Cheqatoʼo ri tajin kkiriq kʼax

1. ¿Jas kubʼan ri Jehová che utzalixik uwach ri kichʼawem ri upatanelabʼ?

¿LA AWETAʼM che ri Jehová kkunik katukojo rech kutzalij uwach ri uchʼawem jun qachalal? Qonojel kojkunik kojtobʼanik; kʼamal taq bʼe, tobʼanelabʼ, precursores, alabʼom alitomabʼ, ixoqibʼ achijabʼ y ri nim chi kijunabʼ. Are chiʼ jun qachalal kutaʼ tobʼanik che ri Jehová, kʼi mul ktzalix uwach ri uchʼawem are chiʼ ktoʼ kumal ri e kʼamal bʼe y nikʼaj chi qachalal rech kkubʼsax ukʼuʼx (Col. 4:11). Are jun nimalaj tewchibʼal che kojkunik kqabʼan ri kraj ri Jehová y keqatoʼ ri qachalal. Kojkunik kqabʼan wariʼ are chiʼ kpe nimaʼq taq yabʼil, xaq kʼateʼ kkʼulmataj jun kʼax o are chiʼ kqʼatex uwach ri qachak che ri Dios.

ARE CHIʼ KPE NIMAʼQ TAQ YABʼIL

2. ¿Jasche kʼax kqariq che kitoʼik ri e qachalal are chiʼ kʼo nimaʼq taq yabʼil?

² Are chiʼ kʼo jun nimalaj yabʼil, weneʼ kojkun ta chik kqatoʼlaʼ qibʼ. Jun kʼutbʼal, weneʼ kqaj kqataʼ kitzijol ri e qachalal cho taq kachoch, are kʼu ri yabʼil kuya ta bʼe chqe. O weneʼ kqaj keqasikʼij ri e qachalal che qas ta kʼo jastaq kech rech kekitijaʼ jun kiwa cho qachoch, are kʼu xuqujeʼ kbʼan taj. Weneʼ sibʼalaj kqaj keqatoʼ ri e nikʼaj chik, are kʼu ri qachalaxik oj xuqujeʼ tajin kkiriq kʼax. Paneʼ jeriʼ, kqaj keqatoʼ ri e qachalal, wariʼ kuya kikotemal che ri Jehová (Prov. 3:27; 19:17). Rumal laʼ, ¿jas kojkunik kqabʼano?

3. Junam rukʼ ri kubʼij Jeremías 23:4, ¿jas kqetaʼmaj chkij ri e kʼamal bʼe re ri ucongregación ri qachalal Desi?

³ Ri kekunik kkibʼan ri e kʼamal bʼe. We at at kʼamal bʼe re ri congregación, qas chawetaʼmaj kiwach konojel ri e qachalal (chasikʼij uwach Jeremías 23:4). Ri qachalal Desi che xojchʼaw chrij pa ri jun kan kʼutunem, kubʼij wariʼ: «Ri e kʼamal bʼe re ri nugrupo che utzijoxik utzij ri Dios kinaqʼatisam chi kibʼ keʼel wukʼ che utzijoxik utzij ri Dios y kukʼ nikʼaj chi qachalal, xuqujeʼ kkibʼan nikʼaj chi jastaq qukʼ».b Rumal wariʼ, kʼax ta chi xkiriq ri e kʼamal bʼe che utoʼik ri qachalal Desi are chiʼ xumaj ri nimalaj yabʼil COVID-19 y are chiʼ xekam jujun rachalaxik rumal ri yabʼil.

4. ¿Jasche ri e kʼamal bʼe xekunik xkitoʼ ri qachalal Desi, y jas kketaʼmaj ri e kʼamal bʼe chkij?

⁴ Ri qachalal Desi kubʼij: «E wachiʼl chi ri e kʼamal bʼe, rumal laʼ xinbʼij chke ronojel ri kinaʼo y ri kinbʼisoj». ¿Jas kketaʼmaj ri e kʼamal bʼe chrij wariʼ? Che rajawaxik kekisolij y keʼux kachiʼl ri e qachalal are chiʼ majaʼ kpe jun kʼax. We rumal jun nimalaj yabʼil kixkun taj kixbʼe che kichʼabʼexik cho ri kachoch, chitzukuj ri kibʼano rech kixtzijon apan kukʼ. Ri qachalal Desi kubʼij: «Jujun mul, kuriq ribʼ ri llamadas che kkikoj lo ri e kʼamal bʼe wukʼ xuqujeʼ ri mensajes che kkitaq lo chwe. Sibʼalaj kukubʼsaj nukʼuʼx ri textos che kkitaq lo chwe, paneʼ wetaʼm chi ri kubʼij».

5. ¿Jas kkibʼan ri e kʼamal bʼe che retaʼmaxik ri rajawaxik chke ri e qachalal, y jas kkibʼan che kitoʼik?

⁵ Rech kketaʼmaj ri e kʼamal bʼe jas rajawaxik chke ri e qachalal, utz che kkibʼan preguntas chke (Prov. 20:5). ¿La kʼo ri rajawaxik chke junam rukʼ ri kkitijo o kikunabʼal? ¿La kʼo kichak? O ¿la e kunaq che utojik ri kachoch? ¿La rajawaxik ketoʼ che utaʼik tobʼanik che ri qʼatbʼal tzij? Ri qachalal Desi xtoʼ kumal jujun qachalal rukʼ jastaq che rajawaxik che. Are kʼu ri más xuya tobʼanik che are che ri e kʼamal bʼe xkitatabʼej y xkikubʼsaj ukʼuʼx rukʼ ri Biblia. Ri qachalal Desi kubʼij: «Knaʼtaj ta chwe ri xkibʼij ri e kʼamal bʼe pa ri kichʼawem che xkibʼan wukʼ, are kʼu sibʼalaj xuya nuchuqʼabʼ. Jetaneʼ ri Jehová tajin kubʼij wariʼ chwe: ‹Atukel ta at kʼolik›» (Is. 41:10, 13).

6. ¿Jas kqabʼan che utoʼik qibʼ pa ri congregación? (Chawilaʼ ri e wachbʼal).

⁶ Ri kekunik kkibʼan ri e qachalal. Qetaʼm che are ri e kʼamal bʼe nabʼe keʼilow ri rajawaxik chke ri e qachalal. Are kʼu ri Jehová xuqujeʼ kubʼij chqe che oj kojkunik kqaya kichuqʼabʼ y keqatoʼ ri e nikʼaj chik (Gál. 6:10). Are chiʼ kqasipaj jun jastaq o kqabʼan jun toqʼobʼ che jun qachalal che yawabʼ, sibʼalaj nim kril wi riʼ. Ri akʼalabʼ kekunik kkibʼan jun alaj tarjeta o jun alaj dibujo rech kkiya che jun qachalal. Ri alabʼom alitomabʼ kekunik kekibʼanaʼ kan jun utaqkil jun qachalal ixoq o kekiloqʼo kan jujun jastaq rech. Y, e nikʼaj chik kekunik kekiya kan uwa jun qachalal che yawabʼ. Are chiʼ kpe jun nimalaj yabʼil, qonojel rajawaxik qachuqʼabʼ. Rumal laʼ, rajawaxik che aninaq ta kojbʼek are chiʼ kkʼis ri riqbʼal ibʼ rech kojkunik kojtzijon kukʼ ri e qachalal pa ri Ja rech Ajawbʼal o pa videoconferencia. Xuqujeʼ kajwataj chuqʼabʼ chke ri e kʼamal taq bʼe. Rumal laʼ, jujun taq qachalal kkitaq notas chke rech kkimaltyoxij ri nimalaj chak kkibʼano, más na are chiʼ kʼo jun nimalaj yabʼil. Sibʼalaj utz che qonojel kqakoj qachuqʼabʼ che unimaxik ri kubʼij wariʼ: «Chikubʼsalaʼ ikʼuʼx, chiyalaʼ ichuqʼabʼ jas ri kʼa tajin kibʼano» (1 Tes. 5:11).

ARE CHIʼ XAQ KʼATEʼ KKʼULMATAJ JUN KʼAX

7. Are chiʼ xaq kʼateʼ kkʼulmataj jun kʼax, ¿jas kubʼan pa ukʼaslemal jun winaq?

⁷ Ri kʼaxkʼolil che xaq kʼateʼ kkʼulmatajik kukʼex ri ukʼaslemal jun winaq. Rumal che weneʼ ksach uwach ri jastaq rech, ri rachoch, o weneʼ kkam jun rachalaxik. Y waʼ we kʼax riʼ xuqujeʼ kkiriq ri e qachalal. Rumal laʼ, ¿jas kqabʼan che kitoʼik?

8. ¿Jas rajawaxik kkibʼan ri e kʼamal bʼe y ri e tat nan are chiʼ majaʼ kkʼulmataj jun kʼax?

⁸ Ri kekunik kkibʼan ri e kʼamal bʼe. Kʼamal taq bʼe, cheʼitoʼo ri e qachalal rech kkil apanoq jas kkibʼano are chiʼ xaq kʼateʼ kkʼulmataj jun kʼax. Chiwilaʼ che konojel ri qachalal ketaʼm chik jas kkibʼan chuwach jun kʼax y rech kixtzijon apan kukʼ. Ri qachalal Margaret, che xojchʼaw kan chrij pa ri jun kan kʼutunem, kubʼij: «Pa jun chʼabʼal re ri kajwataj pa ri congregación, ri e kʼamal taq bʼe xkinaʼtasaj chqe che kʼa tajin kkʼat na ri kʼachelaj, y xkibʼij chqe che we ri qʼatal taq tzij kkibʼij che rajawaxik kojel bʼi pa ri qachoch rajawaxik aninaq kojnimanik». Sibʼalaj utz che xkiya wajun chʼabʼal riʼ rumal che are chiʼ qʼaxinaq chi cinco semanas xmajtaj jun nimalaj poroʼn chkinaqaj ri qachalal. Tat nan, are chiʼ kibʼan ri iqʼijilanik pa ri familia, chixtzijon chrij ri rajawaxik kibʼano are chiʼ xaq kʼateʼ kkʼulmataj jun kʼax. We iwilom chi rukʼ ri ifamilia jas kibʼano, kixutoʼo rech ksach ta ikʼuʼx.

9. ¿Jas rajawaxik kkibʼan ri e kʼamal taq bʼe are chiʼ majaʼ kkʼulmataj jun kʼax y are chiʼ qʼaxinaq chik?

⁹ We at kʼamal bʼe re jun grupo re utzijoxik ri utzij ri Dios, kʼateʼ ta katzukuj ri kinúmero re teléfono ri e qachalal are chiʼ kkʼulmataj jun kʼax. Qas chawilaʼ we kʼo ri kinúmero awukʼ y chawilaʼ we kikʼexom taj. Jeriʼ, are chiʼ xaq kʼateʼ kkʼulmataj jun kʼax katkunik keʼachʼabʼej apan ri e qachalal che e kʼo pa ri agrupo rech kawetaʼmaj jas rajawaxik chke. Chabʼij che ri jachal kichak ri e kʼamal taq bʼe jas ri kajwataj chke ri e qachalal, rech ri areʼ kchʼaw rukʼ ri solinel re circuito. Más utz kel ri chak we kixchakun pa junamam. Are chiʼ xtaniʼ ri nimalaj poroʼn, ri solinel re circuito re ri qachalal Margaret xukoj 36 horas che kichʼabʼexik ri kʼamal taq bʼe rech kekitzukuj y kekitoʼ ri e 450 qachalal che xebʼe chi pa jun lugar (2 Cor. 11:27). Jeriʼ, xriqitaj jun lugar jawiʼ kekʼojiʼ wi ri e qachalal.

10. Junam rukʼ ri kubʼij Juan 21:15, ¿jasche nim ubʼanik che ri e kʼamal bʼe kekichajij ri e qachalal?

¹⁰ Are ri e kʼamal bʼe rajawaxik keʼilow ri kajwataj chke ri e qachalal pa ri kikojonik y rech kkiya kichuqʼabʼ (1 Ped. 5:2). Are chiʼ kriqitaj jun nimalaj kʼax, ri nabʼe che kkibʼan ri e kʼamal taq bʼe are che kkilo we ri e qachalal kʼo ta kʼax xkiriqo, we kʼo kiwa, katzʼyaq y we kʼo kekʼojiʼ wi. Y weneʼ rajawaxik kkubʼsax kikʼuʼx ri e qachalal pa kʼi ikʼ (chasikʼij uwach Juan 21:15). Ri qachalal Harold, che kʼo pa jun Comité re Sucursal y che tzijonaq kukʼ qachalal che kiriqom kʼax, kubʼij: «Kukʼam bʼi nim tiempo rech ksach ri bʼis chke. Weneʼ kilitajik che e utz chik, are kʼu weneʼ xaq kʼateʼ kpe jun nimalaj bʼis chke, rumal che knaʼtaj jun kachalal chke che xkamik, jun jastaq kech xkiya kanoq o jun chi kʼax. Xaq kʼateʼ kuya bʼis chke rumal ri xkikʼulmaj. Are kʼu xa ta rumal che kʼo ta kikojonik, xaneʼ jelaʼ kqanaʼ qonojel rumal che xa oj winaq».

11. ¿Jas tobʼanik kajwataj chke ri familias che kkiriq kʼax?

¹¹ Sibʼalaj nim ubʼanik che ri kʼamal taq bʼe kkinimaj wajun chomanik re ri Biblia: «Chixoqʼ kukʼ ri keʼoqʼik» (Rom. 12:15). Ri e qachalal che kiriqom kʼax rumal jun kabʼraqan, jun kaqiqʼ jabʼ o jun chi kʼax, rajawaxik knaʼtajisax chke che keloqʼoqʼex rumal ri Jehová y kumal ri e qachalal. Ri e kʼamal bʼe kekunik kekitoʼ ri familias rech kkiya ta kan ubʼanik kichʼawem, unikʼoxik ri Biblia, bʼenam pa taq ri e riqbʼal ibʼ y utzijoxik ri utzij ri Dios. Xuqujeʼ kekunik kekitoʼ ri e tat nan rech kkikʼut chkiwach ri e kalkʼwaʼl che kʼo jastaq kkun ta ri kʼax che usachik uwach. Tat nan, chinaʼtajisaj chke ri iwalkʼwal che amaqʼel iwachiʼl ri Jehová y amaqʼel kʼo iwukʼ. Chibʼij chke che e kʼo qachalal pa ronojel ri uwach Ulew che kitoʼik (1 Ped. 2:17).

12. ¿Jas kekunik kkibʼan ri e qachalal rech kekitoʼ ri kkiriq kʼax? (Chawilaʼ ri wachbʼal).

¹² Ri kekunik kkibʼan ri e qachalal. We chunaqaj ri awachoch kkʼulmataj jun nimalaj kʼax chataʼ chke ri kʼamal taq bʼe jas kabʼano rech katkunik kattobʼanik. Weneʼ katkunik kaya ri awachoch rech kekanaj kan ri qachalal awukʼ che xkiriq kʼax o ri e opanaq che uyaʼik tobʼanik. Weneʼ katkunik kattobʼan che ujachik ri kajwataj chke ri e qachalal. Y, we ri kʼax xkʼulmataj pa jun tinamit che sibʼalaj naj kʼo wi, katkunik kattobʼanik. ¿Jas kabʼan che uyaʼik tobʼanik? Kabʼan achʼawem pa kiwiʼ ri e qachalal che xkiriq kʼax y kaya ri akuchuj pa ri obra mundial che kkoj che kitoʼik ri e qachalal (2 Cor. 1:8-11; 8:2-5). We katkunik katbʼe che kitoʼik, chataʼ chke ri e kʼamal bʼe jas rajawaxik kabʼano. Y we katsikʼixik kattijox na rech qas katkunik kaya tobʼanik pa ri lugar che kattaq wi bʼik.

ARE CHIʼ KQʼATEX UWACH RI QACHAK CHE RI DIOS

13. ¿Jas kʼax kkiriq ri e qachalal jawiʼ qʼatem wi uwach ri qachak che ri Dios?

¹³ Ri e qachalal kkiriq más kʼax are chiʼ keqʼatex che upatanixik ri Jehová. Ri keʼel pa jun tinamit jawiʼ qʼatem wi uwach ri qachak che ri Dios kkiriq kʼax che uriqik ri pwaq, keyawajik y kekam kachalaxik. Rumal che qʼatem uwach ri qachak weneʼ ri e kʼamal bʼe kekun taj kechʼaw kukʼ ri qachalal che ukubʼsaxik kikʼuʼx. Are jeriʼ xukʼulmaj ri qachalal Andréi che xojchʼaw chrij pa ri jun kan kʼutunem. Jun qachalal ixoq che kʼo pa ri ugrupo che utzijoxik ri utzij ri Dios kʼo ta chi urajil tekʼuriʼ xuriq jun accidente. Xbʼan kʼi operaciones che, rumal laʼ kkun ta chik kchakunik. Paneʼ kʼo ri nimalaj yabʼil y qʼatem uwach ri qachak kumal ri e qʼatal taq tzij, ri e qachalal xkitzukuj ri xkibʼan che utoʼik y ri Jehová amaqʼel xok il che.

14. ¿Jas kkibʼan ri e kʼamal bʼe che ukʼutik che kkikubʼsaj kikʼuʼx chrij ri Jehová?

¹⁴ Ri kekunik kkibʼan ri e kʼamal bʼe. Ri qachalal Andréi xubʼan uchʼawem che ri Jehová y xubʼan ri kkun che ubʼanik. ¿Jas xubʼan ri Jehová che uyaʼik ri xutaʼ che? Xeʼukoj ri qachalal rech kekitoʼo ri qachalal ixoq. E jujun qachalal xkikʼam bʼi ri qachalal ixoq rukʼ ri doctor y nikʼaj chik xetobʼan rukʼ pwaq. Ri Jehová xutewchiʼj ri utzalaj achilanik che xkʼojiʼ chkixoʼl y ri chuqʼabʼ che xkikoj che utoʼik ri qachalal ixoq (Heb. 13:16). Kʼamal taq bʼe, cheʼitijoj ri e nikʼaj chik rech ketaʼm ri kkibʼano are chiʼ kqʼatex uwach ri qachak che ri Dios (Jer. 36:5, 6). Are kʼu, ri más nim ubʼanik chitzukuj ri utobʼanik ri Jehová. Ri areʼ kixutoʼ na rech kiya ri kajwataj chke ri e qachalal.

15. ¿Jas rajawaxik kqabʼano rech kkʼojiʼ utz achilanik chqaxoʼl are chiʼ kqʼatex uwach ri qachak che ri Dios?

¹⁵ Ri kekunik kkibʼan ri e qachalal. Pa ri tinamit jawiʼ qʼatem wi uwach ri qachak che ri Dios, weneʼ rajawaxik e kʼi ta ri e qachalal kkimulij kibʼ che ubʼanik ri kiriqbʼal ibʼ. Rumal laʼ, sibʼalaj nim ubʼanik che kʼo jamaril chqaxoʼl kukʼ ri e qachalal. Chojchʼojin rukʼ ri Satanás, kukʼ ta ri e qachalal. We kʼo jun kʼax xkʼulmataj chixoʼl aninaq chisukʼumaj y chikuyulaʼ imak (Prov. 19:11; Efes. 4:26). Oj nabʼe chqamajij kitoʼik ri e qachalal (Tito 3:14). Ri tobʼanik che xkiya che ri qachalal ixoq che kʼo pa ri ugrupo ri qachalal Andréi sibʼalaj xeʼutoʼ ri e nikʼaj chi qachalal. Xnimar más ri achilanik chkixoʼl junam rukʼ jun familia (Sal. 133:1).

16. Junam rukʼ ri kubʼij Colosenses 4:3, 18, ¿jas kojkunik kqabʼan pa kiwiʼ ri e qachalal jawiʼ qʼatem wi ri qachak che ri Dios?

¹⁶ Sibʼalaj e kʼi qachalal kiyaʼom ta kan upatanexik ri Jehová paneʼ ri e qʼatal taq tzij kiqʼatem uwach ri qachak. E jujun e kʼamom bʼi pa cárcel. Rumal laʼ, chqabʼanaʼ qachʼawem pa kiwiʼ, cheqatoʼ ri kachalaxik y ri e qachalal che kkiya tobʼanik chke (chasikʼij uwach Colosenses 4:3, 18).c Maqachomaj che kʼo ta upatan ri chʼawem che kqabʼan pa kiwiʼ (2 Tes. 3:1, 2; 1 Tim. 2:1, 2).

17. ¿Jas rajawaxik kqabʼan kimik rech qetaʼm jas kqabʼano are chiʼ kqʼatex uwach ri qachak che ri Dios?

¹⁷ At y ri afamilia kimik kixkunik kiwilo jas kibʼano are chiʼ majaʼ kqʼatex uwach ri qachak che ri Dios (Hech. 14:22). Are ta katchoman chrij ri kʼax che weneʼ kkʼulmatajik. Xaneʼ are chakowirisaj ri awachilanik rukʼ ri Jehová y cheʼatoʼ ri awalkʼwal rech je kkibʼano. We kʼo jumul sibʼalaj katbʼisonik chabʼij che ri Jehová (Sal. 62:7, 8). Chixtzijon rukʼ ri ifamilia jasche kikubʼsaj ikʼuʼx chrij ri Jehová.d We awilom chik jas kabʼano are chiʼ kriqitaj jun kʼax y kakubʼsaj akʼuʼx chrij ri Jehová, ri e awalkʼwal kkixeʼj ta kibʼ y ksach ta kikʼuʼx.

18. ¿Jas kqariq na pa ri petinaq?

¹⁸ Ri ujamaril ri Dios kojutoʼo rech kqaxeʼj ta qibʼ (Filip. 4:6, 7). Xuqujeʼ kojutoʼo rech ksach ta qakʼuʼx are chiʼ kpe jun nimalaj yabʼil, xaq kʼateʼ kkʼulmataj jun kʼax o are chiʼ kqʼatex uwach ri qachak che ri Dios. Ri Jehová kukoj ri e kʼamal taq bʼe che kichajixik ri e qachalal, y ubʼim chqe che kojkunik kqatoʼlaʼ qibʼ. Ri jamaril riʼ xuqujeʼ kojutoʼo rech kqachʼij apachike uwach kʼax che kqariq na pa ri «nimalaj kʼaxkʼolil» (Mat. 24:21). Pa riʼ ri tiempo, rajawaxik kqakubʼsalaʼ qakʼuʼx y kqatoʼlaʼ qibʼ. Are kʼu, are chiʼ qʼaxinaq chi ri nimalaj kʼaxkʼolil kʼo ta chi jun jastaq kusach qakʼuʼx chrij ri petinaq. Tekʼuriʼ laʼ qas kqariq ri utzujum ri Jehová chqe: ri qastzij jamaril che kʼo ta ukʼisik (Is. 26:3, 4).