaxel xuya ri uchomanik pa kijolom kʼi täq achijabʼ xuqujeʼ xukʼam bʼe pa kiwiʼ rech xkitzʼibʼaj jun loqʼalaj wuj. Wajun wuj riʼ are ri Loqʼalaj Pixabʼ. Kʼo etaʼmanik chupam che sibʼalaj nim ubʼantajik che kraj ri Ajawaxel kqetaʼmaj.

Are ri Ajawaxel qas retaʼm su ri utz chaqe, rumal che are ajyaʼol ri nojibʼal. We kqanimaj, qas kʼo nim qanojibʼal (Proverbios 1:5).

Ri Ajawaxel kraj che konojel ri winaq e kʼo cho ruwach Ulew kkisikʼij uwach ri Loqʼalaj Pixabʼ. Che wa täq qʼij riʼ kʼo pa jalajoj täq chʼabʼal.

We kawaj kanimaj ri Ajawaxel, rajawaxik kasikʼij uwach ri Loqʼalaj Pixabʼ xuqujeʼ kawetaʼmaj ri kubʼij.

Winaq rech ronojel täq lugar tijan kkinimaj ri Ajawaxel (Mateo 28:19)

Ri testigos rech Jehová kekunik katkitoʼ che retaʼmaxik ri kubʼij ri Loqʼalaj Pixabʼ.

E areʼ kkikʼut pa ronojel ri uwach Ulew ri qastzij chirij ri Ajawaxel.

Katoj täj rech kawetaʼmaj chirij ri Ajawaxel. Chatopan pa ri Ja rech ri Ajawbʼal che kʼo naqaj che awachoch, chilaʼ kawetaʼmaj ri qastzij chirij ri Ajawaxel.

Xaq xiw jun qastzij Ajawaxel kʼolik. Ubʼiʼ are Jehová, ri Loqʼalaj Pixabʼ kubʼij: «Rech ri winaq kketaʼmaj che at ri abʼiʼ are Jehová» (Salmo 83:18, NM). Areʼ are jun uxlabʼal, rumal laʼ kojkun täj kqilo. Kojuloqʼoqʼej xuqujeʼ kraj che kqaloqʼoqʼej. Xuqujeʼ kraj kqaloqʼoqʼej nikʼaj chik winaq (Mateo 22:35-40). Areʼ nim ubʼanik che kiwach ronojel ri kʼolik, are Ajbʼanol re ronojel ri kʼolik.

Ri nabʼe xubʼan ri Ajawaxel are jun uxlabʼal che kʼo nim uchoqʼabʼ. Chiʼ qʼaxinaq chi ri qʼij xetaʼmax uwach rukʼ ri bʼiʼaj Jesucristo. Jehová xuqujeʼ xeʼubʼan ri ángeles.

Jehová xubʼan ronojel ri kʼo pa ri kaj . . . xuqujeʼ ri kʼo cho ruwach Ulew (Apocalipsis 4:11)

Jehová xubʼan ri chʼumil, ri uwach Ulew xuqujeʼ ronojel ri kʼo chuwach (Génesis 1:1).

Xubʼan ri Adán, ri nabʼe achi, rukʼ jubʼiqʼ ulew (Génesis 2:7).

Jehová xuya kʼi täq jastaq chike ri Adán xuqujeʼ ri Eva (Génesis 1:28)

Jehová xubʼan ri nabʼe ixoq, ubʼiʼ Eva, tekʼuriʼ xuya che ri achi rech kubʼan rixoqil che (Génesis 2:21, 22).

Jehová xuya jun tzʼaqat kibʼaqil xuqujeʼ jun tzʼaqat kichomanik.

Ri kotzʼiʼjalaj Edén are ri kachoch ri Adán xuqujeʼ ri Eva. Sibʼalaj jeʼlik: kʼo jaʼ, uwach cheʼ xuqujeʼ e kʼo chikop.

Jehová xchʼaw kukʼ xuqujeʼ xukʼut ri utaqonik chike. Wet xenimanik xkʼejeʼ tariʼ jun kikʼaslemal che kʼot ukʼisik cho ruwach ri Ulew.

Kʼo jun cheʼ che ri Ajawaxel xubʼij chike che kkitij ta ri uwach (Génesis 2:16, 17)

Jun ángel xniman ta che ri Ajawaxel. Wajun ángel riʼ are ri Itzel Satanás.

Jehová xukʼut che kiwach ri Adán rukʼ ri Eva jun chike ri cheʼ, xubʼij chike we kkitij uwach ri cheʼ kekamik.

Satanás kraj täj che Adán xuqujeʼ ri Eva keniman che ri Jehová. Rumal laʼ xukoj jun kumatz rech xubʼij che Eva che we kutij ri uwach ri cheʼ kkam täj. Xubʼij che, che kubʼan junam rukʼ ri Ajawaxel. Wariʼ xa jun molom tzij (Génesis 3:1-5).