Kipreguntas ri sikʼinelabʼ

¿Jampaʼ kqaya kan utzijoxik ri utzij ri Dios?

Ri Jesús xubʼij: «Ktzijox na ri utz taq noticias re ri Uqʼatbʼal tzij ri Dios pa ronojel uwach ulew rech kqʼalajisax chkiwach e juntir taq ri tinamit, tekʼuriʼ kpe ri kʼisbʼalil» (Mat. 24:14). Pa wajun versículo riʼ y pa ri versículos 6 y 13, ri tzij «kʼisbʼalil» are kchʼaw chrij are chiʼ ksachisax na uwach juntir ri kʼo pa uqʼabʼ ri Satanás pa ri Armagedón (Apoc. 16:14, 16). Rumal laʼ kqaya kan utzijoxik ri utzij ri Dios are chiʼ kumajij ri Armagedón. Wariʼ are jun kʼakʼ etaʼmanik.

Nabʼe xqachomaj che kqaya kan utzijoxik ri utzij ri Dios are chiʼ ksachisax kiwach ri qastzij taj kojonem y are chiʼ kumajij ri nimalaj kʼaxkʼolil (Apoc. 17:3, 5, 15, 16). Xqachomaj che are chiʼ kumajij ri nimalaj kʼaxkʼolil kkʼis ri «utzalaj junabʼ rech ri Ajawaxel» (Is. 61:2). Xuqujeʼ xqachomaj che xaq xiw kekʼasiʼ kan pa ri nimalaj kʼaxkʼolil ri tajin kkipatanij ri Jehová rukʼ sukʼilal. Y xqachomaj che waʼ taq upatanelabʼ ri Jehová riʼ e junam kukʼ ri judíos che xekʼasiʼ kanoq are chiʼ xsachisax uwach Jerusalén pa ri junabʼ 607, che xbʼixik che kekʼasiʼ kanoq rumal che tajin kkipatanij ri Jehová (Ezeq. 5:11; 9:4). Pero are ta laʼ ri xubʼij kan ri Jesús, rumal che ri areʼ xubʼij che kyaʼ kan ubʼixik ri utz taq noticias chke ri winaq are chiʼ kopan ri kʼisbʼalil pa ri Armagedón.

Are chiʼ más tajin kqachʼobʼ ri kubʼij Mateo 24:14, kqilo che rajawaxik bien kqachʼobʼ ri kraj kubʼij Apocalipsis 16:21, che kchʼaw chrij chomaʼq taq saqbʼach. Are chiʼ más kqanikʼoj ri textos riʼ, kqilo che tajin kchʼaw chrij ri mismo mensaje. ¿Jasche kqabʼij wariʼ? Junam rukʼ ri xubʼij ri apóstol Pablo che ri utzalaj taq noticias utz kkita na ri winaq che kʼo jun utz kanimaʼ rumal che kkiriq na ri kʼaslemal kʼo ta ukʼisik, pero chke ri itzel taq winaq are itzel taq noticias rumal che kkiriq ta ri kʼaslemal kʼo ta ukʼisik (2 Cor. 2:15, 16). Itzel kkita wariʼ rumal che e kʼo pa uqʼabʼ ri Satanás y xa jubʼiqʼ chi kraj ksachisax kiwach. Rukʼ wariʼ kqilo che ri kebʼ textos riʼ xaq junam mensaje ketzijon wi chrij y depende jachin winaq kutaʼ we mensaje riʼ, jelaʼ kubʼan che ukʼamik (Juan 7:7; 1 Juan 2:17; 5:19).

Pero Apocalipsis 16:21 kubʼij che sibʼalaj e nimaʼq ri saqbʼach. Wariʼ kraj kubʼij che rumal ri predicación más ketaʼmax na chrij ri Jehová pa ri nimalaj kʼaxkʼolil (Ezeq. 39:7). ¿La kraj kubʼij wariʼ che e kʼo winaq kkaj kkipatanij na ri Jehová are chiʼ sachisam chi kiwach ri qastzij taj kojonem? Weneʼ kʼolik. Rumal che weneʼ knaʼtaj na chke che ri oj testigos rech Jehová xqaya ubʼixik che ri qastzij taj kojonem ksach na kiwach.

Xaq junam xbʼantaj pa Egipto, are chiʼ ri winaq xkil ri 10 plagas che xekʼulmatajik. E kʼi winaq che e israelitas taj xkaj xeteriʼ bʼi chkij ri utinamit ri Jehová (Éx. 12:12, 37, 38). Weneʼ ri winaq riʼ xkaj xeteriʼ chrij ri utinamit ri Jehová rumal che xkilo che qastzij xebʼantaj ri xubʼij ri Moisés.

Ri winaq che kkaj kkipatanij na ri Jehová are chiʼ sachisam chi ri qastzij taj kojonem, kekun na riʼ kkiya ri kitobʼanik pa ri chak che tajin kkibʼan ri kebʼe pa ri kaj rech jeriʼ kkibʼan salvar kibʼ (Mat. 25:34-36, 40). Y ri tiempo che yaʼom chke rech kkichaʼ upatanexik ri Jehová kkʼisik are chiʼ konojel ri e chaʼom e kʼo chi pa ri kaj y are chiʼ xa jubʼiqʼ kraj kumajij ri Armagedón.

Y rukʼ ri xqilo kojkunik kqil ri nimalaj uloqʼoqʼebʼal ri Jehová che kunaʼ chke ri winaq rumal che «kraj taj chi kʼo jun ksach uwach, xaneʼ are kraj chi konojel kkikʼex na kikʼuʼx» (2 Ped. 3:9).