Chakʼutuʼ che kaxiʼj ta awibʼ junam rukʼ ri Sadoc

1, 2. ¿Jachin riʼ ri Sadoc? (1 Crónicas 12:22, 26-28).

CHATCHOMAN chrij wariʼ. Más 340,000 achijabʼ xkimulij kibʼ rech kkibʼan qʼatal tzij che ri David pa Israel. Oxibʼ qʼij chik tajin ktataj puwiʼ taq ri juyubʼ ri bʼixonem y kitzeʼn ri winaq che e kʼo chunaqaj ri Hebrón rumal che sibʼalaj kekikotik (1 Crón. 12:39). Chkixoʼl ri winaq riʼ xuqujeʼ kʼo jun ala ubʼiʼ Sadoc, che weneʼ ri winaq kkil taj che kʼo chkixoʼl. Are kʼu ri Jehová retaʼm che kʼo chilaʼ y kraj che oj kqetaʼmaj (chasikʼij 1 Crónicas 12:22, 26-28). Are kʼu ¿jachin riʼ ri Sadoc?

² Ri Sadoc are jun kojol tabʼal toqʼobʼ che kchakun rukʼ ri Abiatar ri kinimal kojol tabʼal toqʼobʼ. Ri Jehová xuya unoʼj ri Sadoc rech kuchʼobʼo jas riʼ ri urayibʼal ri Dios (2 Sam. 15:27). Ri winaq kkitzukuj ri Sadoc rech kyaʼ kinoʼj rumal. Ri areʼ are jun achi che kuxiʼj ta ribʼ. Y pa wajun kʼutunem riʼ kojchʼaw na chrij che ri Sadoc man xuxiʼj ta ribʼ.

3. a) ¿Jasche rajawaxik che kqaxiʼj ta qibʼ? b) ¿Jas kqil na pa wajun kʼutunem riʼ?

³ Pa we kʼisbʼal taq qʼij, ri Satanás más tajin kubʼan kʼax che ri utinamit ri Dios (1 Ped. 5:8). Ri Jehová kusachisaj na uwach ri Satanás y ronojel ri kʼo pa uqʼabʼ, rumal laʼ rajawaxik che kqaxiʼj ta qibʼ kamik (Sal. 31:24).Chqilampeʼ oxibʼ jastaq che kojkunik kqabʼano rech kqesaj uwach ri Sadoc.

CHQATOʼ UWIʼ RI UQʼATBʼAL TZIJ RI DIOS

4. ¿Jasche kajwataj chuqʼabʼ chqe rech kqatoʼ uwiʼ ri Uqʼatbʼal tzij ri Dios? (Xuqujeʼ chawilaʼ ri wachbʼal).

⁴ Ri oj upatanelabʼ ri Jehová kqatoʼ uwiʼ ri Uqʼatbʼal tzij ri Dios, are kʼu jujun taq mul rajawaxik kqakʼutu che kqaxiʼj ta qibʼ (Mat. 6:33). Jun kʼutbʼal, rumal ri itzelal che kʼo kamik rajawaxik kqaxiʼj ta qibʼ che unimaxik ri utaqanik ri Jehová y kqatzijoj ri utzij chke ri winaq (1 Tes. 2:2). Kamik, ri winaq kijachom kibʼ rumal ri política, rumal laʼ rajawaxik kqakoj qachuqʼabʼ rech kqanim ta qibʼ pa política (Juan 18:36). Y e kʼi testigos rech Jehová weneʼ kʼax kkibʼan che uriqik ri pwaq, kechʼayik, keya pa cárcel rumal che kkaj taj kkitoʼ uwiʼ jun qʼatbʼal tzij o rumal che kkaj taj kebʼe pa chʼoj.

5. ¿Jasche xajwatajik che ri Sadoc xuxiʼj ta ribʼ are chiʼ xutoʼ ri David?

⁵ Ri Sadoc xaq xiw ta xbʼe pa Hebrón rech kerilaʼ ri David are chiʼ kkoj che qʼatal tzij. Xaneʼ ukʼamom bʼi ri jastaq re rech kbʼe pa ri chʼoj (1 Crón. 12:38). Qas xraj xbʼe rukʼ ri David pa taq ri chʼoj y rech kutoʼ chkiwach ri ukʼulel. Weneʼ qas ta retaʼm kchʼojinik are kʼu xuxiʼj ta ribʼ.

6. ¿Jas utz kʼutbʼal xuya ri David che ri Sadoc? (Salmo 138:3).

⁶ ¿Jas xtoʼw ri Sadoc rech xuxiʼj ta ribʼ? Qastzij riʼ che are ri kikʼutbʼal ri achijabʼ che retaʼm kiwach che xuqujeʼ xkixiʼj ta kibʼ. Jun chke are ri David. Rumal che xuxiʼj ta ribʼ y xukʼam «kibʼe ri aj Israel che kibʼanik taq ri chʼoj», ri tinamit Israel xraj xukoj che qʼatal tzij (1 Crón. 11:1, 2). Ri David qas xukubʼsaj ukʼuʼx chrij ri Jehová y amaqʼel xutaʼ tobʼanik che are chiʼ xtereneʼx kumal ri ukʼulel (Sal. 28:7; chasikʼij Salmo 138:3). Y ri Sadoc kʼi xretaʼmaj chrij ri utz kikʼutbʼal ri Jehoiadá y ri Benaya che are jun ajchʼoj, xuqujeʼ nikʼaj chi 22 achijabʼ che xkitoʼ ri David (1 Crón. 11:22-25; 12:26-28). Konojel ri achijabʼ riʼ qas xkaj xkitoʼ ri qʼatal tzij David.

7. a) ¿Jachin taq ri kkiya jun utz kʼutbʼal chqe kamik? b) ¿Jas xawetaʼmaj chrij ri qachalal Nsilu pa ri video?

⁷ Retaʼmaxik ri kibʼanom ri upatanelabʼ ri Jehová che utoʼik uwiʼ ri Uqʼatbʼal tzij kojutoʼo rech ri oj xuqujeʼ kqaxiʼj ta qibʼ. Ri Qʼatal tzij Jesucristo, xraj taj xunim ribʼ pa política (Mat. 4:8-11; Juan 6:14, 15). Amaqʼel xukubʼsaj ukʼuʼx chrij ri Jehová rech kuxiʼj ta ribʼ. Y kamik xuqujeʼ e kʼo qachalal alabʼom che kiyaʼom jun utz kʼutbʼal chqawach rumal che kkinim ta kibʼ pa política y kebʼe ta pa chʼoj. Utz we katzukuj jujun chke ri experiencias riʼ pa jw.org.a

CHEQATOʼ RI QACHALAL

8. ¿Jampaʼ rajawaxik che ri kʼamal taq bʼe kekitoʼ ri qachalal?

⁸ Ri upatanelabʼ ri Jehová sibʼalaj kkaj kkitoʼ kibʼ (2 Cor. 8:4). Are kʼu jujun taq mul rajawaxik kkikʼutu che kkixiʼj ta kibʼ. Jun kʼutbʼal, are chiʼ kkʼulmataj jun chʼoj, ri kʼamal taq bʼe rajawaxik kkikubʼsaj kikʼuʼx ri qachalal, kkikʼam bʼi kiwa y kkiya ri kajwataj chke pa ri kikojonik. Rumal che sibʼalaj e loqʼ ri qachalal chkiwach, kkibʼan apachike jastaq che kitoʼik, paneʼ kkiya ri kikʼaslemal pa kʼax (Juan 15:12, 13). Je wariʼ kkikʼutu che kkixiʼj ta kibʼ junam rukʼ ri Sadoc.

9. Junam rukʼ ri kubʼij 2 Samuel 15:27-29, ¿jas xubʼij ri David che ri Sadoc? (Xuqujeʼ chawilaʼ ri wachbʼal).

⁹ Ri ukʼaslemal ri David kʼo pa kʼax. Ri Absalón xraj xresaj ri qʼatbʼal tzij che (2 Sam. 15:12, 13). Rumal laʼ ri David xel bʼi pa Jerusalén. Xubʼij chke ri upatanelabʼ: «¡Chujanimaj bʼaʼ chanim o we man je kqabʼano kojqaj riʼ pa uqʼabʼ ri Absalón!» (2 Sam. 15:14). Are chiʼ ri David elenaq chi bʼi pa Jerusalén, xrilo che rajawaxik kkanaj kan jun pa Jerusalén rech kretaʼmaj ri tajin kubʼan ri Absalón. Rumal laʼ xutaq bʼi ri Sadoc y jujun kojol tabʼal taq toqʼobʼ rech kekilaʼ ri tajin kkʼulmataj pa ri tinamit (chasikʼij 2 Samuel 15:27-29). Sibʼalaj kʼax ri chak che xuya ri David chke; rumal che weneʼ kekamisaxik. Ri Absalón nim kubʼan che ribʼ, kubʼan kʼax chke ri winaq y kubʼij molom taq tzij chke. ¿Jas ta xubʼan riʼ chke ri achijabʼ riʼ we ta xretaʼmaj che are ri David xetaqow bʼik?

10. ¿Jas xkibʼan ri Sadoc y ri nikʼaj chik che utoʼik ri David?

¹⁰ Ri David xutaʼ ri utobʼanik ri Sadoc y ri utzalaj ramigo che are ri Husái, rech kkitoʼ kibʼ chuwach ri Absalón (2 Sam. 15:32-37). Ri Husái xujaluj che rachiʼl ri Absalón y xubʼij che ri kubʼano rech kchʼakan puwiʼ ri David. Tekʼuriʼ, ri Husái xubʼij chke ri Sadoc y ri Abiatar ri kubʼan na ri Absalón (2 Sam. 17:8-16). Y ri Sadoc y ri Abiatar xkibʼij apan wariʼ che ri David (2 Sam. 17:17). Rukʼ ri utobʼanik ri Jehová, ri Sadoc y ri e kojol tabʼal toqʼobʼ xkichajij ri David rech xkamisax taj (2 Sam. 17:21, 22).

11. ¿Jas kqabʼan che resaxik uwach ri Sadoc we kbʼix chqe che keqatoʼ ri qachalal?

¹¹ ¿Jas kqabʼan che resaxik uwach ri Sadoc we kbʼix chqe che keqatoʼ ri qachalal paneʼ kqaya ri qakʼaslemal pa kʼax? 1) Chqabʼanaʼ ri kbʼix chqe. Are chiʼ kqakʼulmaj wariʼ rajawaxik kojnimanik rech amaqʼel kʼo junamil chqaxoʼl. Rumal laʼ, chqabʼanaʼ ri kubʼij lo ri sucursal chqe (Heb. 13:17). Ri kʼamal taq bʼe rajawaxik che amaqʼel kkinikʼoj ri rajawaxik kbʼanik are chiʼ kkʼulmataj jun kʼax (1 Cor. 14:33, 40). 2) Kqaxiʼj ta qibʼ, are kʼu qas chqilaʼ na ri kqabʼano (Prov. 22:3). Maqayaʼ qibʼ chuwach kʼax. 3) Chqakubʼsaj qakʼuʼx chrij ri Jehová. Ri areʼ kel ukʼuʼx chqe y kraj che kqachajij qibʼ. Ri Jehová kojutoʼo rech utz kqabʼan che kitoʼik ri qachalal.

12, 13. ¿Jas kqetaʼmaj chkij ri qachalal Víktor y Vitali? (Xuqujeʼ chawilaʼ ri wachbʼal).

¹² Chqilampeʼ ri xkikʼulmaj ri qachalal Víktor y Vitali, kebʼ kʼamal taq bʼe che xkikʼam bʼi jastaq che ktijowik y joron chke ri qachalal che xkiriq kʼax rumal ri chʼoj pa Ucrania. Ri qachalal Víktor kubʼij: «Xqakoj qachuqʼabʼ che utzukuxik jastaq che ktijowik. Kʼi taq mul xqato are chiʼ kekʼaq ri balas chqanaqaj. Jun qachalal kʼo jun utienda y xusipaj jastaq che ktijowik, je wariʼ xyaʼ ri kajwataj chke ri qachalal. Knaʼtaj chwe are chiʼ tajin kqaya ri jastaq pa ri carro, xtzaq jun bomba chqanaqaj weneʼ 20 metros (66 pies), are kʼu xpoqʼ taj. Pa wajun qʼij riʼ sibʼalaj xintaʼ che ri Jehová che kuya qachuqʼabʼ rech kqaya ta kan kitoʼik ri qachalal».

¹³ Ri qachalal Vitali kubʼij: «Rajawaxik che kqaxiʼj ta qibʼ», xuqujeʼ kubʼij. «Ri nabʼe viaje che xinbʼano 12 horas xuchʼijo. Are chiʼ in bʼenaq pa ri bʼe amaqʼel xinbʼan orar che ri Jehová». Ri qachalal Vitali xuxiʼj ta ribʼ are kʼu qas xril na ri xubʼano: «Amaqʼel xintaʼ nunoʼj che ri Jehová rech kinutoʼ che rilik ri kinkunik kinbʼano. Xaq xiw xinbʼe pa taq ri lugares jawiʼ kuya wi bʼe ri Qʼatal tzij che kojopan wi. Más xinkubʼsaj nukʼuʼx chrij ri Dios are chiʼ xinwilo che ri qachalal pa junamam tajin kechakunik. Xojkitoʼo rech xojkunik xojqʼax bʼi pa taq ri carreteras, xkitzukuj ri kajwatajik y xojkitoʼ che uyaʼik bʼi ri jastaq pa ri carro, xkiya jawiʼ kojwar wi kan rukʼ ri a Víktor y xkiya qawa».

MAYA KAN UPATANEXIK RI JEHOVÁ

14. ¿Jas kqanaʼo are chiʼ jun qamigo o jun qafamilia kuya kan upatanexik ri Jehová?

¹⁴ Sibʼalaj bʼisobʼal are chiʼ jun afamilia kuya kan upatanexik ri Jehová (Sal. 78:40; Prov. 24:10). Y más kʼax kanaʼ pa ri awanimaʼ we naj tiempo chik at kʼo rukʼ wajun winaq. We akʼulmam wariʼ, nim katutoʼ wi riʼ ri ukʼutbʼal ri Sadoc.

15. ¿Jasche xajwataj chuqʼabʼ che ri Sadoc rech xuya ta kan upatanexik ri Jehová? (1 Reyes 1:5-8).

¹⁵ Are chiʼ ri David nim chi ri ujunabʼ y xa jubʼiqʼ chi kraj che kkamik, ri Adonías xraj xutoqij ri qʼatbʼal tzij che, paneʼ ri Jehová ubʼim chik che are ri Salomón ri kux qʼatal tzij (1 Crón. 22:9, 10). Ri Sadoc xuya ta kan upatanexik ri Jehová, are kʼu ri Abiatar are xutoʼ ri Adonías (chasikʼij 1 Reyes 1:5-8). Je wariʼ ri Abiatar xukʼutu che kraj ta chik kupatanij ri Jehová y che kraj ta chik kutoʼ ri uqʼatbʼal tzij ri David. ¿Jas xunaʼ riʼ ri Sadoc? Más che 40 junabʼ xeʼux kojol tabʼal toqʼobʼ (2 Sam. 8:17). E kebʼ xkikʼam bʼi ri Arca (2 Sam. 15:29). Xuqujeʼ e kebʼ xkikoj kichuqʼabʼ che utoʼik ri David are chiʼ xux qʼatal tzij y kʼi xkibʼan che upatanixik ri Jehová (2 Sam. 19:11-14).

16. ¿Jas xtoʼw ri Sadoc rech xuya ta kan upatanexik ri Jehová?

¹⁶ Paneʼ ri Abiatar xuya kan upatanexik ri Jehová y xubʼan kʼax che ri David, are kʼu ri Sadoc xuya ta kan upatanexik ri Jehová. Are chiʼ xbʼix che ri David ri kraj kubʼan ri Adonías, xutaʼ tobʼanik che ri Sadoc, ri Natán y ri Benaya rech kkoj ri Salomón che qʼatal tzij (1 Rey. 1:32-34). Qastzij riʼ che nim xtobʼan wi che ri Sadoc ri ukʼutbʼal ri Natán y nikʼaj chi upatanelabʼ ri Jehová che xkiya ta kan upatanixik y xkitoʼ ri uqʼatbʼal tzij ri David (1 Rey. 1:38, 39). Are chiʼ ri Salomón xux qʼatal tzij, xukoj ri Sadoc «che kojol tabʼal toqʼobʼ che ukʼexwach ri Abiatar» (1 Rey. 2:35).

17. ¿Jas kqabʼan che resaxik uwach ri Sadoc we jun qamigo o familia kuya kan upatanexik ri Jehová?

¹⁷ ¿Jas katkunik kabʼano rech kawesaj uwach ri Sadoc? We kʼo jun awamigo o familia che kuya kan upatanexik ri Jehová, qas chakʼutuʼ jachin katoʼ uwiʼ (Jos. 24:15). Ri Jehová kuya na ri achuqʼabʼ che kajwataj chawe. Amaqʼel chabʼanaʼ orar che ri Jehová y chatkʼol kukʼ ri upatanelabʼ che tajin kkipatanij rukʼ ronojel kanimaʼ. Ri Jehová nim kril ri kabʼan che upatanexik y katutewchiʼj na rumal wariʼ (2 Sam. 22:26).

18. ¿Jas kqetaʼmaj chkij ri qachalal Marco y Sidse?

¹⁸ Chqilaʼ ri xkikʼulmaj ri qachalal Marco rukʼ ri rixoqil ubʼiʼ Sidse. Are chiʼ xekʼiy ri kebʼ kalkʼwal alitomabʼ xkiya kan upatanexik ri Jehová. Ri qachalal Marco kubʼij: «Are chiʼ kekʼojiʼ ri qalkʼwal, sibʼalaj keqaloqʼoqʼej. Kqabʼan apachike jastaq rech keqachajij. Rumal laʼ sibʼalaj kojbʼisonik are chiʼ kkiya kan upatanexik ri Jehová». Kubʼij chik: «Are kʼu ri Jehová oj uyoʼm ta kanoq. Are chiʼ sibʼalaj kinbʼisonik ri wixoqil Sidse kinutoʼo y we are ri wixoqil ri kbʼisonik in kintoʼo». Ri qachalal Sidse kubʼij: «Qachʼijom wariʼ xa rumal ri utobʼanik ri Jehová. Sibʼalaj xinbʼisonik rumal che xinchomaj che umak wech in ri e wal xkiya kan upatanexik ri Jehová. Rumal laʼ xinbʼij che ri Jehová ronojel ri kinnaʼo. Xa jubʼiqʼ tiempo qʼaxinaq, xinwil uwach jun qachalal ixoq che ojer kanoq wilom uwach, xinuchap chke ri nutelebʼ y xubʼij chwe: ‹Sidse, chnaʼtaj chawe che amak ta at ri xkʼulmatajik›. Ri Jehová inutoʼm rech kinya ta kan upatanexik rukʼ kikotemal».

19. ¿Jas kawaj kabʼano?

¹⁹ Ri Jehová kraj che konojel ri upatanelabʼ kkixiʼj ta kibʼ junam rukʼ ri xubʼan ri Sadoc (2 Tim. 1:7). Are kʼu ri areʼ kraj che kqakubʼa qakʼuʼx chrij. Rumal laʼ, we tajin kaqʼaxej jun kʼax, chataʼ ri utobʼanik ri Jehová. Ri areʼ qas katutoʼ na rech kaxiʼj ta awibʼ junam rukʼ ri xubʼan che utoʼik ri Sadoc (1 Ped. 5:10).