Osëas
10 “Israelqa alli üvas planta këkarmi, mana alli üvas plantaman tikrashqa y imëpis wayuykanmi.+
Imëkayoq tikrarmi, mas altarkunata rurayan.+
Chakrankunachö imëkapis mas alli wayuptinmi, pëkunaqa mas shumaq sagrädu postikunata rurayan.+
2 Pëkunaqa ishkë cäram kayan,
tsëmi kananqa juzgashqa kayanqa.
Altarninkunata y sagrädu postikunatam ushakätsiyanqa.
3 Kananqa kënömi niyanqa: ‘Teyta Jehoväta mana respetanqantsikpitam gobernamaqnintsik kantsu.+
Gobernamaqnintsik karpis, ¿imataraq noqantsikpaq ruramunman?’.
4 Mana imachöpis yanapakoqtam parlayan, mana cumpliyänampaqmi imatapis änikuyan+ y acuerduta rurayan.
Chakrakunachö venënuyoq planta miranqannömi mana alli rurëkuna mirashqa.+
5 Mallwa töru santunkunata Bet-Ävenman+ apashqa kayaptinmi,
Samaria nunakunaqa mantsakashqa këkäyan.
Santunkunata juk nacionkunaman apakushqa kayaptinmi, adoraqnin nunakunaqa llakikuyanqa, tsënöllam tsë santukunata sirweq sacerdötikunapis llakikuyanqa.
Puëdeq këninkuna y kushikuyninkuna santunkuna kashqa kaptinmi llakikuyanqa.
6 Asiriachö puëdeq gobernaqta qarayänampaqmi santunkunata apayanqa.+
Consejayanqanta rurashqa karmi
Efrainqa allqutsashqa kanqa y Israelpis penqakatsishqa kanqa.+
7 Yaku jananman jitayanqan räma ushakaqnömi,
Samariawan gobernaqninqa ushakäyanqa.+
8 Israelïtakunata jutsaman*+ chätseq Bet-Avenchö+ sagrädu sitiukunapis ushakäyanqam.+
Altarninkunachöpis kashakuna y cardonkunam jeqamunqa.+
Nunakunam jirkakunata, ‘¡tsaparkayämë!’ niyanqa,
y taksha jirkakunatanam, ‘¡janäkunaman jeqarkayämuy!’ niyanqa.+
9 Guibeä+ markachö juk kuti pasakunqannömi, israelïtakunaqa jutsa* rurëkunaman chäyashqa.
Tsë sitiuchömi mana allikunata rurar sïguiyashqa.
Mana allita ruraqkunata ushakätsiyänampaq Guibeächö rurayanqan guërraqa, manam mana allita ruraqkunata ushakätsirqantsu.
10 Munanqä höram pëkunata castigashaq,
y ishkan castïgunkunata yügutanö apaqta rikarmi
wakin nacionkunaqa contran juntakäyanqa.
11 Efrainqa trillëta gustaq alli yachatsishqa malta wäkanömi karqan,
tsëmi kuyëllapaq matankanman yüguta churarqätsu.
Kananqa Efrainta+ montashqa puritsiyänantam permitishaq.
Judämi yapyanqa,* y Jacobmi rastrïlluwan pëpaq trabajanqa.
12 Ima alli kanqanta cuentaman churëkur muruyë, y rasumpa kuyakuytam cosechayanki.
Alli kaqta yachatsiyäshunëkipaq pë shamunqanyaq tsëta rurayë.+
13 Peru qamkunaqa mana alli kaqtam muruyarqunki,
tsëmi mana alli kaqta cosechayarqunki,+
y engañakoq karmi imëka mana allikunapa pasayarqunki.
Qamkunaqa imatapis munayanqëkinömi rurayarqunki,
y mëtsika soldäduykikunamanmi confiakuyarqunki.
14 Markëkichö kaqkunawan pelyaqmi büllata rurar shayämunqa,
y alli murallashqa markëkikunatapis ushakätsiyanqam.+
Tsëqa kanqa Bet-Arbel sitiuta Salman guërrachö ushakätsinqannömi.
Tsë kutichöqa warmikunata y wamrankunatam feyupa wanutsiyarqan.
15 Alläpa mana allikunata ruraptikim, qamtaqa tsënö rurayäshunki Betel.+
Israelchö gobernaqtaqa patsa warëmi ushakätsiyanqa”.+