KʼUTUNEM 12
Pixabʼ che utz che ri kʼaslemal
Ri wuj rech Proverbios —are Salomón xtzʼibʼan kʼi chike— nojinaq che utz taq upixabʼ ri Dios
¿LA UTZ kojelik we kqanimaj ri utaqanik ri Jehová? Rech kqetaʼmaj, rajawaxik kqil ri pixabʼ che kuya chaqe pa ri Utzij. ¿La qas e utz? ¿La kojkitoʼ rech kqariq utzil pa ri qakʼaslemal? Pa ri wuj rech Proverbios, ri ajawinel Salomón xuya kan kʼi pixabʼ che utz che ronojel ri kʼaslemal. Chqetaʼmaj jujun chike.
Ri qachilanik rukʼ ri Dios. Rech kʼo jun utz qachilanik rukʼ ri Jehová, rajawaxik kqakubʼsaj qakʼuʼx chirij. Ri Salomón xubʼij: «Rukʼ ronojel awanimaʼ chakuʼbʼaʼ akʼuʼx chrij ri Ajawaxel man chrij ta kʼut ri awetaʼmanik pa awech wi. Chayaʼ uqʼij ri ukʼolem ri Ajawaxel pa ronojel ri kabʼano, chnataj ri Ajawaxel chawe, areʼ kʼu katkʼamow na bʼik pa ri sukʼalaj bʼe» (Proverbios 3:5, 6). ¿Jas kqabʼan che ukʼutik che kqakubʼsaj qakʼuʼx chirij ri Dios? Kqaya che kukʼam qabʼe xuqujeʼ kqanimaj ri utaqonik. We je kqabʼan waʼ kqabʼan riʼ ri utz pa ri qakʼaslemal: ri ukikotemaxik ri Qatat pa ri kaj xuqujeʼ kqakʼutu che ri Itzel are jun bʼanal tzij (Proverbios 27:11).
Ri familia xuqujeʼ ri e achiʼl. Ri familias qas rajawaxik che kkʼam kibʼe rumal ri Dios. Ri Dios kuya wajun pixabʼ riʼ che ri achi: «¡Chatkikot rukʼ ri akʼulaj pa ri awakʼalal!», rukʼ waʼ kunaʼtasaj che ri achi che rajawaxik sukʼ che ri rixoqil (Proverbios 5:18-20). Che ri ixoq, ri capítulo 31 rech ri Proverbios kuya kʼi utz pixabʼ che, rech ri rachajil xuqujeʼ ri e ral nim kkilo. Xuqujeʼ, qetaʼm, che chike ri alkʼwalabʼ kbʼixik che rajawaxik kkinimaj ri kitat kinan (Proverbios 6:20). Wajun wuj riʼ xuqujeʼ kubʼij che nim ubʼanik ri achilanik, xuqujeʼ kubʼij che utz taj we kqatas qibʼ chikij nikʼaj chik, rumal che we kqatas qibʼ kubʼano che xaq xiw kqachomaj qibʼ (Proverbios 18:1). Tekʼuriʼ, pa neʼ utz che e kʼo qachiʼl, are utz keqachaʼ na xuqujeʼ keqachilaj ta ri weneʼ kojkitaqchij che ubʼanik itzelal (Proverbios 13:20; 17:17).
Pa ri kʼaslemal. Pa ri Proverbios e kʼo utz pixabʼ che kojkitoʼ rech kqariq utzilal, rech utz kqabʼan che rilik ri jastaq, rech kojqaj ta che utijik tzaʼm, xuqujeʼ rech kujux utz ajchakibʼ (Proverbios 6:6; 14:30; 20:1). Kubʼij chaqe chirij ri kʼax kuya we kqabʼan ta ri utaqonik ri Dios (Proverbios 14:12). Xuqujeʼ kuya pixabʼ chaqe rech kqachajij ri qachomanik—ri qas qabʼantajik—, rumal che «kakʼiy wi ri kʼaslemal» (Proverbios 4:23).
Ri e pixabʼ riʼ kiyaʼom utzilal pa kikʼaslemal kʼi winaq, che kimik ketaʼm che are más utz we kqanimaj ri Jehová.
(Esam chupam ri wuj Proverbios.)