Isaïas
47 Babilonia+ nunakunapa shipash wamran, tëkanqëkipita bajar allpaman täkuy.+
Caldeu nunakunapa shipash wamran,
gobernar täkunqëki sitiuqa manam kannatsu, patsaman täkuy.
Nunakunaqa manam delicäda,
y munëninta rurakoq warmi niyäshunkinatsu.
2 Maki mulinuwan harinata rurë,
y cärëkita tsapaq ratashta jipikuy.
Chankëkikuna rikakunampaq faldëkita jipikuy,
y mayukunata* tsimpë.
3 Nunakunam qalapächuta rikäyäshunki.
Awmi, entëru cuerpuykitam rikäyanqa.
Rurënikikunamannö qamkunata castigaptïqa*+ manam ni pï michämanqatsu.
4 “Yapë rantimaqnintsikqa Israelpa Limpiu Diosninmi.+
Pëpa jutinqa, angelkunata mandaq Teyta Jehovämi”.
5 Caldëa nunakunapa shipash wamran,+ ampirëkaqman o tsakëkaqman* yëkuskir tsëchö upälla täkuy.
Y manam yapëqa, mëtsë nacionchö
Nunakunata Gobernaq Warmi niyäshunkinatsu.+
6 Sirwimaqnïkunawanmi alläpa cölerakurqä,+
y penqakuychö ushayänanta permitirmi+
qampa makikiman entregarqä.+
7 Qamqa, “noqaqa imëpis Gobernaq Warmim kashaq”+ nirqëkim,
y manam rurëkanqëkiman pensarqëkitsu,
ni imachö ushanampaq kaqman yarparqëkitsu.
8 Wiyamë imëkayoq këta gustaq+ y kikinllaman confiakoq warmi.
Qamqa shonquykichömi kënö ninki:
“Noqanöqa manam ni pï kantsu.+
Noqaqa manam imëpis viudatsu kashaq,
y manam wamräkunata oqrashaqtsu”.+
9 Tsënö nikarmi, juk junaqllachö+ illaqpita
wamrëkikunata oqranki y viuda quedanki.
10 Imëka mana allikunata rurëkarpis,
“manam ni pï rikämantsu” nirqëkim.
Yachaq kanqëki y imëkata musyanqëkim mana alliman chätsishurqunki.
Y shonquykichömi kënö ninki: “Noqanöqa manam ni pï kantsu”.
11 Imëka mana allikunam qamman chämunqa,
y manam ima magiata ruranqëkipis salvashunkitsu.
Tsë mana allikuna qamman chämuptinqa manam salvakuyta puëdinkitsu,
y illaqpitam mana imëpis pasashunqëkita sufrinki.+
12 Tsëqa, brujerïata rurar+ y nunakunata brüjar sïgui.
Tsëtaqa jövin kanqëkipitam mana dejëpa rurarqunki.
Capazchi tsëta rurarqa imallatapis tarinkiman
o nunakuna espantakuyänanta logrankiman.
13 Consejashoqnikikunata kutin kutin tapuytapis ajayaskirqunkinam.
Pëkunaqa llullu killachömi ima pasashunëkipaq kaqta willakuyan.
14 ¡Rikë! Pëkuna raströjunö kayaptinmi
nina ushakätsinqa.
Awmi, ninapitaqa manam salvakuyta puëdiyanqatsu.
Tsë shanshëkaq o shankëkaq carbonqa manam qoñükunapaqtsu,
tsë ninaqa manam frentinchö täkunapaqtsu.
15 Awmi, jövin kanqëkipita qamwan trabajaq brüjukunam
qampaq tsënö kayanqa.