Zacarïas

3 Tsëpitanam mandakoq sacerdöti Josuëta+ rikätsimarqan. Pëqa Teyta Jehoväpa angelnin puntanchömi këkarqan, y derëcha kaq lädunchönam contran churakänampaq Satanas+ këkarqan. 2 Tsëmi Teyta Jehoväpa angelninqa Satanasta nirqan: “¡Teyta Jehovä corregishuy Satanas!+ ¡Awmi, Jerusalenta akraq Teyta Jehovä corregishuy!+ ¿Manaku kë nunaqa ninapita salvashqa yantanö këkan?”.

3 Josuëqa mana limpiu röpanwanmi angelpa puntanchö këkarqan. 4 Tsënam angelqa pëpa puntanchö këkaqkunata, “mana limpiu röpanta jipitsiyë” nirqan. Tsëpitanam Josuëta nirqan: “Culpayoq kanqëkitam ushakätsirqö, y kananqa alli röpatanam vistitsiyäshunki”.+

5 Tsënam noqapis, “peqanman o umanman limpiu wankunata churatsiyë”+ nirqä. Tsëmi limpiu wankunata churapuyarqan y röpan vistitsiyarqan, y Teyta Jehoväpa angelnimpis pëkunapa lädunchömi këkarqan. 6 Tsëpitanam Teyta Jehoväpa angelninqa Josuëta nirqan: 7 “Angelkunata mandaq Teyta Jehovämi këta nin: ‘Mandakunqänö kawar y ruranëkipaq mandanqaqta cumplirqa, wayïchömi juez kanki+ y patiükunatam cuidanki,* këchö këkaq angelkunanömi këkanqäman yëkamuyta puëdinki’.

8 ‘Mandakoq sacerdöti Josuë, qampis y qampa puntëkichö jamakoq sacerdötikunapis shumaq wiyarayämë, tsë sacerdötikunaqa señal cuentam kayan. ¡Tseqllipi+ jutiyoq sirwimaqnïtam mandamushaq!+ 9 ¡Josuëpa puntanman churanqä rumita rikäyë! Tsë rumiqa qanchis nawiyoqmi, y tsë rumiman qellqarmi tsë nunakunapa mana alli rurëninkunata juk junaqllachö ushakätsishaq’ ninmi angelkunata mandaq Teyta Jehovä.+

10 Angelkunata mandaq Teyta Jehoväqa kënöpis ninmi: ‘Tsë junaqqa, üvas plantëkikunapa y hïgus plantëkikunapa chakinchö jamakuyänëkipaqmi vecïnuykikunata niyanki’”.+