Romänus

8 Tsëmi Cristu Jesuswan juknölla këkaqkunaqa condenashqatsu kayan. 2 Awmi, Cristu Jesusrëkur kawëta apamoq santu espïritupa leyninqa, jutsapa* leynimpita y wanuypitam salvayäshurqunki.+ 3 Teyta Diosqa nunakuna jutsa* ruraq kayaptin Ley rurëta mana puëdinqantam rurarqan.+ Pëqa jutsata ushakätsinampaqmi, jutsa ruraq nunatanö+ Tsurinta mandamurqan.+ Tsënömi nunakunapa jutsanta condenarqan, 4 tsënöpa jutsata* ruraq cuerpuntsik dominamänata mana permitir santu espïritu dirigimänata permiteqkunachö,+ awmi, noqantsikchö Leypa alli kaq mandamientun cumplikänampaq.+ 5 Jutsa* ruraq cuerpunkuna munanqannö kawaqkunaqa,+ jutsa ruraq cuerpunkuna munanqanmanmi yarparäkuyan, peru santu espïritu munanqannö kawaqkunaqa, santu espïritupa kaqkunamanmi yarparäyan.+ 6 Jutsa* ruraq cuerpuntsik munanqanman yarparëqa wanuymanmi chätsikun,+ peru santu espïritupa kaqkunaman yarparëqa, kawëman y yamë këmanmi chätsikun.+ 7 Jutsa* ruraq cuerpuntsikqa, manam Teyta Diospa leyninta cäsukuntsu ni cäsukuyta puëdintsu.+ Tsëmi jutsa ruraq cuerpuntsik munanqanman yarparëqa, Teyta Diospa chikeqnin tikratsimantsik. 8 Tsëmi jutsa* ruraq cuerpunkuna munanqannö kawaqkunaqa, Teyta Diosta kushitsita puëdiyantsu.

9 Tsënö kaptimpis, Teyta Diospa santu espïritun qamkunachö rasumpa kaptinqa, manam jutsa* ruraq cuerpuykikuna munanqannötsu kawëkäyanki, sinöqa santu espïritu munanqannömi.+ Peru Cristupa pensëninta mana katsirqa, manam pï nunapis pëpatsu. 10 Tsënö kaptimpis, Cristu qamkunawan juknölla kaptinqa,+ jutsarëkur* cuerpuykikuna wanushqanö këkaptimpis, allita ruraqnö rikashqa karmi santu espïritupita kawëta chaskiyanki. 11 Wanushqampita Jesusta kawatsimoqpa santu espïritun qamkunachö këkaptinqa, Cristu Jesusta wanushqampita kawatsimoqmi,+ wanoqlla cuerpuykikunatapis+ qamkunachö këkaq santu espïritunwan yapë kawatsinqa.

12 Tsëmi wawqikuna y panikuna, jutsa* ruraq cuerpuntsik munanqannö mana kawanapaq, jutsa ruraq cuerpuntsik dominamänantsikta permitishunki.+ 13 Qamkuna jutsa* ruraq cuerpuykikuna munanqannö kawarqa wanuyankim o wañuyankim, peru santu espïritu yanapayäshuptiki jutsaman chätsikoq rurëkunata cuerpuykikunapita ushakätsirqa,+ kawayankim.+ 14 Awmi, Teyta Diospa espïritun munanqannö kawaqkunaqa, Diospa rasumpa tsurinkunam kayan.+ 15 Qamkunaqa manam yapë mantsakäyänëkipaqtsu esclävu këman chätsikoq espïrituta chaskiyarqunki, sinöqa tsurinkuna kayänëkipaq legitimäyäshoqniki espïritutam chaskiyarqunki, tsë espïrituyoq karmi fuertipa “¡Abba,* Teyta!”+ nintsik. 16 Teyta Diospa santu espïritunmi shonquntsikchö+ cläru musyatsimantsik, Diospa tsurinkuna kanqantsikta.+ 17 Tsëmi tsurinkuna karqa, noqantsikpis herenciata chaskishun. Awmi, Teyta Diospita herenciata chaskeqkunam kantsik,+ y Cristuwanqa herenciata chaskeq mayim kantsik. Tsënö kaptimpis, Cristunö mas puëdeq këta chaskinapaqqa,+ pë sufrinqannömi sufrinantsik.+

18 Noqapaqqa, shamoq tiempuchö Teyta Diospita chaskinapaq alläpa shumaq premiuwanqa, manam kanan witsan sufrimientukunaqa ichikllapis igualantsu.+ 19 Awmi, kamashqa kaqkunaqa alläpam shuyarëkäyan Diospa tsurinkuna puëdeq kayanqan rikakunanta.+ 20 Kamashqa kaqkuna kawë vïdankunachö rurayanqanqa manam imapaq välintsu,+ peru manam kikinkuna munartsu tsëman churakäyarqan, sinöqa tsëman churaqninkuna munaptinmi, peru pëqa këtam änikushqa: 21 kamashqa kaqkunapis ismur ushakaq cuerpupita libri kayänampaq kaqta+ y Diospa tsurinkuna kar alläpa shumaq libri këta tariyänampaq kaqta. 22 Musyantsikmi llapan kamashqakunaqa, kananyaqpis llakikuypita waqar y imëkata sufrir këkäyanqanta. 23 Manam tsëllatsu, änimanqantsikpita punta kaqta chaskishqa kaqkunapis, awmi, santu espïrituta chaskishqa kaqkunapis, tsurinkuna kanapaq legitimashqa këta shuyaranqantsikyaqmi,+ awmi, pagakur salvamanqantsikrëkur cuerpuntsikpita librashqa këta shuyaranqantsikyaqmi, shonquntsikchö llakikur waqar këkantsik.+ 24 Noqantsikqa tsë änimanqantsikta shuyarëkarmi salvashqa karquntsik. Tsënö kaptimpis, rikanqantsikta shuyëqa manam rasumpa shuyarëtsu, awmi, ¿imanöraq pï nunapis rikëkanqantaqa shuyaranman? 25 Peru mana rikanqantsikta+ shuyararqa,+ alli tsarakurmi chämunantana munar shuyarëkantsik.+

26 Tsënöllam santu espïritupis kallpannaq këkanqantsik höra yanapamantsik.+ Awmi, höraqa manam musyantsiktsu Teyta Diosman mañakur imata mañakunapaq kaqta, peru shonquntsikchö llakikuypita waqar ima nita mana puëdishqaqa,* santu espïritum noqantsikpaq rogakun. 27 Y santu espïrituqa Teyta Dios munanqannömi limpiu nunakunarëkur rogakun. Tsëmi shonquntsikchö ima kanqanta rikaqqa,+ santu espïritu ima nita munanqanta cläru musyan.

28 Musyantsikmi Teyta Diosqa kuyaqnin kaqkunapa, awmi munanqannö akrashqa kaqkunapa biennin imëkatapis ruranqanta.+ 29 Puntata akranqan kaqkunataqa, Tsurinnö kayänampaqpis pëqa puntallapitanam akrarqan,+ tsënöpa mëtsikaq wawqikunachö*+ pë punta tsuri kanampaq.+ 30 Y manam tsëllatsu, puntallapitana akranqan kaqkunataqa,+ qayarqanmi;+ y qayanqan kaqkunataqa, allita ruraqtanömi rikarqan.+ Tsëpitanam, allita ruraqtanö rikanqankunata, mas respetëpaqta tikratsirqan.+

31 Tsëqa, ¿imataraq tsëkunapaq nishun? Teyta Dios noqantsikwan këkaptinqa, ¿piraq noqantsikpa contrantsikchö këkanqa?+ 32 Kikimpa Tsurintapis sufrinampita mana salvëkarqa, sinöqa noqantsikrëkur entregashqa këkarqa,+ ¿manatsuraq alläpa alli kar pëta entreganqannölla wakin kaqkunatapis entregamäshun? 33 ¿Piraq Teyta Dios akranqankunata acusanqa?+ Kikin Teyta Diosmi pëkunataqa allita ruraqtanö rikan.+ 34 ¿Piraq pëkunata condenanqa? Cristu Jesusmi wanurqan o wañurqan y tsëpitapis masqa wanushqampitam kawaritsimushqa kashqa. Pëqa Teyta Diospa derëcha lädunchömi këkan,+ y pëpis noqantsikrëkurmi rogakun.+

35 ¿Piraq* Cristu kuyamanqantsikta ushakätsinman?+ ¿Imëka mana allikunatsuraq? ¿Llakikuytsuraq? ¿Imëkata rurar sufritsimanqantsiktsuraq? ¿Mallaqëtsuraq? ¿Röpannaq kanqantsiktsuraq? ¿Peligrukunatsuraq? ¿Espädawan amenazämanqantsiktsuraq?+ 36 Kënömi qellqarëkan: “Qampa sirweqniki kayaptïmi, imë hörapis wanutsiyäman o wañutsiyäman. Pëkunapaqqa, pishtayänampaq rakiyanqan üshankunanömi kayä”.+ 37 Peru kuyamaqnintsikrëkurmi tsë llapanta vencikantsik.+ 38 Segürum këkä wanuy o wañuy ni kawë ni angelkuna ni gobiernukuna, ni kanan pasëkanqankuna ni shamoq tiempuchö pasakunampaq kaqkuna, ni ima poder,+ 39 ni altu kaq ni ruri kaq, ni ima kamashqa kaqpis Señornintsik Cristu Jesuschö këkaq Teyta Dios kuyamanqantsikpita mana rakimänapaq kaqta.