Levïticu

27 Teyta Jehoväqa yapëmi Moisesta parlapar kënö nirqan: 2 “Israelïtakunatam këta ninëki: ‘Pillapis änikunqanta cumplinampaq,+ juk nuna välinqampa chaninta Teyta Jehoväta qararqa, 3 veinti watayoqpita sesenta watayaq ollqupa chaninta pagakuyta munarqa, cincuenta yuraq pläta qellëtam* paganan. Tsë plätataqa sagrädu sitiuchö këkaq pësakunata churëkurmi pesayänan. 4 Peru warmipa chaninta pagakuyta munarqa, treinta yuraq pläta qellëtam paganan. 5 Pitsqa watayoqpita veinti watayoq ollqupa chaninta pagakuyta munarqa, veinti yuraq pläta qellëtam paganan. Y warmipa chaninta pagakuyta munarqa, chunka yuraq pläta qellëtam paganan. 6 Y juk killayoqpita pitsqa watayoq ollqupa chaninta pagakuyta munarqa, pitsqa yuraq pläta qellëtam paganan. Y warmipa chaninta pagakuyta munarqa, kima yuraq pläta qellëtam paganan.

7 Sesenta watayoqpita witsëpa ollqupa chaninta pagakuyta munarqa, quinci yuraq pläta qellëtam paganan. Y warmipa chaninta pagakuyta munarqa, chunka yuraq pläta qellëtam paganan. 8 Teyta Diosta änikoq nuna waktsayar pagakunampaq kaqta mana pagakuyta puëdirqa,+ sacerdötimanmi ëwanan, y pëmi tsë nuna paguëta puëdinqanta rikëkur ëkata paganampaq ninqa.+

9 Y pillapis Teyta Jehoväpaq juk limpiu animalta apaptinqa, tsë animalqa Teyta Jehoväpaqmi sagrädu kanqa. 10 Tsë apanqan animaltaqa, manam jukwan cambianantsu. Y manam sänu animalta mana sänu animalwan cambianantsu, ni mana sänu animalta sänu animalwan cambianantsu. Tsëta ruraptinqa ishkan animalkunam Teyta Diospaq sagrädu kanqa. 11 Y Teyta Jehoväpaq qarëta apar mana limpiu animalta aparqa,+ sacerdötimanmi apanan. 12 Sacerdötinam tsë animal alli o mana alli kanqanta rikëkur chaninta churanqa. Tsë animalpa chaninqa sacerdöti churanqanmi kanqa. 13 Tsë animalta apaq nuna, animalninta yapë rantita munarqa, tsë animalpa chanintam paganan, y tsëmanmi cada chunka yuraq pläta qellëta paganqampita ishkë yuraq pläta qellëta yapanan.+

14 Pï nunapis wayinta Teyta Jehoväta qaraptinqa, sacerdötim tsë wayi alli o mana alli kanqanta rikëkur chaninta churanan. Tsë wayipa chaninqa sacerdöti churanqanmi kanqa.+ 15 Y Teyta Diosta qaraq nuna wayinta yapë rantita munarqa, tsë wayipa chanintam paganan, y tsëmanmi cada chunka yuraq pläta qellëta paganqampita ishkë yuraq pläta qellëta yapanan. Tsëran tsë wayiqa yapë pëpa kanqa.

16 Pï nunapis chakranta Teyta Jehoväta qaraptinqa, tsë chakraman ëka muru yëkunqanta tantiëkurmi chaninta churayänan. Cientu treinta kïlusnö* cebäda yëkuptinqa, cincuenta yuraq pläta qellëmi chakrapa chanin kanqa. 17 Kushikuypaq Watachö tsë chakranta Teyta Diosta qaraptimpis,+ chaninqa igual-llam kanqa. 18 Peru Kushikuypaq Wata pasanqanchöraq chakranta Teyta Diosta qaraptinqa, yapë Kushikuypaq Watayaq ëka watakuna pishinqanta yupëkurmi tsë chakrapa chaninta sacerdöti churanan. Y chaninqa mënusllanam kanqa.+ 19 Chakranta Teyta Diosta qaraq nuna yapë rantita munarqa, tsë chakrapa chanintam paganan, tsëmanmi cada chunka yuraq pläta qellëta paganqampita ishkë yuraq pläta qellëta yapanan. Y tsë chakraqa yapëmi pëpana kanqa. 20 Peru tsë nuna chakranta mana rantiptin, y juk nunana rantiptinqa, manam chakranta yapë rantita puëdinqanatsu. 21 Kushikuypaq Watachö tsë chakra libri quedaptinqa, sagrädu karmi Teyta Jehoväpana kanqa. Tsë chakraqa sacerdötikunapanam kanqa.+

22 Pï nunapis rantinqan chakrata Teyta Jehoväta qaraptinqa,+ 23 sacerdötim Kushikuypaq Watayaq ëka watakuna faltanqanta yupëkur tsë chakrapa chaninta churanan, y tsë nunaqa tsë junaqllam chaninta paganan.+ Tsë chakrapa chaninqa Teyta Jehoväpaq sagrädum kanqa. 24 Kushikuypaq Watachöqa punta kaq duëñuntam tsë chakrata kutitsinan.+

25 Pagayanqan plätataqa sagrädu sitiuchö këkaq pësata churëkurmi pesayänan. Tsë pësaqa döci grämusmi* pesanan.

26 Wäkapa y üshapa punta wawan Teyta Jehoväpana kaptinmi,+ tsë animalkunapa punta wawantaqa Teyta Jehoväpaq apayänëkinatsu.+ 27 Teyta Diospa rikënimpaq mana limpiu animal kaptinqa, tsë animalpa chanintam pagayänëki, y tsëmanmi cada chunka yuraq pläta qellëta pagayanqëkipita ishkë yuraq pläta qellëta yapayänëki.+ Tsë animalta yapë mana rantiyaptikiqa, sacerdöti churayanqan chaninchömi rantikuyanqa.

28 Tsënö kaptimpis mëqëkipis juk nunata, juk animalta o juk chakrata Teyta Jehovätana qararqa, manam rantikuyta ni yapë rantita puëdiyankitsu. Teyta Jehoväta imatapis qarayanqëkiqa alläpa sagrädum kanqa.+ 29 Pï nunatapis wanutsiyänampaq mandakuyaptinqa, manam chaninta paguëkur tsë nunata salvëta puëdiyankitsu.+ Tsë nunataqa wanutsiyänanmi.+

30 Chakrëkikunachö wayunqampita y früta plantëkikuna wayunqampitaqa, cada chunkapita+ jukqa* Jehoväpam. Tsëkunaqa Teyta Jehoväpaq sagrädum kanqa. 31 Mëqëkipis cada chunkapita jukta qarayanqëkita yapë rantita munarqa, tsëkunapa chanintam pagayänëki, y tsëmanmi cada chunka yuraq pläta qellëta pagayanqëkipita ishkë yuraq pläta qellëta yapayänëki. 32 Cada chunka wäkëkikunapita y cada chunka üshëkikunapita y cabrëkikunapita jukqa Teyta Jehoväpaqmi kanqa. Tsëpaqqa animalnikikunata yuparmi, chunka kaqta Teyta Diospaq rakiyänëki. 33 Tsë animal sänu o mana sänu kanqantaqa manam rikapäyänëkitsu, ni manam jukwan cambiayänëkitsu. Cambiayaptikiqa, punta kaq animalpis y cambiayanqëki animalpis Teyta Diospanam kanqa.+ Y manam yapëqa rantita puëdiyankitsu’”.

34 Kë mandakunqankunata israelïtakunata willanampaqmi, Teyta Jehoväqa Moisesta Sinaï jirkachö mandarqan.+