¿Jas kubʼij ri Biblia chkij ri ángeles?

Jehová kraj che kqetaʼmaj uwach ri ufamilia che kʼo pa ri kaj. Pa wajun familia riʼ e kʼo ri ángeles, che xuqujeʼ kbʼix ralkʼwal ri Dios chke (Job 38:7). ¿Jas kukʼut ri Biblia chkij ri ángeles? ¿Jas kkibʼan pa kikʼaslemal ri winaq? ¿Y la e utz konojel ri ángeles?

1. ¿E jachin riʼ ri ángeles?

Chiʼ ri Jehová majaʼ kubʼan ri uwach Ulew xeʼubʼan ri ángeles. Junam rukʼ ri Dios, ri e areʼ e uxlabʼal y e kʼo pa ri kaj (Hebreos 1:14). E kʼo kʼi ángeles y jalajoj kibʼanik chkijujunal (Apocalipsis 5:11). Are kkibʼan ri kubʼij ri Jehová y e «sakʼaj che unimaxik» (Salmo 103:20). Ojer ri Jehová xeʼutaq lo ri ángeles che uqʼaxexik ri utzij y che utoʼik ri utinamit. Kimik, ri ángeles kkikʼam kibʼe ri cristianos rech kekiriq ri winaq che kkaj kketaʼmaj más chrij ri Dios.

2. ¿Jachin riʼ ri Satanás y ri demonios?

E jujun ángeles xeniman ta che ri Jehová. Ri nabʼe are «ri kbʼix Itzel xuqujeʼ Satanás che, ri keʼusubʼ konojel ri winaq» (Apocalipsis 12:9). Satanás xraj xtaqan pa kiwiʼ nikʼaj chik, rumal laʼ xeʼusubʼ ri nabʼe taq winaq rech kkinimaj ri kubʼij. Y chiʼ xqʼax ri tiempo e nikʼaj chi ángeles xkibʼan ke ri xubʼano. Ri ángeles riʼ che xeniman ta che ri Dios are kbʼix demonios chke. Jehová xeresaj lo pa ri kaj y xeʼukʼaq lo cho ri uwach Ulew, y ksachisax na kiwach (chasikʼij Apocalipsis 12:9, 12).

3. ¿Jas kkibʼan ri Satanás y ri demonios che qasubʼik?

Satanás y ri demonios kkikoj ri itzinik y nikʼaj chi uwach qʼijinik rech kekisubʼ ri winaq, wariʼ kubʼano che keqebʼ kukʼ ri itzel taq uxlabʼal. Jun kʼutbʼal, jujun taq winaq kkisikʼij ri horóscopo y nikʼaj chik kebʼe kukʼ ajqʼijabʼ, ajitz (brujos), astrólogos, curanderos y winaq che kkil ri kkʼulmataj na pa ri petinaq. Nikʼaj chik kkitzukuj ri kitobʼanik ri ajqʼijabʼ rech kekunataj che jun yabʼil. Y e kʼo kkibʼij che kekunik kechʼaw kukʼ ri kaminaqibʼ. Are kʼu, ri Jehová kubʼij chqe: «Mixbʼe kukʼ ri ajqʼijabʼ, mawi kukʼ ri chʼobʼonelabʼ mitzʼonoj inoʼj chke» (Levítico 19:31). Ri Jehová kraj kojuchajij chkiwach ri Satanás y ri demonios, rumal che e ukʼulel y kkaj kkibʼan kʼax chqe.

CHANIMARISAJ RI AWETAʼMANIK

4. Ri ángeles kekitoʼ ri winaq rech kketaʼmaj uwach ri Jehová

Ri utz taq ángeles kechʼaw ta kukʼ ri winaq. Ri kkibʼano are che kkikʼam kibʼe ri upatanelabʼ ri Dios rech kekiriq ri winaq che kkaj kketaʼmaj uwach ri Dios. Chisikʼij Apocalipsis 14:6, 7 y chixtzijon chrij wariʼ:

• ¿Jasche kajwataj ri kitobʼanik ri ángeles chqe are chiʼ kqatzijoj ri utzij ri Dios?

• ¿Jas kanaʼo are chiʼ kawetaʼmaj che ri ángeles kkikʼam abʼe rech keʼariq ri winaq che kkaj kketaʼmaj chrij ri Biblia? ¿Jasche?

5. Chaxutuj ri kichak ri ajqʼijabʼ y ri kʼo ubʼanik rukʼ

Ri Satanás y ri demonios e ukʼulel ri Jehová, xuqujeʼ e qakʼulel oj. Chisikʼij Lucas 9:38-42 y chixtzijon chrij wariʼ:

• ¿Jas kkibʼan ri demonios chke ri winaq?

Kqaj taj kqaya bʼe che ri demonios keʼok pa ri qakʼaslemal. Chisikʼij Deuteronomio 18:10-12 y chixtzijon chrij wariʼ:

• ¿Jas kkikoj ri demonios rech keʼok pa ri qakʼaslemal y ketzijon qukʼ? ¿Jas taq kbʼan pa ri lugar che katel wi at?

• ¿Jasche ri Dios kubʼij chqe che kqabʼan ta jastaq che kʼo ubʼanik rukʼ ri qʼijinik o itzinik?

Chiwilaʼ ri VIDEO y chixtzijon chrij wariʼ:

VIDEO: Chiqʼatej uwach ri Itzel (5:02)

• ¿La kachomaj che ri pulsera che kʼo che ri uqʼabʼ ri uneʼ Palesa kubʼan kʼax chke? ¿Jasche?

• ¿Jas xubʼan Palesa che utoʼik ribʼ chkiwach ri demonios?

Ri qastzij cristianos amaqʼel kkixutuj ri kʼo ubʼanik kukʼ ri demonios. Chisikʼij Hechos 19:19 y 1 Corintios 10:21, y chixtzijon chrij wariʼ:

• ¿Jasche rajawaxik kakʼaq bʼi ri jastaq che kʼo awukʼ che kʼo ubʼanik rukʼ ri qʼijinik o ri itzinik?

6. Kaxeʼj ta awibʼ chkiwach ri Satanás y ri demonios

Ri Satanás are ri ktaqan pa kiwiʼ ri demonios. Are kʼu ri sukʼ taq ángeles are ktaqan ri arcángel Miguel pa kiwiʼ, are jun chi bʼiʼaj che kbʼix che ri Jesús. ¿La nim uchuqʼabʼ riʼ ri Miguel? Chisikʼij Apocalipsis 12:7-9 y chixtzijon chrij wariʼ:

• ¿Jachin kʼo más uchuqʼabʼ: ri Miguel y ri ángeles, o ri Satanás y ri demonios?

• ¿La kkixeʼj kibʼ ri e terneʼl re ri Cristo chkiwach ri Satanás y ri demonios?

At katkunik katchʼakan pa kiwiʼ ri Satanás y ri demonios. Chisikʼij Santiago 4:7 y chixtzijon chrij wariʼ:

• ¿Jas rajawaxik kabʼano rech kachajij awibʼ chkiwach ri Satanás y ri demonios?

RI XQETAʼMAJ

Ri sukʼ taq ángeles kojkitoʼo. Ri Satanás y ri demonios e ukʼulel ri Jehová, y kekisubʼ ri winaq rukʼ ri itzinik o ri qʼijinik.

¿La knaʼtaj chawe?

• ¿Jas kkibʼan ri utz taq ángeles rech ri winaq kketaʼmaj uwach ri Jehová?

• ¿Jachin riʼ ri Satanás y ri demonios?

• ¿Jasche utz taj katzukuj tobʼanik kukʼ ri winaq che kkibʼan itzinik o qʼijinik?

CHAWILAʼ CHI NIKʼAJ

Chawilaʼ jasche ri Jesús are ri arcángel Miguel.

«¿Jachin riʼ ri arcángel Miguel?» (Kʼutunem re jw.org)

Chasikʼij jasche kqabʼij che qastzij kʼo ri Itzel y che xaq ta are jun símbolo re ri itzelal.

«¿La qastzij kʼo ri Itzel?» (Kʼutunem re jw.org)

Chawilaʼ jas xubʼan jun ixoq rech xel chuxeʼ ri kitaqanik ri demonios.

«Kkikot chi pa ri ukʼaslemal» (La Atalaya, 1 re julio 1993)

Chawilaʼ jas kubʼan ri Satanás che usachisaxik ri kichomanik ri winaq rukʼ ri itzinik o qʼijinik.

«Ri qastzij chrij ri magia, ri itzinik y ri qʼijinik» (¿Ha encontrado usted el camino a la vida eterna?, parte 5)