2 Rëyes
25 Sedequïas isqun watapa gobernëkaptinmi, chunka kaq killapa chunka junaqninchö, Babiloniata gobernaq Nabucodonosor+ soldädunkunawan ëwarqan Jerusalen markata atacanampaq.+ Chëkurnam tsë markapa murällan waqtampa altu perqakunata rurayarqan.+ 2 Tsëchömi kayarqan Sedequïas onci watapa gobernanqan witsanyaq. 3 Chusku kaq killapa isqun kaq junaqnimpaqqa, manam ni imapis mikuyänampaq karqannatsu.+ 4 Tsëmi Jerusalen markachö täkoq* soldädukunaqa paqaspa perqata uchkuriyarqan.+ Y gobernantipa huertan kuchumpam, perqachö këkaq punkupa qeshpir ëwakuyarqan. Babiloniu soldädukunaqa markapa entëru lädunchö këkarpis manam rikäyarqantsu. Sedequïasqa Arabä pampapa ëwaq nänipam ëwakurqan.+ 5 Caldeu soldädukuna musyëkurnam qatipar ëwar Jericöpa tsunyaq sitiunchö taripäyarqan. Tsënam Sedequïaspa soldädunkunaqa mantsakar wakpa këpa ëwakuyarqan. 6 Sedequïasta prësurirmi+ Riblä markachö këkaq Babiloniapa gobernantinman apayarqan y tsëchömi Sedequïasta juzgar ima pasanampaq kaqta nirqan. 7 Rikëkaptinmi tsurinkunata wanutsiyarqan. Tsëpitanam Nabucodonosorqa Sedequïasta wiskuyätsirqan o qaprayätsirqan y cobripita cadënawan alli watarkur Babiloniaman prësu aparqan.+
8 Nabucodonosor diecinuëvi watapa gobernëkaptinmi, pitsqa kaq killapa qanchis kaq junaqninchö, Nebuzaradan+ charqan Jerusalen markaman. Pëqa karqan Babilonia gobernantipa sirweqnin+ y soldädukunapa mandaqninmi. 9 Chärirmi Jehovä Diospa templunman,+ palaciu wayiman,+ Jerusalen markachö llapan wayikunaman+ y respetashqa nunakunapa wayinkunamampis ninata prendïkurqan.+ 10 Y soldädukunata mandaq Nebuzaradanwan këkaq llapan caldeu soldädunkunam markapa entëru murällankunata ushakätsiyarqan.+ 11 Tsëpitanam Nebuzaradanqa kawëkar quedaq nunakunata, nacionninta traicionar Babiloniapa gobernantintana yanapaq nunakunata y wakin markakunachö täkoq* nunakunatapis prësu apakurqan.+ 12 Peru mas waktsa kaqkunataqa chakrakunachö obligädu trabajayänampaq+ y üvas plantakunata cuidayänampaqmi dejarqan. 13 Caldeu soldädukunaqa, Teyta Jehoväpa wayinchö cobripita columnakunata,+ carrëtakunata+ y Jehoväpa wayinchö këkaq Lamar niyanqan cobripita jatun lavatoriutam+ pakir ushayarqan. Y llapan cobritam Babiloniaman apakuyarqan.+ 14 Tsënöllam baldikunata, lampakunata, mëchata upitsina pinzakunata, cöpakunata y cobripita rurashqa llapan cösaskunata apakuyarqan. 15 Nebuzaradannam örupita y pläta metalpita rurashqa tazonkunata y carbonta puritsiyänankunata apakurqan.+ 16 Jehoväpa templunchö kanampaq Salomon ruratsinqan ishkan columnakunaman, Mar niyanqan jatun lavatoriuman y chunka carrëtakunamanqa mëtsika cobrim yëkurqan. Tsëmi mëtsika cobri kaptin pesëta puëdiyarqantsu.+ 17 Columnapa altunqa puwaq metrum* karqan+ y puntanman churayanqan cobripita jatun adornupis cäsi juk metru pullannömi* karqan. Jatun adornupa pachampa tumaq mällapis y tsë jawampa* ishkë fïlapa tumamoq granädakunapis cobripitam karqan.+ Ishkan columnapis tsë niraqllam karqan.
18 Nebuzaradanqa, sacerdötikunapa mandaqnin Seräyata,+ yanapaqnin sacerdöti Sofonïasta+ y templu punkuta täpaq kimaq nunakunatam prësu apakurqan.+ 19 Tsënöllam prësu aparqan soldädukunapa mandaqnin cortichö trabajaq nunata, gobernantipa pitsqa yanapaqninkunata, sesenta ollqukunata y soldädukunapa mandaqnimpa secretariunta. Tsë secretarium soldädu kayänampaq nunakunata qayatseq. 20 Tsë llapan nunakunatam soldädukunapa mandaqnin Nebuzaradanqa,+ Babiloniachö gobernaqman aparqan. Tsë gobernantiqa Riblä markachömi këkarqan.+ 21 Babiloniapa gobernantinqa, Hamatchö+ këkaq Riblä markachömi tsë llapan nunakunata wanutsirqan. Tsënömi Judä+ nunakunataqa prësu apakuyarqan.
22 Judächö+ quedaq nunakunapa mandaqnin kanampaqmi, Babiloniapa gobernantin Nabucodonosorqa Guedalïasta+ churarqan. Guedalïaspa papäninqa Ahicam-mi+ karqan y awilunnam Safan+ karqan. 23 Mandaqninkuna kanampaq Guedalïasta Babiloniapa gobernantin churashqa kanqanta musyarirmi, soldädukunapa mandaqninkunaqa, Guedalïaswan parlayänampaq Mizpä markaman ëwayarqan. Ëwaqkunaqa kayarqan Netanïaspa tsurin Ismael, Carëahpa tsurin Johanan, Netofä markapita Tanhümetpa tsurin Seräya y maacatïta nunapa tsurin Jaazanïam. Y pëkunawanmi soldädunkunapis ëwayarqan.+ 24 Chäriyaptinnam Guedalïasqa mana mantsakuyänampaq kënö parlaparqan: “Ama caldeu nunakunapa sirweqnin këta mantsayëtsu, y gobernantinkunata sirwirnin këchö kushishqa kawakuyë. Manam imapis pasayäshunkitsu”.+
25 Tsëpita qanchis killa pasariptinmi, Ismaelqa+ chunka soldädunkunawan Mizpä markata ëwëkur, Guedalïas y pëwan këkaq judïukunata y caldeu nunakunata wanutsiyarqan.+ Ismaelqa Judächö gobernantikunapa kastanmi karqan. Papäninqa Netanïasmi karqan y awilunnam Elisamä karqan. 26 Tsëpitanam caldeu nunakunata mantsarnin+ llapan nunakuna, hasta wamrapis, mayorpis y soldädukunapa mandaqninkunapis Egiptu nacionta ëwakuyarqan.+
27 Judäpa gobernantin Joaquin+ treinta y siëti watapa prësurëkaptinmi, döci kaq killapa veintisiëti junaqninchö, Babiloniapa gobernantin Evil-Merodac libri dejarirqan Joaquinta.+ Tsëtaqa rurarqan gobernar qallëkurllam. 28 Babiloniachö gobernantiqa alläpa allim Joaquinwan karqan, Babiloniachö këkaq wakin gobernaqkunapitapis mas allim tratarqan. 29 Tsëmi Joaquinqa prësu kanqan röpanta cambiakur, gobernaqwan juntu palaciu wayinchö wanukunqan junaqyaq mikurqan. 30 Y gobernantiqa, wanunqanyaqmi o wañunqanyaqmi cada junaq mikuynin qarayänampaq mandakurqan.