Rajawaxik kojachiʼlanik rech e kʼo qachiʼl

Ri achiʼlanik kmajtajik chupam ri loqʼoqʼem. Chiʼ sibʼalaj kanimarisaj anojibʼal chirij ri Jehová, sibʼalaj kkʼiy na ri aloqʼoqʼem chirij areʼ xuqujeʼ kawaj kapatanej areʼ. Wariʼ katuselebʼisaj na che ubʼanik ajtijoxel rech ri Jesucristo (Mateo 28:19). Katkunik katkikot na che jun achiʼlanik che kʼot ukʼisik rukʼ ri Ajawaxel, we kajunamisaj awibʼ kukʼ ri qʼalajsinelibʼ rech ri Jehová. ¿ Jas kabʼano rech kariq awibʼ kukʼ we nikʼaj riʼ?

Chanimaj utaqoʼnik ri Ajawaxel rech kakʼutu che kaloqʼoqʼej. «Ri uloqʼoqʼexik ri Dios are kinimaxik ri kkebʼij, ri e utaqomal man e al täj.» (1 Juan 5:3.)

Chabʼana jas tijan kawetamaj. Ri Jesús xutzijoj jun bʼantajik. Jun achi nim unoʼjibʼäl xubʼan rachoch puwiʼ ri abʼaj, tekʼuriʼ kʼo jun achi che xuta ta ri tzij che xubʼan rachoch puwiʼ ri sanyïbʼ. Jachiʼ xpe ri qʼeqal jabʼ, ri ja bʼanom puwiʼ ri abʼaj xtakʼe kanoq, tekʼuriʼ ri ja bʼanom puwiʼ ri sanyïbʼ xtinlajik jachiʼ xtzaq bʼik. Ri Jesús xubʼij che ri winaq che kketatebʼej ri ukʼutunem, e junam rukʼ ri achi che kʼo unoʼjibʼäl che xubʼan rachoch puwiʼ ri abʼaj. Xuqujeʼ xubʼij che jachinlaʼ kketatebʼej ri ukʼutunem tekʼuriʼ kkebʼan täj, junam kekaʼyik rukʼ ri achi che xuta ta ri tzij, che xubʼan rachoch puwiʼ ri sanyïbʼ. ¿ Jachin chike che ri kebʼ achijabʼ kawaj junam katkaʼy rukʼ? (Mateo 7:24-27.)

Chajachaʼ akʼaslemal che ri Ajawaxel. Katkunik kabʼij chupam jun chʼawem che ri Jehová, che kawaj kabʼan jun Utaqoʼnik che kʼot ukʼisik. We kqabʼan utaqoʼnik ri Ajawaxel, kqakʼutu che ujajtijoxel rech ri Jesucristo (Mateo 11:29).

Chabʼanaʼ ri qasanjaʼ. «Chabʼan ri a bautismo (qasan jaʼ).» (Hechos 22:16.)

Chapatanej ri Ajawaxel rukʼ ronojel akʼuʼx. «Apachike ri kibʼano, chibʼanaʼ rukʼ ronojel iwanimaʼ, [...] are kipatanej ri Ajawaxel, man are ta ri winaq.» (Colosenses 3:23.)