Jeremïas

33 Soldädukunapa Patiun niyanqanchö prësurëkaptinmi, Teyta Jehoväqa Jeremïasta yapë parlapar kënö nirqan:+ 2 “Noqa Jehovämi patsata kamarqö. Awmi, noqa Jehovämi patsata rurarqö, y këkanqanman alli patsätsirqö. Noqapa jutïqa Jehovämi. Noqam këta nikaq: 3 ‘Noqata qayamaptikiqa wiyashqëkim, y qam mana musyanqëki, imëka espantëpaqkunata y mana entiendipaqkunatam musyatsishqëki’”.+

4 “Kë markachö wayikunata y Judächö gobernaqkunapa wayinkunata ushakätseq nunakunapaqmi, Israel nunakunapa Diosnin Jehoväqa parlarqan. Tsë nunakunaqa, markankunaman mana yëkuyänampaq y espädawan ushakätsiyänampita+ defendikurmi, tsë wayikunata ushakätsiyarqan. 5 Tsënöllam Caldëapita soldädukunawan pelyaq ëwëkaq nunakunapaq, y alläpa cölerar wanutsinqan nunakunapa ayanwan junta këkaq wayikunapaqpis parlarqan. Tsë nunakuna alläpa mana alli kayaptinmi, pëqa kë markata dejaskirqan. Pëkunapaqmi Teyta Diosqa këta nin: 6 ‘Pëkunata jampirmi alli saloryoq+ kayänampaq yanapashaq. Awmi, pëkunata alliyäyänampaq yanaparmi, imëpis yamë y següru kawakuyänanta permitishaq.+ 7 Juk nacionman apayanqampitam, Judäpita y Jerusalenpita nunakunata kutitsimushaq,+ y unënöllam nacion kayänanta permitishaq.+ 8 Rikënïchö imëka jutsata*+ rurayanqampitam limpiuyätsishaq. Jutsata rurar culpayoq kayanqampita, y rikënïpaq imëka mana allikunata rurayanqampitam perdonashaq.+ 9 Kë markapa jutinta wiyarqa, alläpam kushikushaq. Y kë markachö nunakunapaq imëka ruranqäta musyarqa, mëtsë nacionpita nunakunam noqapaq allita parlayanqa y alabayämanqa. Pëkunapaq imëka allikunata ruranqäta,+ y yamë kawakuyänanta permitinqäta musyarmi,+ mëtsë nacionpita nunakuna alläpa mantsakar karkaryäyanqa’”.+

10 “Teyta Jehovämi këta nin: ‘Qamkunaqa kë kinrë markakunapaqmi niyanki tsunyaq këkanqanta, y nunapis ni animalkunapis mana kanqanta. Awmi, Judächö markakuna y Jerusalenchö cällikuna tsunyaq këkanqanta, nunapis y animalninkunapis mana kanqantam niyanki. 11 Tsënö kaptimpis yapëmi wiyayanki, nunakuna alläpa kushikur+ büllayanqanta, noviuwan novian parlayanqanta y kënö niyanqanta: “¡Alläpa alli kanqampita,+ angelkunata mandaq Teyta Jehoväta agradecikuyë! ¡Teyta Jehoväqa alläpa kuyakoqmi imëpis këkan!”’.+

‘Unënö kayänampaqmi, juk nacionman apashqakunata kë kinrë markakunaman kutitsimushaq. Tsëmi noqata agradecikamar, noqa Jehoväpa wayïman+ qarëkunata apayämunqa’ ninmi Teyta Jehovä”.

12 “Angelkunata mandaq Teyta Jehoväqa këtapis ninmi: ‘Mitsikoqkuna üshankunata jamatsiyänampaqmi, nunapis y animalpis mana kanqan tsunyaq sitiuchöpis y kë kinrë markakunachöpis yapë qewa kanqa’.+

13 ‘Tsënöllam jirkakuna kinrë markakunachö, Sefelä kinrë markakunachö, Nëgueb kinrë markakunachö, Benjaminpa kastankuna kawayanqan markakunachö, Jerusalenpa amänunchö+ y Judäpa markankunachöpis,+ mitsikoqkunaqa rikrankuna jawampa* pasaq üshankunata yapë yupayanqa’ ninmi Teyta Jehovä”.

14 “Teyta Jehoväqa kënöpis ninmi: ‘Rikäyë, ichikllachönam Israelpita y Judä nacionpita nunakunata, imëka allikunata ruranäpaq äninqäta cumplishaq.+ 15 Tsë junaqkuna y tsë witsanmi, Davidpa kastampita juk alli nuna+ yurinanta permitishaq. Pëqa entëru patsachömi justiciata ruranqa, y alli kaqllata ruranqa.+ 16 Tsë witsanqa Judäpita nunakunatam salvayanqa+ y Jerusalenpita nunakunam següru kawayanqa.+ Y noqantsikpaqqa Jehovämi Justiciata Ruranqa nirmi reqishqa kayanqa’”.+

17 “Teyta Jehoväqa këtam nin: ‘Israel nunakunataqa, Davidpa kastankunam imëpis gobernayanqa.+ 18 Tsënöllam rupatsina qarëkunata, gränupita rurashqa qarëkunata y wakin qarëkunatapis, Levïpa kastan sacerdötikunalla noqapaq rupatsiyämunqa’”.

19 Teyta Jehoväqa Jeremïasta yapë parlaparmi kënö nirqan: 20 “Teyta Jehovämi këta nin: ‘Junaqpis paqaspis tiempunchö chämunampaq, junaqwan y paqaswan ruranqä acuerduta, pï nunapis ushakätsita puëdiptinllam,+ 21 gobernar täkunqampita+ tsurinkuna gobernayänampaq sirwimaqnï Davidwan+ ruranqä acuerduta ushakätsishaq. Tsënö pasakuptinllam, Levïpa kastan sacerdötikunawan sirwiyänampaq ruranqä acuerdutapis ushakätsishaq.+ 22 Imanömi ciëluchö estrëllakunata* y lamar kuchunchö arënata, mëtsika kaptin ni pï yupëta puëdintsu, tsënöllam sirwimaqnï Davidpa kastankuna y sirwikämaq Levïpa kastankunapis mëtsika kayanqa’”.

23 Teyta Jehoväqa yapëmi Jeremïasta parlapar kënö nirqan: 24 “¿Manaku wiyarqunki kë nunakuna nikäyanqanta? Pëkunaqa, ‘Teyta Jehoväqa akranqan ishkë familiakunatam dejarishqa’ nikäyanmi. Pëkunaqa manam sirwimaqnïkunata respetayantsu, y manam naciontanötsu rikäyan.

25 Tsëmi noqa Jehoväqa këta nï: ‘Junaqwan y paqaswan acuerduta ruranqänölla,+ y ciëlupaq y patsapaq leykunata churanqänöllam,*+ 26 Jacobpa kastankunata y sirwimaqnï Davidpa kastankunataqa, manam imëpis dejashaqtsu. Tsëmi Abrahanpa, Isaacpa y Jacobpa kastankunataqa, Davidpa kastankunalla imëpis gobernayanqa. Tsënöqa kanqa, juk nacionman apayanqampita kutitsimur+ pëkunata llakipaptïmi’”.*+