Levïticu
24 Tsëpitanam Teyta Jehoväqa Moisesta kënö nirqan: 2 “Chiwchikuna imëpis mana upiyänampaq,* israelïtakunata mandë chiwchikunapaq aceiti de olïvata apayämunampaq.+ 3 Carpa* wayichö këkaq chiwchikunataqa Aaronmi rikänan. Y noqa Jehoväpa rikënïchö mana upinampaqmi,* tardipita patsa waranqanyaq altantu këkänan. Tsë chiwchikunaqa Sagrädu Cäja churaränan cuartuta tsapaq cortïnapa kë lädunchömi këkan. Kë mandakunqätaqa israelïtakuna y tsëpita yureq tsurinkunapis cumpliyänanmi. 4 Aaronmi alli kaq örupita candelabrupa jananchö këkaq chiwchikunata,+ noqa Jehoväpa rikënïchö imëpis listuta katsinan.
5 Alli aqashqa harinapitam döci roscakunata rurayänëki, y cada roscatam ishkë kïlunö* harinapita rurayänëki. 6 Noqa Jehoväpa rikënïchö këkaq alli kaq örupita mësamanmi,+ tsë roscakunata joqta joqta pelayänëki.+ 7 Tsë roscakuna jananmanmi yuraq inciensuta jichayänëki. Tsëqa apayämunqëki qarëta imëpis yarpänäpaqmi kanqa,+ noqa Jehoväpaq ninawan rupatsishqa qarëmi kanqa. 8 Tsë tantakunataqa Aaronmi noqa Jehoväpa rikënïman cada säbadu churanan.+ Kë mandakunqätaqa, israelïtakuna y tsëpita yureq tsurinkunapis cumpliyänanmi. 9 Tsë tantakunaqa Aaronpaq y tsurinkunapaqmi kanqa,+ y carpa* wayipa patiunchömi mikuyänan.+ Noqa Jehoväpaq rupatsiyänampaq apamushqa kayaptikim, tsë tantakunaqa sacerdötipaq sagrädu kanqa. Kë mandakunqätaqa israelïtakuna y tsëpita yureq tsurinkunapis cumpliyänanmi”.
10 Israelïtakuna këkäyanqan campamentuchömi ishkaq nunakuna pelyayarqan. Juknin kaqpa mamanqa israelïtam karqan, y papäninnam egipciu nuna karqan.+ Y juknin nunaqa israelïtam karqan. 11 Israelïta warmipa wamran Teyta Diospa jutimpaq* mana allita parlashqa kaptinmi*+ Moisesman apayarqan.+ Tsë warmiqa Dan kastapita Dibrï jutiyoq nunapa warmi tsurinmi karqan, jutinqa Selomitmi karqan. 12 Y imata rurayänampaq kaqta Teyta Jehovä musyatsikunqanyaqmi, tsë nunata prësu katsiyarqan.+
13 Teyta Jehoväqa Moisesta kënömi nirqan: 14 “Jutïpaq mana allita parlaq nunata campamentupita karuman apayë, y parlanqanta wiyaqkuna peqanman o umanman makinkunata churayätsun, y tsëpitaqa llapan tsëchö këkaqkuna tsë nunata rumiwan wanutsiyätsun.+ 15 Y israelïtakunatam këta ninëki: ‘Pï nunapis Teyta Diospa jutimpaq mana allita parlarqa, castigashqam kanqa. 16 Tsëmi pï nunapis Teyta Diospa jutin Jehoväpaq mana allita parlaptinqa, llapëki rumiwan wanutsiyänëki. Marka mayikikuna o forastëru kaptimpis, Teyta Diospa jutimpaq mana allita parlashqa kaptinmi, tsë nunata wanutsiyänëki.+
17 Nuna mayinta wanutseq nunataqa, wanutsiyänëkim.+ 18 Pï nunapis wätana animalta wanutsirqa, wanutsinqan animalpa duëñuntam jukta kutitsinan. 19 Pï nunapis nuna mayinta malogratsiptinqa, kikintapis tsënöllam rurayänëki.+ 20 Pipa nawintapis pashtapuptinqa, kikimpa nawintapis pashtapuyänëkim; y pipa kiruntapis shikwatsiptinqa, kikimpa kiruntapis shikwatsiyänëkim. Pipa tulluntapis pakirapuptinqa, kikimpa tulluntapis pakirapuyänëkim.+ 21 Pillapis ima animaltapis malogratsiptin o wanutsiptinqa, tsëta ruranqampitam tsë animalpa duëñunta paganan.+ Peru nuna mayinta malogratseq o wanutseq nunataqa wanutsiyänëkim.+
22 Marka mayikikunata o forastërukunata juzgarpis, kë mandakunqänömi rurayänëki.+ Noqam Jehovä Diosninkuna kä’”.
23 Israelïtakunata Moises tsënö niptinmi, Teyta Diospa jutimpaq mana allita parlaq nunata campamentupita karuchö rumiwan wanutsiyarqan.+ Tsënömi israelïtakunaqa Teyta Jehovä Moisesta mandanqannölla rurayarqan.