KʼUTUNEM 28
Chakʼutuʼ che nim kawil ri xkibʼan ri Jehová y ri Jesús chawe
¿Jas kanaʼo are chiʼ jun awachiʼl kuya jun sipanik chawe, che sibʼalaj utz kawilo? Weneʼ sibʼalaj katkikotik, y kawaj kakʼut chuwach ri awachiʼl che nim kawil wi ri xusipaj chawe. Jehová y Jesús xkiya jun nimalaj sipanik chke ri winaq: ri tojbʼal mak. Chqilaʼ jas kqabʼano rech kqamaltyoxij wajun sipanik riʼ.
1. ¿Jas kqabʼano rech kqamaltyoxij ri xkibʼan ri Dios y Cristo rumal qech?
Ri Biblia kubʼij che «konojel ri kekojon che» ri Jesús kkiriq na jun kʼaslemal che kʼo ta ukʼisik (Juan 3:16). ¿Jas kqabʼan che ukʼutik che kojkojon chrij ri Jesús? Xaq xiw ta kqabʼij che kojkojon chrij; xaneʼ kqakʼut rukʼ ri kqabʼano y ri kqachaʼ ubʼanik pa ri qakʼaslemal (Santiago 2:17). Chiʼ kqakʼut ri qakojonik rukʼ ri kqabʼano y ri kqabʼij, kqabʼan más ko che ri qachilanik rukʼ ri Jehová y ri Jesús (chasikʼij Juan 14:21).
2. ¿Jas riqbʼal ibʼ rajawaxik kojkʼojiʼ wi rech kqamaltyoxij ri xkibʼan ri Jehová y Jesús?
Ri chaqʼabʼ che majaʼ kkam ri Jesús, xubʼij chke ri utijoxelabʼ che kkimaltyoxij ri sipanik che xubʼan chke. Xumaj ubʼanik jun waʼim che sibʼalaj nim ubʼanik, ri Biblia kubʼij la Cena del Señor che xuqujeʼ kbʼix ri Unaʼtabʼalil ri ukamikal ri Jesús che (1 Corintios 11:20). Jesús xubʼij kan chke ri apóstoles xuqujeʼ chke konojel ri qastzij cristianos che kkinaʼtasaj ri ukamikal. Ri Jesús xuya kan ri taqanik riʼ: Chibʼanaʼ «waʼ che naʼtabʼal wech» (Lucas 22:19). Are chiʼ katbʼe pa ri riqbʼal ibʼ re ri Unaʼtabʼalil ri ukamikal ri Jesús, kakʼutu che kamaltyoxij ri loqʼoqʼebʼal che xkikʼut ri Jehová y ri Jesús chawe.
CHANIMARISAJ RI AWETAʼMANIK
Chqilaʼ jas más kojkunik kqabʼano rech kqakʼut maltyoxinik che ri loqʼoqʼebʼal che xkikʼut ri Jehová y ri Jesús chqe. Y jasche nim ubʼanik ri Unaʼtabʼalil ri ukamikal ri Jesús.
3. Ri maltyoxinik kubʼano che kʼo kqabʼan pa ri qakʼaslemal
Chachomaj che tajin katjiqʼik tekʼuriʼ kʼo jun kattoʼwik. ¿La ksach pa ajolom ri tobʼanik che xuya chawe o katzukuj ri kabʼano rech kamaltyoxij che?
Ri Jehová xukol ri qakʼaslemal. Chisikʼij 1 Juan 4:8-10 y chixtzijon chrij wariʼ:
¿Jasche are jun utz sipanik ri ukamikal ri Jesús?
¿Jas kanaʼo are chiʼ kawetaʼmaj ri xubʼan ri Jehová y ri Jesús rumal awech?
¿Jas kojkunik kqabʼano rech kqakʼutu che nim kqil wi ri xkibʼan ri Jehová y ri Jesús rumal qech? Chisikʼij 2 Corintios 5:15 y 1 Juan 4:11 y 5:3. Are chiʼ isikʼim chi ri versículos, chixtzijon chrij wariʼ:
¿Jas kqabʼan che ukʼutik maltyoxinik?
4. Kqesaj uwach ri Jesús
Xuqujeʼ kqakʼut maltyoxinik are chiʼ kqesaj uwach ri Jesús. Chisikʼij 1 Pedro 2:21 y chixtzijon chrij wariʼ:
¿Jas kabʼan che resaxik uwach ri Jesús?
Jesús xuloqʼoqʼej ri uTzij ri Dios, xutzijoj ri utzalaj taq tzij y xeʼutoʼ ri winaq.
5. Kqanaʼtasaj ri ukamikal ri Jesús
Rech kiwetaʼmaj ri xkʼulmataj pa ri kʼisbʼal waʼim che xubʼan ri Jesús, chisikʼij Lucas 22:14, 19, 20. Tekʼuriʼ chixtzijon chrij wariʼ:
¿Jas xkʼulmataj pa ri kʼisbʼal uwaʼim ri Jesús?
¿Jas kraj kubʼij ri kaxlanwa y ri vino? (Chiwilaʼ ri versículos 19 y 20).
Jesús kraj che jumul pa jun junabʼ knaʼtasax ri ukamikal, pa ri qʼij che xkamik. Rumal laʼ, ri oj testigos rech Jehová kqanaʼtasaj ri ukamikal ri Jesús ronojel taq junabʼ, y kqabʼan junam rukʼ ri xukʼut kan ri areʼ. We kawaj kawetaʼmaj jas kbʼan che ubʼanik wajun riqbʼal ibʼ riʼ che nim ubʼanik, chiwilaʼ ri VIDEO. Tekʼuriʼ, chixtzijon chrij wariʼ:
¿Jas kbʼan pa ri Unaʼtabʼalil ri ukamikal ri Jesús?
Ri kaxlanwa y ri vino xa e jun etal. Ri kaxlanwa kukʼut ri tzʼaqatalaj ucuerpo ri Jesús, che xuya rumal qech. Y ri vino kraj kubʼij ri ukikʼel.
RI KKICHOMAJ JUJUN WINAQ: «Xaq xiw chatkojon chrij ri Jesús, y katkolotajik».
¿Jas kabʼan riʼ che ukojik Juan 3:16 y Santiago 2:17 rech kakʼutu che kʼo na rajawaxik kbʼanik?
RI XQETAʼMAJ
Kqakʼut ri qamaltyoxinik che ri xubʼan ri Jesús chiʼ kojkojon chrij y chiʼ kojbʼe pa ri Unaʼtabʼalil ri ukamikal.
¿La knaʼtaj chawe?
¿Jas kbʼan che ukʼutik kojonik chrij ri Jesús?
¿La kawaj kakʼut chuwach ri Jehová y ri Jesús che nim kawil wi ri xkibʼano? ¿Jas kawaj kabʼan che ukʼutik?
¿Jasche nim ubʼanik che katbʼe pa ri Unaʼtabʼalil ri ukamikal ri Jesús?
CHAWILAʼ CHI NIKʼAJ
Chawilaʼ jas kubʼan ri ukamikal ri Jesús pa ri qakʼaslemal.
Chawetaʼmaj más chrij ri kojonik y ri kbʼan che ukʼutik.
«Chojkojon chrij ri utzujum ri Jehová» (La Atalaya, octubre 2016)
Chawilaʼ che ri ukamikal ri Jesús xukʼex ri ukʼaslemal jun ixoq. Chasikʼij wariʼ pa: «In kʼaslik, in chʼajchʼoj y nuriqom chi jamaril».
«Ri Biblia xukʼex ri kikʼaslemal» (La Atalaya, 1 re agosto 2011)
Chawilaʼ jasche e kʼi taj kkitij ri kaxlanwa y ri vino pa ri Unaʼtabʼalil ri ukamikal ri Jesús.