Ezequiel

15 Teyta Jehoväqa yapëmi parlapämarqan y kënömi nimarqan: 2 “Nunapa tsurin, ¿üvas plantapa tullunqa wakin qerukunawan igualanku? O ¿montichö këkaq plantakunapa rämanllawampis igualanku? 3 Tsakishqa üvaspa tullumpitaqa, ¿nunakuna imallatapis rurëta puëdiyanmanku? ¿Warkukuna estäcallatapis rurëta puëdiyanmantsuraq? 4 Rikarqunkim, tsakishqa üvaspa tulluntaqa ninamanmi yantatanö jitëkuyan. Y ninaqa qaranllata y shonqunllatam ruparin. Tsënö rupariptinqa, ¿imallapaqpis sirwinku? 5 Nina manaraq rupaptinqa manam ni imapaqpis sirwirqantsu. Nina rupariptinnäqa mas peor-ran välinnatsu”.

6 “Tsëmi Llapanta Gobernaq Teyta Jehovä kënö nin: ‘Imanömi üvaspa tsakishqa tullunta, wakin qerukunanö mana kaptin ninaman jitëkurqö, tsënömi Jerusalenchö nunakunatapis rurashaq.+ 7 Tsë nunakunapa contranmi churakarqö. Ninapita salvakushqa kayaptimpis, pëkunataqa ninam rupar ushakätsinqa. Pëkunapa contran churakaptïmi, qamkuna musyariyanki noqa Jehovä kanqäta’”.+

8 “‘Noqata dejaramar mana allikunata rurayanqampitam,+ markankunaqa tsunyëkar quedanqa’+ ninmi Llapanta Gobernaq Teyta Jehovä”.