Isaïas
19 Egiptu nacionta ima pasanampaq kaqmi këchö qellqarëkan:+
¡Rikäyë! Ras o sas ëwaq pukutë jananchömi Teyta Jehoväqa Egiptuman chärishqa.
Egiptu nacionchö mana imapaqpis sirweq santukunapis,
manam pëpa puntanchö tsarakuyanqatsu+
y Egiptu nacionchö nunakunapis mantsakarmi karkaryäyanqa.
2 “Egiptu nacionpita nunakuna, kikinkunapura, wawqipura
y vecïnupura pelyayänantam permitishaq.
Tsënöllam juk markachö nunakunapis juk markachö nunakunawan pelyayanqa,
y juk markachö gobernaqkunapis juk markachö gobernaqkunawan pelyayanqa.
3 Egiptuchö nunakunaqa manam ima rurëtapis musyayanqatsu
y imata rurayanqampis manam allitsu yarqunqa.+
Tsëmi pëkunaqa mana imapaqpis sirweq santunkunaman,
brüjukunaman, wanushqakunawan parlayanqanta neqkunaman
y suertita qateqkunaman ëwayanqa.+
4 Egiptuchö nunakunataqa, mana llakipäkoq* nunapa makinmanmi churashaq
y malafë gobernaqkunam gobernayanqapis”+
ninmi llapanta gobernaq Señor y angelkunata mandaq Teyta Jehovä.
5 Lamarpis tsakirinqam y mayupis* wallkayarmi tsakirinqa.+
6 Mayukunapis* asyäyanqam, y Egiptuchö Nïlu mayupita yarqoq sekyakunapis
wallkayarmi tsakiriyanqa.
Shoqush y juncupis ismunqam.+
7 Nïlu mayupis* manam lamarman chanqanatsu,
y Nïlu mayu+ kuchunchö plantakuna,
tsë kinrëchö murukuykunapis llapanmi tsakiyanqa.+
Tsë llapanta vientu apakuptinmi ni imapis quedanqanatsu.
8 Pescadorkunapis llakikuyanqam
y Nïlu mayuman* anzuëlunkunata jitaqkunapis llakikurmi waqayanqa,
y pescayänampaq mayuman mällankunata jitaqkunaqa wallkaqllanam kayanqa.
9 Lïnupita+ imëkata ruraqkuna
y telarchö yuraq tëlata awaqkunapis penqakuychömi ushayanqa.
10 Awapakoqkunapis y pägupaq trabajaqkunapis alläpam llakikuyanqa.
11 Zoan+ markachö gobernadorkunaqa upa nunam kayan.
Egiptuchö gobernaqpa mas yachaq consejaqninkunapis,
manam allitatsu consejakuyan.+
¿Imanirtan Egiptuchö gobernaqta, “noqakunaqa yachaq nunakunapa
y unë gobernaqkunapa kastankunam kayä” niyanki?
12 Tsëqa, ¿mëchötan yachaq nunëkikuna këkäyan?+
Musyarninqa angelkunata mandaq Teyta Jehovä
Egiptuta imata ruranampaq decidinqanta niyäshuy.
13 Zoan markapita gobernadorkunaqa upakunanömi portakuyashqa
Kastankunachö dirigeqkunam Egiptu nunakunata mana alliman chätsiyashqa.
14 Teyta Jehovä permitiptinmi Egiptu nunakunaqa imanö këtapis puëdiyantsu.+
Dirigeqninkunapa culpanmi imëka mana allikunaman chäyashqa,
y shonqun jitanqan o tikratsinqan jananchö
ishkikachëkaq machashqa nunanömi këkäyan.
15 Egiptuchö peqanö o umanö, chupanö, tseqllipinö
y juncunö* kaqkunapis manam ima rurëta puëdiyanqatsu.
16 Tsë witsanqa, Egipciu nunakunapis warmikunanö kallpannaqmi tikrayanqa. Y angelkunata mandaq Teyta Jehovä, pëkunata castiganampaq makinta pallareqta* rikarmi alläpa mantsakar karkaryäyanqa.+ 17 Judäpita nunakunam Egiptu nunakunata alläpa mantsakätsiyanqa y angelkunata mandaq Teyta Jehovä pëkunata castiganampaq kaqta musyarmi, Judä nunakunapita parlaqta wiyarlla alläpa mantsakäyanqa.+
18 Tsë witsanqa, Egiptuchö pitsqa markakunam Canaan nunakuna parlayanqan idiömata parlayanqa,+ y angelkunata mandaq Teyta Jehovällatana sirwiyänampaqmi änikuyanqa y juk kaq markatam Ushakätsikoq Marka nir reqiyanqa.
19 Tsë witsanqa, Teyta Jehoväpaqmi Egiptuchö juk altarta rurayanqa, y lindërunkunachömi Teyta Jehoväta alabayänampaq juk postita jawiyanqa.* 20 Angelkunata mandaq Teyta Jehoväta Egiptupita nunakuna yarpäyänampaqmi, tsëkunaqa juk señalnö kayanqa. Y pëkunaqa sufritseqkunapita salvanampaqmi Teyta Jehoväman mañakuyanqa, y pëqa juk salvakoqtam mandanqa. Awmi, pëkunata salvanampaqmi juk alläpa puëdeq salvakoqta mandanqa. 21 Tsënömi egipciu nunakunaqa Jehovä Diosta reqiyanqa y Teyta Jehoväta reqiyanqan junaqmi pëpaq qarëkunata apayanqa y Teyta Jehovällatana sirwiyänampaqmi änikuyanqa y tsëtam imëpis cumpliyanqa. 22 Teyta Jehoväqa Egiptu nunakunata castigarirmi,+ pëkunata alliyätsinqa. Tsënam pëkunaqa Teyta Jehoväman kutiyanqa, y Teyta Diosnam rogakuyanqanta wiyar pëkunata alliyätsinqa.
23 Tsë witsanmi Egiptupita Asiriayaq juk näni kanqa,+ y tsë nänipam Asiriapita nunakunaqa Egiptuman yëkuyanqa, y Egiptupita nunakunanam Asiriaman yëkuyanqa. Asiria nunakuna y Egiptu nunakunaqa, Teyta Diostam juntu sirwiyanqa. 24 Tsë witsanqa, israelïtakunam Egiptu y Asiria+ nunakunawan juntakäyanqa, y entëru patsa nunakunapaqmi juk bendicion kayanqa. 25 Tsënöqa kanqa, Teyta Jehovä kënö nir bendicishqa kaptinmi: “Sirwimaqnï egipciu nunakuna, kamanqä Asiriapita nunakuna y akranqä israelïta nunakuna bendicishqa kayätsun”.+