Jun rachalal ri Pablo che ko ranimaʼ

Kintzijoj jun bʼantajik chawe chrij jun ala che xutoʼ ri apóstol Pablo rech xkam taj. Qetaʼm taj jas ubʼiʼ, are kʼu qetaʼm che ral ri ranabʼ ri Pablo. Jun ala che ko ranimaʼ. ¿La kawaj kawetaʼmaj jas xubʼano?...

Ri Pablo tzʼapim pa Jerusalén. Xtzʼapixik rumal che ktzijon chrij ri Jesús chke ri winaq. E kʼo jujun achijabʼ che sibʼalaj itzel kkil ri Pablo xuqujeʼ kkichomaj kkibʼan kʼax che. Kkaj kkibʼij waʼ che ri kinimal ri ajchajinelabʼ: «Chabʼij che ri ajchajinelabʼ che kkikʼam bʼi ri Pablo chuwach ri qʼatbʼaltzij». Ri itzel taq achijabʼ kkaj kkikʼuʼ kibʼ pa ri bʼe, rech ¡kkikamisaj ri Pablo chiʼ kqʼaxik!

Ri ral ri ranabʼ ri Pablo xretaʼmaj ri tajin kkichomaj ri achijabʼ. ¿Jas xubʼano? Xubʼij che ri Pablo. Ri Pablo xubʼij waʼ che: «Jat chanim che ubʼixik ronojel ri xato che ri kinimal ri ajchajinelabʼ». Uchʼabʼexik ri kinimal ri ajchajinelabʼ sibʼalaj kʼax, rumal che ri achi sibʼalaj nim ubʼantajik. ¿La xukochʼ ri rachalal ri Pablo xchʼaw rukʼ ri achi?... Xukochʼo, ri ala sibʼalaj ko ranimaʼ xuqujeʼ xubʼij che ronojel ri xuto.

Ri kinimal ri ajchajinelabʼ qas xutatabʼej ri xbʼix che. Rech xutoʼ ri Pablo, xutaq bʼi pa jun chi bʼe, rech ri tinamit ubʼiʼ Cesarea. Xuqujeʼ, xeʼutaq bʼi 500 ajchajinelabʼ che uchajixik pa ri bʼe. Xubʼij chke: «Chikʼamaʼ bʼi pa wajun chaqʼabʼ riʼ». ¿La xekun ri itzel taq achijabʼ che ukamisaxik ri Pablo? ¿Jas kachomaj at?... ¡Xekun taj! Ri achijabʼ riʼ xekun ta che ukamisaxik.

¿La utz xata wajun bʼantajik riʼ?... ¿La xawilo che ri ral ri ranabʼ ri Pablo sibʼalaj ko ranimaʼ? ¡At xuqujeʼ katkunik kabʼan ko che ri awanimaʼ! Sibʼalaj rajawaxik che kqakowirisaj ri qanimaʼ chiʼ kqatzijoj ri Jehová chke ri winaq. ¿La ko ri awanimaʼ, xuqujeʼ la kaya ta kan utzijoxik utzij ri Jehová?... Sibʼalaj rajawaxik che kqaya ta kan utzijoxik utzij ri Dios. Rech kʼi winaq kkiriq kikʼaslemal che kʼot ukʼisik.