Pa ri utinamit ri Ajawaxel kʼot jun ajkʼamal bʼe che kyaʼ pwaq che rumal ri kubʼano. Are kkibʼan junam rukʼ ri xbʼan kan ojer chiʼ xuchaplej ri nabʼe congregación cristiana, e kʼo ajkʼamal bʼe che kʼo ketaʼmabʼal rech kkikʼam kibʼe ri «komon kojonelabʼ rech ri Dios» (Hechos 20:28). Ri ajkʼamal bʼe riʼ e achijabʼ che kʼo nim kachilanik rukʼ ri Ajawaxel che kkikʼam kibʼe ri e kʼo pa ri congregación xuqujeʼ kkichajij, «man xaʼ ta rumal rech chi kixchʼij che ubʼanik, xaneʼ chichajij rukʼ ronojel iwanimaʼ jas ri kubʼij ri Dios. Mitzukuj kʼixbʼalalaj chʼakoj, xaneʼ chichajij ri jumulaj chij rukʼ jun utzalaj iwanimaʼ», kchaʼ ri Jehová chike (1 Pedro 5:1-3). ¿Jas chak kkibʼan ri e ajkʼamal bʼe rumal qech?

Keʼok il chaqe xuqujeʼ kojkichajij. Ri ajkʼamal bʼe kkikʼam qabʼe rukʼ ri utobʼanik ri Loqʼalaj Pixabʼ xuqujeʼ kojkitoʼ rech utz ri kachilanik rukʼ ri Jehová. Ketaʼm che are ri Ajawaxel uyaʼom wajun chak riʼ chike che sibʼalaj nim ubʼantajik, ri ajkʼamal bʼe kkibʼan ta kʼäx che ri utinamit ri Ajawaxel, are kkiya tobʼanik chaqe rech kqariq kikotemal xuqujeʼ utzilal (2 Corintios 1:24). Xaq junam rukʼ jun ajyuqʼ che qas kok il chike ri e uchij pa kijujunal, ri e ajkʼamal bʼe kkikoj kichoqʼabʼ che retaʼmaxik kiwach ri e kʼo pa ri congregación pa kijujunal (Proverbios 27:23).

Kkikʼut chqawach ri kqabʼan che ubʼanik ri kraj ri Ajawaxel. Ronojel semanas, ri e ajkʼamal bʼe kkikʼam bʼe che ubʼanik ri riqbʼal ibʼ pa ri congregación rech kubʼan ko ri qakojonik (Hechos 15:32). Ri achijabʼ riʼ kʼo nim kikojonik xuqujeʼ kkikʼam bʼe che ubʼixik ri utzalaj täq tzij, kojkachilaj xuqujeʼ kojkitoʼ rech kqetaʼmaj chirij ri jalajoj ubʼanik ri chak rech utzijoxik ri utzalaj täq tzij.

Kkiya qachoqʼabʼ pa qajujunal. Rech kkikʼutu che qas keʼok il che ri qachilanik rukʼ ri Ajawaxel, ri e ajkʼamal bʼe rech ri congregación weneʼ keʼopan pa ri qachoch o ketzijon qukʼ pa ri Ja rech Ajawbʼal rech kkibʼij chaqe che kkaj kojkitoʼ xuqujeʼ kkiya ri kubʼsal kʼuʼx chaqe che kuya ri Loqʼalaj Pixabʼ (Santiago 5:14, 15).

Kʼi chike ri e ajkʼamal bʼe xaq xiw ta kʼo kkibʼan pa ri congregación, xuqujeʼ kechakunik rech kkichʼak kipwaq xuqujeʼ kkikoj kitiempo che rilik ri kajwataj chike ri kifamilia ronojel wariʼ kukʼam bʼi tiempo chike. Rajawaxik che nim keqil wi we achijabʼ riʼ rumal che sibʼalaj kechakunik (1 Tesalonicenses 5:12, 13).

• ¿Jas kkibʼan ri e ajkʼamal bʼe pa ri congregación?

• ¿Jas kkibʼan ri ajkʼamal bʼe che ukʼutik che keʼok il chaqe pa qajujunal?

Ri Loqʼalaj Pixabʼ kchʼaw chirij kebʼ jupuq achijabʼ che kkil ri kajwataj pa ri congregación: ri e ajkʼamal bʼe xuqujeʼ ri kepataninik (Filipenses 1:1). Pa ronojel congregación e kʼo wa e qachalal riʼ. ¿Jas chak kkibʼan ri ajtobʼanel pa qawiʼ?

Kkitoʼ ri e ajkʼamal bʼe. Ri e ajtobʼanel e achijabʼ che e rijabʼ xuqujeʼ e kʼo jujun che e rijabʼ täj, konojel kʼo nim kachilanik rukʼ ri Jehová, kojkunik kqakubʼsaj qakʼuʼx chikij, xuqujeʼ are qas kkibʼan ri kubʼij ri Loqʼalaj Pixabʼ. Kkibʼan chak che qas rajawaxik kbʼanik, ri chak riʼ nim ubʼanik xuqujeʼ rajawaxik kbʼan pa ri congregación. Wariʼ kubʼano che ri e ajkʼamal bʼe kʼo kitiempo che ukʼutik chirij ri Loqʼalaj Pixabʼ xuqujeʼ ukubʼsaxik kikʼuʼx ri qachalal.

Kkibʼan chak che kajwatajik. E kʼo jujun chike ri ajtobʼanel kbʼix chike che kkilij konojel ri keʼopan pa ri riqbʼal ibʼ. Jujun chik are kkil ri sonido, kkijach ri wuj, kkajilaj ri pwaq rech ri congregación xuqujeʼ kkibʼij chike ri e kʼo pa ri congregación jachiʼ rajawaxik kyaʼ wi ubʼixik ri utzalaj täq tzij. Xuqujeʼ ketobʼan che ri rajawaxik che ri Ja rech Ajawbʼal. Ri e ajkʼamal bʼe weneʼ kkibʼij chike che kekitoʼ ri e qachalal che e rijabʼ chik. Pa neʼ jalajoj uwach ri chak kyaʼ chike ri ajtobʼanel, e areʼ kkibʼan rukʼ rutzil kanimaʼ je wariʼ kubʼano che nim keʼil wi (1 Timoteo 3:13).

Kkiya jun utz kʼutbʼal rumal ri kkibʼano. Ri e ajtobʼanel e chaʼom rumal che kʼo utz kibʼantajik. Chiʼ kkiya chʼabʼal pa ri riqbʼal ibʼ kubʼan ko che ri qakojonik. Kkiya jun utz kʼutbʼal chiʼ kkiya ubʼixik ri utzalaj täq tzij, kkibʼano che öj nim kqil ubʼixik ri utzalaj täq tzij. Rumal che sibʼalaj kkaj ketobʼanik, kkibʼano che kʼo kikotemal xuqujeʼ utzilal chqaxoʼl (Efesios 4:16). Chiʼ kqʼax ri qʼij kekunik kkibʼan ajkʼamal bʼe.

• ¿Jas kibʼantajik ri ajtobʼanelabʼ?

• ¿Jas kkibʼano rech utz kel ri kbʼan pa ri congregación?

Ri Loqʼalaj Pixabʼ kchʼaw chikij ri Bernabé chiʼl ri apóstol Pablo. Wa e achijabʼ riʼ xekisolij ri e nabʼe congregaciones. ¿Jasche? Rumal che qas xeʼok il chike ri e kachalal pa ri kikojonik. Ri Pablo xubʼij «joʼ chi jumul che kisolixik chik ri qachalal» xubʼij wariʼ rech kekilaʼ jas kibʼanom. Areʼ xraj xubʼan nimaʼq täq bʼe rech kbʼe che kilik xuqujeʼ che uyaʼik kichoqʼabʼ (Hechos 15:36). Kimik are je kkibʼan ri ajsolinelabʼ.

Kojkisolij rech kkiya qachoqʼabʼ. Jun ajsolinel rech circuito kusolij weneʼ 20 congregaciones, jun semana kubʼan pa jujun chike kusolij jun congregación kebʼ mul pa jun junabʼ. Jun ajsolinel rech distrito kusolij kʼi circuitos, jumul pa jun junabʼ kusolij jun chike ri circuito xuqujeʼ kril jun chike ri nim riqbʼal ibʼ rech circuito xuqujeʼ kusolij jun chike ri congregación. Kojkunik kqariq nim utzilal chiʼ kqata ri kibʼanom pa ri kikʼaslemal xuqujeʼ we kʼo kixoqil kojkunik kqetaʼmaj chikij. E areʼ kkikoj kichoqʼabʼ che retaʼmaxik kiwach ri e akʼalabʼ na xuqujeʼ ri e rijabʼ chik, xuqujeʼ sibʼalaj kkaj kojkachilaj chiʼ kqaya ubʼixik ri utzalaj täq tzij xuqujeʼ chiʼ kqakʼut chirij ri Loqʼalaj Pixabʼ chuwach jun winaq chik. Ri e ajsolinel riʼ kebʼe kukʼ ri ajkʼamal bʼe che kisolixik ri e qachalal, xuqujeʼ kkiya qachoqʼabʼ, chiʼ kkiya chʼabʼal pa ri riqbʼal ibʼ xuqujeʼ pa ri nimaʼq riqbʼal ibʼ (Hechos 15:35).

Keʼok il chike konojel. Ri e ajsolinel qas keʼok il che ri ubʼanom ri kachilanik rukʼ ri Jehová ri e kʼo pa ri congregación. Kkimulij kibʼ kukʼ ri ajkʼamal bʼe xuqujeʼ kukʼ ri ajtobʼanel rech kkilo jas tijan kkibʼan che ubʼanik ri kichak pa ri congregación xuqujeʼ kkiya pixabʼ chike. Kekitoʼ ri precursores rech utz kkibʼan che ri kichak, xuqujeʼ kekikotik chiʼ kketaʼmaj kiwach ri winaq che tijan chi kketaʼmaj chirij ri Ajawaxel xuqujeʼ che tijan knimar ri kikojonik chirij ri Ajawaxel. Konojel ri e qachalal riʼ e ajchak che qaxoʼl rech kqariq ri utzilal (2 Corintios 8:23). Rajawaxik kubʼan ri qakojonik junam kukʼ ri ke e areʼ xuqujeʼ ri qasukʼilal che ri Ajawaxel (Hebreos 13:7).

• ¿Jasche kkisolij ri congregaciones ri ajsolinelabʼ?

• ¿Jas kabʼano rech kawetaʼmaj utz täq jastaq che ri kisolinik ri ajsolinelabʼ?

Chiʼ kʼo jun kʼäx, ri testigos rech Jehová chanim kkichomaj ri kkibʼano rech kkilo jas kkibʼan che kitoʼik ri qachalal che xkiriq kʼäx. Ri choqʼabʼ che kkikoj che ubʼanik wariʼ kukʼut ri qastzij loqʼoqʼenik kʼo chkixoʼl (Juan 13:34, 35; 1 Juan 3:17, 18). ¿Jas kqabʼano rech kojtobʼanik?

Kqaya pwaq. Chiʼ xpe jun nimalaj wiʼjal pa Judea, ri nabʼe cristianos rech Antioquía xkiya pwaq rech kkoj che kitoʼik ri kachalal pa ri kikojonik (Hechos 11:27-30). Xaq junam, chiʼ kqata che e kʼo qachalal che tijan kkiriq kʼaxkʼolil. Kqaya pwaq pa ri congregación rech kkoj che kitoʼik ri e qachalal che kʼo rajawaxik chike (2 Corintios 8:13-15).

Keqatoʼ rukʼ ri kqabʼano. Ri e ajkʼamal bʼe che e kʼo jachiʼ xbʼan wi ri kʼäx kkilo jachiʼ e kʼo wi konojel ri e kʼo pa ri congregación xuqujeʼ kkilo we kʼot kʼäx xkiriqo. Jun jupuq qachalal e tijom rech kkitoʼ ri qachalal che kʼo rajawaxik chike, kkil ujachik ri ktijowik, ri jaʼ, ri atzʼyaq, jachiʼ kekʼejeʼ wi ri qachalal xuqujeʼ we kʼo jachin kajwataj ajkunanel che. Kʼi chike ri Testigos che kʼo ketaʼmabʼal chirij ri tijan kbʼanik kkitoʼ ri winaq xuqujeʼ ri pwaq kkisach ri e areʼ are ketojowik xuqujeʼ ketobʼan che usukʼumaxik ri kachoch ri e qachalal xuqujeʼ ri Ja rech Ajawbʼal che xewulinik. Ri utzilal che kʼo chqaxoʼl ri öj Testigos xuqujeʼ ri ronojel ri qetaʼmam rumal che junam kqabʼan ri qachak, kubʼano che chanim kqaya tobʼanik chike ri kajwataj chike. Are kqaya ri tobʼanik chike «ri qachalal pa ri kojonik», xuqujeʼ chiʼ kojkunik, keqatoʼ ri nikʼaj chik winaq pa neʼ jun chi wi ri kikojonem (Gálatas 6:10).

Kqaya kubʼsal kʼuʼx rech ri Loqʼalaj Pixabʼ chike. Ri winaq che xkiriq kʼäx are qas kajwataj kubʼsal kʼuʼx chike. Chuwach ri kʼaxkʼolil riʼ, xaq xiw kqariq qachoqʼabʼ rukʼ ri Jehová, ri «Dios waʼ ri kukuʼbʼisaj qakʼuʼx pa ronojel» (2 Corintios 1:3, 4). Rukʼ rutzil qanimaʼ kqaya ubʼixik ri ubʼim ri Ajawaxel chike ri kiriqom kʼäx, kqakʼut chkiwach che ri Rajawbʼal ri Ajawaxel qas kresaj na ronojel ri kʼäx che sibʼalaj kuya kʼaxkʼolil (Apocalipsis 21:4).

• ¿Jasche ri testigos rech Jehová aninaq kkimulij jastaq xuqujeʼ winaq rech kekitoʼ ri qachalal chiʼ kkiriq jun kʼäx?

• ¿Jas kubʼsal kʼuʼx re ri Loqʼalaj Pixabʼ kojkunik kqabʼij chike ri winaq che xekʼaseʼ kanoq?

Chiʼ xa jubʼiqʼ chi kraj che kopan ri ukamikal ri Jesús, xtzijon kukʼ kajibʼ chike ri apóstoles pa kitukel: Pedro, Santiago, Juan xuqujeʼ Andrés. Chiʼ xubʼij ri kbʼan pa ri kʼisbʼal täq qʼij, xubʼan jun pregunta che nim ubʼanik: «¿Jachin kʼu ri jikalaj pataninel, utz uchomanik, ri xkoj rumal ri rajaw pakiwiʼ ri aj uwo rachoch che uyaʼik ri tzuqbʼal kech pa ri kiqʼijol?» (Mateo 24:3, 45; Marcos 13:3, 4). Rukʼ wa täq tzij riʼ, Jesús, che are ajaw, xubʼij che kuya chike jupuq winaq rech kkiya ri rajawaxik che ri kikojonik ri rajtijoxelabʼ pa ri kʼisbʼal täq qʼij. ¿E jachin riʼ?

E areʼ jun alaj jupuq cristianos che kebʼe pa ri kaj. Ri «pataninel» kimik are ri Jupuq Ajkʼamal bʼe cho ronojel uwach Ulew kech ri testigos rech Jehová. Kuya ri kajwataj chike ri rachiʼl pa ri kikojonik qas pa ri qʼij chiʼ kajwataj chike. Sibʼalaj rajawaxik chike ri cristianos wajun jupuq sukʼalaj winaq riʼ rech kuya ri «kiwa ronojel qʼij» (Lucas 12:42).

Kril ri kajwataj che rachoch ri Ajawaxel. (1 Timoteo 3:15). Jesús xuya chike jupuq winaq rech kkil ri kajwataj che ri utinamit ri Jehová che kʼo waral pa ri uwach Ulew, wariʼ kubʼij che kuchajij ri jastaq re che kʼo cho ruwach ulew, kkil ri kbʼan che ubʼixik ri utzalaj täq tzij xuqujeʼ ri kkʼut chqawach pa ri congregación. Rumal laʼ, «ri jikalaj pataninel, utz uchomanik» kuya ri kajwataj chaqe pa ri qakojonik pa täq ri wuj che kkoj chiʼ kyaʼ ubʼixik ri utzalaj täq tzij, ri kqakoj pa ri riqbʼal ibʼ xuqujeʼ pa ri nimaʼq täq riqbʼal ibʼ.

Ri «ajpatanel» are jik che ri qastzij re ri Loqʼalaj Pixabʼ xuqujeʼ che ubʼixik ri utzalaj täq tzij, xuqujeʼ utz uchomanik chiʼ kril rukʼ unojibʼal ronojel ri jastaq che e kʼo pa ri uwach Ulew che ri Cristo xubʼij che, che rajawaxik krilo (Hechos 10:42). Jehová tijan kutewchij ri kichak xuqujeʼ tijan kubʼano che kekʼiyar ri winaq che kkaj kketaʼmaj chirij ri Loqʼalaj Pixabʼ xuqujeʼ kuya kʼi jastaq che kojutoʼ pa ri qakojonik (Isaías 60:22; 65:13).

• ¿Jachin xuchaʼ ri Jesús rech kuya chike ri rajtijoxelabʼ ri kajwataj chike pa ri kikojonik?

• ¿Jasche kbʼix jik xuqujeʼ utz uchomanik che ri «pataninel»?

Pa ri nabʼe täq 100 junabʼ pa täq kiqʼij ri apóstoles, jun alaj jupuq, ri «e taqom e kachil täq ri tatayibʼ ri ketaqan pa ri komon kojonelabʼ» are kkichaʼ ubʼanik jastaq pa ubʼiʼ ri congregación rech ri cristianos che e chaʼom rech kebʼe pa ri kaj (Hechos 15:2). Rech junam kkichaʼ ubʼanik jun jastaq, are kkil ri kubʼij ri Loqʼalaj Pixabʼ xuqujeʼ kkiya che ri uxlabʼixel kukʼam kibʼe (Hechos 15:25). Je waʼ kbʼan kimik.

E chaʼom rumal ri Ajawaxel rech kkibʼan ri urayinik. Ri e qachalal che e chaʼom rech kebʼe pa ri kaj che jujun chike e are ri Jupuq Ajkʼamal bʼe cho ronojel ri uwach Ulew e areʼ sibʼalaj kkiloqʼoqʼej ri Loqʼalaj Pixabʼ xuqujeʼ kekun che rilik ri jastaq che rajawaxik chaqe che ubʼanik ri uchak ri Ajawaxel xuqujeʼ che ri qakojonik. Kkimulij kibʼ ronojel täq semana rech kkilo ri kajwataj chike konojel ri qachalal che e kʼo pa ronojel ri uwach Ulew. Junam che xbʼan kan pa ri nabʼe 100 täq junabʼ, kkiya pixabʼ che esam pa ri Utzij ri Ajawaxel, kkiya ubʼixik pa wuj, kumal ri ajsolinel o rumal nikʼaj chik. Wariʼ kubʼano che junam ri kichomanik chirij ri Ajawaxel xuqujeʼ junam kbʼan pa ri utinamit (Hechos 16:4, 5). Ri Jupuq Ajkʼamal bʼe cho ronojel ri uwach Ulew kril ri kbʼan che uyaʼik ri kajwataj chaqe rech kubʼan nim ri qachilanik rukʼ ri Ajawaxel, krilo che qas kyaʼ ubʼixik chirij ri Ajawbʼal chike konojel ri winaq xuqujeʼ kril rech utz kichaʼik ri qachalal achijabʼ kbʼanik rech kyaʼ keqelen pa ri congregación.

Kkiya che ri uxlabʼixel kukʼam kibʼe. Ri Jupuq Ajkʼamal bʼe cho ronojel ri uwach Ulew kkibʼan ri kraj ri Jehová, ri sibʼalaj nim ubʼanik pa ri kajulew, xuqujeʼ kkibʼan ri kubʼij ri Ajkʼamal bʼe puwiʼ ri congregación, Jesús (1 Corintios 11:3; Efesios 5:23). E areʼ kkichomaj täj che nim kibʼanik o e areʼ ajchaqʼe ri utinamit ri Ajawaxel. E areʼ, junam kukʼ konojel ri nikʼaj chik che kebʼe pa ri kaj «keterenem ri Alaj Chij [Jesús] apawijeʼ ta ne ri kabʼe wi» (Apocalipsis 14:4). Ri Jupuq Ajkʼamal bʼe cho ronojel ri uwach Ulew sibʼalaj nim kkil wi chiʼ kqataʼ chikij pa ri qachʼawem.

• ¿Pa täq ri kiqʼij ri apóstoles e jachin ajkʼamal täq bʼe pa kiwiʼ ronojel ri congregación?

• ¿Jas kubʼan kimik ri Jupuq Ajkʼamal bʼe cho ronojel ri uwach Ulew rech kkʼam ubʼe rumal ri Jehová?

Betel are jun bʼiʼaj che pa hebreo kraj kubʼij «Rachoch Dios» (Génesis 28:17, 19). Wariʼ are jun utz bʼiʼaj che xkoj che jupuq nimaʼq täq ja che ri testigos rech Jehová kibʼanom pa kʼi tinamit rech ri uwach Ulew chilaʼ kil wi ri rajawaxik rech ktzijox ri utzalaj täq tzij. Ri e Ajkʼamal bʼe cho ronojel uwach Ulew kechakun pa ri unimal che kʼo pa ri tinamit, Nueva York (Estado Unidos), chilaʼ kkil wi ri chak kbʼan pa kʼi täq ja kbʼix sucursales chike che e kʼo pa jalajoj nimaʼq täq tinamit. Ri winaq che e kʼo pa wa nimaʼq täq ja riʼ kbʼix familia Betel chike. Junam rukʼ jun familia, xaq jun e kʼo wi xuqujeʼ junam kkibʼan ri kichak, junam kewaʼik xuqujeʼ junam kketaʼmaj chirij ri Loqʼalaj Pixabʼ (Salmo 133:1).

Are jun lugar jachiʼ konojel ri familia rech Betel kechakun rukʼ ronojel kanimaʼ. Pa ronojel ja ubʼiʼ Betel, e kʼo achijabʼ xuqujeʼ ixoqibʼ ajkojonelabʼ che are kkibʼan ri kraj ri Ajawaxel kkikoj ronojel ri kiqʼij che ubʼanik ri rajawaxik che ri Ajawbʼal (Mateo 6:33). Kʼot nijun chike ktojik, tekʼuriʼ kyaʼ jachiʼ kekʼejeʼ wi konojel xuqujeʼ kyaʼ kiwa xuqujeʼ kyaʼ nikʼaj pwaq chike rech kkikoj che ri kajwataj chike. Konojel pa Betel kʼo jun kichak, weneʼ ajtzʼibʼanelabʼ o kkibʼan wa. E kʼo jujun kechakun jachiʼ kbʼan wi ri wuj, e kʼo jujun kkimes ri ja, kkichʼaj ri atzʼyaq kkilij ri ja xuqujeʼ nikʼaj chik chak.

Are jun lugar jachiʼ kbʼan wi kʼi chak rech kyaʼ ubʼixik ri utzalaj täq tzij. Ri qas rumal che e kʼo ri ja kbʼix Betel chike are che kkibʼano che kyaʼ ubʼixik ri qastzij chirij ri Loqʼalaj Pixabʼ chike e kʼi winaq. Wajun wuj riʼ are jun kʼutbʼal re. Xtzʼibʼax rukʼ ri kitobʼanik ri Jupuq Ajkʼamal bʼe cho ronojel uwach Ulew, tekʼuriʼ xtaq bʼi chike e kʼi jupuq winaq pa ronojel uwach Ulew rech xkiqʼaxej pa nikʼaj chik chʼabʼal, xuqujeʼ xtaq bʼi pa jujun Betel jachiʼ kʼo wi chʼichʼ che aninaq kubʼan wuj tekʼuriʼ xetaq bʼi pa más che 110.000 congregaciones. Rukʼ ronojel ri chak kbʼan che wariʼ, konojel ri e familias Betel kkiya ri kitobʼanik che ri chak che sibʼalaj rajawaxik ubʼanik chuwach ronojel ri jastaq, ubʼixik ri utzalaj täq tzij chike ri winaq (Marcos 13:10).

• ¿E jachin kepatanin pa rachoch ri Ajawaxel xuqujeʼ jas kyaʼ chike?

• ¿Jas chak sibʼalaj rajawaxik ketobʼan ri familia Betel che ubʼanik?

Ri familia Betel kechakun chirij jalajoj jastaq, rukʼ wariʼ kkiya tobʼanik che ubʼixik ri utzalaj täq tzij pa jun o pa kʼi tinamit. Weneʼ kechakun chkixoʼl jun jupuq winaq che kkiqʼaxej ri kubʼij jun wuj pa jun chik chʼabʼal, kkibʼan ri wuj, kkibʼan ubʼanik, jujun chike kkikʼol ri wuj, kechakun rukʼ audio xuqujeʼ video o ubʼanik chi nikʼaj chik che sibʼalaj rajawaxik kbʼan pa ri tinamit jachiʼ e kʼo wi.

Kʼo jun Jupuq Ajkʼamal bʼe puwiʼ jun sucursal che kril ri tijan kbʼanik. Ri Jupuq Ajkʼamal bʼe cho ronojel uwach Ulew kiyaʼom chike jun Jupuq Ajkʼamal bʼe rech kkil ri kbʼan pa jun sucursal e oxibʼ o más achijabʼ che e ajkʼamal bʼe che qas kekun che ubʼanik ri chak. Waʼ nikʼaj qachalal riʼ kkibʼij chike ri Jupuq Ajkʼamal bʼe cho ronojel ri uwach Ulew we chupam jun tinamit tijan kekʼiyar ri winaq che kkaj kketaʼmaj chirij ri Ajawaxel o kʼo jun kʼäx kriqik. Wariʼ keʼutoʼ ri e Jupuq Ajkʼamal bʼe cho ronojel ri uwach Ulew rech kkilo jas jastaq utz kyaʼ na ubʼixik pa ri nikʼaj chik wuj, pa ri riqbʼal ibʼ xuqujeʼ pa ri nimaʼq täq riqbʼal ibʼ che kbʼan na pa ri petinaq. E kʼo achijabʼ che kepe che ukʼexwach ri Jupuq Ajkʼamal bʼe cho ronojel ri uwach Ulew, ketaq bʼi che rilik jas tijan kbʼan pa ri sucursales xuqujeʼ kkiya utz pixabʼ chike ri Jupuq Ajkʼamal bʼe puwiʼ ri sucursal rech utz kkibʼan che ri kichak (Proverbios 11:14). Chiʼ kpe che solinik kbʼan jun riqbʼal ibʼ che nim ubʼanik ri qachalal che utoqom lo rumal ri central mundial kuya jun chʼabʼal rech kuya kichoqʼabʼ konojel ri e kʼo pa ri tinamit che kril ri sucursal.

Kyaʼ tobʼanik chike ri congregaciones. Jujun chike ri e qachalal ri kichak are kkilo we utz kbʼan chi jun kʼakʼ congregación. Nikʼaj chik kkil ri chak kkibʼan ri precursores, ri misioneros xuqujeʼ ri e ajsolinel rech circuito che e kʼo pa ri tinamit jachiʼ kʼo wi ri sucursal. Kkil ubʼanik ri nimaʼq täq riqbʼal ibʼ, kkil ri rajawaxik kbʼanik rech kyak kʼakʼ täq Ja rech Ajawbʼal xuqujeʼ kkilo che kjach ri wuj che kajwataj chike ri e congregaciones rech utz ri kachilanik rukʼ ri Ajawaxel. Ronojel ri jastaq che kbʼan pa jun sucursal kubʼano che utz ubʼixik ri utzalaj täq tzij kbʼanik (1 Corintios 14:33, 40).

• ¿Jas tobʼanik kkiya ri Jupuq Ajkʼamal bʼe puwiʼ ri sucursal chike ri Jupuq Ajkʼamal bʼe cho ronojel ri uwach Ulew?

• ¿Jas chak kbʼan pa jun sucursal?

Rech kojkunik kqakoj qachoqʼabʼ che ubʼixik «ri junalik tzij re kolobʼal ibʼ» chike «ri e kʼo cho ri uwach ulew, chke konojel ri nimaʼq täq tinimit, xuqujeʼ konojel amaqʼ, konojel chʼabʼal», rumal waʼ kqabʼan jalajoj wuj xa jubʼiqʼ kraj che 750 chʼabʼal (Apocalipsis 14:6). ¿Jas kqabʼano rech kojkunik kqabʼan wajun chak riʼ? Rumal che e kʼo jupuq winaq rech jalajoj lugar che kkiya kitobʼanik rech ktzʼibʼax ri wuj xuqujeʼ rukʼ ri kitobʼanik jupuq winaq che sibʼalaj kechakunik che kkiqʼaxaj pa nikʼaj chik chʼabʼal, konojel e testigos rech Jehová.

Chiʼ ktzʼibʼax ri wuj ktzʼibʼax pa ri chʼabʼal inglés. Ri Jupuq Ajkʼamal bʼe cho ronojel ri uwach Ulew kril ri chak re utzʼibʼaxik ri wuj pa ri kinimal ri e sucursales. Xuqujeʼ kril ri kichak ri ajtzʼibʼanelabʼ re ri wuj pa ri unimal ri sucursales xuqujeʼ kkil ri e kʼo pa nikʼaj chik sucursales. Rumal che e jalajoj ri ketzʼibʼan ri e wuj kubʼano che kechʼaw chirij jalajoj täq jastaq che kechoman ri winaq chirij rech jalajoj tinamit, rumal laʼ ri qawuj kubʼano che sibʼalaj utz kkil winaq rech jalajoj tinamit.

Ri ktzʼibʼaxik ktaq bʼi chike ri winaq che kkiqʼaxaj pa nikʼaj chik chʼabʼal. Chiʼ kʼisnaq chi utzʼibʼaxik xuqujeʼ ilom chik che utz, ktaq bʼi chike konojel ri jujun jupuq ri kkiqʼaxej pa nikʼaj chik chʼabʼal che e kʼo pa ronojel ri uwach Ulew, kkiqʼaxej pa jun chik chʼabʼal, kkilo xuqujeʼ kkisukʼumaj ri tzij tzʼibʼam. E areʼ kkikoj kichoqʼabʼ che utzʼibʼaxik ri «jikalaj täq tzij» rech kekunik kkiya ubʼixik pa kichʼabʼal ri kraj kubʼij ri wuj che tzʼibʼam pa inglés (Eclesiastés 12:10).

Ri e computadoras kkibʼano che chanim kel ri chak. Pa neʼ e kʼo wa e chakubʼal riʼ e rajawaxik ri ketzʼibʼan ri wuj xuqujeʼ ri kkiqʼaxaj chi pa jun chik chʼabʼal. Tekʼuriʼ, rukʼ wariʼ kubʼano che ri kichak más chanim kelik chiʼ kkikoj ri diccionarios, ri jastaq che e kʼo pa ri chʼabʼal xuqujeʼ ri jastaq che kkoj che retaʼmaxik más chirij ri tijan kechakun wi che e kʼo pa ri computadora. Ri testigos rech Jehová kibʼanom ri Sistema Electrónico de Edición Plurilingüe (MEPS, rumal ubʼiʼ pa inglés). Wariʼ are jun chakubʼal pa ri computadora che kkunik kusukʼumaj ri wuj pa kʼi chʼabʼal rech kkoj ri e wachbʼal xuqujeʼ rech kbʼan wuj che.

¿Jasche kqakoj qachoqʼabʼ che ubʼanik wariʼ, xuqujeʼ pa kichʼabʼal e kʼi täj winaq? Rumal che ri Jehová «karaj chi kekolotaj ri winaq chi nimalaj konojel, xuqujeʼ chi kaketamaj ri qastzij» (1 Timoteo 2:3, 4).

• ¿Jas kbʼan che utzʼibʼaxik ri qawuj?

• ¿Jasche kqaqʼaxej ri qawuj pa kʼi chʼabʼal?

Ri utinamit ri Ajawaxel kubʼano xuqujeʼ kujach sibʼalaj kʼi Loqʼalaj Pixabʼ xuqujeʼ nikʼaj chik wuj, kubʼan pa ronojel junabʼ wariʼ kkʼayix täj. Kbʼanik xuqujeʼ kilix ri Ja rech Ajawbʼal xuqujeʼ ri sucursales. Kyaʼ tobʼanik chike konojel ri kechakun pa Betel, chike ri misioneros xuqujeʼ chike ri kkiriq kʼäx. Rumal laʼ weneʼ kachomaj: «¿Jachiʼ kkʼam wi ri pwaq che kkoj che ronojel wariʼ?».

Ktoj täj xuqujeʼ ktaʼ ta pwaq. Pa neʼ ri pwaq che kkoj che ubʼixik ri utzalaj täq tzij are sibʼalaj nim, kqataʼ ta pwaq chike ri winaq. Qʼaxinaq chiʼ más che 100 junabʼ, ri ukabʼ wuj ubʼiʼ La Atalaya xubʼij che are ri Jehová ri tijan kojtowik xuqujeʼ kqaxululej ta pwaq, o kqataʼ ta limosnas, xuqujeʼ kqataʼ ta ri kitobʼanik ri winaq. ¡Xuqujeʼ rajawaxik täj kqabʼano! (Mateo 10:8.)

Ri ksach chirij wajun chak riʼ are ri kuchuj che kkiya ri winaq rukʼ ronojel kanimaʼ. E kʼi winaq sibʼalaj nim kkil ri tijonik kqaya chirij ri Loqʼalaj Pixabʼ rumal laʼ kkiya kitobʼanik. Ri Testigos rukʼ kikotemal kkikoj ri kitiempo, kichoqʼabʼ, kipwaq xuqujeʼ nikʼaj chik rech kyaʼ ubʼixik ri urayinik ri Ajawaxel pa ronojel ri uwach Ulew (1 Crónicas 29:9). Pa ri Ja rech Ajawbʼal xuqujeʼ pa ri nim riqbʼal ibʼ kʼo kaxon rech kuchuj chilaʼ kkiya ri kikuchuj e jachin kkaj kkiyaʼo. O kkiya pa ri qakʼolbʼal pa Internet jw.org. Kʼi mul, ri keyaʼow ri pwaq are winaq che xa kebʼ oxibʼ jastaq ke kʼolik, e junam rukʼ ri kʼutbʼal rech ri malkaʼn ixoq che mebʼaʼ che xchʼaw ri Jesús chirij che xuya ri ukuchuj pa ri kaxon rech ri loqʼalaj ja ojer (Lucas 21:1-4). Je wariʼ, konojel kekunik kkitas «jubʼiqʼ» rech kekunik kkiya «jas ri kape» pa kanimaʼ (1 Corintios 16:2; 2 Corintios 9:7).

Qas qetaʼm che ri Jehová kuya pa ri kanimaʼ ri winaq che kkaj kkiya uqʼij rukʼ ri jastaq ke che ketobʼan che ri Ajawbʼal, rech rumal ri urayinik ri Jehová kbʼan ri chak uyaʼom (Proverbios 3:9).

• ¿Jas kubʼano che ri utinamit ri Ajawaxel xaq ta junam kukʼ ri nikʼaj chik kojonik?

• ¿Jas kbʼan che ukojik ri kuchuj che kqaya rukʼ rutzil qanimaʼ?

Junam che kubʼij ri bʼiʼaj Ja rech Ajawbʼal, ri qas kkʼut chilaʼ are chirij ri Rajawbʼal ri Ajawaxel, ri qas xuya ubʼixik ri Jesús (Lucas 8:1).

E kʼo ja rech ri qastzij qʼijilanik pa kʼi tinamit. Chupam wa täq ja riʼ, ri Testigos kkilo jachiʼ kuya wi ubʼixik ri congregación ri utzalaj täq tzij chirij ri Ajawbʼal (Mateo 24:14). Ri Ja rech ri Ajawbʼal e jalajoj kinimal xuqujeʼ kibʼanik tekʼuriʼ e bʼanom ta rukʼ jastaq re ubʼanik nimal, kʼi chike kkimulij kibʼ kebʼ oxibʼ congregaciones chupam. Pa wa täq junabʼ riʼ, qayakom sibʼalaj e kʼi kʼakʼ täq Ja rech Ajawbʼal (weneʼ jobʼ pa jun qʼij) rumal che tijan kekʼiyar ri e testigos pa täq congregaciones. ¿Jas kbʼan che uyakik? (Mateo 19:26.)

Keyak rukʼ kuchuj che e yaʼom che ubʼanik ri ja. Wa täq kuchuj riʼ ktaq bʼi pa ri sucursal rech kyaʼ ri pwaq pa qajik chike nikʼaj chik congregaciones che kkaj kkiyak jun Ja rech Ajawbʼal o kkibʼan ubʼanik.

Keyak rukʼ kitobʼanik winaq rech jalajoj lugar. Pa kʼi tinamit kmulix jun Jupuq winaq rech kechakun rukʼ Ja rech Ajawbʼal. Ri jupuq kebʼe pa jalajoj congregaciones rech ri nim tinamit, e kʼo jujun mul kebʼe pa lugar che sibʼalaj naj e kʼo wi rech kkitijoj ri e qachalal che e kʼo chilaʼ che kkiyak ri Ja rech Ajawbʼal. Xuqujeʼ pa nikʼaj chik tinamit ri e testigos che kʼo ketaʼmabʼal e chaʼom rech kkʼil ri chak pa ri kitinamit. Pa neʼ keʼopan qachalal che kʼo ketaʼmabʼal che ri chak pa jujun chke ri lugar jachiʼ kyak wi ri ja, konojel ri e kʼo pa ri congregación kkiya ri kitobʼanik che tojom täj. Are ri uxlabʼixel rech ri Jehová xuqujeʼ ri kichoqʼabʼ ri qachalal che kkikoj rukʼ ronojel kanimaʼ tijan kbʼanowik che kbʼan wajun chak riʼ (Salmo 127:1; Colosenses 3:23).

• ¿Jasche kbʼix Ja rech Ajawbʼal chike ri ja jachiʼ kqaya wi uqʼij ri Ajawaxel?

• ¿Jasche kojkunik kqayak Ja rech Ajawbʼal pa ronojel uwach Ulew?

Ronojel ri Ja rech Ajawbʼal kech ri testigos rech Jehová kkikoj ri saqalaj ubʼiʼ ri Ajawaxel. Rumal laʼ, kqachomaj che uyaʼik ri qatobʼanik che usuʼik ri ja, uchajixik rech utz kpetik are nim ubʼanik rumal che kuya uqʼij ri Ajawaxel. Konojel kekunik kkiya ri kitobʼanik.

Chqaya qatobʼanik rech kqameso o kqasuʼ chiʼ kkʼis ri riqbʼal ibʼ. Chiʼ kkʼis ri riqbʼal ibʼ, ri e qachalal achijabʼ xuqujeʼ ixoqibʼ sibʼalaj kekikotik chiʼ kkimeso o kkisuʼ jubʼiqʼ ri Ja rech Ajawbʼal rech chʼajchʼoj. Jumul pa jun semana, ksuʼik o kmes ronojel. Jun ajkʼamal bʼe o jun ajtobʼanel kril ri chak kbʼanik, kʼi mul tzʼibʼam chik jas jastaq rajawaxik kbʼanik, jujun kʼutbʼal re: kmesik, ksuʼik o kchʼaj upam ri ja, usuʼik ri jastaq, unutik ri tem, uchʼajik ri bʼanbʼal chulaj, usuʼik ri ventana, ukʼaqik ri mes o umesik chirij ri ja xuqujeʼ rilik ri täq kotzʼiʼj. Weneʼ jumul pa jun junabʼ ktas jun qʼij rech kmesik o ksuʼ ronojel ri jastaq kʼo pa ri Ja rech Ajawbʼal. Chiʼ kqabʼij chike ri e qalkʼwal che kkibʼan jujun chike wa täq jastaq riʼ, tijan kqakʼut chkiwach rech nim kkil wi ri lugar jachiʼ kqaya wi qʼijilanik che ri Ajawaxel (Eclesiastés 5:1).

Kyaʼ ri tobʼanik rech ksukʼumax jujun täq jastaq. Ronojel junabʼ, kil ronojel ri ubʼanom ri Ja rech Ajawbʼal xuqujeʼ ri kajwataj che, kil ri upam xuqujeʼ ri rij. Chiʼ kiltaj wariʼ, kbʼan ronojel ri kajwataj che ri Ja rech Ajawbʼal rech utz kpetik, rukʼ wariʼ kqʼelobʼ täj rech kajwataj ta nim pwaq che (2 Crónicas 24:13; 34:10). Jun Ja rech Ajawbʼal che chʼajchʼoj xuqujeʼ utz bʼanom che are jun lugar che yaʼtal che, che kyaʼ qʼijilanik che ri Ajawaxel chupam. Chiʼ kojtobʼan che ubʼanik wajun chak riʼ, kqakʼutu che sibʼalaj kqaj ri Jehová xuqujeʼ che nim kqil wi ri Ja rech Ajawbʼal (Salmo 122:1). Xuqujeʼ kuya jun utz kʼutbʼal chkiwach nikʼaj winaq chik (2 Corintios 6:3).

• ¿Jasche rajawaxik kqilij ri ja jachiʼ kqaqʼijilaj wi ri Ajawaxel?

• ¿Jas rajawaxik kbʼanik rech chʼajchʼoj xuqujeʼ utz ri Ja rech Ajawbʼal?

¿La kawaj katzukuj chi nikʼaj rech kkʼiy más awetaʼmabʼal chirij ri Loqʼalaj Pixabʼ? ¿La kʼo jun texto che qas ta kachʼobʼo, ukʼaslemal jun winaq, jun lugar o jastaq che kubʼij ri Loqʼalaj Pixabʼ? O ¿la xachomaj che ri Utzij ri Ajawaxel kkunik katutoʼ chuwach jun kʼäx? Rumal laʼ chakojoʼ ri jalajoj täq wuj che e kʼo pa ri Ja rech Ajawbʼal.

Kʼo jalajoj wuj che katutoʼ che retaʼmaxik más. Qastzij wi, at kʼot awe ronojel ri wuj che esam pa ri Loqʼalaj Pixabʼ che kʼo pa ri achʼabʼal kech ri testigos rech Jehová. Tekʼuriʼ pa ri Ja rech Ajawbʼal, kʼo kʼi chike ri wuj che kʼateʼ esam loq. Xuqujeʼ kʼo jalajoj uwach Loqʼalaj Pixabʼ, kʼo jun utz diccionario, xuqujeʼ nikʼaj chik wuj che are ta ri e testigos rech Jehová e bʼanowinaq. Chiʼ majaʼ kumaj ri riqbʼal ibʼ o chiʼ ukʼisom chik, at katkunik kakojo. We kʼo jun computadora, weneʼ kʼo ri Watchtower Library chupam. Wariʼ are jun programa pa ri computadora che kʼo sibʼalaj kʼi wuj chupam xuqujeʼ kʼäx ta kbʼan che utzukuxik katkunik kakoj ri ubʼiʼ ri kawaj kawetaʼmaj chupam, jun tzij o jun texto rech ri Loqʼalaj Pixabʼ.

Wariʼ sibʼalaj utz chike ri ajtijoxelabʼ rech riqbʼal ibʼ Qachak xuqujeʼ Qakʼaslemal. Utz kakoj ri wuj rech ri Ja rech Ajawbʼal rech katkunik kaya ubʼixik chirij jun chak che kyaʼ chawe. Ri ajkʼamal bʼe rech ri riqbʼal ibʼ Qachak xuqujeʼ Qakʼaslemal areʼ kilow ri wuj rech ri Ja rech Ajawbʼal. Areʼ kilowik che qas kʼo pa ri Ja rech Ajawbʼal ronojel ri wuj che e kʼakʼ xuqujeʼ che utz unutik ubʼanom. Areʼ o ri qachalal che tijan katutoʼ che retaʼmaxik chirij ri Loqʼalaj Pixabʼ kkunik katutoʼ che utzukuxik ri kawaj kawetaʼmaj. Tekʼuriʼ, kuya täj che kkʼam bʼi nijun chike ri wuj rech ri Ja rech Ajawbʼal. Xuqujeʼ, kqaj kqachajij ri wuj keqajuchʼ täj.

Ri Loqʼalaj Pixabʼ kubʼij rech kqariq ri «retaʼmabʼal ri Dyos» rajawaxik kqakoj qachoqʼabʼ che utzukuxik junam che «utzukuxik jun qʼinomal» (Proverbios 2:1-5, TW). Ri wuj rech ri Ja rech Ajawbʼal kekunik katkitoʼ che uriqik.

• ¿Jas kʼo pa ri ukʼolbʼal ri wuj rech ri Ja rech Ajawbʼal che kojutoʼ che uchʼobʼik jun jastaq?

• ¿Jachin kkunik katutoʼ rech katkunik kakoj ri kʼo chupam ri kʼolbʼal wuj rech ri Ja rech Ajawbʼal?

Ri Jesús xubʼij wariʼ chike ri rajtijoxelabʼ: «Chtunun ri ichaj chkiwach ri winaq, rech kekil ri utzalaj täq ichak, kakinimarisaj kʼu uqʼij ri iTat ri kʼo pa ri kaj» (Mateo 5:16). Rumal wariʼ, öj utz ukojik kqabʼan che ri jastaq che tijan kkesaj lo ri winaq, chkixoʼl kʼo ri Internet. Ri qakʼolbʼal pa Internet, jw.org/quc are ri qas kʼolbʼal jachiʼ kriqtaj wi chirij ri kkibʼano xuqujeʼ ri kikojonik ri testigos rech Jehová. ¿Jas kʼo chupam wariʼ?

Kyaʼ ubʼixik chirij ri ktaʼ chirij ri Loqʼalaj Pixabʼ che konojel ri winaq kechoman chirij. Katkunik kariq ri kyaʼ ubʼixik chirij jujun chike ri preguntas che nim kibʼantajik che kkibʼan ri winaq. Jun kʼutbʼal, ri e alaj taq wuj ¿La kopan na jun qʼij che kʼo ta chi kʼax? xuqujeʼ ¿La kekʼastaj na ri kaminaqibʼ?, wariʼ kʼo pa Internet pa más che 600 chʼabʼal. Xuqujeʼ katkunik kariq ri Traducción del Nuevo Mundo pa más che 130 chʼabʼal xuqujeʼ kʼi nikʼaj chik wuj rech katkunik kawetaʼmaj chirij ri Loqʼalaj Pixabʼ, chkixoʼl kʼo ri wuj ¿Su qas kukʼut ri Loqʼalaj Pixabʼ?, xuqujeʼ ri kʼakʼ täq wuj rech La Atalaya xuqujeʼ ¡Despertad!, kʼi chike wa wuj riʼ kuya ksikʼix uwach o kta pa ri computadora xuqujeʼ kuya kkʼol pa formatos che sibʼalaj kchʼobʼ kiwach jun chke are ri MP3, PDF o pa EPUB. Xuqujeʼ katkunik kaqʼaxej chuwach jun wuj tzij che kʼo pa kichʼabʼal winaq che kkaj kketaʼmaj. Kʼo videos chike kʼi kiwach winaq che kkita täj. Xuqujeʼ katkunik kata chirij usikʼixik uwach ri Loqʼalaj Pixabʼ, ri kbʼix chirij jun bʼantajik rech ojer esam pa ri Loqʼalaj Pixabʼ xuqujeʼ qʼojom rech bʼixonem rech kata chiʼ tijan ta katchakunik.

Ri qastzij chikij ri testigos rech Jehová. Xuqujeʼ kariq jastaq xuqujeʼ videos che kuya ubʼixik chirij ri kqabʼan che ri qachak pa ronojel ri uwach Ulew, jastaq che kchʼaw chikij ri testigos rech Jehová xuqujeʼ chirij ri tobʼanik chike ri kkiriq kʼäx. Katkunik kawetaʼmaj chikij ri qʼij che kebʼan ri nimaʼq täq riqbʼal ibʼ che naqaj chi kʼo wi xuqujeʼ jachiʼ e kʼo wi ri ja kbʼix sucursales chike.

Rumal wariʼ, tijan kqaya ukʼutik ri qastzij chike konojel ri winaq cho ronojel ri uwach Ulew. Winaq rech jalajoj nimaʼq täq tinamit, xuqujeʼ ri tinamit che sibʼalaj naj kʼo wi xuqujeʼ che sibʼalaj tew ubʼiʼ Antártida, tijan kketaʼmaj. Kqabʼan qachʼawem rech ri «utzij ri Ajawaxel kajabʼun aninaq» pa ronojel ri uwach Ulew rech kyaʼ uqʼij ri Ajawaxel (2 Tesalonicenses 3:1).

• ¿Jas tijan kubʼan che kitoʼik e kʼi winaq rech kketaʼmaj chirij ri Loqʼalaj Pixabʼ pa ri qakʼolbʼal pa Internet jw.org/quc?

• ¿Jas kawaj kawetaʼmaj pa ri qakʼolbʼal pa Internet?