1 Samuel
12 Tsëpitanam Samuelqa llapan israelïtakunata kënö nirqan: “Llapan niyämanqëkitam ruramurqö, y gobernantikikunapis churamurqömi.+ 2 ¡Këchömi këkan gobernantikikuna!*+ Noqaqa awkinna y soqu aqtsayoqnam kä, y wamräkunaqa qamkunawanmi këkäyan.+ Jövin kanqäpita kananyaqmi qamkunata yanapar këkarqö.+ 3 Imëllapis pipa törunta o ashnunta apakushqa kaptï,+ o ima asuntutapis mana musyaq tukunäpaq ima pägutapis chaskipakushqa kaptï,+ o pitapis sakyapashqa kaptï o sufritsishqa kaptïqa, mä kanan Jehovä Diospa rikëninchö y pë akranqan gobernantipa puntanchö+ shimpiyämë, y noqaqa paguëkuyashqëkim”.+ 4 Pëkunanam niyarqan: “Manam ni imëpis sakyapäyämarqunkitsu, ni sufritsiyämarqunkitsu, ni ima pägutapis chaskipäyämarqunkitsu”. 5 Tsënam Samuelqa nirqan: “Kananqa manam ima mana allipitapis culpatsamëta puëdiyankitsu,* tsëtaqa kikin Teyta Jehovä y pë akranqan gobernantipis wiyëkanmi”. Tsënam pëkunaqa, “awmi, wiyëkäyanmi” niyarqan.
6 Tsënam Samuelqa israelïtakunata kënö nirqan: “Unë kastëkikunata Egiptupita pushamunampaq+ Moisestawan Aaronta mandaq Jehovä Diosmi, kë llapanta wiyëkan. 7 Qamkunapaq y unë kastëkikunapaq Teyta Jehovä imëka allikuna ruramunqanta yarpätsiyänaqpaq puntäman shayämuy. Y noqam Jehovä Diospa puntanchö shimpiyashqëki.
8 Jacobmi Egiptuman charqan,+ y tiempuwannam unë kastëkikuna sufriyarqan, tsëmi Jehovä Diosta yanapëkunampaq rogakuyarqan.+ Tsënam Jehoväqa Moisestawan+ Aaronta mandarqan Egiptupita pushamunampaq+ y kë markakunaman apamunampaq. 9 Unë kastëkikunaqa Jehovä Diosnintsiktam qonqëkuyarqan.+ Tsëmi pëpis dejarirqan Hazor markachö soldädukunapa mandaqnin Sïsara,+ filisteu+ nunakuna y Moab+ markachö gobernanti sufritsinampaq. 10 Tsënam pëkunaqa Jehovä yanapëkunampaq+ kënö nir rogakuyarqan: ‘Teyta Jehovä jutsallakuyarqömi.*+ Baalta+ y Astoret+ santukunata adorarmi qamta qonqëkuyarqoq. Perdonëkayämë y chikimaqnïkunapita salvëkayämë. Tsëqa qamllatanam sirwiyashqëki’. 11 Tsëmi Jehovä Diosqa Jerubaalta,+ Bedanta, Jeftëta+ y Samuelta+ mandarqan chikeqninkunapita salvanampaq. Tsënöpa qamkuna alli kawakuyänëkipaq.+ 12 Peru Jehovä Dios Gobernantikikuna këkaptinmi,+ ammonïtakunapa gobernantin Nahas+ qamkunaman pelyaq shamuptinqa, ‘gobernantïkuna churamunëkitam munayä’+ nirnin kutin kutin niyämarqëki. 13 Munayanqëki y mañakuyanqëki gobernantiqa këchömi këkan. Jehovä Diosmi qamkunapaq churamushqa.+ 14 Jehovä Diosllata respetayaptiki,*+ sirwiyaptiki,+ ninqanta cäsukuyaptiki,+ Jehovä Dios mandakunqanta shumaq wiyakuyaptiki y gobernantikikunawan Teyta Jehovällata sirwiyaptikiqa, llapan rurayanqëkipis allim yarqunqa. 15 Peru Jehovä Dios ninqanta mana cäsukuyaptiki y Jehovä Dios mandakunqampa contran churakäyaptikiqa, Jehovämi qamkunata y papänikikunatapis castigayäshunki.+ 16 Kananqa puntäman shamur rikäyë, Jehovä Diosmi mantsakëpaqta ruramunqa. 17 ¿Manaku trïgu cosëcha witsanchöna këkantsik? Tsënö kaptimpis Jehovämanmi mañakaramushaq tamyatsimunampaq y räyutapis janrarätsimunampaq. Tsënöpam cuentata qokuyanki juk gobernaqta mañakurnin Jehovä Diosta cöleratsiyanqëkita”.+
18 Tsënö nirnam Samuelqa Jehovä Diosman mañakurqan, y Teyta Jehovämi tsë junaq tamyatsimurqan y räyutapis janrarätsimurqan. Tsënöpam Jehoväta y Samuelta llapankuna mantsayarqan. 19 Llapankunam Samuelta niyarqan: “Noqalläkunapaq+ Jehovä Diosman mañakëkamuy, manam wanuyta munayätsu, jutsata* rurëkarpis juk gobernaqta mañakurqa mas jutsataran rurëkuyarqö”.
20 Tsënam Samuelqa llapankunata kënö nirqan: “Ama mantsakäyëtsu. Mana allikunata rurashqa karpis, kanampita witsëpaqa amana Teyta Jehoväta dejayënatsu+ y llapan shonquykikunawan Teyta Jehovällatana sirwiyë.+ 21 Ama Teyta Diosta dejayëtsu ni santukunata adorayëtsu.+ Tsë santukunaqa manam imapaqpis väliyantsu+ ni manam pitapis salvëta puëdiyantsu. 22 Jehovä Diosqa sirweqninkuna kayänëkipaqmi akrayäshurqunki.+ Jehoväqa jutin imëpis respetashqa+ kananta munarmi dejayäshunkitsu.+ 23 Y noqaqa manam qamkunapaq mañakamuyta dejashaqtsu, qamkunapaq mañakamuyta dejarqa Jehovä Diospa contranmi jutsata* rurëkäman. Y alli kaqta rurayänëkipaqmi imëpis yachëkätsiyashqëkilla. 24 Qamkunaqa Teyta Jehoväta respetayë*+ y llapan shonquykikunawan pëllatana sirwiyë. Y imëka allikunata qamkunapaq ruramunqankunata yarpäyë.+ 25 Peru mana allikunata rurëta mana dejarqa, qamkuna y gobernantikikunapis+ ushakäyankim”.+