• ¿Jas riʼ ri uQʼatbʼal tzij ri Dios?
    ¡Jun kʼaslemal che kʼo ta ukʼisik! Chawetaʼmaj ri kubʼij ri Biblia
    • Kʼutunem 31. Ri Jesucristo, ya Qʼatal tzij chi pa ri kaj, kʼo chuwach ri Jehová.

      KʼUTUNEM 31

      ¿Jas riʼ ri uQʼatbʼal tzij ri Dios?

      Ronojel ri kyaʼ ubʼixik pa ri Biblia are más kchʼaw chrij ri uQʼatbʼal tzij ri Dios. Ri Jehová kukoj na wajun Qʼatbʼal tzij riʼ rech kubʼan ri uchomam ubʼanik cho ri uwach Ulew. ¿Jas riʼ ri uQʼatbʼal tzij ri Dios? ¿Jasche qetaʼm che tajin kuqʼat chi tzij kimik? ¿Jas kunaq che ubʼanik? ¿Jas kubʼan na pa ri petinaq? Ri preguntas riʼ ktzalix uwach pa wajun kʼutunem riʼ y pa ri nikʼaj chi kebʼ kʼutunem.

      1. ¿Jas riʼ ri uQʼatbʼal tzij ri Dios, y jachin riʼ ri Qʼatal tzij?

      Are jun qʼatbʼal tzij che xukoj ri Jehová. Ri Qʼatal tzij are ri Jesucristo y chikaj kuqʼat wi lo tzij (Mateo 4:17; Juan 18:36). Ri Biblia kubʼij che ri Jesús «ktaqan na [...] chbʼe qʼij saq» (Lucas 1:32, 33). Rumal che are ri Qʼatal tzij re ri uQʼatbʼal tzij ri Dios, ri areʼ kuqʼat na tzij pa kiwiʼ konojel ri winaq che e kʼo cho ri uwach Ulew.

      2. ¿E jachin kkiqʼat na tzij rukʼ ri Jesús?

      Ri Jesús xaq ta utukel kuqʼat tzij. Xaneʼ «konojel kiwach winaq, chʼabʼal, amaqʼ [y] nimaʼq taq tinamit» kkiqʼat na tzij ruk’ (Apocalipsis 5:9, 10). ¿E jampaʼ kkiqʼat tzij rukʼ ri Jesús? Are chiʼ ri Jesús xpe cho ri uwach Ulew, sibʼalaj e kʼi winaq kimajim uterneʼxik y e uxnaq cristianos. Are kʼu xa e 144.000 winaq kebʼe pa ri kaj rech kkiqʼat tzij rukʼ ri Jesús (chasikʼij Apocalipsis 14:1-4). Ri nikʼaj chi cristianos kekʼojiʼ na cho ri uwach Ulew y kekʼojiʼ na chuxeʼ ri uQʼatbʼal tzij ri Dios (Salmo 37:29).

      3. ¿Jasche ri uQʼatbʼal tzij ri Dios más utz na chuwach ri kiqʼatbʼal tzij ri winaq?

      Paneʼ e kʼo jujun taq qʼatal tzij kkibʼan utz taq jastaq, are kʼu kekun taj kkibʼan ronojel ri kkibʼij. Y are chiʼ kqʼax ri tiempo kekʼexik y kekoj chi nikʼaj che weneʼ kel ta kikʼuʼx che ri tinamit. Are kʼu ri Jesús, ri Qʼatal tzij re ri uQʼatbʼal tzij ri Dios, kʼo ta jumul kkʼexik. Ri Dios xukoj «jun ajawbʼal ri mawi jubʼiqʼ ksachisax ta uwach» (Daniel 2:44). Ri Jesús kuqʼat na tzij puwiʼ ronojel ri uwach Ulew y junam na keril konojel ri winaq. Ri areʼ kloqʼoqʼenik, utz y sukʼ, y rukʼ ri ukʼutbʼal kubʼij na chke ri winaq che kkikʼut loqʼoqʼenik, utzilal y sukʼilal (chasikʼij Isaías 11:9).

      CHANIMARISAJ RI AWETAʼMANIK

      Chqilaʼ jasche ri uQʼatbʼal tzij ri Dios más utz na chuwach ri kiqʼatbʼal tzij ri winaq.

      Ri Jesucristo tajin kuqʼat lo tzij puwiʼ ri uwach Ulew. Chrij e tʼuyul wi ri rach taq qʼatal tzij. Y pa kiwiʼ konojel kʼo wi ri Jehová.

      4. Jun nimalaj Qʼatbʼal tzij kuqʼat na tzij puwiʼ ri uwach Ulew

      Ri Jesús más kʼo na uchuqʼabʼ che usukʼumaxik ronojel ri kʼax chuwach ri kiqʼatbʼal tzij ri winaq. Chisikʼij Mateo 28:18, y chixtzijon chrij wariʼ:

      • ¿Jasche ri utaqanik ri Jesús más nim na ubʼanik chuwach ri kech ri winaq?

      Ri kiqʼatbʼal tzij ri winaq xaq xiw kʼo utaqanik puwiʼ jun lugar cho ri uwach ulew y kopan na jun qʼij che ksach kiwach. ¿La je kkʼulmataj rukʼ ri uQʼatbʼal tzij ri Dios? Chisikʼij Daniel 7:14, y chixtzijon chrij wariʼ:

      • ¿Jas kachomaj at, jas utzilal kqariqo rumal che ksach ta uwach ri uQʼatbʼal tzij ri Dios?

      • ¿Jas utzilal kqariqo rumal che ri uQʼatbʼal tzij ri Dios kuqʼat tzij puwiʼ ri uwach Ulew?

      5. Kkʼex na ri kiqʼatbʼal tzij ri winaq

      ¿Jasche rajawaxik kkʼex ri kiqʼatbʼal tzij ri winaq rukʼ rech ri Dios? Chiwilaʼ ri VIDEO y chixtzijon chrij wariʼ:

      VIDEO: ¿Jas riʼ ri Rajawbʼal ri Dios? (uchʼaqapil) (1:41)

      • ¿Jas taq kʼax uyaʼom ri kiqʼatbʼal tzij ri winaq?

      Chisikʼij Eclesiastés 8:9 y chixtzijon chrij wariʼ:

      • ¿Jas kachomaj at, la rajawaxik kkʼex ri kiqʼatbʼal tzij ri winaq rukʼ ri uQʼatbʼal tzij ri Dios? ¿Jasche?

      6. Ri kkiqʼat tzij pa ri uQʼatbʼal tzij ri Dios ketaʼm ri kʼax che kqariqo

      Ri Jesús, ri Qʼatal tzij, xuqujeʼ kunaʼ ri kʼax che kqariqo y «kel ukʼuʼx» chqe rumal che xpe cho ri uwach Ulew (Hebreos 4:15). Jehová xeʼuchaʼ e 144.000 achijabʼ e ixoqibʼ rech kkiqʼat tzij rukʼ ri Jesús. Ri e winaq riʼ jalajoj ri kichʼabʼal, «amaqʼ [y] nimaʼq taq tinamit» (Apocalipsis 5:9).

      • ¿La kukubʼsaj akʼuʼx che ri Jesús y ri kkiqʼat tzij rukʼ ketaʼm ri ubʼanik ri qakʼaslemal cho ri uwach Ulew? ¿Jasche?

      Achijabʼ e ixoqibʼ re jalajoj taq tiempo che e chaʼom rech ke bʼe pa ri kaj.

      Jehová xeʼuchaʼ jalajoj kiwach winaq rech kkiqʼat tzij rukʼ ri Jesús.

      7. Ri utaqanik ri uQʼatbʼal tzij ri Dios más utz na chuwach ri kech ri winaq

      Ri qʼatal taq tzij kikojom taqanik rech kekitoʼ y kekichajij ri kiwinaq. Ri uQʼatbʼal tzij ri Dios xuqujeʼ kʼo utaqanik, y ri uwinaq rajawaxik kkinimaj. Chisikʼij 1 Corintios 6:9-11 y chixtzijon chrij wariʼ:

      • ¿Jas kachomaj at, jas kkiriq riʼ ri winaq chiʼ konojel kkinimaj ri utaqanik ri Dios?a

      • ¿La taqal che ri Jehová che kqanimaj? ¿Jasche?

      • ¿Jasche qetaʼm che ri e winaq che kkinimaj ta ri utaqanik ri Dios kekun na kkikʼex ri kikʼaslemal? (Chiwilaʼ ri versículo 11).

      Jun policía re tránsito tajin kuqʼatej kiwach ri carros rech keqʼax ri winaq. Winaq che jalajoj kijunabʼ tajin keqʼax pa ri bʼe.

      Ri kiqʼatbʼal tzij ri winaq kkikoj taqanik rech kekichajij y kekitoʼ ri kiwinaq. Are kʼu ri utaqanik ri uQʼatbʼal tzij ri Dios más utz na, keʼuchajij y keʼutoʼ ri uwinaq.

      RI KKICHOMAJ JUJUN WINAQ: «Ri uQʼatbʼal tzij ri Dios pa qanimaʼ kʼo wi».

      • ¿Jas kabʼij riʼ?

      RI XQETAʼMAJ

      Ri uQʼatbʼal tzij ri Dios are jun qʼatbʼal tzij che kʼo pa ri kaj y che kuqʼat na tzij puwiʼ ronojel ri uwach Ulew.

      ¿La knaʼtaj chawe?

      • ¿E jachin kkiqʼat tzij pa ri uQʼatbʼal tzij ri Dios?

      • ¿Jasche ri uQʼatbʼal tzij ri Dios más utz na chuwach ri kiqʼatbʼal tzij ri winaq?

      • ¿Jas kraj ri Jehová che kkibʼan ri winaq chuxeʼ ri uQʼatbʼal tzij?

      Chabʼanaʼ wariʼ

      CHAWILAʼ CHI NIKʼAJ

      Chawilaʼ jawchiʼ kʼo wi ri uqʼatbʼal tzij ri Dios junam rukʼ ri xuya kan ubʼixik ri Jesús.

      «¿La pa qanimaʼ kʼo wi riʼ ri uQʼatbʼal tzij ri Dios?» (Kʼutunem re jw.org)

      ¿Jasche ri testigos rech Jehová kkaj che xaq xiw che ri uQʼatbʼal tzij ri Dios kkiya wi kitobʼanik?

      Xaq xiw kqaya qatobʼanik che ri uQʼatbʼal tzij ri Dios (1:43)

      Chawilaʼ ri kubʼij ri Biblia chkij ri 144.000 winaq che xeʼuchaʼ ri Jehová rech kkiqʼat tzij rukʼ ri Jesús.

      «¿E jachin taq kebʼe pa ri kaj?» (Kʼutunem re jw.org)

      Chawilaʼ ri xtoʼw jun ixoq che uchʼobʼik che xaq xiw ri Dios kkunik kresaj ronojel uwach itzelal cho ri uwach Ulew.

      «Xwetaʼmaj che ksach na uwach ri itzelal» (¡Despertad!, noviembre 2011)

      a Pa ri sección 3 kqil na ri rajawaxik kqabʼan pa ri qakʼaslemal.

  • ¡Tajin chi kuqʼat tzij ri uQʼatbʼal tzij ri Dios!
    ¡Jun kʼaslemal che kʼo ta ukʼisik! Chawetaʼmaj ri kubʼij ri Biblia
    • Kʼutunem 32. Ri Qʼatal tzij Jesucristo rukʼam jun chʼamiʼy y tajin kuqʼat tzij puwiʼ ri uwach Ulew.

      KʼUTUNEM 32

      ¡Tajin chi kuqʼat tzij ri uQʼatbʼal tzij ri Dios!

      Ri uQʼatbʼal tzij ri Dios xumajij uqʼatik tzij pa ri junabʼ 1914. Y pa wajun junabʼ riʼ xmajtaj ri kʼisbʼal taq qʼij rech ri kiqʼatbʼal tzij ri winaq. ¿Jasche qetaʼm wariʼ? Kqil na jas ri xuya kan ubʼixik ri Biblia, ri tajin kkʼulmataj cho ri uwach Ulew y ri kibʼantajik ri winaq che kimajim lo ukʼutik pa ri junabʼ 1914.

      1. ¿Jas xuya kan ubʼixik ri Biblia?

      Ri wuj rech Daniel xubʼij kanoq che ri uQʼatbʼal tzij ri Dios kumajij uqʼatik tzij chiʼ okʼowinaq chi «wuqubʼ junabʼ» o siete tiempos (Daniel 4:16, 17). Ri Jesús xubʼij «ri kiqʼij ri man aj judeyibʼ taj» o de las naciones che wajun tiempo riʼ, y xubʼij che majaʼ kkʼisik (Lucas 21:24). Pa wajun kʼutunem riʼ kqil na che ri siete tiempos xkʼis pa ri junabʼ 1914.

      2. ¿Jas taq kʼax kʼolik y jas bʼantajik kimajim lo ukʼutik ri winaq pa ri junabʼ 1914?

      Ri utijoxelabʼ ri Jesús xkitaʼ che: «¿Jas ri retal ri petbʼal la? ¿Jas ri retal ri ukʼisbʼalil ri uwach ulew?» (Mateo 24:3). Ri Jesús xubʼij kanoq che kkʼulmataj na kʼi jastaq chiʼ kumaj uqʼatik tzij pa ri kaj. Jun kʼutbʼal, xubʼij che kbʼan na chʼoj, kkʼojiʼ na wiʼjal y kubʼan na kabʼraqan (chasikʼij Mateo 24:7). Ri Biblia xuqujeʼ xubʼij che ri kibʼantajik ri winaq «pa ri kʼisbʼal taq qʼijol» kubʼano che are «kʼaxalaj taq qʼij» (2 Timoteo 3:1-5). Umajim lo pa ri 1914, ri kʼulmatajinaq cho ri uwach Ulew y ri kibʼantajik ri winaq más tajin knimatajik.

      3. ¿Jasche más xkʼiyar ri itzelal y ri kʼaxkʼolil chiʼ xumaj uqʼatik tzij ri uQʼatbʼal tzij ri Dios?

      Are chiʼ ri Jesús xux Qʼatal tzij re ri uQʼatbʼal tzij ri Dios, xmajtaj jun nimalaj chʼoj pa ri kaj, ri areʼ xchʼojin rukʼ ri Satanás y ri demonios. Ri Satanás xchʼakan taj y, ri Biblia kubʼij, che xkʼaq lo cho ri uwach Ulew xuqujeʼ ri utaqoʼnibʼ xekʼaq lo rukʼ (Apocalipsis 12:9, 10, 12). Ri Satanás sibʼalaj qʼaqʼarinaq che royowal rumal che retaʼm che xa jubʼiqʼ chi kraj che ksach uwach. ¡Rumal laʼ kʼo kʼaxkʼolil cho ri uwach Ulew! Are kʼu ri uQʼatbʼal tzij ri Dios kusach na uwach ronojel kʼax che kqariqo.

      CHANIMARISAJ RI AWETAʼMANIK

      Chqilaʼ jujun taq kʼutbʼal che kukʼut chqawach che ri uQʼatbʼal tzij ri Dios xumajij uqʼatik tzij pa ri junabʼ 1914 y chqilaʼ ri kubʼan wariʼ pa ri qakʼaslemal.

      4. Ri profecías re ri Biblia kukʼutu che pa 1914 xumaj uqʼatik tzij ri uQʼatbʼal tzij ri Dios

      Chiwilaʼ ri VIDEO.

      VIDEO: Ri uQʼatbʼal tzij ri Dios xumaj uqʼatik tzij pa ri junabʼ 1914 (5:02)

      Ri Dios xubʼano che ri qʼatal tzij re Babilonia ubʼiʼ Nabucodonosor xrachikʼaj jun profecía. Ri xrachikʼaj wajun achi riʼ y ri xuya ubʼixik ri Daniel kukʼutu che wajun profecía kʼo ubʼanik rukʼ ri uqʼatbʼal tzij ri Nabucodonosor y ri uQʼatbʼal tzij ri Dios (chisikʼij Daniel 4:17).a

      Chisikʼij Daniel 4:20-26. Tekʼuriʼ chikojoʼ ri recuadro rech kitzalij uwach ri preguntas riʼ:

      • A) ¿Jas xrachikʼaj ri Nabucodonosor? (Chiwilaʼ ri versículos 20 y 21).

      • B) ¿Jas xkʼulmataj rukʼ ri cheʼ? (Chiwilaʼ ri versículo 23).

      • C)¿Jas xkʼulmatajik are chiʼ xkʼis ri «wuqubʼ junabʼ» o siete tiempos? (Chiwilaʼ ri versículo 26).

      Ri achikʼ re ri cheʼ y ri uQʼatbʼal tzij ri Dios

      RI PROFECÍA (Daniel 4:20-36)

      Qʼatbʼal tzij

      A) Jun nimalaj cheʼ

      Jun nimalaj cheʼ.

      Xqʼatex uwach ri qʼatbʼal tzij

      B) «Chiqasaj ri cheʼ» y chiyaʼ «che kqʼax wuqubʼ junabʼ»

      Raʼ jun cheʼ che ximom che jun chʼichʼ re hierro y cobre.

      Kumaj chi uqʼatik tzij

      C) «Katzalix chi na ri ajawbʼal chawe»

      Jun nimalaj cheʼ.

      Ri nabʼe mul che xtzʼaqat wajun profecía riʼ:

      • D) ¿Jachin xukʼutunisaj ri cheʼ? (Chiwilaʼ ri versículo 22).

      • E) ¿Jampaʼ xukʼis uqʼatik tzij? (Chisikʼij Daniel 4:29-33).

      • F) ¿Jas xkʼulmatajik chiʼ xqʼax ri «wuqubʼ junabʼ»? (Chisikʼij Daniel 4:34-36).

      RI NABʼE MUL CHE XTZʼAQAT WAJUN PROFECÍA RIʼ

      Qʼatbʼal tzij

      D) Nabucodonosor, ri qʼatal tzij re Babilonia

      Ri qʼatal tzij Nabucodonosor rukʼ nimal takʼalik.

      Xqʼatex uwach ri qʼatbʼal tzij

      E) Nabucodonosor xchʼujarik chiʼ qʼaxinaq chi ri junabʼ 606 a.C.b y siete junabʼ xuqʼat ta tzij

      Nabucodonosor tajin kwaʼik junam rukʼ ri kkibʼan ri awaj.

      Kumaj chi uqʼatik tzij

      F) Nabucodonosor xutzirik y xumaj chi uqʼatik tzij

      Ri qʼatal tzij Nabucodonosor e uyakom ri uqʼabʼ y kaynaq chikaj.

      Ri kamul che xtzʼaqat wajun profecía riʼ:

      • G) ¿E jachin xukʼutunisaj ri cheʼ? (Chisikʼij 1 Crónicas 29:23).

      • H) ¿Jampaʼ xkiya kan uqʼatik tzij? ¿Jasche qetaʼm che tajin ta kkiqʼat tzij are chiʼ xpe ri Jesús cho ri uwach Ulew? (Chisikʼij Lucas 21:24).

      • I) ¿Jawchiʼ y jampaʼ xumaj chi uqʼatik tzij wajun qʼatbʼal tzij riʼ?

      RI KAMUL CHE XTZʼAQAT WAJUN PROFECÍA RIʼ

      Qʼatbʼal tzij

      G) Ri qʼatal taq tzij rech Israel che xkikʼutunisaj ri uqʼatbʼal tzij ri Dios

      E qʼatal taq tzij e tʼuyul pa ri kitem. Kʼo jun luz pa kiwiʼ che petinaq chikaj.

      Xqʼatex uwach ri qʼatbʼal tzij

      H) Pa ri junabʼ 607 a.C. xbʼan kʼax che Jerusalén; 2.520 junabʼ nijun qʼatal tzij israelita xuqʼat tzij

      Xporox ri tinamit Jerusalén pa ri junabʼ 607 nabʼe chuwach ri Cristo. Tekʼuriʼ, qʼaxinaq chi 2.520 junabʼ.

      Kumaj chi uqʼatik tzij

      I) Pa 1914 Jesús xux Qʼatal tzij re ri uQʼatbʼal tzij ri Dios pa ri kaj

      Pa ri junabʼ 1914, ri Jesucristo tajin chi kuqʼat tzij pa ri kaj. Tajin kel lo luz chrij.

      ¿Jampaʼ junabʼ riʼ ri siete tiempos?

      Jujun taq kʼutbʼal che kʼo pa ri Biblia kojutoʼ che uchʼobʼik wariʼ. Jun kʼutbʼal, ri wuj rech Apocalipsis kubʼij che tres tiempos y medio kraj kubʼij 1.260 qʼij (Apocalipsis 12:6, 14). We kamul kajilax 1.260 qʼij kukʼaqaʼ 2.520 qʼij. Jujun taq mul, ri Biblia kubʼij che jun qʼij kraj kubʼij jun junabʼ (Ezequiel 4:6). Y are waʼ ri kbʼan che rajilaxik wajun profecía che kyaʼ ubʼixik pa ri wuj rech Daniel: che kraj kubʼij 2.520 junabʼ.

      5. Pa 1914 xkʼextaj ri uwach Ulew

      Chiwilaʼ ri VIDEO.

      VIDEO: Pa 1914 xkʼextaj ri uwach Ulew (1:10)

      Ri Jesús xubʼij kanoq ri kkʼulmatajik are chiʼ kumaj uqʼatik tzij. Chisikʼij Lucas 21:9-11 y chixtzijon chrij wariʼ:

      • Junam rukʼ ri xqasikʼij pa ri versículos riʼ, ¿jas jastaq awilom at o atom che tajin kkʼulmatajik?

      Ri apóstol Pablo xuya kan ubʼixik ri kibʼantajik ri winaq pa ri kʼisbʼal taq qʼij. Chisikʼij 2 Timoteo 3:1-5 y chixtzijon chrij wariʼ:

      • Junam rukʼ ri xqasikʼij pa ri versículos, ¿jas kibʼantajik ri winaq awilom at?

      E wachbʼal che kukʼutu che oj kʼo chi pa ri kʼisbʼal taq qʼij: 1. Jun militar uyakom uqʼabʼ tajin kuraqaqej uchiʼ. 2. Jun nimalaj ja tajin ktzaq rumal jun kabʼraqan. 3. Aviones militares. 4. Winaq che kikojom mascarilla tajin kebʼin pa ri bʼe. 5. Ri Torres Gemelas re Nueva York tajin kenikowik rumal jun ataque terrorista. 6. Jun achi tajin kukoj droga pa ri ucuerpo. 7. Jun achi uyakom uqʼabʼ chrij ri rixoqil y kuraqaqej uchiʼ chrij. 8. Jalajoj taq uwach drogas y tzam. 9. Kebʼ surumuyabʼ o qʼolis taq ixoqibʼ tajin kkesaj kiselfi. 10. Jun DeeJay tajin kukoj música rech kexojow ri winaq pa jun concierto. 11. Jun achi tajin kukʼaq jun bomba molotov.

      6. Retaʼmaxik che ri uQʼatbʼal tzij ri Dios tajin chi kuqʼat tzij kʼo kubʼan pa ri qakʼaslemal

      Chisikʼij Mateo 24:3, 14 y chixtzijon chrij wariʼ:

      • ¿Jas chak che sibʼalaj nim ubʼanik kukʼutu che tajin chi kuqʼat tzij ri uQʼatbʼal tzij ri Dios?

      • ¿Jas kabʼan che uyaʼik tobʼanik pa wajun chak riʼ?

      Ri uQʼatbʼal tzij ri Dios tajin chi kuqʼat tzij, y xa jubʼiqʼ chi kraj kusukʼumaj ronojel ri jastaq cho ri uwach Ulew. Chisikʼij Hebreos 10:24, 25 y chixtzijon chrij wariʼ:

      • ¿Jas rajawaxik kqabʼan qonojel rumal che ri qʼij naqaj chi kʼo wi?

      Jupuq wachbʼal: 1. Jun tijoxel re ri Biblia kʼo pa jun riqbʼal ibʼ kech ri testigos rech Jehová. 2. Ri tijoxel riʼ tajin kutzijoj ri utzij ri Dios che jun winaq che kuchʼobʼ uwach.

      We kawetaʼmaj jun jastaq che keʼutoʼ ri winaq y che kukol ri kikʼaslemal, ¿jas kabʼan riʼ?

      RI KKIBʼIJ JUJUN WINAQ: «¿Jasche ri testigos rech Jehová kkibʼij che ri junabʼ 1914 sibʼalaj nim ubʼanik?».

      • ¿Jas kabʼij riʼ?

      RI XQETAʼMAJ

      Ri profecías re ri Biblia y ri tajin kkʼulmataj cho ri uwach Ulew kukʼutu che ri uQʼatbʼal tzij ri Dios tajin chi kuqʼat tzij. Y ri oj kqakʼutu che kojkojon chrij wariʼ are chiʼ kqatzijoj wajun Qʼatbʼal tzij riʼ y amaqʼel kojbʼe pa taq ri riqbʼal ibʼ.

      ¿La knaʼtaj chawe?

      • ¿Jas xkʼulmatajik are chiʼ xkʼis ri siete tiempos che kʼo pa ri wuj re Daniel?

      • ¿La kakoj at che ri uQʼatbʼal tzij ri Dios xumaj uqʼatik tzij pa ri junabʼ 1914? ¿Jasche?

      • ¿Jas kabʼan che ukʼutik che kakojo che ri uQʼatbʼal tzij ri Dios tajin chi kuqʼat tzij?

      Chabʼanaʼ wariʼ

      CHAWILAʼ CHI NIKʼAJ

      Chawilaʼ ri kkibʼij jujun taq historiadores y nikʼaj chi winaq che nim ketaʼmabʼal chrij ri jastaq che xkʼextaj pa ri junabʼ 1914.

      «Xkʼextaj ri kibʼantajik ri winaq» (¡Despertad!, abril 2007)

      Chawilaʼ ri xubʼan ri profecía re Mateo 24:14 che ukʼexik ri ukʼaslemal jun achi.

      «Utz xinnaʼ ubʼanik béisbol» (La Atalaya, núm. 3 2017)

      ¿Jasche qetaʼm che ri profecía rech ri capítulo 4 re Daniel kʼo ubʼanik rukʼ ri uQʼatbʼal tzij ri Dios?

      «¿Jampaʼ xumaj uqʼatik tzij ri uQʼatbʼal tzij ri Dios? (Nabʼe uchʼaqapil)» (La Atalaya, 1 re octubre 2014)

      ¿Jasche qetaʼm che ri siete tiempos che kuya ubʼixik pa ri capítulo 4 re Daniel xkʼis pa ri junabʼ 1914?

      «¿Jampaʼ xumaj uqʼatik tzij ri uQʼatbʼal tzij ri Dios? (Ukabʼ uchʼaqapil)» (La Atalaya, 1 re noviembre 2014)

      a Chasikʼij ri kʼisbʼal kebʼ kʼutunem che kʼo pa ri sección «Chawilaʼ chi nikʼaj» re wajun kʼutunem riʼ.

      b Chiʼ kqakoj a.C. kraj kubʼij antes de Cristo. Y chiʼ kqakoj d.C. kraj kubʼij después de Cristo

  • Ri kubʼan na ri uQʼatbʼal tzij ri Dios
    ¡Jun kʼaslemal che kʼo ta ukʼisik! Chawetaʼmaj ri kubʼij ri Biblia
    • Kʼutunem 33. E winaq che e kʼo chi pa ri kotzʼiʼj uwach Ulew.

      KʼUTUNEM 33

      Ri kubʼan na ri uQʼatbʼal tzij ri Dios

      Ri uQʼatbʼal tzij ri Dios tajin chi kuqʼat tzij. Naj ta chi kraj kukʼex na ri jastaq cho ri uwach Ulew. Chqilaʼ jujun taq jastaq che kubʼan na wajun qʼatbʼal tzij riʼ che kubʼano che rukʼ kikotemal kqeyeʼj.

      1. ¿Jas kubʼan na ri uQʼatbʼal tzij ri Dios rech kkʼojiʼ jamaril y sukʼilal cho ri uwach Ulew?

      Pa ri chʼoj re Armagedón, ri Jesús—ri Qʼatal tzij re ri uQʼatbʼal tzij ri Dios—kusachisaj na kiwach ri itzel taq winaq y ri qʼatal taq tzij (Apocalipsis 16:14, 16). Pa wajun tiempo riʼ qas kbʼantaj na ri kubʼij ri Biblia: «Pa kebʼ oxibʼ qʼij man keriqtaj ta chi bʼanal taq itzelal» (Salmo 37:10). Rumal ri uQʼatbʼal tzij ri Dios, ri Jesús kubʼan na che kkʼojiʼ chi jumul jamaril y sukʼilal cho ronojel ri uwach Ulew (chasikʼij Isaías 11:4).

      2. ¿Jas ubʼanik riʼ ri kʼaslemal are chiʼ kbʼan ri kraj ri Dios cho ri uwach Ulew?

      Chuxeʼ ri uQʼatbʼal tzij ri Dios, «ri e utzalaj taq winaq kkechbʼej na ri ulew kejeqiʼ kʼu na chuwach chbʼe qʼij saq» (Salmo 37:29). ¡Chachomajampeʼ che konojel ri winaq e utz, kkiloqʼoqʼej ri Jehová y kkiloqʼoqʼej kibʼ! ¿La sibʼalaj utz riʼ? Kʼo ta chi jun kyawajik y konojel kekam ta chik.

      3. ¿Jas kubʼan na ri uQʼatbʼal tzij ri Dios are chiʼ usachisam chi kiwach ri itzel taq winaq?

      Are chiʼ sachisam chi kiwach ri itzel winaq, ri Jesús kuqʼat tzij 1.000 junabʼ. Pa wajun tiempo riʼ ri Jesús y ri 144.000 che kkiqʼat tzij rukʼ kekitoʼ na ri winaq rech keʼel pa uqʼabʼ ri makaj y kkiriq jun tzʼaqatalaj kʼaslemal. Are chiʼ kkʼis ri mil junabʼ, ri uwach Ulew kotzʼiʼj chi uwach riʼ, konojel chi riʼ ri winaq kekikotik rumal che kkinimaj ri Jehová. Tekʼuriʼ ri Jesús kutzalij ri qʼatbʼal tzij che ri Jehová, ri uTat. Y ri ubʼiʼ ri Dios kchʼajchʼobʼisax na (Mateo 6:9, 10). Qas kilitaj na che ri Jehová are jun utz qʼatal tzij y che kuchajij ri utinamit. Tekʼuriʼ ri Jehová kusachisaj na kiwach ri Satanás, ri demonios y konojel ri winaq che kkinimaj ta ri utaqanik (Apocalipsis 20:7-10). Ri utzilal che kuya na ri uQʼatbʼal tzij ri Dios kʼo ta ukʼisik.

      CHANIMARISAJ RI AWETAʼMANIK

      Chqilaʼ jasche kojkunik kqakubʼsaj qakʼuʼx che ri Dios kubʼan na ronojel ri utzujum rumal ri uQʼatbʼal tzij.

      4. Ri uQʼatbʼal tzij ri Dios kusach na kiwach ri kiqʼatbʼal tzij ri winaq

      «Ri kuʼinem ri kʼo rukʼ ri winaq [kukoj] che ubʼanik kʼax che ri rajil utzʼaqat» (Eclesiastés 8:9). Ri Jehová kukoj na ri uQʼatbʼal tzij che usukʼumaxik ronojel ri kʼax.

      Chisikʼij Daniel 2:44 y 2 Tesalonicenses 1:6-8, y chixtzijon chrij wariʼ:

      • ¿Jas kkibʼan na ri Jehová y ri Jesús, chke ri qʼatal taq tzij y ri ketobʼan kukʼ?

      • ¿Jasche kojkunik kqakubʼsaj qakʼuʼx che ri Jehová y ri Jesús rukʼ sukʼilal kkibʼan ri jastaq?

      Jesús ri Qʼatal tzij tajin kuqʼat lo tzij cho ri uwach Ulew che kotzʼiʼj chi uwach.

      5. Ri Jesús are ri más utz qʼatal tzij

      Ri Jesús ri Qʼatal tzij re ri uQʼatbʼal tzij ri Dios kubʼan na kʼi taq jastaq pa kiwiʼ ri winaq. Chiwilaʼ ri VIDEO rech kiwil ri xubʼan ri Jesús che ukʼutik che kraj keʼutoʼ ri winaq y che ri Dios uyaʼom uchuqʼabʼ rech kkunik kubʼano.

      VIDEO: Jesús xukʼut ri kubʼan na ri uQʼatbʼal tzij ri Dios (1:13)

      Ri xubʼan ri Jesús are chiʼ xkʼojiʼ cho ri uwach Ulew xukʼut kan chqawach ri kubʼan na ri uQʼatbʼal tzij ri Dios. ¿Jas más utz kawil che ri kʼo pa ri lista? Chisikʼij ronojel ri textos che kʼo chunaqaj ri e tzujunik.

      CHIʼ RI JESÚS XKʼOJIʼ CHO RI UWACH ULEW...

      CHIʼ RI JESÚS KUQʼAT TZIJ CHO RI UWACH ULEW...

      • ... kusukʼumaj na ri kʼax che bʼanom che ri uwach Ulew  (Isaías 35:1, 2)

      • ... kresaj na ri wiʼjal cho ronojel ri uwach Ulew  (Salmo 72:16)

      • ... kubʼan na che kʼo ta chi nijun winaq kuriq yabʼil  (Isaías 33:24)

      • ... kresaj na ri kamikal (Apocalipsis 21:3, 4)

      6. Rumal ri uQʼatbʼal tzij ri Dios, kkʼojiʼ na jun utz qakʼaslemal

      Rumal ri uQʼatbʼal tzij, Jehová kubʼan na ri xuchomaj are chiʼ xeʼubʼan ri nabʼe taq winaq. Che kkiriq jun kʼaslemal che kʼo ta ukʼisik pa jun kotzʼiʼjalaj uwach Ulew. Chiwilaʼ ri VIDEO rech kiwilo jas kubʼan ri Jehová che ukojik ri uKʼojol, Jesús, rech kubʼan ri xuchomaj nabʼe kanoq.

      VIDEO: Chqilaʼ ri kbʼan na pa ri petinaq (4:38)

      Chisikʼij Salmo 37:4 y chixtzijon chrij wariʼ:

      • ¿Jas kanaʼo chiʼ kawetaʼmaj che Jehová kuya na ri kurayij ri kanimaʼ ri winaq?

      RI KKICHOMAJ JUJUN WINAQ: «We qonojel kqakoj qachuqʼabʼ che ubʼanik ri utz kojkunik kqasukʼumaj ri kʼax cho ri uwach Ulew».

      • ¿Jas kʼax kresaj na ri uQʼatbʼal tzij ri Dios che ri winaq kekun ta che resaxik?

      RI XQETAʼMAJ

      Ri uQʼatbʼal tzij ri Dios kubʼan na ri utzujum. Kubʼan na kotzʼiʼj che ri uwach Ulew y ri winaq kkiqʼijilaj na ri Jehová pa ronojel ri kikʼaslemal.

      ¿La knaʼtaj chawe?

      • ¿Jas kubʼan na ri uQʼatbʼal tzij ri Dios rech kuchʼajchʼobʼisaj ri ubʼiʼ ri Jehová?

      • ¿Jasche qetaʼm che ri uQʼatbʼal tzij ri Dios kubʼan na ri utzujum?

      • ¿Jas tewchibʼal kawaj at kariq chuxeʼ ri uQʼatbʼal tzij ri Dios?

      Chabʼanaʼ wariʼ

      CHAWILAʼ CHI NIKʼAJ

      Chawilaʼ jas riʼ ri Armagedón.

      «¿Jas riʼ ri Armagedón?» (Kʼutunem re jw.org)

      Chqanikʼoj jas xubʼij kan ri Jesús che kkʼulmataj na pa ri «nimalaj kʼaxkʼolil» (Mateo 24:21).

      «¿Jas riʼ ri nimalaj kʼaxkʼolil?» (Kʼutunem re jw.org)

      Chawilaʼ ri rajawaxik kubʼan jun familia rech kchoman chrij ri tewchibʼal che kuya na ri uQʼatbʼal tzij ri Dios.

      Chachomaj che at kʼo chi pa ri kotzʼiʼjalaj uwach Ulew (1:50)

      Chasikʼij ri biografía rech kawilo jas xubʼan jun político che uriqik ri kutzukuj: «Kinchoman chrij kʼi taq preguntas».

      «Ri Biblia xukʼex ri kikʼaslemal» (La Atalaya, 1 re enero 2012)