Apocalipsis
1 Jesucristu revelar* musyatsikunqan. Tsëtaqa ichikllachöna pasanampaq kaqkunata sirweqninkunata rikätsinampaqmi+ Teyta Dios musyatsirqan.+ Jesusqa angelninta mandarmi, suëñuchönö sirweqnin Juanta tsëkunata rikätsirqan.+ 2 Juannam Dios musyatsinqampita* y Jesucristu musyatsinqampita, awmi, llapan rikanqampita willakurqan. 3 Dispunishqa tiempuqa këllachönam këkan, tsëmi kushikutsun Teyta Dios shamoq tiempupaq musyatsikunqanta fuertipa leyeq, y kushikuyätsun tsëta wiyaqkuna+ y tsëchö qellqarëkanqanta cäsukoqkuna.
4 Juanpita, Asia provinciachö këkaq qanchis congregacionkunachö kaqkunapaq:+
Qamkunawan alläpa alli këkuyätsun y yamë kayänëkipaq yanapëkuyäshuy, “kanan këkaq, kashqa kaq y shamoq kaq Dios”,+ gobernar täkunampa puntanchö qanchis espïritukuna+ 5 y Confiakuypaq Testïgu,+ wanushqakunapita Puntata kawarimoq+ y patsachö gobernaqkunapa Gobernaqnin Jesucristu.+
Kuyamaqnintsik,+ kikimpa yawarninwan jutsantsikkunapita* libramaqnintsik,+ 6 y Teytanta y Diosninta sirwinapaq gobernaqkuna+ y sacerdötikuna+ kanapaq yanapamaqnintsik, awmi, pë imëyaqpis alläpa puëdeq y poderyoq katsun. Tsënö kallätsun.*
7 ¡Rikäyë! Pukutëchömi shamunqa,+ y llapan nunakuna y tukseqnin kaqkunapis rikäyanqam; y përëkurmi patsachö llapan kastakuna llakikur pëchunkunata kutakuyanqa.+ Awmi, tsënö kallätsun.*
8 Jehovä* Diosmi këta nin: “Noqam Alfa y Omëga* kä,+ kanan këkaq, kashqa kaq y shamoq kaq Llapanta Puëdeq Dios”.+
9 Wawqikikuna, sufrimientukunapa pasaq mayikikuna,+ gobiernuta chaskeq mayikikuna+ y Jesuspa qateqnin kar+ alli tsarakoq mayikikuna,+ noqa Juanmi, Diospita parlanqärëkur y Jesucristupita willakunqärëkur, Patmus niyanqan islachö këkarqä. 10 Atska santu espïrituyoq këkarmi, Señorpa junaqninchö rikakurqä, y trompëta waqaqnö qepächö alläpa fuertipa parlanqantam wiyarqä, 11 y kënömi neq: “Rikanqëkita rölluman qellqë, y qanchis congregacionkunaman apatsi, awmi, Ëfesuchö,+ Esmirnachö,+ Pergamuchö,+ Tiatïrachö,+ Sardischö,+ Filadelfiachö+ y Laodicëachö+ këkaq congregacionkunaman apatsi”.
12 Pï parlapëkämanqanta rikänäpaq tumarmi, örupita qanchis candelabrukunata rikarqä.+ 13 Candelabrukunapa chowpinchönam,* chakinyaq largu röpawan vistishqata nunapa tsurin niraqta rikarqä,+ y pëchunchömi örupita wachukuta wachakarëkarqan. 14 Manam tsëllatsu, peqan o uman y aqtsanqa millwanö y rashtanö* yuraqmi karqan, y nawinkunaqa rawrëkaq o lunyëkaq ninanömi karqan.+ 15 Chakinkunaqa hornuchö këkar chipapaq alliyätsishqa cobrinömi karqan,+ y parlanqanqa mëtsika yaku büllaqnömi karqan. 16 Derëcha makinchömi qanchis estrëllakunata katsirqan;+ shimimpitam ishkan lädupa alli afilashqa jatun puntash espäda yarqamoq,+ y cäranqa chipapäkuykaq intinömi o rupaynömi karqan.+ 17 Rikëkurqa, wanushqanömi chakin kaqman ishkirirqä.
Pënam derëcha makinta noqaman churarkur kënö nimarqan: “Ama mantsakëtsu. Noqam kä Punta kaq,+ Ultimu kaq+ 18 y kawëkaq.+ Wanushqam këkarqä,+ peru kananqa imëyaqpis kawëyoqmi kä,+ y wanuypa o wañuypa y Sepultürapa* llävintam katsï.+ 19 Tsëmi rikanqëkita, kanan pasëkanqanta y tsëpita pasanampaq kaqkunata qellqë. 20 Derëcha makïchö rikanqëki qanchis estrëllakuna y örupita qanchis candelabrukuna rikätsikuyanqan pakarëkaq sagrädu noticiaqa këmi: qanchis estrëllakunaqa qanchis congregacionkunachö këkaq angelkunatam rikätsikun, y qanchis candelabrukunaqa qanchis congregacionkunatam rikätsikun.+